Luuk 3

Jɔɔŋ, Wɩa lɩɩ-fooru-la bʋl Wɩa wɩaa

Mat. 3.1-12; Maak 1.1-8; Jɔɔŋ 1.19-28

1-2Ŋɩɩ nɛ Wɩa ta Zɛkarɩya bie Jɔɔŋ dɩ ʋ mʋ bʋl Wɩa wɩaa pɩ nɩaa tintee-hɩlɩŋ tʋɔŋ. Ʋ sɩ suomo ŋɩɩ, Rom tinteeŋ kuoru-balɩŋ Tabiiras sɩ dii kuoruŋ ʋ jɩsɩŋ fii arɩ banɔŋ nɛ ŋɩɩ. Pɔntɩɔs Paalɩt ma fa chɩŋ kuoru-balɩŋ nyuŋ Judiya tinteeŋ lɛ. Hɛrɔd ma fa bibeŋ Galilii tinteeŋ. Ʋ naambie Fɩlɩp ma fa bibeŋ Ituriya arɩ Takɔnaatɩs tinteeŋ. Baal-la ba sɩɩ yɩrɛ Lasiinias ma nɩɩ beŋ Abiliini tinteeŋ. Anas arɩ Kayafas ma nɛ fa ŋaa Wɩɩsʋllɩ sɩpaalaaraa kʋhɩasɩŋ Jerusalɛm lɛ. 3Ŋɩɩ nɛ Jɔɔŋ gɔllɛ Jɔdaŋ fuo-la kala nyuŋ a bʋl Wɩa wɩaa pɩpɩ nɩaa a bʋl, “Má bɩrɩma lɩɩ ma wʋbɔŋŋɔɔ lɛ, ka dɩ mɩ foma Wɩɩchʋɔlɛ lɩɩŋ, dɩ Wɩa joŋ ma wʋbɔŋŋɔɔ chɛma.”

4Wɩa wʋlaabʋlla Azaaya fa ŋmʋnsɛ ŋɩɩ nɛ Wɩa teniŋ sɛmɛ dɔŋɔ. Wɩalɩŋ ʋ fa sɩ ŋmʋnsa nɛ ŋ-la:

“Nʋʋ nɛ chɩŋ tintee-hɩlɩŋ lɛ a heelee bʋl,

‘Má wasɛ wombiiŋ bil La Tɩɩna lɛ.

Má pori wombii-la dɩ ʋ tʋʋlɛ.

5Má dɩŋ fuonaa na-kala.

Má keri peelee arɩ dundolluŋ

a kaa jɛrɛ dɩ ba magɛ dɔŋɔ,

wombii-la sɩ golibo, má kaa tʋʋlɛ.

Wombii-la sɩ ŋaa nyʋra nyʋra, má leŋ dɩ ʋ ŋaa mʋla mʋla.

6Dɩ ma ŋaa ŋɩɩ, dʋnɩa nɩaa kala jaŋ na ŋɩɩ Wɩa sɩ laa nɩaa tɩta.’ ”

7Ŋɩɩ nɛ nɩaa yʋgɛ a kɔ Jɔɔŋ teeŋ dɩ ʋ foba Wɩɩchʋɔlɛ lɩɩŋ. Ʋ bʋla pɩba, “Ma nɩaa deemba wʋŋaalaa nagɛ dɩŋŋaa nɛ. Ma bɩɩna ma jaŋ wuo fá lɛl chɛɛ-la Wɩa sɩ jaŋ dii nʋʋkala sarɩyaa? 8Máa ŋaa wɩalɩŋ sɩ jaŋ dagɛ arɩ ma bɩrɩma lɩɩ ma wʋbɔŋŋɔɔ lɛ nɛ, aŋ sɩ́ bɩɩna bʋl Abɩraham sɩ ŋaa ma naabalɩma ŋɩɩ, Wɩa bɩ jaŋ dɔgɩsɛma. Mɩ jaŋ bʋla pɩma arɩ Wɩa paala jaŋ wuo ŋaa dɩ tabɩaa deemba ma sɩ na bɩrɩmɛ Abɩraham doho nɩaa. 9Na, ba kɛŋ saaŋ jee nɛ a ŋaa siri dɩ ba keri tɩɩsɩŋ lo. Tɩa-la kala sɩ bɩ nɛŋ-zɔŋŋɔɔ ka nɛŋ, ba jaŋ keru lo a joŋo hɛ nyiniŋ lɛ.”

