Maak 15

Ba kɛŋ Yesu kaa mʋ Paalɩt teeŋ

Mat. 27.1-2, 11-14; Luuk 23.1-5; Jɔɔŋ 18.28-38

1Ŋɩɩ nɛ chʋchʋɔ-fɩɛla, Wɩɩsʋllɩ sɩpaalaaraa kʋhɩasɩŋ arɩ ba taŋ kʋhɩasɩŋ arɩ Wɩa teniŋ kerichiba arɩ nɩalɩŋ kala sɩ yie hilimi a vʋvʋʋrɛ wɩaa, ba kala kʋ hilimi a vʋʋrɛ. Ba kɛŋ Yesu a vɔɔ a kɛnʋ kaa mʋ Paalɩt teeŋ.

2Ŋɩɩ nɛ Paalɩt pɩɛsɛ Yesu, “Ŋ nɛ Juu tɩŋŋaa kuoro?”

Yesu bʋl, “Oo, mɩ nɛ.”

3Ŋɩɩ nɛ Wɩɩsʋllɩ sɩpaalaaraa kʋhɩasɩŋ dagɛ wɩalɩŋ Yesu sɩ ŋaa chei a yʋgɛ. 4Ŋɩɩ nɛ Paalɩt pɩɛsɛ Yesu, “Ŋ bɩ wɩɩ kɛnɛ ŋ sɩ jaŋ bʋla pɩbaa? Bee na wɩaa sɩ magɛ ŋɩɩ ba dagɛ arɩ ŋ cheye.”

5Ama Yesu bɩra bɩ ʋ niiŋ suro. Wɩɩ-la kperi Paalɩt.

Ba sɛyɛ arɩ ba jaŋ kpʋ Yesu

Mat. 27.15-26; Luuk 23.13-25; Jɔɔŋ 18.39–19.16

6Dɩ dɩɩsɩŋ kiele bal gbieli nɛ yie-na kala Paalɩt yie lɩɩsɛ nɩalɩŋ ba sɩ kaa tɔ dɩa dɔŋɔ nɛ a ta, nɩɩ-la nɩaa sɩ cho dɩ ba lɩɩsa ta. 7Dɩ nɩaa dɔnsʋŋ ma fa hɛ nɩtɔɔrɩ dɩa lɛ, ba fa hɛ yuosuŋ nɛ a kpʋ nɩaa. Ba kɛmba kaa mʋ tɔ dɩa, ba dɔŋɔ yɩrɩŋ nɛ Barabas.

8Ŋɩɩ nɛ nɩaa yʋgɛ a gire mʋ Paalɩt teeŋ a bʋl dɩ ʋ ŋaa ŋɩɩ ʋ sɩ vɛnɛɛ ŋaa pɩba. 9Paalɩt pɩɛsɛba, “Ma cho dɩ mɩ lɩɩsɛ Juu tɩŋŋaa kuoru-la nɛ ta pɩmaa?” 10Ʋ fa jɩma arɩ Wɩɩsʋllɩ sɩpaalaaraa kʋhɩasɩŋ yaraa bieri nɛ, ŋɩɩ nɛ tɩɩ ba kɛŋ Yesu a kɔ ʋ teeŋ. 11Ŋɩɩ nɛ Wɩɩsʋllɩ sɩpaalaaraa kʋhɩasɩŋ nyɩsɛ nɩaa hɛ dɩ ba sɛɩ dɩ ba lɩɩsɛ Barabas a ta aŋ leŋ Yesu.

12Ŋɩɩ nɛ Paalɩt bɩra pɩɛsɛ nɩalɩŋ, “Aŋ ka baal-la ma, ma sɩɩ yɩrɛ Juu tɩŋŋaa kuoro, bɛɛ nɛ ma sɩ mɩ ŋaa ʋ lɛ?”

13Ŋɩɩ nɛ ba kala faasa kpɩa, “Leŋ dɩ ba kpaasʋ mɛrɛ daagɛsɛ nyuŋ.”

14Ŋɩɩ nɛ Paalɩt pɩɛsɛba, “Wʋbɔŋ bɛɛ nɛ ʋ ŋaa?”

Ŋɩɩ nɛ ba faasa kpɩa a kɩɩ bumbuŋ-la, “Leŋ dɩ ba kpaasʋ mɛrɛ daagɛsɛ nyuŋ.”

15Paalɩt chɛ dɩ ʋ ŋaa dɩ nɩalɩŋ tʋɔŋ tɔrɛ. Ʋ lɩɩsɛ Barabas ta pɩba aŋ leŋ ba vɩɩrɛ Yesu aŋ kɛnʋ mʋ kpaasa daagɛsɛ nyuŋ.

