Maak 8
8
Yesu pɩ nɩaa bʋɩ banɛsɛ kʋdiilee
Mat. 15.32-39
1Tapʋlɩɩ kʋbala lɛ nɩ-daŋ bɩra kʋ hilimi, a bɩ kʋdiilee kɛnɛ dɩ ba dii. Ŋɩɩ nɛ Yesu yɩrɛ ʋ harɩ-tooroo a bʋla pɩba, 2“Mɩ beŋ nɩaa deemba nenige kɛmmɛ nɛ. Ba hɛ mɩ teeŋ tapʋlaa batori nɛ ŋ-la, ba bɩ kʋdiilee na dɩ ba dii. 3Dɩ ba nɛ bɩ kʋŋ die, ka dɩ mɩ bʋl dɩ ba viiri, ba jaŋ mʋ yiegi wombiiŋ lɛ, bɛɛ wɩaa ba dɔnsʋŋ lɩɩ dɩ-bolii nɛ.”
4Ŋɩɩ nɛ ʋ harɩ-tooroo pɩɛsʋ, “Ɛɛ nɛ ŋ jaŋ ŋaa a na kʋdiilee dɩ nɩaa deemba kala dii gɩrɩŋ deeŋ tʋɔŋ?”
5Yesu pɩɛsɛba, “Boroboroba baŋmɛɛ nɛ hɛ nɩmɛ?” Ba sɩ, “Kɩaa balɩpɛ nɛ.”
6Ŋɩɩ nɛ ʋ ŋaa nɩalɩŋ tuu hɔŋ tinteeŋ. Ka ʋ joŋ boroboroba-la balɩpɛ a lɔllɛ Wɩa, aŋ kaa chɔgɛ chɔgɛ, a pɩ ʋ harɩ-tooroo dɩ ba laa kpaa nɩalɩŋ. Ba laa kpaaba. 7Dɩ ba kɛŋ chenfil-biisiŋ ma mʋa. Ʋ joŋ ba ma a lɔllɛ Wɩa aŋ ŋaa ʋ harɩ-tooroo laa kpaa nɩalɩŋ. 8Nʋʋkala dii a vɔgɛ. Ka ʋ harɩ-tooroo paa kʋkaaŋ-biisiŋ a su sinsiŋ balɩpɛ. 9Nɩalɩŋ fa sɩ dii kɩalɩŋ, ba yi bʋɩ banɛsɛ. 10Ŋɩɩ nɛ ʋ taba aŋ kɛŋ ʋ harɩ-tooroo ba mʋ jʋʋ lɩɩŋ daboro a mʋ Dalimanuuta tinteeŋ.
Farisii tɩŋŋaa ka chɛ dɩ Yesu ŋaa wʋmagɩlɩŋ
Mat. 16.1-4
11Ŋɩɩ nɛ Farisii tɩŋŋaa dɔnsʋŋ sii kɔ aa chɛ dɩ ba magɩsɛ Yesu a kʋ kɛŋ wɩaa lɩlɛrɛ a bʋl, “Ŋ sɩ kɛŋ doluŋ, ŋaa wʋmagɩl dɩ la na a jɩŋ arɩ ŋ dol-la lɩɩ Wɩa teeŋ nɛ.” 12Yesu tʋɔŋ chei, ʋ faasa wiesi aŋ pɩɛsɛba, “Ma lɛɛlɛ nɩaa deemba, bɛɛ nɛ tɩɩ ma yie chɩchɛ dɩ mɩ dagɛ mɩ doluŋ? Wʋtɩtɩɩ, mɩ bʋlaa pɩma, mɩ bɩ jaŋ ŋaa wʋmagɩl kala dɩ ma lɛɛlɛ nɩaa deemba na.” 13Ŋɩɩ nɛ ʋ lemba aŋ mɩɩra jʋʋ lɩɩŋ daboro a duoro chol mʋga cholo.
Yesu bʋl wɩaa tɩgɛ Farisii tɩŋŋaa arɩ Hɛrɔd lɛ
Mat. 16.5-12
14Yesu arɩ ʋ harɩ-tooroo sɩ duoro chol mʋga cholo ŋɩɩ, ʋ harɩ-tooroo liisi arɩ ba yʋ ba kʋdiilee ta nɛ, aŋ joŋ boroboro kʋbala dʋndʋŋ a hɛ ba lɩɩŋ daboro tʋɔŋ. 15Ŋɩɩ nɛ Yesu bʋl arɩ sɩɩfɩɛsɩŋ, “Má pɔ ma tɩtɩa lɛ arɩ Farisii tɩŋŋaa arɩ Hɛrɔd lɛ. Ba nagɛ sɩbʋrʋŋ nɛ, dɩ ŋ joŋo hɛ kʋŋkala lɛ, ʋ yie sii pʋɔrʋ nɛ.”