10Nɩalɩŋ dɔnsʋŋ sɩ nɩɩ wɩalɩŋ ʋ sɩ bʋla pɩɛsʋ, “Bɛɛ nɛ la saa jaŋ ŋaa?” 11Ʋ bʋla pɩba, “Dɩ ŋ kɛŋ gɛnnɩŋ balɩa, ʋ maga dɩ ŋ joŋ dɔŋɔ a pɩ nɩɩ-la sɩ bɩ kʋŋ kɛnɛ. Nɩɩ-la sɩ kɛŋ kʋdiilee ma, ʋ maga dɩ ŋ ŋaa kpaa nɩalɩŋ sɩ bɩ kʋdiilee kɛnɛ nɛ.”

12Ŋɩɩ nɛ lampoo lɩlaaraa dɔnsʋŋ ma kɔ dɩ ʋ foba Wɩɩchʋɔlɛ lɩɩŋ a pɩɛsʋ, “La kʋhɩaŋ, bɛɛ nɛ la ma jaŋ ŋaa?” 13Ʋ bʋla pɩba, “Má sɩ́ moribiee laa kɩɩ ŋɩɩ ba sɩ daga dɩ maa laa.” 14Laalɩyuoroo dɔnsʋŋ ma pɩɛsʋ, “Ka la ma, bɛɛ nɛ la ma jaŋ ŋaa?” Ʋ bʋla pɩba, “Má sɩ́ nʋʋkala moribiee kaa laa arɩ doluŋ, má sɩ́ wʋnyɩɛrɩŋ nyɩɛ a laa moribiee. Má leŋ dɩ ma tʋɔŋ tɔrɛ arɩ time-la ma sɩɩ laa.”

15Nɩalɩŋ fa sɩ gbɛrɛ Kirisito dɩ ʋ kɔ, ba bɩɩna arɩ ʋ nɛ ŋɩɩ. 16Ŋɩɩ nɛ Jɔɔŋ bʋla pɩba, “Mɩ dee. Lɩɩŋ dʋndʋŋa nɛ mɩ-na kaa foma. Ama nɩɩ-la sɩ jaŋ kɔ, ʋ nɛ jaŋ faasa kɛŋ doluŋ kɩɩmɛ. Mɩ paala bɩ maga dɩ mɩ kpagʋ a kɛŋ ʋ nɛntɛŋŋɛɛ ŋmɛsɩŋ ma kaa puri. Ʋ nɛ jaŋ joŋ Wɩa Dɩŋ-zɔmʋŋ hɛ ma dɔnsʋŋ lɛ aŋ joŋ nyiniŋ ma hɛ dɔnsʋŋ ma lɛ. 17Ʋ jaŋ kori ʋ mɩɩ-chaarɩ gbaŋa. Dɩ ʋ nɛ ŋmoo ʋ mɩaa kala dɛrɛ, ʋ jaŋ kɛŋ gbaŋa-la a kaa chaarɛ a lɩɩsɛ mɩɩ-biiŋ a hɛ ʋ vire lɛ aŋ joŋ jɔrʋŋ a hɛ nyiniŋ lɛ. Nyiŋ-la bɩ jaŋ dɩsɛ.” 18Jɔɔŋ to wombiee yʋgɛ nɛ a bʋl Wɩa wʋzɔmɔ-la a pɩ nɩaa a chagɩlɛba.

19Ama Jɔɔŋ bʋl wɩaa jʋʋ kuoru-balɩŋ Hɛrɔd lɛ. Ʋ fa jaa ʋ naambie Fɩlɩp haala nɛ baa yɩrɛ Hɛrɔdɩas. Jɔɔŋ bʋla pʋ dɩ ʋ bɩ maga dɩ ʋ jaa ʋ naambie haala. Wʋbɔŋŋɔɔ dɔnsʋŋ yʋga Hɛrɔd fa ŋaa. 20Ŋɩɩ nɛ ʋ paala wasa ŋaa wʋbɔŋŋɔɔ a pɛ bumbuŋ wʋbɔmɔ-la lɛ a kɛŋ Jɔɔŋ tɔ dɩa.

