JENESIS 27
27
1Go e pakilina, ragi waina Isaak e pei tea matua, go namatana e kesa, dapala e marisa punusi, naga e soso natuna takalapa Esau, po noa ki nia, e naga, Natugu: go e noa ki nia, e naga, Kinau nea. 2Go e noa, P̃a leo, a pei tea matua, a da atae naaleatia ni namateana aginau mau. 3Go ragi waia p̃a tape, a pavara ni ko, nalikau anigo maga, p̃olaga anigo go naasu anigo, go p̃a tave paki namalasi pano, po maginau palako ki tea valakokiana; 4Po maginau mari navinaga lolo, ega tapala waina a masauna, po maginau dape a umai, naga aga kanikani; naga naatagu ega vasa m̃ata ki‐go ragi waina a ko da mate mau. 5Go Rebekah e dogo ragi waina Isaak e pasa ki natuna Esau. Go Esau e paki namalasi naga ega valako ki tea valakokiana, naga ega tape a umai. 6Go Rebekah e pasa ki natuna Yakob, po naga, P̃a leo, a dogo tamam̃a e pasa ki taim̃a Esau, po naga, 7P̃a maginau dape tea valakokiana, po maginau mari navinaga lolo, naga aga kanikani, po pasa m̃ata ki‐go narae ni Yehovah ega vea ki namateana aginau. 8Go ragi waia, natugu, p̃a rogo parati ki nadaleogu ega tapala waina kinau a dip̃aki‐go asa. 9P̃a vaki navata pano, po maginau dape naninani natuda wia ega rua kakada umai; go aga wo magi tamam̃a mari navinaga lolo, ega tapala waina e masauna: 10Go p̃a wo dape a umai dua tamam̃a asa, go ega wo ganikani, naga ega vasa m̃ata ki‐go ega vea ki namateana aneana. 11Go Yakob e noa ki p̃ilana Rebekah, e naga, P̃a leo, taigu Esau e pei naatam̃oli uluulua, go kinau a pei naatam̃oli m̃om̃oa. 12Mase mama e pe wo dovidogo au, go a pe wo dakiusi tea mari saudoa namatana; go a pe wo piragi navasasakiana sikai paki nau, go a pe wo da piragi navasam̃atakiana sikai mau. 13Go p̃ilana e noa ki nia, e naga, Navasasaki‐go‐ana ega toko au doko, natugu: ma p̃a rogo parati ki nadaleogu, go p̃a vano po maginau dape ra umai. 14Go e pano, po puati ra, po dape ra umai dua p̃ilana ara: go p̃ilana e mari navinaga lolo, dapala waina tamana e masauna. 15Go Rebekah e dape sugoro wia maga ki natuna takalapa Esau, waina e doko pisari a ekopu ni nasum̃a, po sugoro natuna takariki Yakob ara: 16Go e soki nawili ni naninani natuna dua wanogoe doko naruna maga, go tea m̃om̃oa ni nanoana: 17Go e pitua ki navinaga lolo go bred, waina e mari a, paki nam̃elearu ni natuna Yakob. 18Go e umai punusi tamana po noa, Mama: go e noa, Kinau nea; nigo ku pei sei, natugu? 19Go Yakob e noa ki tamana, e naga, Kinau a pei Esau tea takalapa anigo; a po mari dapala waina ku noa kinau asa: p̃a toko leana, a pavara ni ko asa, p̃a toko p̃ia po gani tea valakokiana aginau seara, naga naatam̃a ega vasa m̃ata ki nau. 20Go Isaak e noa ki natuna, e naga, Ku po pap̃ai a m̃araverave dapale sava, natugu? Go e noa, Nalakena Yehovah Sup̃e anigo e mari a e pakilina ki nau. 21Go Isaak e noa ki Yakob, e naga, P̃a umai paki m̃aladigi, a pavara ni ko asa, naga aga tovidogo ko, natugu, nigo ku pe vei natugu Esau lomau kite ku pe vei tea p̃ota. 22Go Yakob e paki m̃aladigi ki tamana Isaak; go e dovidogo e, po noa, Nadaleona e pei nadaleo ni Yakob, ma naruna ero pei naru ni Esau. 23Go e da midoaki p̃otae a mau, nalakena naruna ero uluulua, dakiusi naru ni taina Esau: go e pasa m̃ata ki nia. 24Ma e moro pususu naga, nigo kupei natugu Esau lomau kite? Go e noa, Kinau nea . 25Go e noa, P̃a tape a umai paki m̃aladigi ki nau, go aga wo gani tea valakokiana seara ki natugu, naga naatagu ega vasa m̃ata ki‐go. Go e dape a umai paki m̃aladigi ki nia, go e ganikani: go e maneana dape waine umai, go e munu. 26Go tamana Isaak e noa ki nia, e naga, P̃a umai paki m̃aladigi, a pavara ni ko, po dum̃ili au, natugu. 27Go e umai paki m̃aladigi, po dum̃ili a: go e sidogo nap̃o ni sugoro aneana maga, po pasa m̃ata ki nia, po noa,
P̃a vunusi, nap̃o ni natugu
E dakiusi nap̃o ni vanua sikai waina Yehovah e po pasa m̃ata ki nia;
28Go Sup̃e ega tua ko nasovaki ni nakoroatelagi,
Go nam̃anopunopuana ni maramana,
Go korn go waine ega laapa:
29Narei maga euga manigo suasua,
Go nalauna maga euga suai natano paki‐go:
P̃a vei nawota dap̃au taim̃a maga,
Go p̃ilam̃a natuna maga euga suai natano paki‐go:
Tea mamau puti waina eu pasasa ki‐go, euga vei tea vasasakiana,
Go tea mamau puti waina eu pasa m̃ata ki‐go, euga vei tea vasam̃atakiana.
