Maak 7

Farisii tɩŋŋaa arɩ Wɩa teniŋ kerichiba bʋl ba naabalɩmaba wombiiŋ tonuŋ wɩaa

Mat. 15.1-9

1Ŋɩɩ nɛ chɛɛ kʋbala nɩalɩŋ ba sɩɩ yɩrɛ Farisii tɩŋŋaa arɩ Wɩa teniŋ kerichiba dɔnsʋŋ sɩ lɩɩ Jerusalɛm kɔ, ba kala sii gire kɔ Yesu teeŋ. 2Ba kɔ dɩ Yesu harɩ-tooroo dɔnsʋŋ hɔnɔ didii kɩaa aŋ bɩ ba nɩsaa sɔmɔ. Ba sɩ ŋɩɩ ŋaa disiŋ wɩɩ nɛ. 3Dɩ Farisii tɩŋŋaa arɩ Juu tɩŋŋaa nɛ bɩ ba nɩsaa sɔmɔ, ba bɩ kɩaa ka dii, arɩ ba naabarɩŋ sɩ dagɛ ŋɩɩ. 4Dɩ ba nɛ lɩɩ yɔbɔ kɔ, ba bɩ kɩaa dii, see dɩ ba sɔŋ ba nɩsaa. Ba naaba wɩaa yʋga ba tuto. Ba kɛŋ wombii dɔŋ nɛ ba sɩɩ tiisi ba nyʋnyʋalʋsʋŋ arɩ ba gbansɩŋ arɩ ba hɔɔŋ pupoyee kala ma.

5Ŋɩɩ nɛ Farisii tɩŋŋaa arɩ Wɩa teniŋ kerichiba kʋ pɩɛsɛ Yesu, “Bɛɛ nɛ tɩɩ ŋ harɩ-tooroo bɩ la naabalɩmaba wombiiŋ sɩ dagɛ ŋɩɩ ka to? Bɛɛ nɛ tɩɩ ba bɩ ba nɩsaa sɔmɔ aŋ didii kɩaa?”

6Ŋɩɩ nɛ ʋ bʋla pɩba, “Ma ŋaa kanfugi tɩmma nɛ. Wɩalɩŋ kala Azaaya fa sɩ bʋla Wɩa doluŋ lɛ a tɩgɛ ma lɛ ŋaa wʋtɩtɩɩ nɛ. Ba ŋmʋnsa Wɩa teniŋ tʋɔŋ arɩ Wɩa sɩ,

‘Nɩaa deemba kɛŋ niiŋ nɛ a zizilmi,

ka ba tʋɔŋ lɩɩmɛ.

7Ba yie chʋɔlɛmɛ pɛɩ nɛ

aa dagɛ nuhuobiine wombiiŋ

aŋ bʋl dɩ Wɩa nɛ bʋla.’

8Ma vɩa Wɩa wombiiŋ nɛ aŋ mɩɩra tuto nuhuobiinee wombiiŋ.”

9Ʋ bɩra bʋla pɩba, “Ma yie bɩɩnɛ ma kɛŋ wʋjɩmɩŋ nɛ a vɩa Wɩa wombiiŋ aŋ tuto ma naabalɩmaba wombiee. 10Mosis fa ŋmʋnsa arɩ Wɩa sɩ, ‘Fá ŋ nyɩmma arɩ ŋ naaŋ,’ a bɩra bʋl, ‘Dɩ nʋʋ nɛ bʋl wʋbɔmʋŋ a tɩgɛ ʋ nyɩmma koo ʋ naaŋ lɛ, ʋ maga ba kpʋ tɩɩna nɛ.’ 11Mosis fa ŋmʋnsɛ ŋɩɩ nɛ. Ama ma-na sɩ dɩ nʋʋ nɛ kɛŋ kʋŋ a magɛ dɩ ʋ joŋo pɛ ʋ nyɩmma koo ʋ naaŋ lɛ, tɩɩna mʋ a bʋla pɩba: Kʋ-la mɩ fa sɩ jaŋ joŋo pɛ ma lɛ ŋaa kʋŋ ba sɩɩ yɩrɛ ‘Kobaŋ’ nɛ Ʋ bʋbʋɔŋ nɛ: Wɩa nɛ tɩɩʋ. 12Ma bɩra bɩ sɛɩ dɩ nʋʋ ŋaa wɩɩkala pɛ ʋ nyɩmma arɩ ʋ naaŋ lɛ. 13Ma yie ŋaa ŋɩɩ a vɩa Wɩa niiŋ wɩaa aŋ tuto ma naabalɩmaba wombiiŋ a bɩra joŋoo dagɛ ma hambiisiŋ ma. Wʋdosunu-la yʋga nɛ ma sɩɩ ŋaa.”

