Luuk 20

Farisii tɩŋŋaa pɩɛsɛ Yesu ʋ doluŋ wɩaa

Mat. 21.23-27; Maak 11.27-33

1Tapʋlɩɩ kʋbala Yesu dɩdagɛ nɩaa Wɩa dɩɩ-bal-la lɛ a bʋbʋl Wɩa wʋzɔmɔ-la wɩaa. Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba arɩ Juu tɩŋŋaa kʋhɩasɩŋ sii kɔ ʋ teeŋ, 2a pɩɛsʋ, “Dol bɛɛ nɛ ŋ kɛŋ a ŋɩŋaa wɩaa deemba? Kʋbɛɛ nɛ pɩŋ doluŋ ŋ ŋɩŋaa ŋɩɩ?” 3Ŋɩɩ nɛ Yesu bʋla pɩba, “Mɩ ma jaŋ pɩɛsɛma wɩɩ, dɩ ma dagɛmɛ ʋ bʋbʋɔŋ. 4Jɔɔŋ, nɩɩ-la fa sɩɩ fo nɩaa Wɩɩchʋɔlɛ lɩɩŋ, ʋ doluŋ lɩɩ Wɩa teeŋ nɛ koo nuhuobiine teeŋ nɛɛ?” 5Ŋɩɩ nɛ ba suomo kɛŋ wɩɩ-la chʋchɔgɩsɛ ba tɩtɩa lɛ a bʋl, “Wʋbɛɛ nɛ laa chɛ dɩ la bʋl? Dɩ la nɛ bʋla pʋ dɩ Wɩa teeŋ nɛ ʋ lɩɩ, ʋ jaŋ pɩɛsɛla, ‘Bɛɛ nɛ saa tɩɩ ma bɩ ʋ wɩaa laa dii?’ 6Dɩ la nɛ bɩra sɩ nuhuobiine teeŋ nɛ, nɩ-daŋ-la kala sɩ hilimi daha jaŋ yagɛla arɩ tabɩaa, bɛɛ wɩaa ba sɛyɛ arɩ Jɔɔŋ fa ŋaa Wɩa wʋlaabʋllʋ nɛ.” 7Ŋɩɩ nɛ ba bʋla pʋ, “La bɩ jɩŋ ʋ dol-la sɩ lɩɩ lee-la.” 8Yesu ma bʋla pɩba, “Tɔɔ, mɩ ma bɩ jaŋ dagɛma dol-la mɩ sɩ kɛnɛ a ŋɩŋaa wɩaa deemba bʋbʋɔŋ.”

