JENESIS 32
32
1Go Yakob e pae napua aneana pano, go agelo maga ki Sup̃e eu sua e. 2Go ragi waina Yakob e punusi ra e noa, Tea waia eu pei taua ki Sup̃e: go e soso nagisa ni tokora wanogoe ki Mahanaim.
3Go Yakob e dip̃aki lua tea tautauana seara eu pea ki nia eu pa punusi taina Esau paki navanua ni Seir, navanua ki Edom. 4Go e dip̃aki da, po naga, Kuga noa ki nawota aginau Esau ega tapala waia; kuga naga, Tea suasua anigo Yakob, e noa dapala waia, e naga, A po m̃enaki‐atatoko Laban, po doko pa pa paki ragi waia: 5Go a peani kau maga, go ass maga go navata maga ni shiip go ni naninani, go tea suasua naanoai maga go tea suasua nagoroi maga: go a po dip̃aki lua naga aga noakisai nawota aginau asa, naga aga vap̃ai nasaup̃iaana namatam̃a. 6Go tea tautauana maga eu liliu umai punusi Yakob, po noa, Au pa punusi taim̃a Esau, go nae e umai naga ega sua ko, go naatam̃oli p̃onotia pati eu sikoti a umai. 7Go Yakob e mataku p̃arua go e pei tea riesokiana: go e dap̃otae naatam̃oli maga waina eu sikoti a doko, go navata maga ni shiip go ni naninani, go navata maga ni kau, go kamel maga, eu pei taua dua; 8Go e noa, Esau e pe umai punusi taua sikai, po atu ra, go taua sikai waina eu ko doko eu pe wo sava pano. 9Go Yakob e noa, Sup̃e ki mama Abraham, go Sup̃e ki mama Isaak, Yehovah O, waina ku noa ki nau, ku naga, P̃a liliu paki navanua anigo, po pa punusi namatarau anigo maga, go aga wo mari m̃ata ki‐go: 10Kinau a da p̃ia ki tea kiki sa ni nadodomiana maga, go ni nalomauana maga, waina ku po pisei ki tea suasua anigo asa; nalakena a puati tiko aginau duagoto Yordan waia; go ragi waia a po pei taua dua. 11P̃a vualua au, a pavara ni ko asa, padua ki nam̃elearu ni taigu, padua ki nam̃elearu ni Esau: nalakena kinau a matau ki nia, e pe umai po atu gami, ma tama p̃ilada maga. 12Go nigo ku noa, Aga wo mari m̃ata ki‐go lomau, po mari naworaworam̃a euga takiusi naworaone ni elau, waina e da pei tea veveana mau nalakena nalaapaana. 13Go e m̃enaki tokora wanogoe nap̃ogiana wanogoe; po puati seara ni tea maga waina e peani ra e pei nadodomiana sikai paki taina Esau; 14Naninani goroi p̃onotia dua go naninani anoai rualima dua, shiip goroi p̃onotia dua go shiip anoai rualima dua, 15Kamel waina eu pakasusu rualima dolu go natuda maga, kau goroi rualima pati go kau anoai rualima sikai, ass goroi rualima dua go ass natuda rualima sikai. 16Go e pitua ki da paki nam̃elearu ni tea suasua aneana maga, sara navata eu doko mamau; go e noa ki tea suasua aneana maga, e naga, Kuga tuagoto pea ki nau pano, go kuga mari namalopa sikai ega toko namawota ni navata go ni navata. 17Go e dip̃aki tea vea, e naga, Ragi waina taigu Esau ega wo sua ko, po pusuusu paki‐go, po noa, Ku pei tea ki sei? Go ku paki esava? Go tea maga waina eu pea ki‐go eu pei tea ki sei? 18Ragi wanogoe p̃a noa, Eu pei tea ki tea suasua anigo Yakob; e pei nadodomiana sikai waina e pei tea tip̃akiluaana umai paki nawota aginau Esau: go p̃a leo, nae me edaku ki gami. 19Go e moro dip̃aki kerua, go ketolu, go tea mamau puti waina eu dausi navata maga, po naga, Kuga vasa ki Esau ega tapala waia, ragi waina kuga wo pap̃ai a; 20Go kuga noa, Go p̃a leo, tea suasua anigo Yakob e edaku ki gami. Nalakena e noa, Aga wo mari nap̃op̃ona ega wia paki nau ki nadodomiana waina e pea ki nau pano, go aga wo edaku punusi naraena; mase ega wo piragi au. 21Go nadodomiana wanogoe e duagoto e pea ki nia pano: go nae e m̃enaki nap̃ogiana wanogoe m̃aleoputo ni tea laapa.
22Go e duleana nap̃ogiana wanogoe, po puati anagoroi dua, go tea suasua nagoroi dua, go natuna naanoai rualima sikai tamate sikai, po duagoto tokora ni natuagotoana ni Yabbok. 23Go e puati ra, po mari ra eu duagoto noaisara wanogoe, po mari tea maga waina e peani ra eu duagoto. 24Go Yakob e pei tea toropusiana e sikina doko; go naatam̃oli sikai go nae ero dum̃ada pau ra pa pa paki ragi ni namakotokotoana. 25Go ragi waina e punusi naga e da marimatua ki nia mau, e kisidogo navilana; go navila ni Yakob e maroe, ragi waina ero dum̃ada pau ra. 26Go e noa, P̃a suasua ki nau naga aga vano, nalakena e po pei ragi ni namakotokotoana. Go e noa, Ku pe ta pasa m̃ata ki nau mau, a pe wo da suasua ki‐go naga p̃a vano mau. 27Go e noa ki nia, e naga, Nagisam̃a sei? 28Go e naga, Yakob. Go e noa, Nagisam̃a ega wo da moro pei tea sosoana ki Yakob mau, ma ega wo pei tea sosoana ki Israel: nalakena ku po mari Sup̃e go naatam̃oli maga, po marimatua. 29Go Yakob e pusuusu paki nia, po naga, P̃a noasai nagisam̃a, a pavara ni ko asa. Go e noa, Ekasana ku pusuusu ki nagisagu? Go e pasa m̃ata ki nia tokora wanogoe. 30Go Yakob e soso nagisa ni tokora wanogoe ki Penuel: nalakena, e noa, A po punusi Sup̃e naraegu paki naraena, go namauriana aginau e pei tea mautiana. 31Go elo e sake p̃ai a ragi waina e surata duagoto Penuel, go e nika ki namaona. 32Nalakena tea wanogoe Israel natuna maga eu da gani natali ni nap̃ele ni namao waina e doko navila, pa pa paki naaleatia waia mau; nalakena e kisidogo navila ni Yakob natali ni nap̃ele ni namaona.
Currently Selected:
JENESIS 32: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
