Luuk 7

Yesu vaarɛ laalɩyuoroo kʋhɩaŋ tɩntɩnna

Mat. 8.5-13

1Yesu sɩ bʋl wɩaa deemba kala a pɩ nɩalɩŋ dɛrɛ, ʋ sii mʋ taŋ kʋbala baa yɩrɛ Kapɛnam.

2Baal kʋbala nɛ fa hɛ nɩmɛ. Ʋ fa ŋaa Rom laalɩyuoroo kʋhɩaŋ nɛ a fa kɛŋ ʋ tɩntɩnna a chou woruŋ. Tɩntɩnnʋ-la wʋwɩɩlɛ a pɩna kikiigi. 3Ŋɩɩ nɛ laalɩyuoroo kʋhɩaŋ-la nɩɩ Yesu wɩaa. Ʋ sɩ nɩɩ ŋɩɩ, ʋ lɩɩsɛ Juu tɩŋŋaa kʋhɩasɩŋ dɩ ba mʋ sʋlʋ dɩ ʋ kʋ vaarɛ ʋ tɩntɩnnʋ-la. 4Ba sii a mʋ Yesu teeŋ a sʋlʋ kɩŋkɛŋ kɩŋkɛŋ a bʋl, “Baala deeŋ ŋaa nɩzɔŋ nɛ. Ʋ maga dɩ ŋ pɛ ʋ lɛ. 5Ʋ cho la nɩaa nɛ woruŋ. Ʋ tɩtɩa nɛ saa Wɩɩchʋɔlɛ dɩa a pɩla.”

6Ŋɩɩ nɛ Yesu to ba harɩŋ mʋ. Ba sɩ mʋ kpagɛ laalɩyuoroo kʋhɩaŋ dɩa, baal-la tɩŋ ʋ nandɔnsʋŋ dɩ ba kʋ lɩɩ bʋla pɩ Yesu, “Mɩ Tɩɩna, sɩ́ ŋ tɩtɩa walɩmʋ a kɔ mɩ dɩa. Mɩ bɩ maga dɩ ŋ kʋ jʋʋ mɩ dɩa. 7Ŋɩɩ nɛ tɩɩ mɩ paala bɩ ŋ teeŋ kɔ. Ŋ-na yaa suri ŋ niiŋ a bʋl dɩ mɩ tɩntɩnnʋ-la duori, ʋ jaŋ duori. 8Mɩ ma paalaa to mɩ laalɩyuori hɩasɩŋ niiŋ nɛ. Laalɩyuoroo dɔnsʋŋ ma tuto mɩ niiŋ. Dɩ mɩ nɛ sɩ dɩ nɩa deeŋ mʋ daha, ʋ yie mʋ nɛ. Dɩ mɩ nɛ sɩ dɩ nɩa deeŋ kɔ daha, ʋ yie kɔ nɛ. Dɩ mɩ nɛ bʋla pɩ mɩ tɩntɩnna dɩ ʋ ŋaa wɩɩŋ deeŋ, ʋ yie ŋaa nɛ.” 9Yesu sɩ nɩɩ wɩaa deemba, ʋ ŋaaʋ wʋkpuŋkpere. Ʋ mɩɩra chaasɛ nɩ-daŋ-la fa sɩɩ to ʋ harɩŋ a bʋla pɩba, “Mɩ bʋlaa pɩma, mɩ ha bɩ Wɩa laa diiniŋ deeŋ doho na Iziral nɩaa tʋɔŋ.”

10Ŋɩɩ nɛ nɩalɩŋ laalɩyuoroo kʋhɩaŋ-la fa sɩ tɩma, ba mɩɩra mʋ ʋ dɩa, dɩ ʋ tɩntɩnnʋ-la duoro.

Yesu chɩsɛ yo-haala bie

11Yesu sɩ vaarɛ Rom laalɩyuoroo kʋhɩaŋ tɩntɩnnʋ-la, ʋ bɩ diene ka ʋ mʋ taŋ kʋbala baa yɩrɛ Neeŋ. Ʋ harɩ-tooroo arɩ nɩ-daŋ nɛ to ʋ harɩŋ mʋ. 12Ʋ sɩ mʋ kpagɛ taŋ-la boi-baalɩŋ niiŋ dɩ baa yel yoho. Baal kʋbala nɛ sʋba. Ʋ nɛ fa ŋaa ʋ naaŋ bie kala. Ʋ naaŋ ma fa ŋaa yo-haal nɛ. Nɩaa yʋga a lɩɩ taŋ-la a kʋ chigi haal-la. 13Yesu sɩ na haal-la, nenige kala kɛnʋ. Ʋ bʋla pʋ dɩ ʋ sɩ́ yel. 14Ŋɩɩ nɛ ʋ mʋ a digi daga-la ba fa sɩ joŋ sʋʋ-la hɛ. Nɩalɩŋ fa sɩ chʋŋ daga-la a kaa mʋ dɩ ba hugi, ba chɩŋ. Ŋɩɩ nɛ Yesu bʋla pɩ sʋʋ-la a bʋl, “Bapʋɔsɩ-bie, mɩ bʋla pɩŋ dɩ ŋ sii sʋʋŋ lɛ.” 15Baal-la sii sʋʋŋ lɛ a suomo bʋbʋl wɩaa. Ŋɩɩ nɛ Yesu joŋu pɩ ʋ naaŋ. 16Fawʋllʋŋ kɛŋ nʋʋkala. Ba dɛnnɛ Wɩa a bʋl, “Wɩa wʋlaabʋllaa tʋɔŋ nɩbal nɛ kɔ la teeŋ. Wɩa kɔ dɩ ʋ laa ʋ nɩaa ta nɛ.”

