EXODUS 23

Ibet Abaŋade Unen Ikpe

1KUTIBI nsu-nsu ikɔ: kusin ubɔk fo ye idiɔk owo man edi ntiense nnama. 2Kutiene ediwak owo edem uka udiɔk; kunyuŋ ubɔrɔ ke ikpe uwaha utiene ediwak owo edem, man akwaŋa ikpe: 3kunyuŋ ukpe ikpe ubuene ke ufure.

4Edieke afo okutde enaŋ asua, mme ass esie oyode asaŋa, kutre ndimum enye mfiak nsɔk enye. 5Edieke afo okutde ass asua fo, nte enye anade ke idak mbiomo esie, tre ndikpɔŋ (ass) nnɔ enye: tiene enye tat (ass oro).

6Kukwaŋa ikpe ubuene fo ke ikɔ esie. 7Kubuana ke nsu-nsu ikɔ, kunyuŋ uwot owo eke miduehe isop, ye edinen owo: koro mmendiyakke ikpe etebe idiɔk owo. 8Kunyuŋ ubɔ enɔ: koro enɔ otibide mme okut-usuŋ enyin, onyuŋ ɔyurɔde ikɔ ndinen owo. 9Kunyuŋ ufik esen owo koro mbufo emefiɔk esit esen owo: koro mbufo ekedide isen ke isɔŋ Egypt.

10Ndien tɔ iŋwaŋ fo ke ofuri isua itiokiet, nyuŋ taŋ mbuŋwum esie: 11edi ke ɔyɔhɔ isua itiaba yak enye ɔduɔk odudu, onyuŋ ana suŋ; kpaŋ mme ubuene obio mbufo ekpedia: ndien yak mme unam ikɔt eta se mmɔ esuhɔde. Nam kpa ntre ye iŋwaŋ vine fo, ye iŋwaŋ olive fo.

12Nam utom fo ke ofuri usen itiokiet, ndien ke ɔyɔhɔ itiaba dop; man enaŋ fo ye ass fo etie suŋ, man eyen ofin aŋwan fo ye esen owo enyuŋ eduɔk odudu.

13Mbufo enyuŋ ekpeme idem mbufo ke kpukpru se ndɔhɔde mbufo: ekunyuŋ ebaŋa enyiŋ Abasi efen: kuyak ekop enye ke inua fo.

14Nim usɔrɔ nɔ mi utim ikata ke isua. 15Nim usorɔ uyo eke leaven miduhe: ta uyo eke leaven miduhe ke usen itiaba, kpa nte emi ŋkowukde fi, ke ini emi odoride, ke ɔfiɔŋ Abib: koro ke esit ke afo ɔkɔwɔrɔ ke Egypt; ndien owo baba kiet okuwut mi idem ubɔk-ubɔk: 16ye usɔrɔ ukpeŋe ibokpot, akpan mbuŋwum utom fo, eke afo editɔde ke iŋwaŋ: ye usɔrɔ ubiom mbuŋwum ke utit isua, adaŋemi afo ataŋde utom fo ke iŋwaŋ ama. 17Yak kpukpru irenowo fo ewut Ɔbɔŋ Jehovah idem mmɔ utim ikata ke isua.

18Kuwa iyip uwa mi udian ke uyo eke leaven odude; kunyuŋ uyak ikpɔŋ unam usɔrɔ mi adaŋ esiere usen.

19Da akpa mbem-iso akpan mbuŋwum iŋwaŋ fo sɔk ke ufɔk Jehovah Abasi fo.

Kutem eyen ebot ke mmɔŋ-eba eka esie.

20Sese, ami mmɔŋ ndɔŋ angel ebem fi iso, nte ekpeme fi ke usuŋ, onyuŋ ada fi aka ke ebiet emi ŋkonimde. 21Kpeme idem fo bak enye, nyuŋ kop uyo esie, kuyat enye esit: koro enye midifenke mme idiɔk ido mbufo: koro enyiŋ mi odude enye ke idem. 22Koro afo ama otim okop uyo esie, onyuŋ anam kpukpru se ndɔhɔde; ndien nyedi asua mme asua fo, nyenyuŋ ntɔhɔ utɔk ye mmɔ eke etɔhɔde ye afo. 23Koro angel mi eyebem fi iso, eyenyuŋ ada fi aka ebiet mme Amorite, ye mme Hittite, ye mme Perizzite, ye mme Canaanite, ye mme Hivite, ye mme Jebusite; 24nyenyuŋ nsobo mmɔ. Kunuhɔ unɔ abasi mmɔ, kunyuŋ unam ŋkpɔ mmɔ, kunyuŋ unam nte mmɔ enamde; edi tim sobo mmɔ fap-fap, nyuŋ bom mme adaha-itiat mmɔ mbak-mbak. 25Mbufo enyuŋ enam ŋkpɔ Jehovah Abasi mbufo, ndien enye eyediɔŋ udia mbufo, ye mmɔŋ mbufo: ndien nyesioŋo udɔŋɔ ke otu mbufo mfep. 26Ndien aman ukeŋ, ye ada ididuhe ke isɔŋ fo: nyenyuŋ nnam ibat usen fo ɔyɔhɔ. 27Nyedɔŋ uteŋe mi ebem fi iso, nnyuŋ ntimere kpukpru owo emi afo edikade ebiet mmɔ; nnyuŋ nnam kpukpru mme asua fo ekpa edem enɔ fi. 28Nyenyuŋ ndɔŋ atat ebem fi iso, man ebin mme Hivite, ye mme Canaanite, ye mme Hittite ke iso fo efep. 29Ndibinke mmɔ mfep ke iso fo ke isua kiet; mbak isɔŋ edikabare ndon, mme mme unam ikɔt edinyuŋ ewak ekan fi. 30Nyebin mmɔ nsit-nsit ke iso fo mfep, tutu afo editɔt, onyuŋ ada isɔŋ oro enyene 31Nyenyuŋ nnim mme adaŋa fo, ɔtɔŋɔde ke Ididuot Inyaŋ tutu atuak ke Inyaŋ mme Philistine, onyuŋ ɔtɔŋɔde ke wilderness tutu osim ke Akpa: koro ndidade mme andiduŋ isɔŋ oro nsin fi ke ubɔk; ndien afo eyebin mmɔ ke iso fo efep. 32Kunam ediomi ye mmɔ, kunyuŋ unam ye mme abasi mmɔ. Kuyak mmɔ eduŋ ke isɔŋ fo, mbak mmɔ edisin fi edue mi: 33afo ama anam ŋkpɔ mme abasi mmɔ, iditreke ndidi afia eke omumde fi.

Currently Selected:

EXODUS 23: ENA

Highlight

Copy