Laalɩyuoroo mɔŋ Yesu

Mat. 27.27-31; Jɔɔŋ 19.2-3

16Ŋɩɩ nɛ laalɩyuoroo kɛnʋ lɩɩ ba kuoru-balɩŋ dɩa kaala tʋɔŋ a yɩrɛ ba laalɩyuoroo dɔnsʋŋ kala. Ba kala kʋ hilimi. 17Ŋɩɩ nɛ ba joŋ gɛrɩ-fɩaŋ a laalʋ a chɛ sɔsʋŋ a kaa sʋa kuoru nyunchuulo a joŋo chuu. 18Ba sieri ʋ lɛ a bʋl, “Juu tɩŋŋaa kuoro, laa chʋɔlʋŋ.” 19Ba joŋ daaŋ ŋmoo ʋ nyuŋ lɛ, a tʋ nantʋɔrʋŋ ma a hɛ ʋ lɛ, a tuu kpirimi a nagɛ baa zilu. 20Ba sɩ mɔŋ ʋ lɛ a dɛrɛ, ba wuri gɛrɩ-fɩaŋ-la aŋ paa ʋ tɩtɩa gɛnnɩŋ a laalʋ, a kɛnʋ kaa lɩɩ wombiiŋ dɩ ba kɛnʋ kaa mʋ kpaasa mɛrɛ daagɛsɛ nyuŋ.

Ba kpaasɛ Yesu mɛrɛ daagɛsɛ nyuŋ

Mat. 27.32-44; Luuk 23.26-43; Jɔɔŋ 19.17-27

21Ba sɩ kʋ lɩɩ ŋɩɩ, dɩ ba cheŋ baal kʋbala baa yɩrɛ Saamɔŋ. Ʋ jaŋ yɩrɩŋ nɛ Siriini. Ʋ nɛ fa ŋaa Alɛkɩzanda arɩ Rufas nyɩmma. Ʋ lɩɩ baga a jʋjʋʋ taŋ-la tʋɔŋ, ba kɛnʋ a fʋgʋ ʋ laa daagɛsɛ-la a baasɛ. 22Ba kɛŋ Yesu kaa mʋ lee kʋbala, baa yɩrɛ Gɔlɩgɔta. Yɩrɩ-la bʋbʋɔŋ nɛ nyu-kuŋkogulo. 23Nɩmɛ nɛ, ba joŋ sɩnɩŋ a guoli tɩɩ-kel kʋbala baa yɩrɛ mɛɛ lɛ a joŋo pʋ dɩ ʋ nyʋa. Ʋ vɩa. 24Ba kɛŋ Yesu a kpaasɛ daagɛsɛ nyuŋ, aŋ kɛŋ ʋ gɛnnɩŋ kpaa. Ba tɔnsɔ nɛ a jɩŋ gɛrɩ-la nʋʋkala jaŋ laa. 25Dɩ wɩa magɛ ji-looluŋ, ka ba kpaasʋ daagɛsɛ-la nyuŋ. 26Ba sɩ sɩ Yesu ŋaa wɩalɩŋ chei, ba ŋmʋnsa mɛrɛ daagɛsɛ-la lɛ a bʋl,

“JUU TƖŊŊAA KUORO NƐ

Ŋ-LA.”

27Gaaraa balɩa ma nɛ ba fa kpaasɛ a pɛ Yesu lɛ. Dɔŋɔ hɛ Yesu nadiiŋ, dɔŋɔ ma hɛ ʋ nagʋa. [ 28Ba fa ŋmʋnsa bil Wɩa teniŋ tʋɔŋ a bʋl dɩ ba jaŋ kɛnʋ kaa pɛ wʋbɔŋ ŋaaraa lɛ. Lɛɛlɛ wɩaa deemba kala sɛnɛ ŋaa.] 29Ba sɩ kpaasʋ mɛrɛ daagɛsɛ nyuŋ ŋɩɩ, nɩalɩŋ sɩ to nɩmɛ bɩbal, ba tʋtʋʋsʋ aŋ kɛŋ ba nyuŋ chuchugisi a bʋl, “Oi, ŋ nɛ nɩɩ-la sɩ sɩ ŋ jaŋ ŋmoo la Wɩa dɩɩ-balɩŋ lo aŋ bɩra wuo saaʋ tapʋlaa batori pɛgɛ. 30Lɩɩ daa-la nyuŋ tuu a laa ŋ tɩtɩa ta yei.”

31Wɩɩsʋllɩ sɩpaalaaraa kʋhɩasɩ-la arɩ Wɩa teniŋ kerichiba, ba ma sisieri Yesu lɛ a bʋlaa pɩ dɔŋɔ, “Ʋ wuo nɩaa laa tɩta nɛ aŋ bɩ ʋ tɩtɩa wuo laa ta. 32Ʋ sɩ sɩ ʋ nɛ ŋaa Kirisito, Juu tɩŋŋaa kuoro, leŋ dɩ ʋ lɩɩ daa-la nyuŋ kʋ tuu dɩ la na a laa ʋ wɩaa dii.” Nɩalɩŋ balɩa ma ba sɩ kpaasa a pɛ Kirisito lɛ, ba ma tʋʋsʋ.

