Luuk 8

Haala-la sɩɩ to Yesu harɩŋ

1Ŋɩɩ harɩŋ Yesu gɔllɔ to tabalaa arɩ tabiisiŋ a bʋbʋl Wɩa wʋzɔmɔ-la a tɩgɛ Wɩa kuorii-la lɛ. Ʋ harɩ-tooro-la fii arɩ balɩa to ʋ harɩŋ mʋ, 2arɩ haalaa dɔnsʋŋ ma. Ba tʋɔŋ dɔnsʋŋ faa wɩɩlɛ nɛ, jɩŋ-bɔŋŋɔɔ ma fa kɛŋ dɔnsʋŋ. Yesu vaarɛ ba kala. Ba tʋɔŋ dɔŋɔ yɩrɩŋ nɛ Mɛɛrɩ Magɩdalɩŋ. Yesu fa kiri jɩŋ-bɔŋŋɔɔ balɩpɛ nɛ ʋ lɛ. 3Dɔŋɔ ma yɩrɩŋ nɛ Jʋana. Ʋ bala ma yɩrɩŋ nɛ Kusa. Kusa fa ŋaa nɩhɩaŋ nɛ kuoro Hɛrɔd dɩa lɛ. Haal-la ba sɩɩ yɩrɛ Suzana ma hɛ nɩmɛ a pɛ haalaa dɔnsʋŋ ma lɛ ba fa yʋga. Ba pɛ ba lɛ arɩ kɩalɩŋ kala Yesu arɩ ʋ harɩ-tooroo sɩɩ chɛ.

Yesu magɛ namaga a tɩgɛ baal-la sɩɩ duu kɩaa lɛ

Mat. 13.1-9; Maak 4.1-9

4Ŋɩɩ nɛ nɩaa lɩɩ tasɩŋ a kʋkɔ Yesu teeŋ. Nɩ-daŋ-la sɩ kʋ hilime dɛrɛ, Yesu magɛ namaga a pɩba, 5“Baal kʋbala nɛ sie a mʋ ʋ duu ʋ kɩaa. Ʋ joŋ ʋ kʋdoho aa mɩsɛ nɛ. Ʋ sɩɩ mɩsɛ ŋɩɩ, dɔnsʋŋ tel wombiiŋ tʋɔŋ. Nɩaa vɛnɛ nʋɔsɛ, ka diibiisiŋ tʋɔsa dii. 6Dɔnsʋŋ ma tel kpagɩnyɩlɩŋ nyuŋ a nyʋ aŋ sʋʋ, bɛɛ wɩaa lɩɩŋ tuo nɩmɛ. 7Dɔnsʋŋ ma tuu tel sɔsʋŋ tʋɔŋ a nyʋ, sɔsʋ-la ma nyʋ nyagɛ ba kpʋ. 8Kʋdoho-la dɔnsʋŋ ma tel tintee-zɔmʋŋ lɛ, a nyʋ a waa a wasɛ woruŋ a hɛ biee zɔlɔ zɔlɔ.” Yesu magɛ namaga-la dɛrɛ aŋ bʋl, “Dɩgɩlaa tɩŋŋaa, má wuoli ma dɩgɩlaa nɩɩ.”

Yesu dagɛ namaga-la bʋbʋɔŋ

Mat. 13.10-23; Maak 4.10-20

9Ŋɩɩ nɛ Yesu harɩ-tooroo pɩɛsɛ namaga-la bʋbʋɔŋ. 10Yesu bʋla pɩba, “Ma nɩaa deemba nɛ Wɩa dagɛ ʋ kuorii-la bʋbʋɔŋ pa. Ama nɩ-daŋ kala, namagaba nɛ ʋ yie kaa dɩdagɛba. Ba yie nyilimi nyilimi aŋ bɩ kʋŋkala wuo na, a bɩra jegili jegili aŋ bɩ ba bʋbʋɔŋ wuo jɩŋ.