Kɩalɩŋ sɩ kɛŋ disiniŋ

Mat. 15.10-20

14Ŋɩɩ nɛ Yesu bɩra yɩrɛ nɩ-daŋ ba kɔ ʋ teeŋ, ʋ bʋla pɩba, “Má kala jegile nɩɩ mɩ teeŋ woruŋ a jɩŋ wɩɩŋ deeŋ sɩaa. 15Kʋŋkala sɩɩ tuu nɩa tʋɔŋ bɩ jaŋ wuo leŋ dɩ ʋ kɛŋ disiniŋ. Ama kɩalɩŋ sɩ hɛ ʋ tʋɔŋ a kʋʋ lɩɩ nɛ yie leŋ ʋ kɛŋ disiniŋ. [16Dɩgɩlaa tɩŋŋaa, má wuoli ma dɩgɩlaa a nɩɩ.]”

17Ʋ sɩ leŋ nɩ-daŋ-la aŋ jʋʋ dɩa, ʋ harɩ-tooroo pɩɛsʋ namaga-la bʋbʋɔŋ. 18Ŋɩɩ nɛ ʋ pɩɛsɛba, “Ma ha bɩ wʋjɩmɩŋ kɛnɛɛ? Ma bɩ jɩŋ arɩ nʋʋ nɛ dii kʋŋ, ʋ bɩ jaŋ wuo ŋaa ʋ kɛŋ disiniŋ? 19Dɩ ŋ nɛ dii kʋŋ, ʋ bɩ ŋ tʋɔŋ ka tuu see ŋ luoruŋ, a bɩra to ŋ yaraa lɩɩ.” (Yesu dagɛba ŋɩɩ arɩ kʋdiilee kɩsɩŋ bɩra tuo.) 20Ŋɩɩ nɛ ʋ bʋl, “Wɩalɩŋ kala sɩ hɛ nɩa tʋɔŋ a kʋʋ lɩɩ, ba nɛ yie leŋ ʋ kɛŋ disiniŋ. 21Ŋ tʋɔŋ lɛ nɛ ŋ yie bɩɩnɛ wʋbɔŋŋɔɔ ŋaanɩŋ a ŋɩŋaa bachɔrʋŋ arɩ hachɔrʋŋ wɩaa, a gɩgaa, a kpʋkpʋ nɩaa, a chɩchɛ nɩaa haalaa, 22a kɛŋ tʋɔ-luŋuŋ, a bɩbɩɩnɛ wʋbɔŋŋɔɔ nɩaa lɛ, a ŋmuŋmoo nɩaa puo, a ŋɩŋaa wʋlɩɩlɩŋ. Ŋ yaraa bibieri nɩaa lɛ, a chichei nɩaa yɩrɩŋ, a bibigisi ŋ tɩtɩa lɛ, a ŋaa nɩyaarɩ. 23Wʋbɔŋŋɔɔ deemba kala yie lɩɩ ŋ tʋɔŋ nɛ a leŋ ŋ kɛŋ disiniŋ.”

Siiria tɩŋŋaa haala sɩ laa Yesu wɩaa dii

Mat. 15.21-28

24Ŋɩɩ nɛ Yesu sii a lɩɩ nɩmɛ a mʋ Taaya arɩ Saadɔŋ tinteeŋ a jʋʋ hɛ dɩa kʋbala lɛ a bɩ chɛ dɩ nʋʋkala jɩŋ ʋ wɩaa, ka ba vɩa aŋ jɩŋ.

