JENESIS 31
31
1Go e dogo navasaana maga ki Laban natuna naanoai maga, eu noa, Yakob e po dape lua tea mamau puti waina eu pei tea ki tamagida; go e po mari nasamasamaana mamau waia ki tea waina e pei tea ki tamagida. 2Go Yakob e punusi narae ni Laban, go p̃a leo, e da dakiusi sala vea paki nia mau. 3Go Yehovah e noa ki Yakob, e naga, P̃a liliu paki navanua ki tamam̃a maga, po pa punusi namatarau anigo maga: go aga wo sikoti ko doko. 4Go Yakob e dip̃aki lua po soso Rahel go Leah ero umai paki namalasi paki navata aneana, 5Go e noa ki da, e naga, Kinau a punusi narae ni tamamu, naga e da dakiusi sala vea paki nau mau; ma Sup̃e ki mama e po sikoti au doko. 6Go nimu koro atae naga a magi tamamu suasua ki nakasuaana aginau mamau, 7Go tamamu e soro au, po mari namoriana aginau e pano p̃ota paka rualima sikai; ma Sup̃e e da suasua ki nia naga ega mari sa ki nau mau. 8E pe noa dapala waia, e pe naga, Tea karakaratia maga euga vei namoriana anigo; go navata mamau eu pe tape tea karakaratia: go e pe noa dapala waia, e pe naga, Tea napuapua maga euga vei namoriana anigo; go navata mamau eu pe tape tea napuapua. 9Go Sup̃e e po dape lua katel maga ki tamamu, po dua au ara. 10Go e pakilina ragi waina navata eu atulake natienaana, naga a sike namatagu, po punusi pae nap̃erea sikai, go p̃a leo, naninani anoai maga waina eu darup̃a navata eu pei napuapua, go karakaratia, go kapukapu. 11Go agelo ki Sup̃e e noa ki nau pae nap̃erea wanogoe, e naga, Yakob: go a naga, Kinau nea. 12Go e noa, P̃a sike namatam̃a, po punusi, naninani anoai mamau puti waina eu darup̃a navata eu pei napuapua, go karakaratia, go kapukapu: nalakena a punusi tea mamau puti waina Laban e mari a paki‐go. 13Kinau a pei Sup̃e ni Beth‐el, tokora waina ku puvurai ki vatu lawodu sikai asa, tokora waina ku sai nasaiana sikai paki nau asa: tea wanogoe, p̃a tuleana, p̃a m̃elu dua ki navanua waia pano, po liliu paki navanua waina ku pakilina asa. 14Go Rahel go Leah ero pasadara po noa ki nia, ero naga, Te matele sikai kite tea veanipiolikiana sikai e ko maginami doko nasum̃a ki tamagami kite? 15E da midoa ki nia naga aro pei nam̃enaki kite? Nalakena e sori gami, go e moro gani puti m̃ane aginami. 16Nalakena nasogolapaana mamau puti waina Sup̃e e po dape lua e ki tamagami, e pei tea anigida go agi natugida maga: go tea wanogoe, tea mamau puti waina Sup̃e e po noa ki‐go asa, p̃a mari a. 17Go Yakob e duleana, po pusake natuna maga go anagoroi maga eu doko kamel maga; 18Go e piragi lua puti katel aneana, go naloriki aneana mamau puti waina e dalua ra, katel maga waina e pakotovi ra, waina e dalua ra Padan‐aram, naga ega va punusi tamana Isaak paki navanua ni Kanaan pano. 19Go Laban e pano naga ega alati shiip aneana maga: go Rahel e panako terafim waina eu pei tea ki tamana. 20Go Yakob e pano panako ki Laban nawora ni Aram pano, e da noakisai a mau naga ega sava pano. 21Go e sava pano nara ma tea mamau puti waina e peani ra; go e duleana, po duagoto Noaisara, po leo pa raki tava ni Kilead.
22Go e pei tea noasaiana paki Laban naaleatia ketolu naga Yakob e sava pano. 23Go e piragi taina maga eu sikoti a, po sava dausi a nasurataana ni naaleatia larua; go e pa parati ki nia tava ni Kilead. 24Go Sup̃e e umai punusi Laban nawora ni Aram nap̃erea sikai ni p̃ogi, po noa ki nia, e naga, P̃a tum̃am̃a pavaigoro ko naga p̃a ta noa ki Yakob te navatuna sa mau. 25Go Laban e pa parati ki Yakob. Go Yakob e lawo ki tap̃aup̃au aneana tava: go Laban go taina maga eu lawo ki tap̃aup̃au adeada tava ni Kilead. 26Go Laban e noa ki Yakob, e naga, Ku po mari nasava, waina ku po pano panako ki nau pano, po piragi lua natugu nagoroi maga eu dakiusi tea viragi‐lua‐pavakotoana maga ki lova? 27Ekasana ku sava panako pano, po pano panako ki nau pano; po da noakisai au asa mau, naga a pe tip̃aki lua ko ki nalaelaeaana go ki nalegaana maga, ki tabret go ki harp; 28Go ku da suasua ki nau naga aga tum̃ili natugu naanoai maga go natugu nagoroi maga mau? Ku po mari manumatavusa ragi waia. 29Nam̃elearugu e kasua naga ega mari sa ki mu: ma Sup̃e ki tamamu e pasa ki nau p̃ogi ni nanova, po naga, P̃a tum̃am̃a pavaigoro ko naga p̃a ta noa ki Yakob te navatuna sa mau. 30Go ragi waia, ku po pano, nalakena ku masau p̃arua ki nasum̃a ki tamam̃a, ma ekasana ku po panako sup̃e aginau maga? 31Go Yakob e pasadara po noa ki Laban, e naga, Nalakena a mataku: nalakena a noa, Ku pe vuati lua pavakoto natum̃a nagoroi maga kiagu. 