17Ŋɩɩ nɛ wɩɩŋ deeŋ Yesu sɩ ŋaa teeli Judiya tinteeŋ kala arɩ tabiisi-la sɩ golli Judiya tinteeŋ.

Jɔɔŋ, Wɩa lɩɩ-fooru-la tɩŋ tɩndaaraa

Mat. 11.2-19

18Jɔɔŋ, Wɩa lɩɩ-fooru-la harɩ-tooroo bʋl wɩaa deemba kala Yesu sɩ ŋaa a pʋ. 19Ŋɩɩ nɛ Jɔɔŋ yɩrɛ ba tʋɔŋ nɩaa balɩa, a tɩmba dɩ ba mʋ Yesu teeŋ a pɩɛsʋ, “Ŋ nɛ nɩɩ-la Jɔɔŋ sɩ sɩ ʋ jaŋ kɔ koo la gbɩgbɛrɛ nʋʋ dɔŋ nɛ?” Ŋɩɩ nɛ ba mʋ Yesu teeŋ. 20Ba sɩ mʋ ʋ teeŋ, ba bʋl, “Jɔɔŋ, Wɩa lɩɩ-fooru-la nɛ tɩnla dɩ la kʋ pɩɛsɩŋ arɩ ŋ nɛ nɩɩ-la ʋ sɩ sɩ ʋ jaŋ kɔ koo la gbɩgbɛrɛ nʋʋ dɔŋ?” 21Bʋa-la tɩtɩa lɛ Yesu vaarɛ nyanyal tɩŋŋaa arɩ nɩaa yawɩɩlaa a yʋgɛ, a kiri jɩŋ-bɔŋŋɔɔ nɩaa lɛ, aŋ suri nyʋlɩmaa ma sɩaa. 22Ŋɩɩ nɛ ʋ bʋla pɩ Jɔɔŋ harɩ-tooro-la, “Má mɩɩra mʋ a bʋla pɩ Jɔɔŋ wɩalɩŋ kala ma sɩ nɩa aŋ na maa. Nyʋlɩmaa sɩaa susuri, gbɛrɩgɛɛ vɩvɛŋ, gbegisiŋ duduori. Taŋŋaa nɩnɩɩ wɩaa. Nɩalɩŋ sɩ sʋba sisii sʋʋŋ lɛ. Summoo ma wuo nɩnɩɩ Wɩa wʋzɔŋŋɔɔ. 23Nɩalɩŋ sɩ bɩ kaa lɛrɛ arɩ mɩ nɛ ŋaa Nɩɩ-la Wɩa sɩ tɩma, ba tʋɔŋ jaŋ tɔrɛ.”

24Ŋɩɩ nɛ Jɔɔŋ harɩ-tooro-la viiri. Ka Yesu suomo bʋl Jɔɔŋ wɩaa a pɩpɩ nɩ-daŋ-la. Ʋ pɩɛsɛba, “Ma sɩ mʋ Jɔɔŋ teeŋ tintee-hɩlɩɩ-la lɛ, bɛɛ nɛ ma fa gbɛrɛ dɩ ma na? Ma mʋ dɩ ma na yaŋ peliŋ sɩ kaa viviisi nɛɛ? Aɩ. 25Bɛɛ nɛ saa ma lɩɩ dɩ ma na? Ma lɩa dɩ ma na nʋʋ sɩ laalɛ gɛrɩ-zɔŋŋɔɔ nɛɛ? Aɩ. Bee na nɩalɩŋ sɩ yie laalɛ gɛnnɩŋ deemba, ba yie jʋʋ kuori-dɩɩsɩŋ nɛ aa nɩɩ sɩma. 26Má saa dagɛmɛ kʋ-la ma sɩ mʋa dɩ ma na. Ma mʋa dɩ ma na Wɩa wʋlaabʋlla nɛɛ? Oo, mɩ jaŋ bʋla pɩma arɩ ma na nʋʋ sɩ kɩɩ Wɩa wʋlaabʋlla nɛ. 27Ʋ-na Jɔɔŋ wɩaa nɛ ba ŋmʋnsa bil Wɩa teniŋ tʋɔŋ, a bʋl dɩ Wɩa sɩ,

