JENESIS 28
28
1Go Isaak e soso Yakob, po pasa m̃ata ki nia, po dip̃aki nia, po noa ki nia, e naga, P̃a ta piragi nagoroi sikai ni nagoroi maga ni Kanaan mau. 2P̃a tuleana, p̃a vaki Padan‐aram pano, paki nasum̃a ki Bethuel p̃ilam̃a tamana; po manigo piragi nagoroi sikai pae tokora wanogoe ni Laban natuna nagoroi maga p̃ilam̃a gorena. 3Go Sup̃e Kasua Mau ega vasa m̃ata ki‐go, po mari ko p̃a wo pavakawora, po mari ko p̃a wo laapa, naga p̃a wo pei taua sikai ni narei maga; 4Go ega tua ko navasam̃atakiana ki Abraham, ega vei anigo go agi naworaworam̃a sikoti ko; naga p̃a veani navanua ni nam̃enaki‐atatokoana anigo maga, waina Sup̃e e dua Abraham asa. 5Go Isaak e dip̃aki lua Yakob: go e paki Padan‐aram pano punusi Laban, natu ni Bethuel nawora ni Aram, gore ni Rebekah, Yakob go Esau p̃ilada. 6Go Esau e punusi naga Isaak e pasa m̃ata ki Yakob po dip̃aki lua e paki Padan‐aram, naga ega viragi nagoroi sikai pae tokora wanogoe; go naga ragi waina e pasa m̃ata ki nia e dip̃aki nia, po noa, P̃a ta piragi nagoroi sikai ni nagoroi maga ni Kanaan mau; 7Go naga Yakob e dogo parati ki tamana go p̃ilana, po paki Padan‐aram pano: 8Go Esau e punusi naga nagoroi maga ni Kanaan eu sa namata ni tamana Isaak; 9Go Esau e pano punusi Ishmael, po piragi sokari nagoroi dua waina e peani sua ra Mahalath natu ni Ishmael natu ni Abraham, gore ni Nebaioth, naga ega vei anagoroi.
10Go Yakob e m̃elu dua ki Beer‐sheba, po surata pano naga ega vaki Haran. 11Go e pa parati ki tokora sikai, po m̃enaki asa nap̃ogiana mamau, nalakena elo e musu; go e dape vatu maga sikai kakada ni tokora wanogoe, po p̃aua asa, po one natano tokora wanogoe naga ega maturu. 12Go e p̃erea, go p̃a leo napua vavadu sikai e lawodu natano, go nap̃auna e paki nakoroatelagi: go p̃a leo agelo maga ki Sup̃e eu do sake po do siwo asa. 13Go p̃a leo, Yehovah e lawodu elagi ki nia, po noa, Kinau a pei Yehovah, Sup̃e ki tamam̃a Abraham, go Sup̃e ki Isaak: navanua waina ku one asa, aga wo dua mu ma naworaworam̃a asa; 14Go naworaworam̃a euga wo dakiusi nam̃otam̃ota ni natano, go p̃a wo peravera paki west, go paki ist, go paki north, go paki sauth: go nimu ma naworaworam̃a naworawora mamau puti ni maramana euga wo pei tea vasam̃atakiana mu. 15Go p̃a leo, kinau a sikoti ko doko, go aga wo pavaigoro ko nasurataana anigo mamau puti, go aga wo moro piragi ko liliu umai paki navanua waia; nalakena aga wo da doropusi ko mau, pa pa aga wo mari tea waina a po pasa ki‐go asa. 16Go Yakob e darapa m̃elu dua ki namaturuana aneana, go e noa, Yehovah e doko tokora waia lomau; go kinau a da atae a mau. 17Go e mataku, po noa, Tokora waia e pei tokora mataukiana pa! Tokora waia e pei nasum̃a ki Sup̃e e da pei tea p̃ota mau, go tokora waia e pei namata‐pua ni nakoroatelagi. 18Go Yakob e duleana malip̃ogi sa, po dape vatu waina e p̃aua asa, po sike a naga ega vei tea lawodu, po daki naroro nap̃auna. 19Go e soso nagisa ni tokora wanogoe ki Beth‐el: ma nagisa ni natokoana wanogoe sala vea e pei Lus. 20Go Yakob e sai nasaiana sikai, po noa, Sup̃e e pe wo sikoti au doko, po pavaigoro au napua waia waina a pae asa pano, po dua au navinaga waina aga kani a, go sugoro waina aga suni a, 21Dapala a pe wo moro liliu umai paki nasum̃a ki mama natam̃ateana, go Yehovah e pe wo pei Sup̃e aginau, 22Go vatu waia, waina a po sike a naga ega vei tea lawodu, e pe wo pei nasum̃a ki Sup̃e: go tea mamau puti waina p̃a wo dua au ara, a pe wo dua ko kerualima kakada lomau.
Currently Selected:
JENESIS 28: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