16Ʋ sɩ bʋl ŋɩɩ, ba bʋla pɩpɩ dɔŋɔ, “La sɩ bɩ boroboro kɛnɛ, ŋɩɩ nɛ tɩɩ ʋ bʋl ŋɩɩ.”
17Yesu jɩŋ wɩɩ-la ba sɩɩ bʋl a pɩɛsɛba, “Bɛɛ nɛ tɩɩ ma bʋbʋl, ‘La bɩ boroboro kɛnɛ?’ Ma sɩaa ha bɩ naa, koo ma bɩ wɩalɩŋ bʋbʋɔŋ jɩŋ? Ɛɛ nɛ ma tʋɔŋ dol ŋɩɩ? 18Ma kɛŋ sɩaa nɛ, ba bɩ naa? Ma kɛŋ dɩgɩlaa nɛ, ba bɩ nɩɩ? Ma bɩ wɩalɩŋ liisee? 19Mɩ joŋ boroboroba banɔŋ nɛ a chɔgɔ kpaa baalaa bʋɩ banɔŋ. Ma sɩ paa kʋkaanaa, sinsiŋ baŋmɛɛ nɛ?”
Ba sɩ, “Sinsiŋ fii arɩ balɩa.”
20Ʋ bɩra pɩɛsɛba, “Mɩ sɩ joŋ boroboroba balɩpɛ a chɔgɔ kpaa nɩaa bʋɩ banɛsɛ, ma sɩ paa kʋkaanaa, sinsiŋ baŋmɛɛ nɛ?”
Ba sɩ, “Sinsiŋ balɩpɛ.” 21Ŋɩɩ nɛ ʋ pɩɛsɛba, “Ma saa ha bɩ wɩaa deemba bʋbʋɔŋ jɩŋ?”
Yesu vaarɛ nyʋlɩma Bɛtɩsaada lɛ
22Yesu arɩ ʋ harɩ-tooroo bɩra kʋ yi taŋ kʋbala baa yɩrɛ Bɛtɩsaada. Ŋɩɩ nɛ nɩaa dɔnsʋŋ sii a kɛŋ nyʋlʋŋ kʋbala kɔ a sʋl Yesu dɩ ʋ joŋ ʋ nɩsɩŋ a digu. 23Ʋ kɛŋ nyʋlʋŋ-la nɩsɩŋ lɛ a kaa lɩɩ taŋ-la tʋɔŋ a tʋ nantʋɔrʋŋ hɛ ʋ sɩaa lɛ a joŋ ʋ nɩsaa daŋ ʋ lɛ aŋ pɩɛsʋ, “Ŋ na leriŋ nɛɛ?”
24Ʋ beŋ leriŋ aŋ bʋl, “Mɩɩ na nɩaa nɛ, ama ba nagɛ tɩɩsɩŋ nɛ aa gɔllɛ.”
25Ŋɩɩ nɛ Yesu bɩra joŋ ʋ nɩsaa daŋ ʋ sɩaa lɛ. Baal-la faasa chaarɛ sɩaa woruŋ, ʋ sɩaa bɩra nɩna ʋ na kʋŋkala woruŋ. 26Ŋɩɩ nɛ Yesu bʋla pʋ, “Mʋ dɩa, bɩra sɩ́ taŋ tʋɔŋ jʋʋ.”
Pɩɩta sɩ dɩ Yesu nɛ ŋaa Kirisito
Mat. 16.13-20; Luuk 9.18-21
27Yesu arɩ ʋ harɩ-tooroo bɩra sii lee-la a mʋmʋ tabiisi-la sɩ hɛ Sɩzarɩya Fɩlɩpa tinteeŋ. Ba sɩɩ mʋ ŋɩɩ, Yesu pɩɛsɛ ʋ harɩ-tooroo, “Kʋbɛɛ nɛ nɩaa sɩ dɩ mɩ ŋaa?”