‘Má jegile nɩɩ mɩ teeŋ, mɩ jaŋ tɩŋ mɩ tɩndaara

dɩ ʋ laa ŋ sɩpaaŋ a mʋ a wasɛ wombiiŋ biliŋ lɛ.’ ”

28Ŋɩɩ nɛ Yesu bɩra bʋla pɩ nɩaa a bʋl, “Jɔɔŋ nɛ kɩɩ nʋʋkala ba sɩ lʋla. Ama nɩɩ-la sɩ ŋaa nɩ-bie Wɩa kuorii-la tʋɔŋ, ʋ nɛ yʋga kɩɩ Jɔɔŋ.”

29(Nɩalɩŋ arɩ ba tʋɔŋ lampoo laaraa fa sɩ nɩɩ wɩalɩŋ Jɔɔŋ sɩ bʋla, ba laa dii a to Wɩa. Ba nɛ kʋ ŋaa tʋɔpʋl tɩmma. Jɔɔŋ foba Wɩɩchʋɔlɛ lɩɩŋ maa. 30Ama Farisii tɩŋŋaa arɩ Wɩa teniŋ kerichiba vɩa Wɩa niiŋ wɩalɩŋ Jɔɔŋ sɩ bʋla. Ba nɛ bɩ sɛyɛ dɩ Jɔɔŋ foba Wɩɩchʋɔlɛ lɩɩŋ.)

31Ŋɩɩ nɛ Yesu bɩra bʋl, “Bɛɛ nɛ mɩ jaŋ kɛŋ jɩnɩŋ nɩaa kaa magɩsɛ? Ɛɛ nɛ ba nagɛ? 32Ba nagɛ hambiisiŋ sɩɩ gbieli yɔbɔ tʋɔŋ nɛ. Dɔnsʋŋ yie kpɩa dɔŋɔ lɛ, a bʋla pɩba,

‘La yɩɩ yɩɩlaa nɛ pɩma,

aŋ ka ma bɩ gʋa,

la yel yoho pɩma,

aŋ ka ma bɩ yel.’

33Bʋa-la lɛ Jɔɔŋ Wɩa lɩɩ-fooru-la sɩ kɔ ma teeŋ, ʋʋ vɔɔ niiŋ nɛ a bɩ sɩnɩŋ ma nyʋa. Ŋɩɩ nɛ ma sɩ dɩ jɩŋ-bɔŋ nɛ kɛnʋ. 34Aŋ ka mɩ-na Nuhuobiine Bie kɔ ma teeŋ a didii kɩaa aŋ pɛ nyʋnyʋa sɩnɩŋ ma. Ŋɩɩ nɛ ma bʋla pɩ dɔŋɔ: Baala deeŋ ŋaa luobii tɩɩna nɛ a ŋaa sɩ-nyʋarʋ ma, aŋ pɛ kɛŋ lampoo laaraa arɩ wʋbɔŋ ŋaaraa kala kaa dii nandɔnsʋŋ. 35Nɩalɩŋ sɩ sɛɩ wʋjɩmɩɩ-la sɩ lɩɩ Wɩa teeŋ, ba wʋŋaalaa daga arɩ ba sɛnɛ lɩɩ Wɩa teeŋ nɛ.”

Yesu jʋʋ Farisii kʋbala dɩa baa yɩrɛ Saamɔŋ

36Tapʋlɩɩ kʋbala Farisii tɩŋŋaa tʋɔŋ dɔŋɔ yɩrɛ Yesu dɩ ʋ kɔ ʋ dɩa dɩ ba dii kʋdiilee. Yesu mʋ a hɔŋ dɩ ba dii kɩaa. 37Dɩ haal kʋbala hɛ taŋ-la lɛ a ŋaa wʋbɔŋ ŋaarʋ. Haal-la nɩɩ Yesu wɩaa arɩ ʋ hɛ Farisii tɩɩna-la dɩa lɛ a didii kɩaa. Ŋɩɩ nɛ ʋ sii joŋ tʋlaalɩɩ loŋ a kaa mʋ jʋʋ dɩa-la. 38Ʋ sɩ jʋʋ dɩa-la, ʋ chɩŋ Yesu naasɩŋ sɛmɛ aŋ yel sɩlɩɩrɩŋ hɩhɛ Yesu naasɩŋ lɛ. Sɩlɩɩrɩŋ sɩ hɛ Yesu naasɩŋ lɛ ŋɩɩ, ʋ kɛŋ ʋ nyu-pʋnaa kaa tɩɩgɛ aŋ guori Yesu naasɩŋ, a bɩsɛ tʋlaalɩɩ-la hɛ ʋ naasɩŋ lɛ.