11Namaga-la bʋbʋɔŋ nɛ ŋ-la: Wɩa niiŋ wɩaa nɛ ŋaa kʋdoho-la. 12Kɩalɩŋ sɩ tel wombiiŋ tʋɔŋ nɛ ŋaa nɩalɩŋ sɩ yie nɩɩ Wɩa niiŋ wɩalɩŋ, ka Sɩtaanɩ kʋ liiri wɩalɩŋ ba tʋɔŋ, dɩ ba sɩ́ wɩalɩŋ laa dii dɩ Wɩa laaba ta. 13Kɩalɩŋ sɩ tel kpagɩnyɩlɩŋ nyuŋ ma nɛ ŋaa nɩalɩŋ sɩ yie nɩɩ Wɩa niiŋ wɩalɩŋ a sɛɩ arɩ tʋɔtɔrʋŋ. Ama ʋ bɩ ba tʋɔŋ tibe. Ba yie sɛɩ wɩɩ-la a mʋ magɛ ŋɩɩ aŋ vɩa. Dɩ wɩaa nɛ jʋʋba, ba joŋo ta. 14Kɩalɩŋ sɩ tel sɔsʋŋ tʋɔŋ ma nɛ ŋaa nɩalɩŋ sɩ yie nɩɩ Wɩa niiŋ wɩalɩŋ, ama dʋnɩa kɩaa wɩaa wʋwalɩmɛba, ba cho dɩ ba jige aa chɩchɛ dʋnɩa tʋɔtɔrɛ wʋŋaalaa. A tɩŋ kɩaa deemba wɩaa ba yie to mʋ magɛ ŋɩɩ aŋ bɩra vɩa wɩalɩŋ. Wɩalɩŋ lɛl ba tʋɔŋ. 15Kɩalɩŋ sɩ tel tintee-zɔmʋŋ tʋɔŋ ma nɛ ŋaa nɩalɩŋ sɩ nɩɩ Wɩa niiŋ wɩalɩŋ a laaba hɛ ba tʋɔŋ lɛ a tutoba, a pɛsɛ wɩalɩŋ lɛ halɩɩ, ba kɛŋ doho.”

Yesu magɛ namaga a mʋ tɩgɛ chaanɩŋ lɛ

Maak 4.21-25

16Ŋɩɩ nɛ Yesu bɩra dagɛ nɩaa a bʋl, “Nʋʋkala bɩ jaŋ nyɩgɛ chaanɩŋ ʋ dɩa lɛ a kɛŋ gbaŋa chu tɔ, koo a joŋo hɛ godo bʋbʋɔŋ. Ʋ yie joŋo daŋ chaaŋ daaŋ nyuŋ nɛ, dɩ nʋʋkala nɛ kʋ jʋʋ ʋ dɩa, dɩ ʋ wuo na pʋlʋmʋŋ. 17Wʋfaalɩɩ tuo see dɩ ʋ kʋ lɩɩ dɩ-jalɩŋ. Wɩɩkala sɩ hɛ birimiŋ tʋɔŋ jaŋ kʋ lɩɩ pʋlʋmʋŋ. 18Má fɩɛlɛ ma sɩaa woruŋ arɩ wɩalɩŋ ma sɩɩ nɩɩ lɛ. Nɩɩ-la kala sɩɩ to Wɩa niiŋ wɩaa, Wɩa jaŋ faasa pɛ ʋ lɛ dɩ ʋ to woruŋ. Nɩɩ-la ma sɩ bɩ Wɩa niiŋ wɩaa ka to, Wɩa bɩ jaŋ pɛ ʋ lɛ. Ʋ sɩ pɛ ʋ lɛ mʋa-la maa, ʋ jaŋ laaʋ kaa viiri.”

Yesu naaŋ arɩ ʋ naambiiriŋ kɔ Yesu teeŋ

Mat. 12.46-50; Maak 3.31-35

19Ŋɩɩ nɛ Yesu naaŋ arɩ ʋ ŋaanaa kɔ lee-la Yesu sɩ hɛ dɩ ba naʋ. Nɩaa sɩ yʋga ŋɩɩ, ba bɩ ʋ wuo na. 20Ŋɩɩ nɛ nʋʋ bʋla pɩ Yesu, “Ŋ naaŋ arɩ ŋ ŋaanaa nɛ chɩŋ jeeŋ harɩŋ a chɩchɛ dɩ ba naŋ.” 21Ŋɩɩ nɛ Yesu bʋla pɩ ba kala, “Nɩalɩŋ sɩ nɩɩ Wɩa niiŋ wɩaa a tutoba, ba nɛ ŋaa mɩ naaŋ arɩ mɩ naambiiriŋ.”

