Luuk 4

Sɩtaanɩ kʋ magɩsɛ Yesu

Mat. 4.1-11; Maak 1.12-13

1Ŋɩɩ nɛ Yesu mɩɩra lɩɩ Jɔdaŋ fuo-la tʋɔŋ kʋ lɩɩ dɩ Wɩa Dɩŋ-zɔmʋŋ hɛ ʋ lɛ woruŋ. Ŋɩɩ nɛ ʋ kɛnʋ kaa jʋʋ tintee-hɩlɩŋ tʋɔŋ tapʋlaa mahɩŋ balɩa, Sɩtaanɩ yie kɔ a mɩmagɩsʋ. 2Tapʋlaa mahɩŋ balɩa deemba kala pɛgɛ ʋ bɩ kʋŋkala die. Ŋɩɩ nɛ losuŋ kɛnʋ. 3Sɩtaanɩ kʋ bʋla pʋ, “Dɩ ŋ nɛ ŋaa Wɩa Bie, leŋ dɩ tabɩɩŋ deeŋ ŋ sɩ na bɩrɩmɛ kʋdiilee.” 4Ŋɩɩ nɛ Yesu bʋla pʋ, “Ba ŋmʋnsɛ Wɩa teniŋ tʋɔŋ a bʋl,

‘Kʋdiilee dʋndʋŋa dee bɩ nuhuobiine mɩɩsɩŋ ka pa.’ ”

5Ŋɩɩ harɩŋ Sɩtaanɩ bɩra kɛnʋ kaa jɩla dagɛ dʋnɩa kuoruŋ fine 6aŋ bʋl, “Kuoruŋ deeŋ kala ŋaa mɩ kʋa nɛ. Mɩ jaŋ ŋaa dɩ ŋ kɛŋ ba kala doluŋ a tɩɩ ba kala a nɩɩ ba sɩma. Mɩ nɛ jaŋ wuo joŋo pɩ nʋʋkala mɩ sɩɩ chɛ. 7Dɩ ŋ nɛ tuu kpirimi mɩ sɩpaaŋ a chʋɔlɛmɛ, kɩaa deemba kala jaŋ ŋaa ŋ kɩaa.” 8Ŋɩɩ nɛ Yesu bɩra bʋla pʋ, “Ba ŋmʋnsɛ Wɩa teniŋ tʋɔŋ,

‘Má chʋchʋɔlɛ La Tɩɩna Wɩa dʋndʋŋa nɛ

a tutou.’ ”

9Sɩtaanɩ kɛnʋ kaa mʋ Jerusalɛm a kɛnʋ jɩl Wɩa dɩɩ-balɩŋ nyu-gbaŋa aŋ bʋla pʋ, “Dɩ ŋ nɛ ŋaa Wɩa Bie, joŋ ŋ tɩtɩa yuo daha a tuu chigisi tinteeŋ. 10Ba ŋmʋnsɛ Wɩa teniŋ tʋɔŋ a bʋl,

‘Wɩa jaŋ leŋ dɩ ʋ tɩndaaraa kʋ cheme kɛnɩŋ, 11dɩ ŋ sɩ́ ŋ naaŋ joŋo ŋmoo tabɩɩŋ.’ ”

12Ŋɩɩ nɛ Yesu bʋla pʋ, “Ba ŋmʋnsɛ Wɩa teniŋ tʋɔŋ a bʋl, ‘Má sɩ́ ma Tɩɩna Wɩa magɩsʋ.’ ”

13Sɩtaanɩ sɩ magɩsɛ Yesu ŋɩɩ a dɛrɛ, ʋ leŋu, ka dɩ ʋ bɩra ŋaa tapʋlɩɩ dɔŋ.

