EXODUS 24

Moses ye Mme Mbiowo Esɔŋɔ Ediomi Mmɔ ye Abasi ke Obot Sinai

1NDIEN enye ɔdɔhɔ Moses, ete, Dɔk tiene Jehovah, afo, ye Aaron, ye Nadab, ye Abihu, ye mbiowo Israel ata ye duop; mbufo enyuŋ eda nsan-nsan etuak ibuot. 2Ndien Moses ikpɔŋ-ikpɔŋ edisaŋa ekpere Jehovah, edi mmɔ eken ekusaŋa ekpere mbio oro ekunyuŋ etiene enye edɔk.

3Ekem Moses emen kpukpru ikɔ Jehovah, ye kpukpru mme item emi, edi editiŋ ɔnɔ kpukpru owo: ndien kpukpru owo ebɔrɔ uyo kiet, ete, Nnyin iyenam kpukpru ikɔ emi Jehovah ɔkɔdɔhɔde. 4Ndien Moses ewet kpukpru ikɔ Jehovah, onyuŋ abak edemere ke usenubɔk, anam itie-uwa ke ukot obot, ye ndaha duopeba, ekem ke mme esien Israel duopeba. 5Ndien enye ɔdɔŋ mkparawa nditɔ Israel, ndien mmɔ efɔp edifɔp uwa, enyuŋ ewa uwa emem ke enaŋ enɔ Jehovah. 6Ndien Moses ada ubak iyip kiet esin ke bason; onyuŋ ada ubak iyip eken esime ke itie-uwa. 7Ndien enye emen ŋwed ediomi eketiŋ ke utɔŋ kpukpru owo: ndien mmɔ edɔhɔ ete, Nnyin iyenam, inyuŋ ikop kpukpru se Jehovah ɔdɔhɔde. 8Ndien Moses ada iyip oro esime kpukpru owo ke idem, ete, Se iyip ediomi, emi Jehovah odiomide ye mbufo, nte kpukpru ikɔ emi edide.

9Edikem Moses ɔdɔk ye Aaron, ye Nadab, ye Abihu, ye mbiowo Israel ata ye duop; 10ndien mmɔ ekut Abasi Israel: ndien ŋkpɔ odu enye ke idak ukot, esem nte ŋkpɔ eke enamde ke sapphire, onyuŋ asana nte idem enyɔŋ. 11Ndien Enye imenke ubɔk esie ituk ikpɔ owo ufɔk Israel: mmɔ enyuŋ ekut Abasi, enyuŋ edia ŋkpɔ enyuŋ eŋwɔŋ.

12Ndien Jehovah ɔdɔhɔ Moses, ete, Dɔk tiene mi ke obot, nyuŋ du do: ndien nyenɔ fi itiat ŋwed, ye mbet, ye ewuhɔ emi ŋwetde, nditeme mmɔ. 13Ndien Moses adaha ke enyɔn, ye Joshua asaŋa-utom esie; ndien Moses ɔdɔk ke obot Abasi. 14Enye onyuŋ ɔdɔhɔ mbiowo, ete, Mbufo etie mi ebet nnyin, tutu nnyin ifiak itiene mbufo: ndien sese, Aaron ye Hur edu ye mbufo: owo ama enyene ikɔ, yak enye etiene mmɔ. 15Ntre ke Moses ɔdɔk obot, obubit enyɔŋ onyuŋ ofuk obot. 16Ndien ubɔŋ Jehovah oduŋ ke obot Sinai, obubit enyɔŋ onyuŋ ofuk enye ke ofuri usen itiokiet: ndien ekem ke ɔyɔhɔ usen itiaba, Enye etie ke ufɔt obubit enyɔŋ okot Moses. 17Ndien iso ubɔŋ Jehovah ebiet ikaŋ asakde ke enyɔŋ obot ke enyin nditɔ Israel. 18Ndien Moses okoduk ke ufɔt obubit enyɔŋ, ɔdɔk obot; Moses onyuŋ odu ke obot oro ke uwemeyo aba ye okoneyo aba.

Currently Selected:

EXODUS 24: ENA

Highlight

Copy