Luuk 9

Yesu tɩŋ ʋ harɩ-tooroo fii arɩ balɩa

Mat. 10.5-15; Maak 6.7-13

1Ŋɩɩ nɛ Yesu yɩrɛ ʋ harɩ-tooroo fii arɩ balɩa a hɛ dɔŋɔ lɛ, a pɩba doluŋ dɩ ba wuo jɩŋ-bɔŋŋɔɔ aŋ vɩvaarɛ nyanyal tɩŋŋaa ma. 2Ŋɩɩ nɛ ʋ tɩmba dɩ ba lɩɩ a bʋl Wɩa kuorii-la wɩaa aŋ pɛ vaarɛ nyanyal tɩŋŋaa. 3Ʋ bʋla pɩba dɩ ba sɩ́ kʋŋkala kaa pɛ vɛŋ wombii-la, dɩ ba sɩ́ dantɩgɩsɩŋ koru, dɩ ba sɩ́ lʋagaba ma koru, dɩ ba sɩ́ kʋdiilee ma koru, dɩ ba sɩ́ moribiee ma koru, a sɩ́ gɛnnɩŋ balɩa ma paa. 4Ʋ bɩra bʋla pɩba, “Dɩ ma nɛ mʋ jʋʋ taŋ kala, má jʋʋ dɩa-la nɩaa sɩ laama, a hɛ dɩɩ-bala lɛ halɩɩ a mʋ lɩɩ taŋ-la lɛ. 5Dɩ ma nɛ mʋ taŋ kala, dɩ ba vɩama, má kiele mʋ. Dɩ ma nɩɩ mʋ, má kpesi ma naasɩŋ hagɩla ta. Ŋɩɩ jaŋ ŋaa dɩ ba jɩŋ arɩ ba ŋaa wɩɩ nɛ a cheima.”

6Ŋɩɩ nɛ Yesu harɩ-tooro-la sii a gɔllɔ to tasɩŋ aa bʋl Wɩa wʋzɔmɔ-la wɩaa aŋ pɛ vaarɛ nɩaa lee-na kala ba sɩ mʋa.

Hɛrɔd tʋɔbɩɩnaa vʋgʋma

Mat. 14.1-12; Maak 6.14-29

7Galilii tɩŋŋaa kuoro Hɛrɔd sɩ nɩɩ wɩalɩŋ Yesu harɩ-tooro-la fa sɩ gɔllɔ ŋaa, ʋ tʋɔŋ kala vʋgʋma, bɛɛ wɩaa nɩaa dɔnsʋŋ bʋla arɩ Jɔɔŋ Wɩa lɩɩ-fooru-la nɛ sii sʋʋŋ lɛ. 8Nɩaa dɔnsʋŋ ma sɩ Ɩlaaja nɛ sii sʋʋŋ lɛ, dɔnsʋŋ ma sɩ faafaa Wɩa wʋlaabʋlla-la dɔŋɔ nɛ sii sʋʋŋ lɛ. 9Ŋɩɩ nɛ Hɛrɔd bʋl, “Mɩ ŋaa ba kpʋ Jɔɔŋ a keri ʋ nyuŋ nɛ, ka kʋbɛɛ wɩaa nɛ saa mɩ bɩraa nɩɩ ŋ-la?” Ŋɩɩ nɛ ʋ nɩnɛrɩgɛ dɩ ʋ na Yesu.

Yesu pɩ nɩaa bʋɩ banɔŋ kʋdiilee

Mat. 14.13-21; Maak 6.30-44; Jɔɔŋ 6.1-14

10Ŋɩɩ nɛ Yesu nanzɔɔba-la mɩɩra kɔ ʋ teeŋ a bʋl wɩalɩŋ kala ba sɩ ŋaa pʋ. Ŋɩɩ nɛ ʋ kɛŋ ba dʋndʋŋa mʋ taŋ kʋbala baa yɩrɛ Bɛtɩsaada. 11Nɩalɩŋ sɩ nɩɩ Yesu wɩaa dɩ ʋ mʋ Bɛtɩsaada, ba to ʋ harɩŋ mʋ. Ʋ kɛmba woruŋ a bʋl Wɩa kuorii-la wɩaa pɩba, aŋ vaarɛ nɩalɩŋ sɩɩ wɩɩlʋ.