25Haal kʋbala ma nɛ fa hɛ nɩmɛ, jɩŋ-bɔŋ kɛŋ ʋ tolo. Ʋ sɩ nɩɩ Yesu wɩaa ʋ sii kɔ a tel ʋ naasɩŋ lɛ. 26Haal-la fa ŋaa Giriik tɩɩna nɛ, ka ba lʋlʋ Fɔnɩɩsɩa sɩ hɛ Siiria tinteeŋ lɛ, ŋɩɩ nɛ haal-la sʋl Yesu dɩ ʋ kiri jɩŋ-bɔŋ-la ʋ tolo lɛ.

27Ŋɩɩ nɛ Yesu bʋla pʋ, “Leŋ dɩ hambiisiŋ laa sɩpaaŋ dii kɩaa vɔgɛ, bɛɛ wɩaa ʋ bɩ wombii ŋaa dɩ la joŋ hambiisiŋ kʋdiilee yuo pɩ vasɩŋ.”

28Haal-la bʋl, “Wʋtɩtɩɩ nɛ, mɩ Tɩɩna, ŋ bɩ jaŋ joŋ hambiisiŋ kʋdiilee a pɩ vasɩŋ. Ama hambiisi-la sɩɩ dii kɩalɩŋ, kɩalɩŋ sɩ tel tinteeŋ nɛ, vasɩ-la ma jaŋ paa dii.”

29Ŋɩɩ nɛ Yesu bʋla pɩ haal-la, “A tɩŋ ŋ sɩ bʋl wɩɩŋ deeŋ wɩaa, jɩŋ-bɔŋ-la lɩɩ ŋ tolo lɛ nɛ. Mʋ dɩa.”

30Haal-la viiri. Ʋ mʋa dɩ ʋ tolo-la pɩna, jɩŋ-bɔŋ-la lɩɩ ʋ lɛ.

Yesu vaarɛ taŋɩŋ

31Ŋɩɩ nɛ Yesu mɩɩra lɩɩ Taaya tinteeŋ lɛ a mʋ to Sɩdɔŋ arɩ tasɩŋ fii tinteeŋ a mʋ yi Galilii mʋga. 32Ŋɩɩ nɛ dɩ taŋɩŋ hɛ nɩmɛ. Ba kɛnʋ kaa kɔ a sʋl Yesu dɩ ʋ joŋ ʋ nɩsɩŋ daŋ ʋ lɛ.

33Yesu kɛnʋ kaa lɩɩ nɩaa tʋɔŋ. Ba dʋndʋŋa balɩa hɔŋ. Ŋɩɩ nɛ ʋ joŋ ʋ neniee a kaa mʋ tʋʋ ʋ dɩgɩlaa lɛ aŋ tʋ nantʋɔrʋŋ hɛ ʋ nandelimiŋ lɛ, 34aŋ wʋla beŋ wɩa-nyuŋ aŋ faasa wiesi fir aŋ bʋl baal-la lɛ, “Ɛfata.” Ɛfata bʋbʋɔŋ nɛ: Kaa suri. 35Baal-la dɩgɩlaa suri. Ʋ nandelimiŋ ma bɩrɩmɛ. Ʋ bʋbʋl wɩaa woruŋ.

36Ŋɩɩ nɛ Yesu bʋla pɩ nɩalɩŋ arɩ sɩɩfɩɛsɩŋ dɩ ba sɩ́ wɩɩŋ deeŋ bʋla pɩ nʋʋkala. Ŋɩɩ tɩtɩa ʋ sɩ sɩ dɩ ba sɩ́ wɩɩ-la bʋla pɩ nɩaa, ŋɩɩ tɩtɩa nɛ ba ma fɩɛsɛ sɩɩŋ a bʋl wɩɩ-la gaara bal. 37Nɩalɩŋ kala sɩ nɩɩ wɩɩ-la, ba hirigi a bʋl, “Wɩɩ na-kala nɛ ʋ ŋɩŋaa woruŋ. Ʋ paala ŋaa taŋɩŋ dɩgɩlaa suri nɛ ʋ nɩnɩɩ wɩaa a bʋbʋl wɩaa.”

Currently Selected:

Maak 7: SIS

Highlight

Copy