Luuk 19

Zakɩyas

1Yesu mʋ to taŋ kʋbala baa yɩrɛ Jeriko. 2Baal kʋbala nɛ fa hɛ nɩmɛ. Ʋ fa ŋaa lampoo laaraa kʋhɩaŋ nɛ. Ʋ yɩrɩŋ nɛ fa Zakɩyas. Ʋ fa kɛŋ kɩaa nɛ woruŋ. 3Ʋ faa chɛ dɩ ʋ na Yesu, ama ʋ fa ŋaa nɩ-kuu nɛ. A tɩŋ nɩ-daŋ-la fa sɩ hɛ nɩmɛ ŋɩɩ, ʋ fa bɩ ʋ wuo na. 4Ŋɩɩ nɛ ʋ kieli nɩ-daŋ-la, a fá mʋ jɩl tɩa, dɩ ʋ wuo na Yesu. Ʋ jɩma dɩ ʋ jaŋ kʋ to tɩa-la bʋbʋɔŋ bal. 5Yesu sɩ kʋ to tɩa-la bʋbʋɔŋ bɩbal, ʋ wʋla beŋ tɩa-la nyuŋ a naʋ a bʋla pɩ Zakɩyas, “Zakɩyas, kʋ tuu lɩma. Ʋ maga dɩ mɩ chʋa ŋ dɩa lɛ nɛ jɩnɩŋ.” 6Zakɩyas sɩ nɩɩ ŋɩɩ, ʋ tʋɔŋ tɔrɛ. Ʋ tuu lɩma lɩma a kɛŋ Yesu mʋ ʋ dɩa. 7Nɩalɩŋ kala sɩ hɛ nɩmɛ a na ŋɩɩ, ba suomo gʋgʋrɩmɛ wɩaa a bʋl, “Baala deeŋ mʋa dɩ ʋ chʋa wʋbɔŋ ŋaarʋ-la dɩa lɛ nɛ.” 8Yesu sɩ hɛ Zakɩyas dɩa lɛ ŋɩɩ, Zakɩyas sii chɩŋ a bʋla pɩ La Tɩɩna Yesu, “Mɩ Kʋhɩaŋ, jegile nɩɩ mɩ teeŋ. Mɩ jaŋ joŋ mɩ kɩaa kpaa magɛ dɔŋɔ a pɩ summoo. Dɩ mɩ nɛ gɩrɩmɛ nʋʋ maa, mɩ jaŋ tiŋ ʋ tɩɩna arɩ moribiee naansɩɩŋ bʋnɛsɛ.” 9Ŋɩɩ nɛ Yesu bʋla pʋ, “Wɩa laa ŋ dɩ ŋ dɩa nɩaa kala ta nɛ jɩnɩŋ. Baala deeŋ ma ŋaa Abɩraham doho nʋʋ nɛ, 10bɛɛ wɩaa mɩ-na Nuhuobiine Bie kɔ dɩ mɩ chɛ a laa nɩalɩŋ sɩ lɛlɛ nɛ a ta.”