12Wɩa sɩ suomo dɩ ʋ jʋʋ, ʋ harɩ-tooro-la fii arɩ balɩa-la kɔ ʋ teeŋ a bʋla pʋ, “Leŋ dɩ nɩaa deemba viiri a mʋ taŋ tʋɔŋ arɩ bagɩsɩŋ sɩ kpaga daha a chɛ kʋdiilee arɩ dɩpɩnɩŋ, bɛɛ wɩaa kʋŋkala tuo daha.” 13Ŋɩɩ nɛ Yesu bʋla pɩba, “Má mʋ chɛ kʋdiilee a pɩba dɩ ba dii.” Ŋɩɩ nɛ ba bʋla pʋ, “Kʋ-la la sɩ kɛnɛ nɛ boroboroba banɔŋ arɩ chenfilee balɩa. Ŋŋ chɛ dɩ la mʋ yɔɔ kʋdiilee kaa kɔ pɩ nɩ-daŋ deeŋ kala nɛɛ?” 14Baalaa fa sɩ hɛ nɩalɩŋ tʋɔŋ yi bʋɩ banɔŋ nɛ. Ŋɩɩ nɛ Yesu bʋla pɩ ʋ harɩ-tooroo, “Má leŋ dɩ nɩalɩŋ gulimo hɔŋ-hɔŋ mahɩŋ balɩa arɩ fii fii leree.” 15Ŋɩɩ nɛ ʋ harɩ-tooro-la ŋaa nɩalɩŋ kala tuu hɔŋ. 16Yesu laa boroboroba banɔŋ-la arɩ chenfilee balɩa-la a wʋla beŋ wɩa-nyuŋ aŋ chʋɔlɛ Wɩa, aŋ kaa chɔgɛ chɔgɛ a pɩ ʋ harɩ-tooroo. Ba laa kaa mʋ kpaa nɩalɩŋ. 17Ba kala dii a vɔgɛ aŋ ka. Ʋ harɩ-tooro-la paa kʋkaaŋ-biisiŋ a su sinsiŋ fii arɩ balɩa.

Pɩɩta dagɛ Yesu sɩ ŋaa nɩɩ-la

Mat. 16.13-19; Maak 8.27-29

18Tapʋlɩɩ kʋbala Yesu dʋndʋŋa chʋchʋɔlɛ Wɩa. Ʋ harɩ-tooroo ma hɛ ʋ teeŋ. Ŋɩɩ nɛ ʋ pɩɛsɛba, “Kʋbɛɛ nɛ nɩaa sɩ mɩ ŋaa?” 19Ŋɩɩ nɛ ʋ harɩ-tooro-la bʋl, “Dɔnsʋŋ sɩ ŋ ŋaa Jɔɔŋ nɛ, Wɩa lɩɩ-fooru-la. Dɔnsʋŋ ma sɩ dɩ ŋ ŋaa Ɩlaaja nɛ. Dɔnsʋŋ ma sɩ ŋ ŋaa faafaa Wɩa wʋlaabʋlla-la dɔŋɔ sɩ sii sʋʋŋ lɛ nɛ.” 20Ŋɩɩ nɛ Yesu mɩɩra pɩɛsɛ ʋ harɩ-tooroo maa, “Ka ma maa, ma sɩ mɩ ŋaa kʋbɛɛ nɛ?” Pɩɩta sɩ, “Ŋ nɛ ŋaa Kirisito, Nɩɩ-la Wɩa sɩ lɩɩsa.”

Yesu bʋl ŋɩɩ ʋ sɩ jaŋ na hɛɛŋ aŋ-na sʋʋ

Mat. 16.20-28; Maak 8.30–9.1

21Ŋɩɩ nɛ Yesu bʋla pɩba arɩ sɩɩfɩɛsɩŋ dɩ ba pɔ dɩ ba sɩ́ wɩɩ-la bʋla pɩ nʋʋkala. 22Ʋ bɩra bʋla pɩba, “Mɩ-na Nuhuobiine Bie maga mɩ na hɛɛŋ kɩŋkɛŋ. Juu tɩŋŋaa nɩhɩasɩŋ arɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba kala jaŋ vɩamɛ. Ba jaŋ kpʋmɛ, ka dɩ mɩ sii sʋʋŋ lɛ tapʋl-torimuŋ chɛɛŋ.”

