Maak 16

Yesu sii sʋʋŋ lɛ

Mat. 28.1-8; Luuk 24.1-12; Jɔɔŋ 20.1-10

1Ba chɛ-wiesii-la sɩ dɛrɛ, Lahadi chɛɛŋ sɩɩpʋʋraa, Mɛɛrɩ Magɩdalɩŋ arɩ Jeems naaŋ Mɛɛrɩ arɩ Salomi mʋ yɔɔ tʋlaalɩɩ dɩ ba kaa mʋ a mɩsɛ Yesu kʋsʋʋŋ. 2Lahadi chɛɛŋ chʋchʋɔŋ, wɩa sɩ pɔsɔ, ba sii mʋ Yesu vaamɩŋ leriŋ. 3Ba sɩɩ mʋ ŋɩɩ, ba pɩpɩɛsɛ dɔŋɔ, “Kʋbɛɛ nɛ jaŋ wuo bilimi tabɩɩ-la sɩ tɔ bʋa-la niiŋ ta?”

4Ba sɩ mʋ kpagɛ bʋa-la leriŋ, ba na dɩ ba kɛŋ tabɩɩ-la suri bʋa-la niiŋ a bilime ta. Tabɩɩ-la fa yʋga nɛ woruŋ. 5Ŋɩɩ nɛ ba mʋ jʋʋ bʋa-la a na bapʋɔsɩ-bie dɩ ʋ hɔŋ bʋa-la tʋɔŋ nadiiŋ a laalɛ gɛrɩ-pʋla. Fawʋllʋŋ kɛmba. 6Ŋɩɩ nɛ ʋ bʋla pɩba, “Má sɩ́ fawʋllʋŋ fá, mɩ jɩma arɩ Yesu sɩ lɩɩ Nazarɛt nɛ maa chɛ, nɩɩ-la ba sɩ kpaasa mɛrɛ daagɛsɛ nyuŋ. Ʋ tuo daha. Ʋ sie nɛ. Má kʋ na lee-la ba sɩ joŋu bil. 7Má mʋ bʋla pɩ Pɩɩta arɩ Yesu harɩ-tooroo, arɩ Yesu jaŋ laa ma sɩpaaŋ a mʋ Galilii. Dɩ ma nɛ mʋ nɩmɛ, ma jaŋ naʋ arɩ ʋ sɩ bʋl ŋɩɩ pɩma.”

8Fawʋllʋŋ kɛmba, ba chichel a lɩɩ bʋa-la lɛ a fá. Fawʋllʋŋ sɩ kɛmba ŋɩɩ, ba bɩ wɩɩkala wuo bʋla pɩpɩ nʋʋkala.

9Yesu sii sʋʋŋ lɛ Lahadi chɛɛŋ sɩɩpʋʋraa nɛ. Ʋ sɩ sie, ʋ leŋe Mɛɛrɩ Magɩdalɩŋ nɛ laa sɩpaaŋ naʋ, nɩɩ-la lɛ ʋ sɩ kiri jɩŋ-bɔŋŋɔɔ balɩpɛ ta. 10Ŋɩɩ nɛ ʋ mʋ bʋla pɩ Yesu harɩ-tooroo wɩɩ-la sɩ ŋaa. Ʋ mʋa dɩ ba hɔnɔ yiyel. 11Mɛɛrɩ sɩ bʋla pɩba arɩ Yesu sii sʋʋŋ lɛ nɛ a hɛ ʋ mɩɩsɩŋ lɛ, ʋ-na naʋ nɛ, ba bɩ wɩɩ-la laa dii.

12Ŋɩɩ harɩŋ baalaa balɩa sii lɩɩ a joŋ wombiiŋ a mʋmʋ taŋ dɔŋ. Ba sɩɩ mʋ ŋɩɩ, Yesu bɩra kɛŋ ʋ tɩtɩa bɩrɩmɛ nagɩna dɔŋ a kɛŋ ʋ tɩtɩa kʋ dagɛba. 13Ŋɩɩ nɛ ba mɩɩra kʋ bʋla pɩ Yesu harɩ-tooro-la kʋkaanaa wɩɩ-la sɩ ŋaa. Ama ba bɩ ba ma laa dii.

14Ŋɩɩ harɩŋ nɛ Yesu harɩ-tooro-la fii arɩ kʋbala hɔnɔ didii kɩaa. Ba sɩɩ dii ŋɩɩ, Yesu kpɩaba lɛ a tɩŋ ba tʋɔŋ sɩ dolie wɩaa arɩ ba sɩ bɩ nɩalɩŋ sɩ sɩ ba naʋ dɩ ʋ sii sʋʋŋ lɛ laa dii.

15Ʋ bʋla pɩba, “Má mʋ dʋnɩa sɛmɛ-na kala a bʋl Wɩa wʋzɔmɔ-la a pɩ nʋʋ na-kala. 16Nɩɩ-la kala sɩ laa mɩ wɩaa dii a leŋ ba fou Wɩɩchʋɔlɛ lɩɩŋ, Wɩa jaŋ laaʋ ta, ama nɩɩ-la kala sɩ bɩ mɩ wɩaa laa dii, Wɩa jaŋ joŋ cheeriŋ pʋ. 17Wʋmagɩlaa deemba nɛ ma jaŋ wuo na a jɩŋ nɩalɩŋ sɩ laa mɩ wɩaa dii. Ba nɛ ŋ-la: Ba jaŋ wuo kikiri jɩŋ-bɔŋŋɔɔ mɩ yɩrɩŋ lɛ. Ba jaŋ wuo bʋbʋl yikori dosunuŋ. 18Ba jaŋ wuo kukori dɩŋŋaa, a nyʋa daalusuŋ sɩɩ kpʋ nɩaa, ka ʋ bɩ jaŋ ŋaaba wɩɩkala. Ba jaŋ wuo joŋ ba nɩsaa a daŋ nyanyal tɩŋŋaa lɛ dɩ ba duori.”

19La Tɩɩna Yesu sɩ bʋl wɩalɩŋ dɛrɛ, Wɩa joŋu a kaa mʋ Wɩa-jaŋ, ʋ hɔŋ Wɩa nadiiŋ, nɩduoŋ dɩhɔnʋŋ. 20Ŋɩɩ nɛ ʋ harɩ-tooroo sii lɩɩ a mʋ lee na-kala a bʋbʋl Wɩa wɩaa. La Tɩɩna Wɩa pɛ ba lɛ ba ŋɩŋaa wʋmagɩlaa, dɩ nɩaa jɩŋ arɩ wɩalɩŋ ba sɩɩ bʋl ŋaa wʋtɩtɩɩ nɛ. Amɩɩ.

Currently Selected:

Maak 16: SIS

Highlight

Copy