Yesu magɛ namaga a tɩgɛ moribiiŋ lɛ

Mat. 25.14-30

11Ŋɩɩ nɛ Yesu magɛ namaga a pɩ nɩalɩŋ sɩ nɩɩ wɩalɩŋ ʋ sɩ bʋla. Bʋa deeŋ lɛ ʋ ka mʋa ka dɩ ʋ yi Jerusalɛm. Ŋɩɩ nɛ tɩɩ nɩalɩŋ bɩɩnɛ arɩ bʋa-la lɛ Wɩa kuorii-la sɩ jaŋ guu kɔ kpaga nɛ. 12Ŋɩɩ nɛ ʋ bʋl, “Nɩbal kʋbala nɛ sie a mʋ ta-bolii kʋbala dɩ ba bil u kuoruŋ, ka dɩ ʋ mɩɩra kɔ ʋ jaŋ a ŋaa kuoro. 13Ka dɩ ʋ-na mʋ, ʋ yɩrɛ ʋ dɩa tɩntɩnnaa fii, a joŋ siidi bʋɩ a pɩ kʋŋkala, a bʋl dɩ ba kaa bɩbɩrɩmɛ dɩ ʋ mʋ aŋ kɔ. 14Ama ʋ taŋ-la nɩaa bɛrʋ nɛ. Ŋɩɩ nɛ ba tɩŋ tɩndaaraa ba kiri ʋ harɩŋ mʋ a bʋla pɩ taŋ-la dɔŋɔ kuoro arɩ ba bɩ cho dɩ ʋ ŋaa ba taŋ kuoro. 15Ka baal-la mʋ dii kuoruŋ aŋ mɩɩra kɔ. Ʋ sɩ mɩɩra kɔ, ʋ yɩrɛ ʋ tɩntɩnna-la ʋ fa sɩ joŋ moribii-la pa dɩ ʋ na ba sɩ na nyʋʋrʋŋ magɛ ŋɩɩ. 16Ŋɩɩ nɛ tɩntɩnnɩ-bumbuŋ kɔ ʋ teeŋ a bʋla pɩ ʋ kʋhɩaŋ, ‘Mɩ kʋhɩaŋ, ŋ siidi bʋɩ-la ŋ sɩ joŋo pɩmɛ bɩrɩmɛ siidi bʋɩ fii nɛ.’ 17Ŋɩɩ nɛ ʋ kʋhɩaŋ-la bʋla pʋ, ‘Ŋ ŋaa woruŋ. Ŋ ŋaa tɩntɩnnɩ-tɩtɩɩ nɛ. Ŋ sɩ ŋaa ŋɩɩ a beŋ kʋbii-bie nyuŋ woruŋ, mɩ jaŋ leŋ dɩ ŋ bibeŋ tasɩŋ fii.’ 18Ŋɩɩ nɛ tɩntɩnnɩ-lɩamɩŋ ma kɔ ʋ teeŋ a bʋl, ‘Mɩ kʋhɩaŋ, ŋ siidi bʋɩ-la ŋ sɩ joŋo pɩmɛ, ʋ bɩrɩmɛ siidi bʋɩ banɔŋ nɛ.’ 19Ŋɩɩ nɛ ʋ kʋhɩaŋ-la bʋla pʋ dɩ ʋ jaŋ bibeŋ tasɩŋ banɔŋ. 20Ŋɩɩ nɛ tɩntɩnnɩ dɔŋ-la ma kɔ a bʋla pʋ, ‘Mɩ kʋhɩaŋ, na ŋ siidi bʋɩ-la ŋ sɩ joŋo pɩmɛ, mɩ joŋo gul gɛrɩ-kɔsʋŋ lɛ nɛ a joŋo faa. 21Mɩɩ fáŋ nɛ, bɛɛ wɩaa ŋ ŋaa nɩtɛrɛ nɛ. Ŋ yie kɛŋ nɩaa kɩaa lɩlaa nɛ aŋ kʋkʋŋ kɩalɩŋ ŋ sɩ bɩ duo.’ 22Ŋɩɩ nɛ ʋ kʋhɩaŋ-la bʋla pʋ, ‘Ŋ ŋaa tɩntɩnnɩ-bɔŋ nɛ. Wɩalɩŋ tɩtɩa ŋ sɩ bʋla nɛ jaŋ dii ŋ sarɩya a joŋ cheeriŋ pɩŋ. Ŋ jɩma arɩ mɩ ŋaa nɩtɛrɛ nɛ a kɛŋ nɩaa kɩaa lɩlaa aŋ pɛ kʋkʋŋ kɩalɩŋ mɩ sɩ bɩ duo. 23Bɛɛ nɛ saa tɩɩ ŋ bɩ mɩ moribiiŋ joŋo bil lee-la ba sɩɩ bil moribiee? Mɩ fa sɩ mɩɩra kɔ ŋ-la, mɩ fa jaŋ laa moribie-la arɩ mɩ nyʋʋrʋŋ kala.’ 24Ŋɩɩ nɛ ʋ bʋla pɩ ʋ tɩntɩnnɩ dɔnsʋ-la fa sɩ chɩŋ nɩmɛ, ‘Má laa siidi bʋɩ-la ʋ teeŋ a joŋo pɩ nɩɩ-la sɩ kɛŋ siidi bʋɩ fii-la.’ 25Ŋɩɩ nɛ ba bʋla pʋ, ‘La Tɩɩna, bee na, ʋ paala kɛŋ siidi bʋɩ fii nɛ, aŋ ka ŋŋ chɛ dɩ ŋ joŋ siidi bʋɩ-la a pɛ pʋ ŋɩɩ.’ 26Ŋɩɩ nɛ ʋ bʋla pɩba, ‘Nɩɩ-la sɩ paala kɛŋ kɩaa yʋgɛ, Wɩa jaŋ wasa chɛ pɛ a pʋ, ama nɩɩ-la sɩ bɩ faasa kɛŋ kɩaa yʋgɛ, mʋapɩlɩɩ-la ma ʋ sɩ kɛnɛ, Wɩa jaŋ kaa laa ʋ teeŋ. 27Mɩ dʋndɔŋŋɔɔ deemba saa sɩ bɩ cho dɩ mɩ ŋaa ba kuoro, má kɛmba kaa kɔ daha dɩ mɩ ŋaa ba kpʋba mɩ sɩpaaŋ.’ ”