23Ŋɩɩ nɛ ʋ bʋla pɩ nɩalɩŋ kala, “Dɩ nʋʋkala nɩɩ chɛ dɩ ʋ tomi, see dɩ ʋ vɩa ʋ tɩtɩa wombiiŋ aŋ joŋ ʋ daagɛsɛ baasɛ tapʋlɩɩ-na kala a to mɩ harɩŋ. 24Nɩɩ-la kala sɩɩ chɛ dɩ ʋ laa ʋ mɩɩsɩŋ, ʋ jaŋ joŋ ʋ mɩɩsɩŋ ta, ama nɩɩ-la sɩ vɩa ʋ mɩɩsɩŋ ta a tɩŋ mɩ wɩaa, ʋ jaŋ sɛnɛ laa ʋ mɩɩsɩŋ. 25Dɩ ŋ nɛ tɩɩ dʋnɩa kɩaa kala aŋ bɩ mɩɩsɩŋ kɛnɛ, bɛɛ kʋŋ nyʋʋrɩɩ nɛ ŋ na? 26Dɩ nʋʋ nɛ fá hɩɩsɩŋ a tɩŋ mɩ wɩaa arɩ mɩ wʋbʋlaa lɛ, mɩ-na Nuhuobiine Bie ma jaŋ leŋ dɩ hɩɩsɩŋ kɛnʋ dɩ mɩ nɛ kɔ a chaanɛ arɩ mɩ nyɩmma tʋla, a pɛ Wɩa tɩndaaraa sɩ bɩ disiniŋ kɛnɛ lɛ. 27Wʋtɩtɩɩ nɛ mɩ bʋlaa pɩma, nɩaa dɔnsʋŋ hɛ daha, ba bɩ jaŋ sʋʋ see dɩ Wɩa kuorii-la kɔ.”

Yesu bɩrɩma

Mat. 17.1-8; Maak 9.2-8

28Yesu sɩ bʋl wɩaa deemba kala dɛrɛ, ʋ tapʋlaa chori chɛɛŋ ʋ sii kɛŋ Pɩɩta arɩ Jɔɔŋ arɩ Jeems ba jɩl peeliŋ nyuŋ dɩ ba chʋɔlɛ Wɩa. 29Yesu fa sɩɩ chʋɔlɛ Wɩa ŋɩɩ, ʋ sɩaa bɩrɩmɛ. Ʋ gɛnnɩŋ ma pʋllɛ a nagɛ duonuŋ sɩ lɩgɩsa. 30Nɩaa balɩa guu kɔ ʋ teeŋ a kala tʋtʋl. Mosis arɩ Ɩlaaja nɛ. 31Ba chɩŋ aa bʋl wɩaa. Baa bʋl ŋɩɩ Yesu sɩ jaŋ sʋʋ Jerusalɛm lɛ, dɩ wɩalɩŋ Wɩa sɩɩ chɛ dɩ ʋ ŋaa kʋ ŋaa wʋtɩtɩɩba.

32Pɩɩta arɩ ʋ nandɔnsʋŋ fa pɩŋ doŋ nɛ, ama ba hirige sii a na Yesu sɩɩ tʋl ŋɩɩ, a na nɩalɩŋ balɩa ma sɩ chɩŋ ʋ teeŋ. 33Nɩalɩŋ sɩ ta Yesu ka dɩ ba viiri, ŋɩɩ nɛ Pɩɩta bʋla pʋ, “Kʋhɩaŋ, ʋ ŋaa wʋzɔŋ nɛ la sɩ hɛ daha. La jaŋ hɛ lɛŋŋɛɛ batori, dɩ ŋ kɛŋ dɔŋɔ, dɩ Mosis ma kɛŋ dɔŋɔ, dɩ Ɩlaaja ma kɛŋ dɔŋɔ.” Ʋ fa paala bɩ jɩŋ wɩɩ-la kala ʋ sɩɩ bʋl.

34Pɩɩta ha sɩɩ bʋl wɩaa ŋɩɩ, duoŋ-bɩlɩmbaanɩŋ kʋ tuu tɔba. Ʋ sɩ tɔba ŋɩɩ, fawʋllʋŋ kɛŋ Yesu harɩ-tooro-la. 35Ka nʋʋ yikoro lɩɩ duoŋ-bɩlɩmbaaŋ-la tʋɔŋ aa bʋl, “Mɩ Bie nɛ ŋ-la. Ʋ nɛ ŋaa Nɩɩ-la mɩ sɩ lɩɩsa. Má jegile nɩɩ ʋ teeŋ.” 36Yikoro-la sɩ bʋl wɩaa dɛrɛ, ʋ-na Yesu dʋndʋŋa nɛ hɛ nɩmɛ. Ŋɩɩ nɛ ʋ harɩ-tooro-la tɔrɛ ba niiŋ. Ba bɩ wɩɩ-la ba sɩ na bʋla pɩ nʋʋkala.

