EXODUS 25

Mme Enɔ Emi Nditɔ Israel Enyenede Ndinɔ Abasi

1EKEM Jehovah ɔdɔhɔ Moses, 2ete, Dɔhɔ nditɔ Israel, ete, Yak mmɔ eda enɔ esɔk mi: kpukpru owo eke esit mmɔ onyimede ke mbufo edibɔ enɔ mi. 3Ndien emi edi enɔ eke mbufo edibɔde mmɔ, gold, ye silver, 4ye okpoho, ye awawa, ye purple, ye ididuot, ye eti linen, ye idet ebot, 5ye ikpa okukim eke etemde oyibe, ye ikpa badger, ye eto shittim, 6aran ke eke uŋwana, ye ufuɔ-ŋkpɔ ke eke aran-nyere, 7ye edifuɔŋ incense, ye itiat onyx, ye itiat eke esinde ke ephod, ye ke mbana ikpanesit. 8Ndien yak mmɔ enam edisana ebiet enɔ mi, man nduŋ ke otu mmɔ. 9Kpa nte emi ami ŋwutde fi kpukpru ŋkpɔ, kpa mbiet ebiet-iduŋ, ye mbiet kpukpru ŋkpɔ utom esie, kpasuk ntre ke mbufo edinam enye.

10Ndien yak mmɔ eda eto shittim enam ekebe: uniɔŋ esie ibio idomo-okuk ita ye ubak, ubom esie ibio idomo-okuk kiet ye ubak, ye idaha esie ibio idomo-okuk kiet ye ubak. 11Nyuŋ da ata eti gold fuk enye; ke esit ye ke edem ke afo edifuk enye, nnyuŋ nam mkpuk-mkpuk mben o-gold ke esit kanare kuk. 12Ndien tara gold nam mkpanuen inaŋ nɔ enye, sin ke ukot esie mbinaŋ; ndien mkpanuen iba edidu ke ŋkaŋ esie kiet, ye mkpanuen iba ke ŋkaŋ esie eken. 13Nyuŋ da eto shittim nam esaŋ, nyuŋ fuk mmɔ ke gold. 14Ndien sin mme esaŋ oro ke mkpanuen ke ŋkaŋ ekebe, man ebiom ekebe ke esit. 15Yak esaŋ oro esine ke mkpanuen ekebe; ekusio mmɔ efep ke esit. 16Ndien da ŋkpɔ-ntiense emi ndinɔde fi sin ke ekebe.

17Nyuŋ nam itie usio-isop ke ata eti gold: uniɔŋ esie ibio idomo-okuk ita ye ubak, ye ubom esie ibio idomo-okuk kiet ye ubak. 18Nyuŋ nam cherubim iba ke gold; dodom mmɔ nam ke mbuot itie usio-isop mbiba. 19Nyuŋ nam cherub kiet sin ke ibuot kiet ye cherub kiet ke ibuot eken: nam mme cherubim oro sin ke itie usio-isop ke mbuot esie mbiba. 20Ndien cherubim oro etiga mba mmɔ ke enyɔŋ, efuk itie usio-isop ke mba mmɔ; ndien kiet onyuŋ asak iso ese kiet; iso mme cherubim enyuŋ ese itie usio-isop. 21Ndien afo nyuŋ da itie usio-isop dori ke enyɔŋ ekebe; nyuŋ men ŋkpɔ-ntiense emi ndinɔde fi, sin ke ekebe. 22Ndien nyesobo ye afo do, nnyuŋ ntie ke enyɔŋ itie usio-isop, ke ufɔt mme cherubim iba emi (edorede) ke enyɔŋ ekebe ŋkpɔ-ntiense, nneme ye afo mbaŋa kpukpru se nditemede fi nnɔ nditɔ Israel.

23Nyuŋ da eto shittim nam okpokoro: uniɔŋ esie ibio idomo-okuk iba, ye ubom esie ibio idomo-okuk kiet, ye idaha esie ibio idomo-okuk kiet ye ubak. 24Nyuŋ da ata eti gold fuk enye, nyuŋ nam mkpuk-mkpuk mben o-gold ke esit kanade kuk. 25Ndien nam mben esie nte eka-ubɔk kanare kuk, nyuŋ nam mkpuk-mkpuk mben o-gold ke mben esie kanare kuk. 26Nyuŋ nam mkpanuen gold inaŋ nɔ enye, nyuŋ sin mkpanuen oro ke utɔŋ mbinaŋ emi edude ke ukot esie mbinaŋ. 27Mkpanuen oro ekpere mben, ke itie esaŋ eke edibiomde okpokoro ke esit. 28Ndien da eto shittim nam esaŋ, nyuŋ fuk mmɔ ke gold man eda mmɔ ebiom okpokoro. 29Ndien nam mme usan esie, ye mme ikpaŋ esie, ye mme cup esie, ye mme bowl esie, eke edade etɔhɔ (ediŋwɔŋ uwa): nam mmɔ ke ata eti gold. 30Ndien da uyo iso dori ke okpokoro ke iso mi kpukpru ini.

31Ndien da ata eti gold nam uwuk-utuenikaŋ; dodom utuenikaŋ nam; ukot esie, ye ekpat esie, ye mme cup esie, ye ekop esie, ye flower esie, esaŋa idem kiet. 32Ndien ŋkɔk itiokiet esiaha ke ŋkaŋ esie; ŋkɔk uwuk-utuenikaŋ ita ke ŋkaŋ esie kiet, ye nkɔk uwuk-utuenikaŋ ita ke ŋkaŋ esie eken; 33cup ita ebiet almond, ekop ye flower esaŋa ke ŋkɔk kiet; cup ita ebiet almond, ekop, ye flower, enyuŋ esaŋa ke ŋkɔk efen; ntem ke ŋkɔk mbitiokiet emi uwuk-utuenikaŋ asiahade, edisaŋa. 34Ndien cup inaŋ ebiet almond, ye ekop mmɔ, ye flower mmɔ, edu ke uwuk-utuenikaŋ. 35Yak esin ekop kiet ke idak ŋkɔk iba eke enye asiahade, ye ekop kiet ke idak ŋkɔk iba eke enye asiahade, ye ekop kiet ke idak ŋkɔk iba eke enye asiahade, ekem ke ŋkɔk mbitiokiet eke uwuk-utuenikaŋ asiahade. 36Ekop mmɔ ye ŋkɔk mmɔ esaŋa idem kiet ye enye: ofuri utuenikaŋ edidi se edomde ata eti gold enam. 37Nyuŋ nam utuenikaŋ esie itiaba; ndien domo mme utuenikaŋ esie, man eŋwaŋa edem emi asakde iso ese enye. 38(Nyuŋ nam) mme udiɔŋ utuenikaŋ esie, ye usin udiɔŋ utuenikaŋ esie, ke ata eti gold. 39Yak enam enye ye kpukpru ŋkpɔ emi ke talent ata eti gold kiet. 40Ndien tiŋ enyin nam mmɔ sin ke mbiet mmɔ emi ewutde fi ke enyɔŋ obot.

Currently Selected:

EXODUS 25: ENA

Highlight

Copy