Yesu magɛ namaga a tɩgɛ tɩntɩnnaa sɩ hɛ baga lɛ

Mat. 21.33-46; Maak 12.1-12

9Ŋɩɩ nɛ Yesu magɛ namaga deeŋ a pɩ nɩalɩŋ, “Baal kʋbala nɛ fa hɛ nɩmɛ a bil baga a chɔnsɛ girep tɩɩsɩŋ. Ŋɩɩ nɛ ʋ paa nɩaa hɛ baga-la lɛ dɩ ba bibeŋ, aŋ sii mʋ tintee dɔŋ a dieni nɩmɛ. 10Girep nɛnɛ-la tɔrʋŋ sɩ yie, ʋ tɩŋ ʋ tɩntɩnnaa dɔŋɔ dɩ ʋ mʋ nɩalɩŋ sɩɩ beŋ baga teeŋ a laa tɩɩnɛnɛ-la dɔnsʋŋ kaa kɔ. Ʋ mʋ ba kɛnʋ a ŋmobu aŋ kiru, ʋ mɩɩra kɛŋ na-hɩllɩŋ a kaa mʋ baga tɩɩna teeŋ. 11Ŋɩɩ nɛ ʋ bɩra tɩŋ ʋ tɩntɩnna-la dɔŋɔ ma. Ʋ ma bɩra mʋ. Nɩalɩŋ ŋmoo ʋ ma aŋ hɩɩsʋ aŋ kiru ta, ʋ mɩɩrɛ arɩ nahɩllɩŋ. 12Ŋɩɩ nɛ ʋ bɩra tɩŋ nɩ-tori. Nɩalɩŋ pɩrɛ ʋ ma aŋ kiru ta. 13Ŋɩɩ nɛ baga-la tɩɩna bʋl, ‘Wʋbɛɛ nɛ mɩ jaŋ ŋaa? Mɩ jaŋ tɩŋ mɩ bii-chooluŋ. Ŋ bɩ pɔ, ba jaŋ zilu.’ Ŋɩɩ nɛ ʋ tɩŋ bile ʋ mʋ. 14Nɩalɩŋ sɩɩ beŋ baga sɩ naʋ dɩ ʋʋ kɔ, ŋɩɩ nɛ ba bʋla pɩ dɔŋɔ, ‘Baga-la tɩɩna nanʋala nɛ ŋɩɩ. Dɩ baga-la tɩɩna nɛ sʋba, ʋ nanʋala deeŋ nɛ jaŋ dii ʋ dʋa. Má leŋ dɩ la kpʋʋ, ka dɩ baga-la ŋaa la kʋŋ.’ 15Ba kɛnʋ kaa lɩɩ baga-la tʋɔŋ a kpʋʋ.” Ŋɩɩ nɛ Yesu pɩɛsɛ nɩalɩŋ, “Wʋbɛɛ nɛ ma bɩɩnɛ baga-la tɩɩna jaŋ ŋaaba? 16Ʋ jaŋ kɔ a kpʋ nɩalɩŋ sɩɩ beŋ baga-la kala aŋ joŋ baga-la a pɩ nɩtanɩa.”

Nɩalɩŋ sɩ nɩɩ wɩalɩŋ Yesu sɩ bʋla, ba sɩ, “Wɩɩŋ deeŋ bɩ jaŋ kɔ dɩ ʋ ŋaa.”

17Ŋɩɩ nɛ Yesu bemba aŋ pɩɛsɛba, “Wɩɩŋ deeŋ ba sɩ ŋmʋnsa Wɩa teniŋ tʋɔŋ bʋbʋɔŋ nɛ bɛɛ?

‘Tie-bii-la dɩɩ-saaraa sɩ vɩa ta,

ʋ nɛ jaŋ kʋ ŋaa tie-bii-duoŋ ba sɩ joŋo bil dɩa gentine.’

18Nɩɩ-la kala sɩ tel tie-bii-la nyuŋ, ʋ tɩɩna jaŋ yɛrɛ muno muno. Dɩ tie-bii-la ma nɛ tel nʋʋkala nyuŋ, ʋ jaŋ chʋgʋsɛ tɩɩna.”