Yesu kiri jɩŋ-bɔmʋŋ bie lɛ

Mat. 17.14-18; Maak 9.14-27

37Ʋ taŋ sɩ pʋla, ba lɩɩ peel-la nyuŋ kʋ tuu, ŋɩɩ nɛ nɩ-daŋ kʋ cheŋ Yesu. 38Dɩ baal kʋbala lɩɩ nɩ-daŋ-la tʋɔŋ a faasa yɩrɛ, “La kʋhɩaŋ, bee na mɩɩ sʋlʋŋ dɩ ŋ pɛ mɩ bie lɛ. Ʋ nɛ mɩ bie kala. 39Jɩŋ-bɔŋ nɛ kɛnʋ, ʋ chɩchɩɩrɛ a terigi. Nantʋɔ-fʋnfʋga yie tɔ ʋ niiŋ. Ʋʋ walɩmʋ a pɔ ʋ bɩ ʋ ka leŋ. 40Mɩ mʋ sʋl ŋ harɩ-tooroo dɩ ba kiri jɩŋ-bɔŋ-la ʋ lɛ, ama ba bɩ wuo kiri.” 41Ŋɩɩ nɛ Yesu bʋla pɩba, “Ma lɛɛlɛ nɩaa deemba, ma bɩ Wɩa laa dii. Ma ŋaa nɩbɔmɔ nɛ. Ɛɛ nɛ mɩ jaŋ nyalɩmɛ a dieni magɛ ma teeŋ?” Ŋɩɩ nɛ ʋ bʋla pɩ baal-la a bʋl, “Kɛŋ ŋ bile kaa kɔ mɩ teeŋ.” 42Bile sɩɩ mʋ ŋɩɩ, jɩŋ-bɔŋ-la ŋmobu lo tinteeŋ ʋ terigi. Ŋɩɩ nɛ Yesu kpɩa jɩŋ-bɔŋ-la lɛ dɩ ʋ lɩɩ bile lɛ. Ʋ lɩɩ, ka bile duori, Yesu joŋu pɩ ʋ nyɩmma.

43Ʋ ŋaa nɩalɩŋ kala wʋkpuŋkpere. Ba sɩ dɩ Wɩa kɛŋ doluŋ woruŋ.

Yesu bɩra bʋl ʋ sʋʋŋ wɩaa

Mat. 17.22-23; Maak 9.30-32

Nɩalɩŋ kala haa bɩɩnɛ wʋkpuŋkperisi-la Yesu sɩ ŋaa lɛ. Ŋɩɩ nɛ ʋ bʋla pɩ ʋ harɩ-tooro-la, 44“Má sɩ́ wɩɩ-la mɩ sɩ jaŋ bʋla pɩma yʋ. Ʋ nɛ ŋ-la: Ba jaŋ joŋ mɩ-na, Nuhuobiine Bie a hɛ nɩaa nɩsɩŋ lɛ.” 45Ama ʋ harɩ-tooro-la bɩ wɩɩ-la ʋ sɩ bʋla bʋbʋɔŋ jɩŋ. Ʋ ŋaa wʋfaalɩɩ nɛ ba teeŋ. Ŋɩɩ nɛ tɩɩ ba bɩ ʋ bʋbʋɔŋ wuo jɩŋ. Ama ba fɩfá fawʋllʋŋ dɩ ba pɩɛsɛ wɩɩ-la bʋbʋɔŋ.

Yesu harɩ-tooroo chɛ dɩ ba jɩŋ ba tʋɔŋ kʋhɩaŋ

Mat. 18.1-5; Maak 9.33-37

46Ŋɩɩ nɛ Yesu harɩ-tooroo kɛŋ ba tʋɔŋ kʋhɩaŋ wɩaa lɩlɛrɛ. 47Yesu fa jɩŋ wɩɩ-la ba sɩɩ bɩɩnʋ nɛ a kɛŋ bii-bie kaa kɔ kɩɩ ʋ sɛmɛ, 48aŋ bʋla pɩba, “Dɩ nʋʋkala nɛ kɛŋ bii-bie deeŋ dɔŋɔ woruŋ a tɩŋ mɩ wɩaa, mɩ nɛ ʋ kɛŋ woruŋ ŋɩɩ. Nɩɩ-la ma kala sɩ kɛmmɛ woruŋ, mɩ dʋndʋŋa dee ʋ kɛŋ woruŋ ŋɩɩ. Nɩɩ-la sɩ tɩmmɛ ma nɛ ʋ kɛŋ woruŋ ŋɩɩ. Nɩɩ-la sɩ ŋaa nɩ-bie ma tʋɔŋ, ʋ nɛ ŋaa ma tʋɔŋ nɩbalɩŋ.”