Jɔɔŋ fo Yesu Wɩɩchʋɔlɛ lɩɩŋ

Mat. 3.13-17; Maak 1.9-11

21Bʋa-la lɛ Jɔɔŋ sɩɩ fo nɩaa kala Wɩɩchʋɔlɛ lɩɩŋ, ʋ fo Yesu ma Wɩɩchʋɔlɛ lɩɩŋ nɛ. Ʋ sɩ fou dɛrɛ, ʋ chʋchʋɔlɛ Wɩa, ŋɩɩ nɛ wɩa-nyuŋ kpaa balɩa, 22Wɩa Dɩŋ-zɔmʋŋ kʋ tuu a nagɛ kokomo a togili ʋ lɛ. Ʋ nɩɩ yikoro dɩ ʋ lɩɩ wɩa-nyuŋ a bʋla pʋ, “Ŋ nɛ mɩ Bii-chooluŋ. Mɩ tʋɔŋ tɔrɛ ŋ nyuŋ.”

Yesu doho nɩaa

Mat. 1.1-17

23Yesu fa sɩ suomo a tɩtɩŋ ʋ tɩntɩŋŋaa, ʋ fa yi jɩsɩŋ mara arɩ fii nɛ. Ʋ doho nɩaa nɛ ŋ-la: Josɛf nɛ fa ŋaa ʋ nyɩmma. Ʋ nɛ nɩaa fa bɩɩnɛ arɩ ʋ nɛ lʋl Yesu. Josɛf nyɩmma yɩrɩŋ nɛ fa Hɛlɩ. 24Hɛlɩ nyɩmma ma yɩrɩŋ nɛ fa Matat. Matat ma nyɩmma yɩrɩŋ nɛ fa Levi. Levi ma nyɩmma yɩrɩŋ nɛ fa Mɛlɩkɩ. Mɛlɩkɩ nyɩmma ma yɩrɩŋ nɛ fa Jana. Jana nyɩmma ma yɩrɩŋ nɛ fa Josɛf. 25Josɛf nyɩmma ma yɩrɩŋ nɛ fa Matatayas. Matatayas nyɩmma ma yɩrɩŋ nɛ fa Ɛmɔs. Ɛmɔs nyɩmma ma yɩrɩŋ nɛ fa Nahum. Nahum nyɩmma ma yɩrɩŋ nɛ fa Ɛzɩlɩ. Ɛzɩlɩ nyɩmma ma yɩrɩŋ nɛ fa Nagaɩ. 26Nagaɩ nyɩmma ma yɩrɩŋ nɛ fa Maaf. Maaf nyɩmma ma yɩrɩŋ nɛ fa Matatayas. Matatayas nyɩmma ma yɩrɩŋ nɛ fa Semeŋ. Semeŋ nyɩmma ma yɩrɩŋ nɛ fa Josɛk. Josɛk nyɩmma ma yɩrɩŋ nɛ fa Joda. 27Joda nyɩmma ma yɩrɩŋ nɛ fa Jʋanaŋ. Jʋanaŋ nyɩmma ma yɩrɩŋ nɛ fa Rɩɩsa. Rɩɩsa nyɩmma ma yɩrɩŋ nɛ fa Zerubabɛl. Zerubabɛl nyɩmma ma yɩrɩŋ nɛ fa Sɩalɩtɩɛl. Sɩalɩtɩɛl nyɩmma ma yɩrɩŋ nɛ fa Nɛɛrɩ. 28Nɛɛrɩ nyɩmma ma yɩrɩŋ nɛ fa Mɛlɩkɩ. Mɛlɩkɩ nyɩmma ma yɩrɩŋ nɛ fa Adɩ. Adɩ nyɩmma ma yɩrɩŋ nɛ fa Kosam. Kosam nyɩmma ma yɩrɩŋ nɛ fa Ɛlɩmadam. Ɛlɩmadam nyɩmma ma yɩrɩŋ nɛ fa Ɛɛ. 29Ɛɛ nyɩmma ma yɩrɩŋ nɛ fa Josua. Josua nyɩmma ma yɩrɩŋ nɛ fa Elieza. Elieza nyɩmma ma yɩrɩŋ nɛ fa Jorim. Jorim nyɩmma ma yɩrɩŋ nɛ fa Matat. Matat nyɩmma ma yɩrɩŋ nɛ fa Levi. 30Levi nyɩmma ma yɩrɩŋ nɛ fa Simioŋ. Simioŋ nyɩmma ma yɩrɩŋ nɛ fa Juda. Juda nyɩmma ma yɩrɩŋ nɛ fa Josɛf. Josɛf nyɩmma ma yɩrɩŋ nɛ fa Jonam. Jonam nyɩmma ma yɩrɩŋ nɛ fa Ɛlɩakɩm. 