Yesu sʋba

Mat. 27.45-56; Luuk 23.44-49; Jɔɔŋ 19.28-30

33Wɩa sɩ kʋ magɛ nyu-gbaŋa, leriŋ kala biri lim a mʋ yi dɩdaanɩŋ kerifi batori. 34Kerifi batori-la lɛ Yesu faasa ŋmoo niiŋ a bʋl, “Eloi, Eloi, lama sabakɩtanɩ.” Ʋ bʋbʋɔŋ nɛ: “Mɩ Wɩa, mɩ Wɩa, bɛɛ nɛ tɩɩ ŋ vɩamɛ ta?”

35Dɩ nɩaa dɔnsʋŋ fa chɩŋ nɩmɛ a nɩɩ wɩalɩŋ ʋ sɩ bʋla. Ŋɩɩ nɛ ba bʋl, “Má jegili, Ɩlaaja nɛ ʋ yɩyɩrɛ ŋɩɩ.”

36Nɩalɩŋ dɔŋɔ fá mʋ joŋ suosuo a kaa mʋ yuu sɩnɩŋ sɩ nyala a joŋo tuu daaŋ lɛ, a kaa mʋ hɛ Yesu niiŋ lɛ dɩ ʋ nyʋa. Ʋ sɩ ŋaa ŋɩɩ, ʋ bʋl, “Má leŋu nɩmɛ, má leŋ la gbɛrɛ a na arɩ Ɩlaaja jaŋ kʋ soru daa-la nyuŋ koo.”

37Ŋɩɩ nɛ Yesu faasa ŋmoo niiŋ, aŋ wiesi ʋ wiesi katɩɩ.

38Patɩɩsaŋ nɛ fa kɛrɛ Wɩa dɩɩ-bal-la tʋɔŋ. Ʋ kɩɛsɛ balɩa a chɩŋ nyu-gbaŋa a kʋ tuu. 39Ŋɩɩ nɛ dɩ laalɩyuoroo zɔlɔ kʋhɩaŋ kʋbala fa chɩŋ Yesu sɩpaaŋ a pɔʋ. Ʋ sɩ na Yesu dɩ ʋ wiesi ʋ wiesi katɩɩ ŋɩɩ, ʋ bʋl, “Wʋtɩtɩɩ, baala deeŋ sɛnɛ ŋaa Wɩa Bii nɛ.”

40Haalaa dɔnsʋŋ ma fa chɩŋ dɩ-bolii a bibeŋ. Ba tʋɔŋ, Mɛɛrɩ Magɩdalɩŋ arɩ Mɛɛrɩ sɩ ŋaa Jeems-wie arɩ Joozis naaŋ arɩ Salomi ma fa hɛ nɩmɛ. 41Haalaa deemba kala faa to Yesu harɩŋ nɛ a pɩpɛ ʋ lɛ Galilii lɛ. Haala-la ma sɩ to Yesu harɩŋ a kɔ Jerusalɛm fa yʋga a hɛ nɩmɛ.

Ba hugi Yesu

Mat. 27.57-61; Luuk 23.50-56; Jɔɔŋ 19.38-42

42Tapʋlɩɩ-la dɩ ba kɛŋ ba tɩtɩa hɛ dɔŋɔ a gbɛrɛ ba chɛ-wiesii-la, ʋ dɩdaanɩŋ nɛ, 43baal kʋbala ma fa hɛ nɩmɛ, ʋ yɩrɩŋ nɛ Josef, a lɩɩ Arɩmatɩya. Ʋ fa ŋaa nɩalɩŋ sɩ yie hilimi a vʋvʋʋrɛ wɩaa dɔŋɔ nɛ. Nɩaa zizilu. Ʋ ma fa gbɛrɛ Wɩa kuorii-la nɛ dɩ ʋ kɔ. Ŋɩɩ nɛ dɩdaaŋ-la ʋ mʋ Paalɩt teeŋ arɩ bɔɩ-duoŋ a sʋl Yesu kʋsʋʋŋ. 44Ŋɩɩ nɛ Paalɩt guu hirigi, ʋ sɩ nɩa arɩ Yesu daŋa sʋba. Ʋ yɩrɛ laalɩyuoroo zɔlɔ kʋhɩaŋ-la a pɩɛsʋ dɩ ʋ na Yesu daŋa sʋba nɛɛ. 45Laalɩyuoroo zɔlɔ kʋhɩaŋ-la bʋla pʋ arɩ ʋ sʋba nɛ, ʋ pɩ Josɛf wombiiŋ dɩ ʋ mʋ sori Yesu kʋsʋʋŋ. 46Ŋɩɩ nɛ Josɛf mʋ yɔɔ gɛrɩpɛ-pʋla a sori Yesu kʋsʋʋŋ a kɛŋ gɛrɩpɛɛ-la bɛʋ a joŋu hugi bʋbʋa ba sɩ lɔsɔ lɛ, a bilimi tabɩɩ-balɩŋ tɔ bʋa-la niiŋ. 47Mɛɛrɩ Magɩdalɩŋ arɩ Joozis naaŋ Mɛɛrɩ ma hɛ nɩmɛ a na lee-la ba sɩ joŋu hugi.

Currently Selected:

Maak 15: SIS

Highlight

Copy