Nɩɩ-la kala sɩ bɩŋ bɛrɛ, ʋ choŋ nɛ

Maak 9.38-40

49Ŋɩɩ nɛ Jɔɔŋ bʋla pɩ Yesu, “La Kʋhɩaŋ, la na baal kʋbala dɩ ʋ kiri jɩŋ-bɔŋŋɔɔ nɩaa lɛ ŋ yɩrɩŋ lɛ. La kiru dɩ ʋ sɩ́ ŋɩɩ ŋaa, bɛɛ wɩaa ʋ bɩ la dɔŋɔ ŋaa.” 50Yesu bʋla pɩ Jɔɔŋ arɩ ʋ harɩ-tooroo kʋkaanaa, “Má sɩ́ ʋ kiru, bɛɛ wɩaa nɩɩ-la kala sɩ bɩ ma harɩŋ lɩa, ʋ ŋaa ma dɔŋɔ nɛ.”

Samarɩa tinteeŋ sɛmɛ dɔŋɔ nɩaa vɩa Yesu

51Ŋɩɩ nɛ tapʋlɩɩ-la kpagɛ dɩ ba joŋ Yesu a kaa jɩl Wɩa-jaŋ. Ʋ ŋaa siri a sii, a joŋ wombiiŋ a mʋmʋ Jerusalɛm. 52Ʋ tɩŋ tɩndaaraa dɩ ba laa ʋ sɩpaaŋ a mʋ Samarɩa tinteeŋ tabie kʋbala, a chɛ leriŋ a bil ʋ lɛ. 53Ka nɩalɩŋ bɩ siri ŋaa dɩ ba laaʋ, bɛɛ wɩaa ba jɩma dɩ ʋ mʋ Jerusalɛm nɛ.

54Ʋ harɩ-tooroo Jeems arɩ Jɔɔŋ sɩ na ŋɩɩ, ba pɩɛsɛ Yesu a bʋl, “La Tɩɩna, ŋ jaŋ leŋ dɩ la sʋl nyiniŋ dɩ ʋ lɩɩ wɩa-nyuŋ kʋ tuu a diiba koo?” 55Ŋɩɩ nɛ Yesu daasɛ harɩŋ aŋ kpɩaba lɛ. [“Ma bɩ jɩŋ dɩma-la doho Wɩa sɩ joŋo pɩma. Mɩ-na Nuhuobiine Bie bɩ kɔ dɩ mɩ kpʋ nɩaa, ama dɩ mɩ laa nɩaa ta.”] 56Ŋɩɩ nɛ ka ba kiele mʋ taŋ dɔŋɔ.

Nɩalɩŋ sɩ maga dɩ ba to Yesu harɩŋ

Mat. 8.19-22

57Ba sɩ lɩɩ joŋ ba wombiiŋ, baal kʋbala bʋla pɩ Yesu, “Mɩ ŋaa siri dɩ mɩ to ŋ harɩŋ a mʋ lee-na kala ŋ sɩɩ mʋ.” 58Ŋɩɩ nɛ Yesu bʋla pʋ, “Jolluŋ kɛŋ bʋɔsʋŋ nɛ a jʋjʋʋ, diibiisiŋ ma kɛŋ dɛllɩŋ nɛ a jʋjʋʋ, ama mɩ-na Nuhuobiine Bie bɩ dɩpɩnɩŋ kɛnɛ dɩ mɩ pɩna wiesi.” 59Ŋɩɩ nɛ ʋ bʋla pɩ nʋʋ dɔŋ ma, “To mɩ harɩŋ.” Ʋ bʋla pʋ, “Mɩ Tɩɩna, leŋ dɩ mɩ laa sɩpaaŋ mʋ hugi mɩ nyɩmma.” 60Ŋɩɩ nɛ Yesu bʋla pʋ, “Leŋ dɩ sʋʋnʋŋ tɩŋŋaa mʋ hugi ba sʋʋnʋŋ, aŋ ka dɩ ŋ ma mʋ bʋl Wɩa kuorii-la wɩaa a pɩ nɩaa.”

61Nʋʋ ma dɔŋ bɩra bʋla pʋ, “Mɩ Tɩɩna, mɩ jaŋ to ŋ harɩŋ, ama leŋ dɩ mɩ mʋ ta mɩ dɩa nɩaa aŋ kɔ.” 62Ŋɩɩ nɛ Yesu bʋla pʋ, “Nʋʋ na-kala sɩ suomo dɩ ʋ pɛrɛ aŋ dɩdaasɛ ʋ harɩŋ, ʋ bɩ tɩntɩmɩɩ kala kɛnɛ Wɩa kuorii-la lɛ.”

Currently Selected:

Luuk 9: SIS

Highlight

Copy