Yesu ŋaa peliŋ sigili

Mat. 8.23-27; Maak 4.35-41

22Tapʋlɩɩ kʋbala Yesu arɩ ʋ harɩ-tooroo sii jʋʋ lɩɩŋ daboro. Ŋɩɩ nɛ Yesu bʋl dɩ ba chol mʋga cholo dɔŋɔ. Ba jʋʋ lɩɩŋ daboro-la a duoro mʋ. 23Ba fa sɩ duoro mʋ ŋɩɩ, Yesu pɩŋ doŋ. Ŋɩɩ nɛ pel-duo kʋbala suomo ŋɩŋaa, a kʋ ŋmoo lɩɩŋ a hɛ lɩɩŋ daboro-la tʋɔŋ ʋ chɩchɛ ʋ su. Ʋ fa ka mʋa dɩ ba tuu lɩɩŋ bʋbʋɔŋ.

24Ŋɩɩ nɛ Yesu harɩ-tooro-la mʋ lee-la ʋ fa sɩ pɩna, a chɩsʋ a bʋla pʋ, “La kʋhɩaŋ, laa chɛ dɩ la sʋʋ nɛ.” Ŋɩɩ nɛ Yesu sii doŋ lɛ a kpɩa pel-la lɛ aŋ bʋl lɩɩ-pel-la ma lɛ dɩ ʋ fɩɛla pɩŋ. Pel-la kɛrɛ, ka leriŋ kala ŋaa fʋɩɩ. 25Ŋɩɩ nɛ Yesu pɩɛsɛ ʋ harɩ-tooroo a bʋl, “Ma bɩ Wɩa laa dii?” Ʋ ŋaa nʋʋkala wʋkpuŋkpere. Fawʋllʋŋ ma kɛmba.

Ŋɩɩ nɛ ba pɩpɩɛsɛ dɔŋɔ, “Kʋbɛɛ nɛ saa paala ŋaa nɩa deeŋ? Ʋ bʋl wɩaa a pɩ peliŋ arɩ lɩɩ-peliŋ, ba kala to ʋ niiŋ.”

Yesu vaarɛ baal kʋbala jɩŋ-bɔŋŋɔɔ fa sɩ kɛnɛ

Mat. 8.28-34; Maak 5.1-20

26Ŋɩɩ nɛ ba duoro kɔ Gɛrasɩŋ tinteeŋ. Gɛrasɩŋ arɩ Galilii tinteeŋ kpagɛ dɔŋɔ nɛ. 27Ba sɩ mʋ yi lee-la, Yesu kʋ lɩɩ lɩɩŋ niiŋ, dɩ baal kʋbala ma lɩɩ taŋ-la a kʋ chemu. Jɩŋ-bɔŋŋɔɔ kɛnʋ. Ʋ kɛŋ yarɩ-biree nɛ aa gɔllɛ a dieni. Ʋ bɩ dɩa maa jʋʋ. Vaamaa leriŋ nɛ ʋ yie hɛ. 28Ʋ sɩ na Yesu, ʋ ŋmoo niiŋ aŋ tuu tel ʋ sɩpaaŋ, aŋ bʋla pʋ, “Yesu, Wɩɩ-balɩŋ Bie, bɛɛ nɛ ŋ chɛ ŋ ŋaa mɩ lɛ? Mɩɩ sʋlʋŋ, sɩ́ mɩ dɔgɩsʋ.” 29Yesu fa bʋla pɩ jɩŋ-bɔŋ-la dɩ ʋ lɩɩ baal-la lɛ, ŋɩɩ nɛ tɩɩ ʋ bʋl ŋɩɩ. Jɩŋ-bɔŋ-la fa vɛnɛ kɛnʋ a yʋgɛ nɛ. Nɩaa kɛnʋ kaa tɔ dɩa a hɛʋ kuruŋ a kɛŋ chɔrʋmɔɔ vɔbʋ aŋ hɛ nɩaa ba bibenu. Ʋ yie kɛŋ chɔrʋmɔ-la kaa kɛrɛ, ka jɩnsɩ-la kɛnʋ kaa lɩɩ jʋʋ gɩrɩŋ. 30Ŋɩɩ nɛ Yesu pɩɛsʋ, “Ŋ yɩrɩŋ nɛ bɛɛ?” Ŋɩɩ nɛ baal-la bʋl dɩ ʋ yɩrɩŋ nɛ kʋ-kɛnɛ, bɛɛ wɩaa jɩnsɩŋ fa yʋga nɛ a kɛnʋ. 31Ŋɩɩ nɛ jɩŋ-bɔmɔ-la sʋl Yesu dɩ ba nɛ leŋ baal-la, dɩ ʋ sɩ́ leŋe dɩ ba tuu buotuo-luŋuŋ.