39Farisii tɩɩna-la sɩ yɩrɛ Yesu dɩ ʋ kʋ dii kɩaa na wɩɩŋ deeŋ a bɩbɩɩnɛ ʋ tʋɔŋ lɛ, “Dɩ baala deeŋ sɛnɛ ŋaa Wɩa wʋlaabʋllʋ nɛ, ʋ fa jaŋ jɩŋ arɩ haala deeŋ sɩ digu ŋaa wʋbɔŋ ŋaarʋ nɛ.”

40Ŋɩɩ nɛ Yesu bʋla pɩ Saamɔŋ, “Saamɔŋ, mɩ kɛŋ wɩɩ nɛ dɩ mɩ bʋla pɩŋ.”

Ŋɩɩ nɛ Saamɔŋ bʋla pʋ, “Mɩ kʋhɩaŋ, bʋla pɩmɛ.”

41Ŋɩɩ nɛ Yesu bʋla pʋ, “Baalaa balɩa nɛ fa hɛ nɩmɛ a sii mʋ chɩŋ moribiee kɩaa tɩɩna teeŋ. Dɔŋɔ chɩŋ siidi bʋɩ banɛsɛ, dɔŋɔ ma chɩŋ siidi zɔɔ-banɛsɛ. 42Nɩaa deemba balɩa tʋɔŋ, kʋŋkala bɩ ʋ chɩmɩŋ wuo tiŋ. Ŋɩɩ nɛ kɩaa tɩɩna-la joŋ chɩŋ-la a chɛ ba kala. Nɩaa deemba balɩamɩŋ tʋɔŋ, kʋbɛɛ nɛ jaŋ cho baal-la woruŋ?”

43Ŋɩɩ nɛ Saamɔŋ bʋla pʋ dɩ ʋ bɩɩna arɩ nɩɩ-la chɩmɩŋ sɩ yʋga nɛ.

Yesu bʋla pʋ dɩ wʋtɩtɩɩ nɛ.

44Ŋɩɩ nɛ ʋ mɩɩra beŋ haal-la aŋ pɩɛsɛ Saamɔŋ, “Ŋ na haal-la deeŋ nɛɛ? Mɩ kɔ ŋ dɩa, aŋ ka ŋ bɩ lɩɩŋ ŋaa pɩmɛ dɩ mɩ sɔŋ mɩ naasɩŋ, aŋ ka ʋ-na kɛŋ ʋ sɩlɩɩrɩŋ kaa sɔŋ mɩ naasɩŋ aŋ kɛŋ ʋ nyu-pʋnaa ma tɩɩgɛ. 45Mɩ sɩ kɔ ŋ dɩa, ŋ bɩ mɩ guoro, ama haala deeŋ sɩ guori mɩ naasɩŋ, ʋ ha bɩ leŋe. 46Ŋ bɩ nʋʋŋ ŋaa tɩsɛ mɩ nyuŋ, ka ʋ-na ŋaa tʋlaalɩɩ tɩsɛ mɩ naasɩŋ. 47Mɩ bʋla pɩŋ arɩ mɩ joŋ ʋ wʋbɔŋŋɔɔ yʋgɛ nɛ a chɛʋ, ŋɩɩ nɛ tɩɩ ʋ chomi woruŋ ŋɩɩ. Ama nɩɩ-la ma mɩ sɩ joŋ ʋ wʋbɔŋŋɔɔ mʋapɩlɩɩ chɛʋ, ʋ tɩɩna ma chomi mʋapɩlɩɩ nɛ.”

48Ŋɩɩ nɛ Yesu bʋla pɩ haal-la nɩaa tʋɔŋ arɩ ʋ joŋ ʋ wʋbɔŋŋɔɔ a chɛʋ nɛ. 49Ŋɩɩ nɛ nɩalɩŋ kʋkaanaa fa sɩ hɔnɔ didii kʋdiile-la bɩbɩɩnɛ ba tʋɔŋ lɛ a bʋl, “Kʋbɛɛ nɛ nɩa deeŋ sɩ paala joŋ wʋbɔŋŋɔɔ chɛ nɩaa?” 50Ama Yesu bʋla pɩ haal-la, “Ŋ sɩ laa Wɩa dii, ŋɩɩ nɛ tɩɩ ŋ na laatanɩŋ. Mʋ arɩ yarɩfɩɛlaa.”

Currently Selected:

Luuk 7: SIS

Highlight

Copy