Luuk 10

Yesu tɩŋ ʋ nanzɔɔba mahɩŋ batori arɩ fii

1Yesu sɩ bʋl wɩaa deemba dɛrɛ, ʋ lɩɩsɛ nɩaa mahɩŋ batori arɩ fii a kɛmba kaa kpaa balɩa balɩa, a tɩmba dɩ ba laa sɩpaaŋ mʋ lee-kala ʋ tɩtɩa sɩ jaŋ mʋ. 2Ʋ bʋla pɩba, “Kɩaa yʋga baga lɛ dɩ ba ŋaa, ama tɩntɩnnaa bɩ yʋgɛ dɩ ba tɩŋ. Má sʋl baga-la tɩɩna dɩ ʋ hɛ nɩaa dɩ ba tɩŋ tɩntɩmɩɩ-la. 3Má sii mʋ. Ma nagɛ pie-biisiŋ nɛ, mɩɩ tɩmma dɩ ma guoli guŋgurusuŋ tʋɔŋ. 4Má sɩ́ moribiee koru, má sɩ́ sʋllɩ-gbansɩŋ koru a sɩ́ nɛntɛŋŋɛɛ tʋŋ bʋlɩa ma koru a sɩ́ chɩna chʋɔlɛ nɩaa ma dieni wombiiŋ lɛ.

5Dɩ ma nɛ mʋ jʋʋ dɩa kala, má laa sɩpaaŋ bʋl, ‘Dɩa deeŋ nɩaa jaŋ hɔŋ arɩ yarɩfɩɛlaa.’ 6Dɩ nʋʋ nɛ hɛ nɩmɛ sɩ cho yarɩfɩɛla-la, má leŋ dɩ ʋ hɔŋ arɩ yarɩfɩɛlaa arɩ ma sɩ sʋl ŋɩɩ. Dɩ nʋʋ tuo dɩa-la lɛ a cho yarɩfɩɛla-la, yarɩfɩɛla-la ma sɩ sʋla jaŋ mɩɩra kɔ ma teeŋ. 7Dɩ ba nɛ pɩma dɩpɩnɩŋ, má hɛ dɩɩ-bala lɛ halɩɩ aa dii kʋdiile-la ba sɩ ŋaa pɩma aa nyʋa lɩɩŋ ma nɩmɛ. Dɩ tɩntɩnna nɛ tɩma, ʋ maga dɩ ba timu nɛ. Má sɩ́ gɔllɔ pɩpɩŋ nɩaa dɩɩsɩŋ lɛ.

8Dɩ ma nɛ mʋ taŋ kala, dɩ ba nɛ laama, má dii kʋŋ na-kala ba sɩ ŋaa pɩma lee-la. 9Má vaarɛ nyanyal tɩŋŋaa ma kala sɩ hɛ taŋ-la lɛ aŋ bʋla pɩba, ‘Wɩa kuorii-la kʋ kpagɛma nɛ.’ 10Ama dɩ ma nɛ mʋ taŋ kala, dɩ ba nɛ bɩ ma laa, má lɩɩ chɩŋ wombiiŋ lɛ aŋ bʋla pɩba, 11‘Ma taŋ-la hagɩla sɩ mɛrɛ la naasɩŋ lɛ, ba nɛ la kpesee hɛ ma lɛ ŋ-la. Ama ʋ maga dɩ ma jɩŋ arɩ Wɩa kuorii-la kpaga nɛ.’ 12Mɩ bʋlaa pɩma arɩ sarɩya chɛ-diiliŋ, Wɩa jaŋ dɔgɩsɛ taŋ-la nɩaa a kɩɩ bʋa-la lɛ ʋ sɩ dɔgɩsɛ Sodom nɩaa ŋɩɩ.”