32Dɩ toonuŋ ma hɛ lee-la a yʋgɛ a didii kɩaa peeliŋ nyuŋ. Ŋɩɩ nɛ jɩnsɩ-la sʋl Yesu dɩ ʋ leŋ dɩ ba mʋ jʋʋ toonu-la. Ʋ sɛɩ. 33Ba lɩɩ baal-la lɛ a mʋ jʋʋ toonu-la. Ŋɩɩ nɛ toonu-la kala sii a fá lɩɩ peel-la nyuŋ a tuu tel mʋga tʋɔŋ a nyʋa lɩɩŋ sʋʋ.

34Too-daara-la sɩ na wɩɩ-la sɩ ŋaa, ba fá mʋ a hɛ duoso pɩ bagɩ-daaraa arɩ taŋ-la nɩaa kala. 35Nɩaa sii lɩɩ mʋ dɩ ba na wɩɩ-la sɩ ŋaa a kɔ Yesu teeŋ. Baa kɔ dɩ baal-la Yesu sɩ kiri jɩnsɩŋ ʋ lɛ, dɩ ʋ hɔŋ Yesu sɛmɛ a laalɛ gɛrɩŋ a kɛŋ yarɩfɩɛlaa. Ba sɩ na ŋɩɩ, fawʋllʋŋ kɛmba. 36Nɩalɩŋ sɩ hɛ nɩmɛ aa beŋ, ka Yesu vaarɛ baal-la, ba bʋla pɩ ba dɔnsʋŋ tɩŋŋaa ŋɩɩ ʋ sɩ ŋaa a vaarɛ baal-la. 37Ba sɩ nɩɩ wɩalɩŋ, fawʋllʋŋ kɛmba woruŋ. Ŋɩɩ nɛ taŋ-la nɩaa kala kʋ bʋla pɩ Yesu dɩ ʋ lɩɩ ba jaŋ lɛ. Ŋɩɩ nɛ Yesu sii jʋʋ lɩɩŋ daboro. Ba dɩ ʋ harɩ-tooroo duoro viiri. 38Ŋɩɩ nɛ baal-la Yesu sɩ kiri jɩŋ-bɔŋŋɔɔ ʋ lɛ ma sʋlʋ dɩ ʋ leŋ dɩ ʋ kɔ dɩ ba mʋ. Ʋ bɩ sɛyɛ aŋ bʋla pʋ, 39“Mʋ dɩa a bʋla pɩ ŋ dɩa nɩaa Wɩa sɩ ŋaa wɩɩ-la ŋ lɛ.” Ŋɩɩ nɛ baal-la gɔllɛ jaŋ tʋɔŋ kala a bʋl wɩɩ-la Yesu sɩ ŋaa ʋ lɛ.

Yesu vaarɛ Jaarɩs tolo

Mat. 9.18-26; Maak 5.21-43

40Ŋɩɩ nɛ Yesu mɩɩra mʋ jʋʋ lɩɩŋ daboro ba duoro chol mʋga. Ba cholo ŋɩɩ dɩ nɩ-daŋ hilime a hɔnɔ gbɛrʋ.

41-42Dɩ baal kʋbala ma kɔ nɩmɛ. Baa yɩrɛ Jaarɩs. Ʋ fa ŋaa Wɩɩchʋɔlɛ dɩa kʋhɩaŋ nɛ. Ʋ fa kɛŋ toli-bala nɛ. Tolo-la fa yi jɩsɩŋ fii arɩ balɩa nɛ. Ŋɩɩ nɛ baal-la kɔ Yesu teeŋ a tuu tel ʋ naasɩŋ lɛ a sʋlʋ dɩ ʋ kɔ ʋ dɩa. Ʋ bʋla pʋ arɩ ʋ tolo nɛ pɩna kikiigi. Ŋɩɩ nɛ Yesu sii dɩ ʋ mʋ baal-la dɩa. Ʋ sɩɩ mʋ ŋɩɩ, dɩ nɩaa gollu chu sɛmɛ-na kala.