32Naata waina ku pe vap̃ai sup̃e anigo maga eu pe sikoti a doko, ega ta mauri mau: narae ni taigida maga p̃a leop̃otae tea waina e pei tea anigo waina e sikoti au doko, go p̃a tape lua e. Ma Yakob e da atae mau naga Rahel e panako ra. 33Go Laban e paki ekopu ni tap̃aup̃au ki Yakob, go ni tap̃aup̃au ki Leah, go ni tap̃aup̃au ki tea suasua nagoroi dua; ma e da pap̃ai ra mau. Go e dave tap̃aup̃au ki Leah, po paki ekopu ni tap̃aup̃au ki Rahel. 34Go Rahel e dape terafim, po doropusi ra eu sili naloriki maga ni kamel, po dasake ara. Go Laban e dovidogo usuraki tap̃aup̃au mamau, ma e da pap̃ai ra mau. 35Go e noa ki tamana, e naga, Nawota aginau ega ta maeto mau nalakena a pe ta duleana naraem̃a mau, nalakena a sua naleo ki nagoroi maga. Go e laaga ma e da pap̃ai terafim mau. 36Go Yakob e maeto, po pasa kasua ki Laban: go Yakob e pasadara po noa ki Laban, e naga, Nasava e pei natapiriana aginau? Nasava e pei namarinaleosaana aginau, naga ku po sava dausi au? 37Nalakena ku po dovidogo sara naleo aginau, ku po pap̃ai nasava ni naleo maga ni nasum̃a anigo? P̃a toropusi a nea narae ni taigida maga, naga euga vasap̃otae namawota kakagida toro dua. 38Natau rualima dua waia a sikoti ko doko; shiip goroi anigo maga go naninani goroi anigo maga eu da pisola sa mau, go tea anoai maga ni navata anigo maga a da gani ra mau. 39Tea katip̃oraeana ki nalo mila maga a da dape a umai dua ko asa mau; kinau a dua oli dua ko asa; e pe vei tea vanakoana aleati kite e pe vei tea vanakoana p̃ogi, ku pe tatago asa paki nam̃elearugu. 40A dapala waia doko; navivitinuana e gani au aleati, go namaladiana e gani au p̃ogi; go namaturuana aginau e sava dua ki namatagu pano. 41Natau rualima dua waia a doko nasum̃a anigo; a manigo suasua natau rualima sikai tamate pati raki natum̃a nagoroi dua, go natau latesa raki navata anigo: go ku mari namoriana aginau e pano p̃ota paka rualima sikai. 42Sup̃e ki mama, Sup̃e ki Abraham, go Tea Mataukiana ki Isaak, e pe ta sikoti au doko mau, ku pe alagoro dip̃aki lua au a pe p̃alo pano. Sup̃e e punusi narogokitesaana aginau go nawosiana ni nam̃elearugu, po pasa kasua ki‐go p̃ogi ni nanova. 43Go Laban e pasadara po noa ki Yakob, e naga, Nagoroi maga waia eu pei natugu nagoroi maga, go piakiki naanoai maga waia eu pei piakiki naanoai aginau maga, go navata maga waia eu pei navata aginau maga, go tea mamau puti waina nigo ku punusi ra eu pei tea aginau maga: go natugu nagoroi maga waia aga mari nasava paki da masoso, kite paki natuda maga waina eu po dape ra? 44Go ragi waia p̃a umai, toroga mari navasasokiana sikai, kinau go nigo; go ega vei tea noasokisoki namawota kakagida. 45Go Yakob e dape vatu sikai, po sike a e pei tea lawodu. 46Go Yakob e noa ki taina maga, e naga, Kuga vilae saisai ki vatu maga; go eu dape vatu maga, po mari taua sikai: go eu ganikani tokora wanogoe pisari taua. 47Go Laban e soso e ki Yekar‐sahudutha: ma Yakob e soso e ki Caleed. 48Go Laban e noa, Taua waia e pei tea noasokisoki namawota kakagida masoso. Nalakena tea wanogoe nagisana e pei tea sosoana ki Caleed: 49Go Mispah, nalakena e noa, Yehovah ega vavai namawota kakagida, ragi waina toroga wo dum̃agida puoli ki gida. 50Ku pe mari natugu nagoroi dua ero pe rogokitesa, go ku pe viragi nagoroi seara sokari natugu nagoroi dua, te naata e da sikoti gida doko mau; p̃a vunusi, Sup̃e e pei tea noasokisoki namawota kakagida. 51Go Laban e noa ki Yakob, e naga, P̃a leo taua waia, go p̃a leo vatu lawodu, waina a po lawo ki nia namawota kakagida. 52Taua waia ega vei tea noasokisoki, go vatu lawodu ega vei tea noasokisoki, naga kinau aga wo da liu taua waia punusi ko, go naga nigo p̃a wo da liu taua waia go vatu lawodu waia punusi au, naga toroga tum̃agida mari sa ki gida mau. 53Sup̃e ki Abraham, go Sup̃e ki Nahor, Sup̃e ki tamada, ega vasap̃otae namawota kakagida. Go Yakob e pivisa pae Tea Mataukiana ki tamana Isaak. 54Go Yakob e pitua ki naviriana sikai tava wanogoe, po soso taina maga naga euga kani navinaga: go eu gani navinaga, po m̃enaki tava wanogoe. 55Go Laban e duleana malip̃ogi sa, po dum̃ili natuna naanoai maga go natuna nagoroi maga, po pasa m̃ata ki da: go Laban e pano, po liliu paki tokora aneana pano.
Currently Selected:
JENESIS 31: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