Yesu bʋl lampoo timiŋ wɩaa

Mat. 22.15-22; Maak 12.13-17

19Ŋɩɩ nɛ Wɩa teniŋ kerichiba arɩ Wɩɩsʋllɩ sɩpaalaaraa kʋhɩasɩŋ wʋwalɩmɛ dɩ ba kɛŋ Yesu naabʋɔsʋ-la lɛ, bɛɛ wɩaa ba jɩma arɩ ʋ magɛ namaga-la a tɩgɛ ba lɛ nɛ. Ama baa fá nɩalɩŋ sɩ hɛ nɩmɛ nɛ. 20Ŋɩɩ nɛ ba bee chɩchɛ wombii-la ba sɩ jaŋ to a kɛnʋ. Ba joŋ moribiee kpal nɩaa ka dɩ ba fugi arɩ ba ŋaa nɩtɩtɩɩba nɛ, a magɩsɛ Yesu a pɩɛsʋ wɩaa dɩ ba na ʋ jaŋ bʋl wɩɩ chei, dɩ ba wuo to ŋɩɩ lɛ a kɛnʋ a kaa mʋ hɛ ba kuoru-balɩŋ nɩsɩŋ lɛ, dɩ ʋ ŋaaʋ ŋɩɩ kala ʋ sɩ cho. 21Ŋɩɩ nɛ nɩalɩŋ ba sɩ hɛ mʋ Yesu teeŋ, a pɩɛsʋ, “La kʋhɩaŋ, la jɩma wɩalɩŋ kala ŋ sɩɩ bʋl aŋ dɩdagɛ ma, ba ŋaa wʋtɩtɩɩba nɛ. La jɩma arɩ ŋ joŋ nɩaa kala ba ŋaa kʋbala nɛ, ŋŋ dagɛ Wɩa wombii-tɩtɩɩ nɛ. 22Ʋ ŋaa wombii nɛ dɩ la tiŋ lampoo a pɩ Rom tinteeŋ kuoru-balɩŋ ba sɩɩ yɩrɛ Siiza koo ʋ bɩ wombii ŋaa?” 23Ama Yesu jɩŋ wɩɩ-la kala ba sɩ magɩsʋ a chɩchɛ nɛ. Ŋɩɩ nɛ ʋ bʋla pɩba, 24“Má kɛŋ moribii-biiŋ kaa kɔ mɩ bee na. Kʋbɛɛ nyuŋ nɛ hɛ ʋ lɛ? Kʋbɛɛ yɩrɩŋ ma nɛ ba tuuro hɛ moribie-la lɛ?” Ŋɩɩ nɛ ba sɩ, “Siiza yɩrɩŋ nɛ.” 25Ŋɩɩ nɛ Yesu bʋl, “Tɔɔ, má joŋ Rom tinteeŋ kuori-bal-la kɩaa a pʋ, aŋ joŋ Wɩa ma kɩaa pʋ.” 26Ʋ sɩ bʋl ŋɩɩ, ba bɩ wɩɩkala na ba sɩ jaŋ wuo to ŋɩɩ lɛ kɛnʋ nɩalɩŋ sɩ hɛ nɩmɛ sɩpaaŋ. Wɩalɩŋ ʋ sɩ bʋla ŋaaba wʋkpuŋkpere, ba niiŋ kala maa.

Yesu bʋl wɩaa a tɩgɛ nɩalɩŋ sɩ sii sʋʋŋ lɛ

Mat. 22.23-33; Maak 12.18-27

27Ŋɩɩ nɛ Saduusi tɩŋŋaa dɔnsʋŋ ma kɔ Yesu teeŋ. Nɩaa deemba laa dii arɩ nɩalɩŋ sɩ sʋba bɩra bɩ jaŋ sii sʋʋŋ lɛ. Ŋɩɩ nɛ ba pɩɛsʋ, 28“La kʋhɩaŋ, Mosis dagɛla Wɩa teniŋ tʋɔŋ arɩ baal nɛ jaa haala, dɩ haal-la arɩ baal-la nɛ bɩ bii lʋla, aŋ ka dɩ baal-la sʋʋ, dɩ ʋ ŋaana jaa yo-haal-la a lʋl biiriŋ pɩ ʋ malɩma sɩ sʋba, dɩ biiri-la chɩŋ ʋ nyuŋ lɛ. 29Naambiiriŋ balɩpɛ nɛ fa hɛ nɩmɛ bʋa kʋbala lɛ. Ba kʋhɩaŋ jaa haala. Ʋ dɩ haal-la bɩ bii lʋla, aŋ ka ʋ sʋʋ. 30Lɩamɩŋ tɩɩna joŋ haal-la jaa. Ʋ dɩ ʋ ma bɩ bii lʋla, aŋ ka ʋ ma sʋʋ. 31Torimuŋ tɩɩna ma joŋ haal-la jaa. Ʋ ma ŋɩɩ tɩtɩa nɛ. Ŋɩɩ nɛ naambiiri-la balɩpɛ kala jaa haal-la. Ba kala sʋʋ aŋ bɩ bii lʋla. 32Ʋ ŋɩɩ harɩŋ haal-la ma sʋʋ. 33Tapʋlɩɩ-la nɩaa sɩ jaŋ sii sʋʋŋ lɛ, baalaa deemba balɩpɛ tʋɔŋ kʋbɛɛ nɛ jaŋ tɩɩ haal-la? Ba kala balɩpɛ nɛ jaaʋ.”