43Haal kʋbala ma fa hɛ ba tʋɔŋ. Ʋ fa kɛŋ tɩŋa nɛ jɩsɩŋ fii arɩ balɩa, ʋ pɔ ʋ bɩ dɛrɛ. [Ʋ gɔllɔ ŋaa daalusuŋ kɩŋkɛŋ a chei ʋ moribiee kala, ka daalusu-la bɩ ʋ laa.] 44Ŋɩɩ nɛ ʋ lugisi nɩalɩŋ tʋɔŋ a kʋ chɩŋ Yesu harɩŋ a digi ʋ gɛrɩŋ niipiniŋ lɛ. Ʋ tɩŋa-la guu dɛrɛ. 45Ŋɩɩ nɛ Yesu pɩɛsɛ, “Kʋbɛɛ nɛ digimi?” Nʋʋkala bʋl dɩ ʋ-na dee. Ŋɩɩ nɛ Pɩɩta bʋla pɩ Yesu, “Kʋhɩaŋ, ka ŋ na nɩaa sɩ yʋga ŋɩɩ nɛ a golluŋ chu a yiyigi dɔŋɔ.” 46Ama Yesu ha bʋl, “Nʋʋ nɛ digimi. Mɩ jɩma arɩ doluŋ lɩɩ mɩ lɛ nɛ.” 47Haal-la sɩ na arɩ wɩɩ-la ʋ sɩ ŋaa bɩ wʋfaalɩɩ ŋaa, ʋ kʋ kpirimi Yesu sɩpaaŋ a chichel, a bʋl nɩalɩŋ tʋɔŋ wɩɩ-la sɩ tɩɩ ʋ digu, a dagɛ ŋɩɩ ʋ sɩ digu a duori lɩma. 48Ŋɩɩ nɛ Yesu bʋla pʋ, “Mɩ tolo, ŋ sɩ laa Wɩa dii nɛ tɩɩ ŋ duori, mʋ arɩ yarɩfɩɛlaa.”

49Yesu fa sɩɩ bʋl wɩaa ŋɩɩ, dɩ tɩndaara lɩɩ Jaarɩs dɩa kɔ, a bʋla pɩ Jaarɩs, “Ŋ tolo-la sʋba nɛ, bɩra sɩ́ la kʋhɩaŋ-la walɩmʋ.” 50Yesu sɩ nɩɩ ŋɩɩ, ʋ bʋla pɩ Jaarɩs, “Sɩ́ leŋe dɩ fawʋllʋŋ kɛnɩŋ. Dɩ ŋ nɛ laa Wɩa dii, ʋ jaŋ sii.”

51Yesu sɩ mʋ yi baal-la dɩa, ʋ bɩ leŋe nʋʋkala to ʋ harɩŋ jʋʋ dɩa-la, see Pɩɩta arɩ Jɔɔŋ arɩ Jeems, a pɛ bile nyɩmma arɩ ʋ naaŋ lɛ. 52Ba kʋ jʋʋ dɩa-la dɩ nɩalɩŋ kala sɩ hɛ nɩmɛ sime aa yel bile yoho. Ŋɩɩ nɛ Yesu bʋla pɩba, “Má sɩ́ yel, bile bɩ sʋba, doŋ nɛ ʋ pɩŋ.” 53Ŋɩɩ nɛ ba kala mɔmʋ, bɛɛ wɩaa ba jɩma arɩ ʋ sʋba nɛ. 54Yesu mʋ kɛŋ bile nɩsɩŋ lɛ aŋ yɩrʋ, “Mɩ bii, sii.” 55Ŋɩɩ nɛ ʋ dɩma mɩɩra kʋ jʋʋ. Ʋ sii chɩŋ. Yesu bʋl dɩ ba ŋaa kʋdiilee pʋ dɩ ʋ dii. 56Wɩɩ-la ŋaa bile nyɩmma arɩ ʋ naaŋ wʋkpuŋkpere. Ŋɩɩ nɛ Yesu bʋla pɩba dɩ ba sɩ́ wɩɩŋ deeŋ sɩ ŋaa bʋla pɩ nʋʋkala.

Currently Selected:

Luuk 8: SIS

Highlight

Copy