Yesu jʋʋ Jerusalɛm

Mat. 21.1-11; Maak 11.1-11; Jɔɔŋ 12.12-19

28Yesu sɩ bʋl wɩaa deemba dɛrɛ, ʋ joŋ ʋ wombiiŋ a laa ʋ harɩ-tooroo sɩpaaŋ ba mʋmʋ Jerusalɛm. 29Ba kʋ yi Bɛtɩfagɩ arɩ Bɛtanɩ dɩɩrɩŋ a kʋ yi peel kʋbala baa yɩrɛ Olif. Ŋɩɩ nɛ Yesu lɩɩsɛ ʋ harɩ-tooroo balɩa a tɩmba a bʋla pɩba, 30“Má mʋ taŋ-la sɩ hɛ sɩpaaŋ. Dɩ ma nɛ mʋa, ma jaŋ na kaku-bie dɩ ba vɔbɔ a kɩɩ. Nʋʋ ha bɩ ʋ jɩla. Má mʋ puri a kaa kɔ. 31Dɩ ma nɩɩ puru, dɩ ba pɩɛsɛma a bʋl dɩ bɛɛ nɛ tɩɩ maa puri, má bʋl dɩ La Tɩɩna Yesu nɩɩ chɛ, dɩ ʋ nɛ sɩ dɩ ma puro kaa kɔ.” 32Ŋɩɩ nɛ ba mʋ a na wɩalɩŋ kala Yesu fa sɩ bʋla pɩba. 33Ba sɩɩ puri kaku-bie-la, ʋ tɩɩna pɩɛsɛba, “Bɛɛ nɛ tɩɩ maa puri kaku-bie-la?” 34Ŋɩɩ nɛ ba bʋla pʋ, “La Tɩɩna nɩɩ chɛ.” 35Ŋɩɩ nɛ ba kɛŋ kaku-bie-la a kaa mʋ pɩ Yesu, a wuri ba gɛnnɩŋ a daŋ kaku-bie-la nyuŋ, aŋ kɛŋ Yesu ʋ jɩla hɔŋ. 36Ʋ sɩ jɩl kaku-bie-la aa vɛŋ ŋɩɩ, ba joŋ ba gɛnnɩŋ jɛrɛ wombiiŋ lɛ. 37Ʋ sɩ mʋ kpagɛ Jerusalɛm, lee-la wombiiŋ sɩ lɩɩ Olif peel-la nyuŋ tuu, nɩ-daŋ-la fa sɩ to Yesu harɩŋ suomo jʋjʋɔsɛ a faasa dɩdɛnnɛ Wɩa a tɩŋ ʋ wʋmagɩla-la kala ba sɩ na. 38Ba bʋla,

“Wɩa jaŋ pɛ kuoru-la sɩɩ kɔ La Tɩɩna Wɩa doluŋ lɛ.