Yesu suomi ʋ tɩntɩŋŋaa Galilii tinteeŋ lɛ

Mat. 4.12-17; Maak 1.14-15

14Ŋɩɩ nɛ Yesu lɩɩ tintee-hɩlɩɩ-la tʋɔŋ Wɩa Dɩŋ-zɔmʋŋ doluŋ lɛ a mʋ Galilii tinteeŋ. Ʋ wɩaa teeli Galilii tinteeŋ kala. 15Ŋɩɩ nɛ ʋ dagɛ nɩaa Wɩɩchʋɔlɛ dɩɩsɩŋ lɛ. Ba kala bɩbɛsɛ ʋ lɛ.

Ba vɩa Yesu Nazarɛt lɛ

Mat. 13.53-58; Maak 6.1-6

16-17Ŋɩɩ nɛ Yesu mʋ Nazarɛt, lee-la ba sɩ lʋlʋ. Chɛ-wiesii-la chɛɛŋ ʋ mʋ jʋʋ Wɩɩchʋɔlɛ dɩa arɩ ʋ sɩ vɛnɛɛ ŋaa ŋɩɩ. Ŋɩɩ nɛ ʋ sii dɩ ʋ karɩmɛ Wɩa teniŋ a pɩ nɩaa. Ba joŋ Wɩa teniŋ sɛmɛ dɔŋɔ pʋ, teŋ-la Wɩa wʋlaabʋlla Azaaya sɩ ŋmʋnsa lɛ. Ʋ suri a na lee-la ba sɩ ŋmʋnsɛ ŋ-la a karɩmɛ,

18“Wɩa Dɩŋ-zɔmʋŋ hɛ mɩ lɛ nɛ.

Ʋ nɛ lɩɩsɛmɛ dɩ mɩ bʋl Wɩa wʋzɔmɔ-la a pɩ summoo.

Ʋ tɩmmɛ nɛ dɩ mɩ heele bʋla pɩ nɩalɩŋ ba sɩ yuo kɛsɛ arɩ ba jaŋ jomba ta,

a bɩra bʋla pɩ nyʋlɩmaa dɩ ba sɩaa jaŋ suri.

Ʋ bɩra tɩmmɛ dɩ mɩ laa nɩaa ba sɩ nyaga bil a ta,

19ʋ sɩ mɩ heele arɩ jɩna jaŋ yi

dɩ La Tɩɩna Wɩa laa ʋ nɩaa ta.”