Tasɩ-la nɩaa sɩ bɩ Yesu wɩaa laa dii

Mat. 11.20-24

13Ŋɩɩ nɛ Yesu bʋla pɩ taŋ-la nɩaa sɩ bɩ ʋ wɩaa laa dii, “Ma Kɔrazɩŋ tɩŋŋaa, ma jaŋ na hɛɛŋ. Bɛtɩsaada tɩŋŋaa ma, ma ma jaŋ na hɛɛŋ. Wʋmagɩla-la ba sɩ ŋaa ma teeŋ, dɩ ba nɛ fa ŋaaba Taaya arɩ Sɩdɔŋ nɩaa teeŋ ŋ-la, ba fa bɩ jaŋ dieni aŋ hɔnɔ tɛllɛ naasɩŋ a ŋaa tʋɔrʋŋ bʋbʋgɛ ba tɩtɩa, a dɩdagɛ ŋɩɩ arɩ ba bɩrɩma lɩɩ ba wʋbɔŋŋɔɔ lɛ nɛ. 14Sarɩya chɛ-diiliŋ, Wɩa jaŋ dɔgɩsɛ Kɔrazɩŋ arɩ Bɛtɩsaada tɩŋŋaa a kɩɩ Taaya arɩ Sɩdɔŋ tɩŋŋaa. 15Ma-na Kapɛnam tɩŋŋaa, ma nɛ paala chɩchɛ dɩ ma kɛŋ ma tɩtɩa a kaa jɩl Wɩa-jaŋ. Ama Wɩa jaŋ jomma yuo ta dɩ ma tuu jʋʋ Wɩa nyiniŋ.”

16Ŋɩɩ nɛ aŋ ka ʋ bɩra bʋla pɩ ʋ harɩ-tooro-la, “Nɩɩ-la kala sɩ jegile nɩɩ ma teeŋ, ʋ jegile nɩɩ mɩ ma teeŋ nɛ. Nʋʋkala sɩ vɩama, ʋ vɩa mɩ ma nɛ. Nɩɩ-la kala ma sɩ vɩamɛ, ʋ ma vɩa Nɩɩ-la sɩ tɩmmɛ nɛ.”

Yesu nanzɔɔba-la mahɩŋ batori arɩ fii mɩɩra kɔ Yesu teeŋ

17Ŋɩɩ nɛ Yesu nanzɔɔba-la mahɩŋ batori arɩ fii-la mɩɩra kɔ Yesu teeŋ. Ba tʋɔŋ tɔrɛ kɩŋkɛŋ ba bʋla pɩ Yesu, “La Tɩɩna, dɩ la nɛ yɩrɛ ŋ yɩrɩŋ, jɩŋ-bɔŋŋɔɔ ma yie paala to la niiŋ nɛ.” 18Ŋɩɩ nɛ Yesu bʋla pɩba, “Mɩ na Sɩtaanɩ dɩ ʋ lɩɩ wɩa-nyuŋ kʋ tuu tel a nagɛ duonuŋ sɩɩ lɩgɩsɛ ŋɩɩ.” 19Yesu bɩra bʋla pɩba, “Má jegile nɩɩ mɩ teeŋ. Mɩ pɩma doluŋ nɛ dɩ ma wuo vɩvɛŋ dɩŋŋaa arɩ nʋɔmaa tʋɔŋ, ka ba bɩ ma wuo dɩŋ. Mɩ pɩma doluŋ dɩ ma wuo Sɩtaanɩ maa. Ʋ bɩ jaŋ wuo ŋaama wʋbɔŋ kala. 20Ama má sɩ́ leŋe dɩ ma tʋɔŋ tɔrɛ arɩ jɩŋ-bɔŋŋɔɔ sɩɩ to ma niiŋ lɛ, má leŋ dɩ ma tʋɔŋ tɔrɛ a tɩŋ ba sɩ ŋmʋnsɛ ma yɩraa Wɩa-jaŋ lɛ.”

Yesu tʋɔŋ tɔrɔ Wɩa Dɩŋ-zɔmʋŋ doluŋ lɛ

Mat. 11.25-27; 13.16-17

21Bʋa-la tɩtɩa lɛ Yesu tʋɔŋ tɔrɛ Wɩa Dɩŋ-zɔmʋŋ doluŋ lɛ ʋ bʋl, “Mɩ Nyɩmma, ŋ nɛ ŋaa wɩa-nyuŋ arɩ tinteeŋ kala Tɩɩna. Mɩɩ lɔllʋŋ arɩ ŋ sɩ kɛŋ wɩalɩŋ ŋ sɩ joŋo faa a dagɛ nɩalɩŋ sɩ bɩ wɩaa jɩŋ, aŋ bɩ joŋo dagɛ nɩalɩŋ sɩ kɛŋ wʋjɩmɩŋ. Mɩ Nyɩmma, mɩɩ lɔllʋŋ. Ŋ tɩtɩa tʋɔtɔrʋŋ lɛ nɛ ŋ ŋaa ŋɩɩ.”