Ba jaŋ hɔŋ arɩ yarɩfɩɛlaa Wɩa-jaŋ lɛ. Wɩa yɩrɩŋ ma jaŋ yɩrɛ.”

39Ŋɩɩ nɛ Farisii tɩŋŋaa dɔnsʋŋ fa sɩ hɛ nɩ-daŋ-la tʋɔŋ bʋla pɩ Yesu, “La kʋhɩaŋ, ŋaa dɩ ŋ harɩ-tooro-la kɛŋ goŋ.”

40Ŋɩɩ nɛ Yesu bʋla pɩba, “Mɩ jaŋ bʋla pɩma, dɩ ba nɛ fa bɩ goŋ maa ŋaa, tabɩaa ma tɩtɩa jaŋ ŋaa goŋ.”

Yesu yel Jerusalɛm wɩaa

41Yesu sɩɩ mʋ ŋɩɩ, ʋ kʋ kpagɛ Jerusalɛm a na taŋ-la. Ʋ yel a tɩŋ taŋ-la nɩaa wɩaa aŋ bʋl, 42“Mɩ fa cho dɩ ma taŋ deeŋ nɩaa jɩŋ ŋɩɩ ma sɩ jaŋ ŋaa a hɔŋ arɩ yarɩfɩɛlaa nɛ jɩnɩŋ, ama ma bɩ wuo na. 43Tapʋlɩɩ jaŋ yi dɩ ma dʋndɔŋŋɔɔ saa kɛrɛ gollima, dɩ ma sɩ́ wuo lɩɩ. 44Ba jaŋ kpʋ ma nɩalɩŋ kala sɩ hɛ taŋ-la tʋɔŋ, ma dɩ ma biiriŋ kala. Tabɩɩ-bie ma bɩra bɩ jaŋ daŋ ʋ dɔŋɔ lɛ lee-la. Ma bɩ sɛyɛ bʋa-la lɛ Wɩa sɩ kɔ dɩ ʋ laama ta. Ŋɩɩ nɛ tɩɩ ba jaŋ ŋaa ŋɩɩ.”

Yesu jʋʋ Wɩa dɩa

Mat. 21.12-17; Maak 11.15-19; Jɔɔŋ 2.13-22

45Yesu sɩ mʋ jʋʋ Wɩa dɩa, ʋ suomo kikiri nɩalɩŋ sɩɩ yallɛ kɩaa nɩmɛ 46aŋ bʋla pɩba, “Ba ŋmʋnsɛ Wɩa teniŋ tʋɔŋ a bʋl arɩ Wɩa sɩ, ʋ dɩa jaŋ ŋaa lee-la nɩaa sɩ jaŋ chʋchʋɔlɛ Wɩa, aŋ ka ma mɩɩra kaa bɩrɩmɛ gaarɩ-dɩa.”

47Tapʋlɩɩ-na kala Yesu yie dɩdagɛ nɩaa Wɩa dɩɩ-bal-la tʋɔŋ. Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba arɩ Juu tɩŋŋaa sɩpaalaaraa chɩchɛ dɩ ba kpʋʋ. 48Ama ba bɩ jɩŋ wombii-la ba sɩ jaŋ to, bɛɛ wɩaa nɩalɩŋ kala fa sɩ hɛ nɩmɛ jegile nɩnɩɩ wɩalɩŋ ʋ sɩɩ bʋl nɛ arɩ sɩɩfɩɛsɩŋ.

Currently Selected:

Luuk 19: SIS

Highlight

Copy