20Yesu sɩ karɩmɛ teŋ-la dɛrɛ, ʋ kaa tɔ aŋ joŋo pɩ nɩɩ-la sɩɩ bil teŋ-la aŋ tuu hɔŋ. Nɩalɩŋ kala sɩ hɛ Wɩɩchʋɔlɛ dɩa-la lɛ chaarɛ sɩaa a pɛ ʋ lɛ. 21Ŋɩɩ nɛ Yesu bʋla pɩba, “Teŋ-la mɩ sɩ karɩma pɩma, jɩnɩŋ ʋ sɛnɛ kʋ ŋaa wʋtɩtɩɩ nɛ.” 22Ŋɩɩ nɛ nɩaa kala tʋɔŋ tɔrɛ ʋ nyuŋ. Wʋzɔmɔ-la kala ʋ sɩ bʋla pɩba ŋaaba wʋkpuŋkpere. Ba pɩpɩɛsɛ dɔŋɔ, “Josɛf bile dee ŋ-laa?” 23Ŋɩɩ nɛ Yesu bɩra bʋla pɩba, “Mɩ laa dii arɩ ma jaŋ magɛ namaga a pɩmɛ. Ʋ nɛ ŋ-la: ‘Daalusuŋ tɩɩna, mʋ vaarɛ ŋ tɩtɩa.’ Ma jaŋ bɩra bʋla pɩmɛ a bʋl dɩ wɩalɩŋ kala mɩ sɩ ŋaa Kapɛnam lɛ, dɩ mɩ ŋaaba mɩ tɩtɩa jaŋ ma lɛ.” 24Ŋɩɩ nɛ Yesu bɩra bʋl, “Wʋtɩtɩɩ, mɩ bʋlaa pɩma arɩ Wɩa wʋlaabʋlla nɛ kɔ ʋ tɩtɩa jaŋ, ʋ nɩaa bɩ ʋ cho.” 25Ŋɩɩ nɛ Yesu bɩra bʋl, “Má jegili, wʋtɩtɩɩ nɛ mɩ bʋlaa pɩma. Ɩlaaja fa sɩ hɛ ʋ mɩɩsɩŋ lɛ, duonuŋ bɩ nɩa jɩsɩŋ batori arɩ kpaa magɛ dɔŋɔ. Ɩlaaja fa ŋaa Wɩa wʋlaabʋllʋ nɛ. Losuŋ jʋʋ Iziral tinteeŋ woruŋ. Bʋa-la lɛ yo-haalaa yʋga a fa hɛ nɩmɛ. 26Ama Wɩa bɩ leŋe Ɩlaaja mʋ pɛ Juu tɩŋŋaa yo-haalaa kʋŋkala lɛ. Ʋ tɩmʋ ʋ mʋ pɛ yo-haal kʋbala dʋndʋŋ lɛ nɛ a lɩɩ Sɩdɔŋ tinteeŋ taŋ kʋbala baa yɩrɛ Zarɛfaf. 27Bʋa-la lɛ Ɩlaasa ma fa sɩ hɛ ʋ mɩɩsɩŋ lɛ, gbegisiŋ ma yʋga nɛ a hɛ Iziral tinteeŋ lɛ, ama Wɩa bɩ leŋe Ɩlaasa vaarɛ ba kʋŋkala see baal kʋbala baa yɩrɛ Neemaŋ. Ʋ lɩɩ Siiria tinteeŋ nɛ.”

28Nɩalɩŋ kala fa sɩ hɛ Wɩɩchʋɔlɛ dɩa-la lɛ a nɩɩ wɩɩŋ deeŋ, ba baanɩŋ sii ʋ nyuŋ. 29Ba sii a kɛŋ Yesu lɛrɛ lɩɩ ba taŋ tʋɔŋ a kɛnʋ kaa jɩl dundolo-la nyuŋ ba fa sɩ saa ba jaŋ. Ba kɛnʋ kaa jɩl dundolo-la nyuŋ dɩ-bolii aa chɛ dɩ ba joŋu yuo ta dɩ ʋ tuu tel tinteeŋ. 30Ka ʋ to nɩalɩŋ tʋɔŋ a lɩɩ viiri.

Jɩŋ-bɔmʋŋ kɛŋ baala

Maak 1.21-28

31Ŋɩɩ nɛ Yesu lɩɩ Nazarɛt lɛ a mʋ Kapɛnam sɩ hɛ Galilii tinteeŋ. Chɛ-wiesii-la chɛɛŋ ʋ mʋ jʋʋ Wɩɩchʋɔlɛ dɩa a dɩdagɛ nɩaa. 32Ʋ sɩɩ dagɛba ŋɩɩ, ʋ ŋaaba wʋkpuŋkpere, bɛɛ wɩaa ʋʋ bʋl wɩaa arɩ doluŋ nɛ. 33Dɩ baal kʋbala nɛ fa hɛ Wɩɩchʋɔlɛ dɩa-la lɛ. Jɩŋ-bɔmʋŋ nɛ fa kɛnʋ. Ŋɩɩ nɛ ʋ faasa chɩɩrɛ 34a bʋl, “Yesu ŋ sɩ lɩɩ Nazarɛt, bɛɛ kʋŋ nɛ ŋ chɛ ŋ ŋaala lɛ? Ŋ kɔ dɩ ŋ kpʋla nɛɛ? Mɩ jɩmɩŋ nɛ. Ŋ ŋaa Wɩa tʋɔpʋl Tɩɩna nɛ.” 35Yesu sɩ nɩɩ wɩalɩŋ baal-la sɩ bʋla, ʋ kpɩa jɩŋ-bɔŋ-la lɛ, “Kɛŋ goŋ aŋ kʋ lɩɩ baal-la lɛ.” Jɩŋ-bɔŋ-la ŋaa baal-la tel ba kala sɩpaaŋ aŋ lɩɩ baal-la lɛ, a bɩ ʋ pɩra. 36Ba sɩ na ŋɩɩ, ʋ ŋaa nʋʋkala wʋkpuŋkpere. Ŋɩɩ nɛ ba pɩpɩɛsɛ dɔŋɔ, “Ɛɛ nɛ ʋ wuo bʋl ŋ-la? Baala deeŋ kɛŋ doluŋ a wuo jɩŋ-bɔŋŋɔɔ, a bʋl wɩaa pɩba ba lɩɩ nɩaa lɛ.” 37Ŋɩɩ nɛ Yesu wɩaa teeli lee-la kala.