30Go e pakilina, ragi waina Isaak e pasa m̃ata ki sua Yakob, go Yakob e po dave m̃elu dua ki narae ni tamana Isaak pano, naga taina Esau e pae navalakoana aneana umai paki ekopu. 31Go nae ma e mari navinaga lolo, po dape a umai dua tamana asa; go e noa ki tamana, e naga, Mama ega toko leana, po gani tea valakokiana ki natuna, naga naatam̃a ega vasa m̃ata ki nau. 32Go tamana Isaak e noa ki nia, e naga, Nigo ku pei sei? Go e noa, Kinau a pei natum̃a, tea takalapa anigo, Esau. 33Go Isaak e durururu ki namatakuana warua sa, po noa, Go sei e po palako ki tea valakokiana, po dape a umai dua au asa, go a po gani kovai puti a ragi waina ku ko da umai mau, go a po pasa m̃ata ki nia? Io, go ega wo pei tea vasam̃atakiana. 34Ragi waina Esau e dogo navasaana maga ki tamana, e kua ki nakuaana warua sa go ni nasusueana warua sa, po noa ki tamana, e naga, P̃a vasa m̃ata ki nau, p̃a moro pasa m̃ata ki nau, mama O. 35Go e noa, Taim̃a e umai pilake nasorosoroana, po dape lua navasam̃atakiana anigo. 36Go e noa, Nagisana e da pei tea soso‐gara‐ana ki Yakob kite? Nalakena e po sielua au paka rua waia: e dape lua tea ni naveitakalapa‐ana aginau; go p̃a leo, ragi waia e po dape lua navasam̃atakiana aginau. Go e noa, Ku da maginau mauti navasam̃atakiana sikai kite? 37Go Isaak e pasadara po noa ki Esau, e naga, P̃a leo, a po mari a e pei nawota anigo, go a po dua e taina mamau puti naga euga maneana suasua; go a po silae a ki korn go waine: go aga wo moro manigo mari nasava, natugu? 38Go Esau e noa ki tamana, e naga, Ku peani navasam̃atakiana sikai maau, mama, kite? P̃a vasa m̃ata ki nau, p̃a moro pasa m̃ata ki nau, mama O. Go Esau e sike nadaleona, po dagi. 39Go tamana Isaak e pasadara po noa ki nia, e naga,
P̃a leo, natokoana anigo ega wo doko nam̃anopunopuana ni maramana,
Go nasovaki ni nakoroatelagi waina e pae elagi umai;
40Go p̃a wo mauri ki lova anigo, go p̃a wo magi taim̃a suasua;
Go ragi waina p̃a wo pilakoto,
P̃a wo marip̃ori nakau ni nanoa aneana ega m̃elu dua ki nanoam̃a.
41Go Esau e pilosi Yakob nalakena navasam̃atakiana waina tamana e pasa m̃ata ki nia asa: go Esau e noa nap̃op̃ona, e naga, Naaleatia maga ni nasusue‐mama‐ana eu pei m̃aladigi; ragi wanogoe aga wo maripunue taigu Yakob asa. 42Go navasaana maga ki natuna takalapa Esau e pei tea rogorogokiana paki Rebekah; go e dip̃aki lua po soso natuna takariki Yakob, po noa ki nia, e naga, P̃a leo, taim̃a Esau e dum̃ana pasapakavakale a ako, naga ega maripunue ko. 43Go ragi waia, natugu, p̃a rogo parati ki nadaleogu; go p̃a tuleana, p̃a sava paki Haran pano punusi goregu Laban; 44Go p̃a toko sikoti a doko naaleatia seara, pa pa namaritausuana ki taim̃a ega liliu; 45Pa pa namaetoana ki taim̃a ega liliu m̃elu dua ki‐go pano, go ega malio ki tea waina ku po mari a paki nia: ragi wanogoe aga wo dip̃aki lua, po piragi ko pae tokora wanogoe umai: ekasana koroga wo dua puoli ki nau ki namateana naaleatia sikai maau?
46Go Rebekah e noa ki Isaak, e naga, A mamale ki namauriana aginau nalakena Heth natuna nagoroi maga: Yakob e pe viragi nagoroi sikai ni Heth natuna nagoroi maga, dakiusi tea maga waia, ni nagoroi maga ni navanua, namauriana aginau e pe mari au a pe wia dapale sava?
Currently Selected:
JENESIS 27: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