31Ɛlɩakɩm nyɩmma ma yɩrɩŋ nɛ fa Mɛlɩya. Mɛlɩya nyɩmma ma yɩrɩŋ nɛ fa Mɛna. Mɛna nyɩmma ma yɩrɩŋ nɛ fa Mataata. Mataata nyɩmma ma yɩrɩŋ nɛ fa Netaŋ. Netaŋ nyɩmma ma yɩrɩŋ nɛ fa Devit. 32Devit nyɩmma ma yɩrɩŋ nɛ fa Jesi. Jesi nyɩmma ma yɩrɩŋ nɛ fa Ɔbɛd. Ɔbɛd nyɩmma ma yɩrɩŋ nɛ fa Bʋas. Bʋas nyɩmma ma yɩrɩŋ nɛ fa Salɩmɔŋ. Salɩmɔŋ nyɩmma ma yɩrɩŋ nɛ fa Nasɔŋ. 33Nasɔŋ nyɩmma ma yɩrɩŋ nɛ fa Amɩnadab. Amɩnadab nyɩmma ma yɩrɩŋ nɛ fa Adɩmɩŋ. Adɩmɩŋ nyɩmma ma yɩrɩŋ nɛ fa Aanɩ. Aanɩ nyɩmma ma yɩrɩŋ nɛ fa Hɛzɩrɔŋ. Hɛzɩrɔŋ nyɩmma ma yɩrɩŋ nɛ fa Pɛrɛs. Pɛrɛs nyɩmma ma yɩrɩŋ nɛ fa Juda. 34Juda nyɩmma ma yɩrɩŋ nɛ fa Jekɔb. Jekɔb nyɩmma ma yɩrɩŋ nɛ fa Aɩzɩk. Aɩzɩk nyɩmma ma yɩrɩŋ nɛ fa Abɩraham. Abɩraham nyɩmma ma yɩrɩŋ nɛ fa Tɛra. Tɛra nyɩmma ma yɩrɩŋ nɛ fa Nahɔ. 35Nahɔ nyɩmma ma yɩrɩŋ nɛ fa Sɛrʋg. Sɛrʋg nyɩmma ma yɩrɩŋ nɛ fa Riu. Riu nyɩmma ma yɩrɩŋ nɛ fa Pɛlɛg. Pɛlɛg nyɩmma ma yɩrɩŋ nɛ fa Ɛba. Ɛba nyɩmma ma yɩrɩŋ nɛ fa Sɛla. 36Sɛla nyɩmma ma yɩrɩŋ nɛ fa Kɛnaŋ. Kɛnaŋ nyɩmma ma yɩrɩŋ nɛ fa Afaza. Afaza nyɩmma ma yɩrɩŋ nɛ fa Sɛm. Sɛm nyɩmma ma yɩrɩŋ nɛ fa Nowa. Nowa nyɩmma ma yɩrɩŋ nɛ fa Lamɛk. 37Lamɛk nyɩmma ma yɩrɩŋ nɛ fa Mɛtʋsɛla. Mɛtʋsɛla nyɩmma ma yɩrɩŋ nɛ fa Ɛnɔk. Ɛnɔk nyɩmma ma yɩrɩŋ nɛ fa Jarɩd. Jarɩd nyɩmma ma yɩrɩŋ nɛ fa Mahalalɛl. Mahalalɛl nyɩmma ma yɩrɩŋ nɛ fa Kɛnaŋ. 38Kɛnaŋ nyɩmma ma yɩrɩŋ nɛ fa Ɛnɔs. Ɛnɔs nyɩmma ma yɩrɩŋ nɛ fa Sɛf. Sɛf nyɩmma ma yɩrɩŋ nɛ fa Adam. Wɩa nɛ ta Adam.

Currently Selected:

Luuk 3: SIS

Highlight

Copy