Yesu vaarɛ nɩaa yʋgɛ

Mat. 8.14-17; Maak 1.29-34

38Ŋɩɩ nɛ Yesu lɩɩ Wɩɩchʋɔlɛ dɩa-la lɛ a mʋ baal kʋbala baa yɩrɛ Saamɔŋ dɩa. Ʋ mʋa dɩ Saamɔŋ hɩɩlɩ-haala pɩna aa wɩɩlɛ. Ʋ yaraa kala lɩŋ. Ba sɩ bʋl ʋ wɩaa pʋ, 39Yesu mʋ chɩŋ ʋ sɛmɛ aŋ kpɩa nyanyalɩɩ-la lɛ dɩ ʋ leŋu. Nyanyalɩɩ-la leŋ haal-la, ʋ guu sii a ŋaa kʋdiilee pɩba.

40Dɩ nɩaa dɔnsʋŋ ma nɛ ŋɩɩ, ba nandɔnsʋŋ wʋwɩɩlɛ. Nyanyal doho kala nɛ kɛmba. Wɩa sɩ jʋa, ba kɛmba kaa kɔ Yesu teeŋ. Ʋ joŋ ʋ nɩsaa a daŋ ba kʋŋkala lɛ, ba duori. 41Jɩŋ-bɔŋŋɔɔ ma lɩɩ nɩaa lɛ a yʋgɛ aa chɩɩrɛ, a bʋla pɩ Yesu, “Ŋ nɛ ŋaa Wɩa Bie.” Ŋɩɩ nɛ Yesu kpɩa ba lɛ dɩ ba sɩ́ ʋ wɩaa bʋl, bɛɛ wɩaa ba jɩma arɩ ʋ nɛ ŋaa Kirisito.

Yesu bʋl Wɩa wɩaa Judiya tinteeŋ lɛ

Maak 1.35-39

42Sɩɩpʋʋraa Yesu lɩɩ taŋ-la lɛ a mʋ lee-la nɩaa sɩ tuo nɩmɛ. Ŋɩɩ nɛ nɩaa suomo chɩchɛʋ. Ba sɩ mʋ naʋ, ba wʋwalɩmɛ dɩ ba kɛnʋ bil dɩ ʋ sɩ́ viiru. 43Ŋɩɩ nɛ Yesu bʋla pɩba, “Ʋ maga dɩ mɩ mʋ tasɩŋ dɔnsʋŋ ma a bʋl Wɩa kuorii-la wɩaa nɩmɛ. Ŋɩɩ nɛ Wɩa tɩmmɛ dɩ mɩ kʋ ŋaa.” 44Ŋɩɩ nɛ ʋ bʋl Wɩa wɩaa Judiya tinteeŋ, Wɩɩchʋɔlɛ dɩɩsɩŋ lɛ.

Currently Selected:

Luuk 4: SIS

Highlight

Copy