22Ŋɩɩ nɛ ʋ bɩra bʋl, “Mɩ Nyɩmma joŋ kʋŋkala doluŋ nɛ pɩmɛ. Mɩ Nyɩmma dʋndʋŋa nɛ jɩŋ ŋɩɩ mɩ sɩ naga. Mɩ ma dʋndʋŋa nɛ jɩŋ ŋɩɩ mɩ Nyɩmma ma sɩ naga. Nʋʋkala bɩra bɩ ʋ jɩŋ, see nɩalɩŋ dʋndʋŋa mɩ sɩ cho dɩ mɩ daga.”

23Ŋɩɩ nɛ Yesu mɩɩra daasɛ ʋ harɩ-tooro-la aŋ bʋla pɩ ba dʋndʋŋa, “Ma nyuŋ sɩma nɛ ma sɩ na wɩalɩŋ kala ma sɩ na. 24Mɩ jaŋ bʋla pɩma arɩ bumbuŋ Wɩa wʋlaabʋllaa arɩ faafaa kuoroo yʋga a fa cho dɩ ba na wɩalɩŋ ma sɩɩ na aŋ bɩ wuo na, a fa cho dɩ ba nɩɩ wɩalɩŋ ma ma sɩɩ nɩɩ, aŋ ka ba bɩ wuo nɩɩ.”

Yesu dagɛ nɩaa ba sɩ jaŋ ŋaa ŋɩɩ a cho ba dɔnsʋŋ tɩŋŋaa

25Ŋɩɩ nɛ Wɩa teniŋ kerichi kʋbala kɔ a wʋwalɩmɛ dɩ ʋ magɩsɛ Yesu a pɩɛsʋ, “Kʋhɩaŋ, bɛɛ kʋŋ nɛ mɩ jaŋ ŋaa a kɛŋ mɩɩsɩ-la sɩ bɩ dɛrɛ?” 26Ŋɩɩ nɛ Yesu pɩɛsʋ, “Bɛɛ nɛ ba ŋmʋnsɛ Wɩa teniŋ tʋɔŋ? Ɛɛ nɛ ŋ yie karɩmɛ?” 27Ŋɩɩ nɛ baal-la bʋla pʋ, “Ba sɩ dɩ ŋ kɛŋ ŋ tʋɔŋ arɩ ŋ wɩɩ-wɩɩkala cho ŋ Tɩɩna Wɩa, a cho ŋ dɔŋɔ tɩɩna ma arɩ ŋ sɩ cho ŋ tɩtɩa ŋɩɩ.” 28Ŋɩɩ nɛ Yesu bʋla pʋ, “Wɩalɩŋ kala ŋ sɩ bʋla ŋaa wʋtɩtɩɩ nɛ. Ŋ nɛ ŋaa ŋɩɩ, ŋ jaŋ kɛŋ mɩɩsɩŋ.”