28Ba bʋl, “Dɔnsʋŋ sɩ dɩ ŋ nɛ ŋaa Jɔɔŋ, Wɩa lɩɩ-fooru-la. Dɔnsʋŋ ma sɩ dɩ ŋ nɛ ŋaa Wɩa wʋlaabʋlla Ɩlaaja. Dɔnsʋŋ ma sɩ dɩ ŋ nɛ ŋaa Wɩa wʋlaabʋlla-la fa sɩ hɛ nɩmɛ dɔŋɔ.”
29Ŋɩɩ nɛ Yesu bɩra pɩɛsɛ ʋ harɩ-tooroo ma a bʋl, “Ka ma ma, ma sɩ mɩ ŋaa kʋbɛɛ nɛ?” Pɩɩta sɩ, “Ŋ nɛ ŋaa Kirisito, nɩɩ-la Wɩa sɩ lɩɩsa.”
30Pɩɩta sɩ bʋl ŋɩɩ, Yesu bʋla pɩba arɩ sɩɩfɩɛsɩŋ dɩ ba pɔ dɩ ba sɩ́ wɩɩ-la bʋla pɩ nʋʋkala.
Yesu bʋl ʋ sʋʋŋ wɩaa
Mat. 16.21-28; Luuk 9.22-29
31Ŋɩɩ nɛ Yesu suomo dɩdagɛ ʋ harɩ-tooro-la, “Mɩ-na, Nuhuobiine Bie jaŋ na hɛɛŋ woruŋ. Nɩhɩasɩŋ arɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba, ba kala jaŋ vɩamɛ aŋ ŋaa dɩ ba kpʋmɛ. Dɩ ba nɛ kpʋmɛ, mɩ jaŋ ŋaa tapʋlaa batori aŋ bɩra sii sʋʋŋ lɛ.” 32Ʋ chaasa bʋl wɩɩŋ deeŋ nɛ pɩba. Ŋɩɩ nɛ Pɩɩta kɛnʋ kaa sʋʋsa lɩɩ, a kpɩa ʋ lɛ, arɩ ʋ sɩ́ ŋɩɩ bʋl.
33Ŋɩɩ nɛ Yesu bɩrɩma beŋ ʋ harɩ-tooroo aŋ kpɩa Pɩɩta lɛ a bʋl, “Sɩtaanɩ, mʋ nɩmɛ. Wɩalɩŋ ŋ sɩɩ bʋl, nuhuobiine wombiiŋ nɛ, Wɩa wombiiŋ dee.”
34Ŋɩɩ nɛ ʋ yɩrɛ ʋ harɩ-tooroo arɩ nɩalɩŋ kala ba kɔ, ʋ bʋla pɩba, “Dɩ nʋʋkala nɩɩ chɛ dɩ ʋ tomi, see dɩ ʋ vɩa ʋ tɩtɩa wombiiŋ aŋ joŋ ʋ daagɛsɛ baasɛ a tomi. 35Nɩɩ-la kala sɩɩ chɛ dɩ ʋ laa ʋ mɩɩsɩŋ, ʋ jaŋ vɩa ʋ mɩɩsɩŋ ta. Ama nɩɩ-la sɩ vɩa ʋ mɩɩsɩŋ ta a tɩŋ mɩ wɩaa arɩ Wɩa wʋzɔmɔ-la wɩaa, ʋ jaŋ sɛnɛ laa ʋ mɩɩsɩŋ. 36Dɩ ŋ nɛ tɩɩ dʋnɩa kala aŋ bɩ mɩɩsɩŋ kɛnɛ, bɛɛ kʋŋ nyʋʋrɩɩ nɛ ŋ na? 37Dʋnɩa deeŋ lɛ, bɛɛ kʋŋ nɛ saa ŋ jaŋ wuo joŋo lenni ŋ mɩɩsɩŋ? 38Dɩ nʋʋ nɛ leŋe dɩ hɩɩsɩŋ kɛnʋ a tɩŋ mɩ wɩaa arɩ mɩ wʋbʋlaa wɩaa, ma lɛɛlɛ nɩaa deemba sɩ bɩ Wɩa ka fá a ŋɩŋaa wʋbɔŋŋɔɔ tʋɔŋ, mɩ-na Nuhuobiine Bie ma jaŋ leŋ dɩ hɩɩsɩŋ kɛnʋ dɩ mɩ nɛ kɔ arɩ mɩ nyɩmma tʋla a pɛ ʋ tɩndaaraa sɩ bɩ disiniŋ kɛnɛ lɛ.”
Currently Selected:
Maak 8: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