34Ŋɩɩ nɛ Yesu bʋla pɩba, “Baala-la arɩ haala-la sɩ hɛ ba mɩɩsɩŋ lɛ lɛɛlɛ, ba nɩɩ jaa dɔŋɔ. 35Ama bʋa-la lɛ baala-la arɩ haala-la sɩ jaŋ sii sʋʋŋ lɛ a kɛŋ mɩɩsɩ-la sɩ bɩ dɛrɛ, ba bɩra bɩ jaŋ jaa dɔŋɔ. 36Ba jaŋ nagɛ Wɩa tɩndaaraa a bɩra bɩ jaŋ sʋʋ. Wɩa sɩ chɩsɛba sʋʋŋ lɛ ŋɩɩ, ba jaŋ ŋaa Wɩa biiriŋ. 37Mosis fa paala chaasa dagɛ arɩ ba jaŋ chɩsɛ nɩalɩŋ sɩ sʋba sʋʋŋ lɛ dɩ ba wei. Ʋ fa bʋl Wɩa teniŋ sɛmɛ dɔŋɔ arɩ La Tɩɩna Wɩa nɛ ŋaa Abɩraham Wɩa arɩ Aɩzɩk Wɩa arɩ Jekɔb ma Wɩa. Lee-la ʋ fa sɩ bʋl wɩaa a tɩgɛ tɩɩ-bie-la sɩɩ dii nyiniŋ lɛ nɛ, ʋ fa bʋl ŋɩɩ. 38Ʋ ŋaa nɩweyee Wɩa nɛ. Ʋ bɩ nɩsʋʋnʋŋ Wɩa ŋaa, ʋ-na teeŋ nʋʋkala weye nɛ.” 39Ŋɩɩ nɛ Wɩa teniŋ kerichiba dɔnsʋŋ bʋla pʋ, “La kʋhɩaŋ, ŋ bʋl woruŋ nɛ.” 40Ba bɩra bɩ wɩɩkala kɛnɛ dɩ ba pɩɛsɛ.

Ba pɩɛsɛ Kirisito wɩaa

Mat. 22.41-46; Maak 12.35-37

41Ŋɩɩ nɛ Yesu pɩɛsɛba, “Ɛɛ nɛ ba jaŋ wuo bʋl arɩ Kirisito, Nɩɩ-la Wɩa sɩ lɩɩsa, jaŋ ŋaa Devit nihi-lɩɛrɛ dʋndʋŋa? 42Devit tɩtɩa bʋla Wɩa teniŋ sɛmɛ dɔŋɔ ba sɩɩ yɩrɛ Wɩa yɩɩlaa lɛ,

‘Mɩ Tɩɩna Wɩa bʋla pɩ mɩ Tɩɩna,

hɔŋ mɩ nadiiŋ, nɩduoŋ dɩhɔnʋŋ,

43see dɩ mɩ yuo dii ŋ dʋndɔŋŋɔɔ kala dɛrɛ.’

44Devit tɩtɩa yɩrɛ nɩa deeŋ ʋ Tɩɩna. Ɛɛ nɛ saa ʋ jaŋ wuo ŋaa Devit nihi-lɩɛrɛ dʋndʋŋa?”

Yesu bʋl Wɩa teniŋ kerichiba wɩaa

Mat. 23.1-36; Maak 12.38-40

45Ŋɩɩ nɛ Yesu bʋla pɩ ʋ harɩ-tooroo nɩalɩŋ kala sɩpaaŋ, 46“Má kɛŋ ma tɩtɩa woruŋ Wɩa teniŋ kerichiba lɛ. Ba yie gʋgɔllɛ yɔbɔ lɛ arɩ ba gɛrɩ-duduosuŋ, a cho dɩ nɩaa zizilba a chʋchʋɔlɛba. Ba yie chɩchɛ dɩ-hɔŋ zɔŋŋɔɔ Wɩɩchʋɔlɛ dɩɩsɩŋ lɛ. Dɩ ba nɛ yɩrɛba dɩ ba kʋ dii kɩaa, ba cho dɩ ba hɔŋ nɩbalaa dɩ-hɔnɔɔ. 47Ba yie kɛŋ yo-haalaa kɩaa kaa laa didii aŋ fugo chʋɔlɛ Wɩa didieni. Bʋa-la lɛ Wɩa sɩ jaŋ dii ba sarɩya, ba nɛ jaŋ na hɛɛŋ a kɩɩ ba dɔnsʋŋ tɩŋŋaa kala.”

Currently Selected:

Luuk 20: SIS

Highlight

Copy