29Ŋɩɩ nɛ Wɩa teniŋ kerichi-la chɩchɛ dɩ ʋ dagɛ arɩ ʋ kɛŋ wʋtɩtɩɩ. Ŋɩɩ nɛ ʋ pɩɛsɛ Yesu, “Kʋbɛɛ nɛ ŋaa mɩ dɔŋɔ tɩɩna?” 30Yesu magɛ namaga a bʋl, “Baal kʋbala nɛ sie a lɩɩ taŋ kʋbala baa yɩrɛ Jerusalɛm a mʋmʋ Jeriko. Ʋ fa ŋaa Juu tɩɩna nɛ. Ʋ sɩɩ mʋ ŋɩɩ, ʋ mʋ jʋʋ gaaraa tʋɔŋ. Ba kɛnʋ a wuri ʋ gɛnnɩŋ kala aŋ ŋmobu a bolimu aŋ fá lɛl, ka ʋ pɩŋ nɩmɛ a chɩchɛ dɩ ʋ sʋʋ. 31Ŋɩɩ nɛ dɩ Wɩɩsʋllɩ sɩpaalaaraa, ba tʋɔŋ kʋbala ma joŋ wombii-la aa vɛŋ. Ʋ sɩ kʋ a naʋ, ʋ to sɛmɛ dɔŋ nɛ a kpɛrɛ bal. 32Ŋɩɩ nɛ Wɩa dɩa nanzɔɔ kʋbala ma kɔ lee-la a ma kpɛrɛ bal. 33Ka Samarɩa tɩŋŋaa baal kʋbala ma fa joŋ wombii-la a vɛnɛɛ kɔ. Ʋ sɩ naʋ, nenige kɛnʋ. 34Ʋ mʋ ʋ teeŋ a chɛsɛ ʋ naawɩɩlaa a hɛ daalusuŋ aŋ vɔɔ, aŋ joŋu hɛ ʋ tɩtɩa kakumo lɛ a kɛnʋ kaa mʋ nʋhʋɔraa dɩa kʋbala aa benu. 35Taŋ-pʋl ʋ joŋ siidi zɔlɔ a pɩ dɩa tɩɩna aŋ bʋla pʋ dɩ ʋ bibeŋ ʋ nyuŋ woruŋ. Dɩ ʋ nɛ mɩɩra kɔ, ʋ jaŋ tiŋ ʋ sɩ ŋmoo chɩmɩŋ magɛ ŋɩɩ kala.” 36Ŋɩɩ nɛ Yesu pɩɛsɛ Wɩa teniŋ kerichi-la, “Nɩaa deemba batorumuŋ tʋɔŋ, kʋbɛɛ nɛ ŋaa baal-la sɩ jʋʋ gaaraa tʋɔŋ dɔŋɔ tɩɩna? Bɛɛ nɛ ŋ bɩɩnɛ ŋ tʋɔŋ lɛ?” 37Ŋɩɩ nɛ Wɩa teniŋ kerichi-la bʋl, “Baal-la sɩ fá ʋ nisusuŋ.” Ŋɩɩ nɛ Yesu bʋla pʋ, “Tɔɔ, ŋ ma mʋ ŋaa ŋɩɩ tɩtɩa.”

Yesu mʋ Maata arɩ Mɛɛrɩ dɩa

38Yesu arɩ ʋ harɩ-tooroo sɩ joŋ wombiiŋ mʋmʋ ŋɩɩ, ba kɔ taŋ kʋbala, dɩ haal kʋbala ma hɛ nɩmɛ, baa yɩrɛ Maata. Ʋ kɛŋ Yesu kaa jʋʋ ʋ dɩa. 39Ʋ ŋaana ma fa hɛ nɩmɛ, baa yɩrʋ Mɛɛrɩ. Yesu sɩ hɔŋ dɩa-la tʋɔŋ, ʋ kʋ hɔŋ Yesu sɛmɛ a jegilee nɩɩ wɩalɩŋ ʋ sɩɩ bʋl, 40ka Maata fɩɛsɛ sii a ŋɩŋaa kʋdiilee dɩ ʋ pɩ Yesu a kala lɔl. Ŋɩɩ nɛ ʋ na baanɩŋ Mɛɛrɩ nyuŋ a kʋ lɩɩ, a bʋla pɩ Yesu, “Mɩ Tɩɩna, ŋ bɩɩna ʋ zɔmɔ nɛ mɩ ŋaana sɩ leŋ tɩntɩŋŋaa kala pɩmɛ mɩ tɩtɩŋ? Leŋ dɩ ʋ kʋ pɛ mɩ lɛ.” 41Ŋɩɩ nɛ Yesu bʋla pʋ, “Maata, wɩaa yʋga nɛ hɛ nɩmɛ a wʋwalɩmɩŋ. 42Ʋ maga dɩ ŋ chɛ wʋbala dʋndʋŋ nɛ. Wɩɩ-la tɩtɩa nɛ Mɛɛrɩ lɩɩsɛ ŋɩɩ. Wɩɩ-la ba sɩ bɩ jaŋ wuo kaa laa ʋ teeŋ.”

Currently Selected:

Luuk 10: SIS

Highlight

Copy