EXODUS 26

Ebiet Iduŋ Abasi

1NDIEN ŋko nam ebiet-iduŋ ke ikpehe duop eti edifiak linen, ye ke awawa, ye ke purple, ye ke ididuot, nam mmɔ sin cherubim ubɔk-usɔ. 2Uniɔŋ ikpehe kiet edidi ibio idomo-okuk edip ye itiaita, ufot ikpehe kiet edinyuŋ edi ibio idomo-okuk inaŋ: kpukpru ikpehe esaŋa idomo kiet. 3Eda ikpehe ition ekɔt ɔtɔ kiet; enyuŋ eda ikpehe ition (eken) ekɔt ɔtɔ kiet. 4Nyuŋ da awawa nam ekpɔ, sin ke ibuŋ ikpehe kiet emi edide akpatre ke ɔtɔ emi ekɔtde mmɔ; nnyuŋ nam kpasuk ntre ke ibuŋ ikpehe emi edide akpatre ke udiana-akpa ɔtɔ emi ekɔtde mmɔ. 5Nam ekpɔ aba ye duop sin ke mben ikpehe kiet; nyuŋ nam ekpɔ aba ye duop sin ke mben ikpehe emi odude ke udiana-akpa ɔtɔ emi ekɔtde; man ekem ekpɔ kiet ye kiet. 6Ndien da gold nam ŋkɔp aba ye duop, kɔt ikpehe kiet ye eken ke ŋkɔp oro: ndien ebietiduŋ eyedi kiet.

7Ndien da idet ebot nam ikpehe, ete etie nte tent ke enyɔŋ ebiet-iduŋ oro: nam ikpehe duopekiet. 8Unioŋ ikpehe kiet edidi ibio idomo-okuk edip ye duop, ubom ikpehe kiet edinyuŋ edi ibio idomo-okuk inaŋ: ikpehe mboduopekiet esaŋa idomo kiet. 9Ndien kɔt ikpehe ition ke ɔtɔ kiet, ye ikpehe itiokiet ke ɔtɔ kiet, nyuŋ fut ɔyɔhɔ ikpehe itiokiet oro ke iso tent. 10Nyuŋ nam ekpɔ aba ye duop sin ke ibuŋ ikpehe kiet emi edide akpatre ke ɔtɔ ikɔt, ye ekpɔ aba ye duop ke ibuŋ ikpehe ke ɔtɔ udiana ikɔt. 11Ndien nam ŋkɔp okpoho aba ye duop, nyuŋ kpaha ŋkɔp ke ekpɔ oro, ndien yi tent ke ɔtɔ kiet, man edi kiet. 12Ndien yak ubak ikpehe emi osukde, kpa ibio ikpehe emi osukde, ɔkɔŋɔ ke edem ebiet-iduŋ. 13Ndien yak ibio idomo-okuk kiet ŋkaŋ emi, ye ibio idomo-okuk kiet ŋkaŋ eken, eke osukde, ke uniɔŋ ikpehe tent, ɔduɔ ke ŋkaŋ ebiet-iduŋ, ke ŋkaŋ emi ye ŋkaŋ eken, man efuk enye. 14Ndien da ikpa okukim eke etemde oyibe, nam ufuhɔ-ŋkpɔ kiet nɔ tent, nyuŋ da ikpa badger nam ufuhɔ-ŋkpɔ eke edoride ke enyɔŋ. 15Ndien da eto shittim nam obukpɔk ebiet-iduŋ eneŋere eda. 16Uniɔŋ obukpɔk edidi ibio idomo-okuk duop, ye ubara obukpɔk ibio idomo-okuk kiet ye ubak. 17Nam edet iba sin ke obukpɔk kiet, kiet ekem ye eken: ntem ke edinam ke kpukpru obukpɔk ebiet-iduŋ. 18Ntem ke afo edinam mme obukpɔk ebiet-iduŋ, obukpɔk edip esaŋa ke ŋkaŋ edem usuk-usuk. 19Nyuŋ da silver nam socket aba, sin ke idak obukpɔk edip oro: socket iba ke idak obukpɔk kiet, ke eke edet esie mbiba. 20Obukpɔk edip enyuŋ esaŋa ke ŋkaŋ ebiet-iduŋ eken, ese edem edere: 21ye socket silver mmɔ aba, socket aba ke idak obukpɔk kiet, ye socket aba ke idak obukpɔk efen. 22Nyuŋ nam obukpɔk itiokiet sin ke etak ebiet-iduŋ ke edem usop utin. 23Nyuŋ nam obukpɔk iba sin ke mme inuk ebiet-iduŋ ke etak edem mbiba. 24Mmɔ edidi ukem-ukem ke idak; ndien kpasuk ntre edidi ukem-ukem ke ibuot esie, esim akpa mkpanuen: mmɔ mbiba etie ntem; mmɔ edidi ke eke inuk mbiba. 25Ndien mmɔ edidi obukpɔk itiaita, ye socket silver mmɔ, kpa socket efurekiet, socket iba ke idak obukpɔk kiet, ye socket iba ke idak obukpɔk efen.

26Ndien nam bar eto shittim: nam ition nɔ mme obukpɔk ŋkaŋ ebiet-iduŋ kiet, 27nyuŋ nam bar ition nɔ mme obukpɔk ŋkaŋ ebiet-iduŋ eken, ye bar ition ke eke obukpɔk etak ebiet-iduŋ ke edem usop utin. 28Ndien ŋko ufɔt-ufɔt bar emi esinede ke ufɔt mme obukpɔk, edituak ibuot emi ye ibuot oko. 29Nyuŋ da gold fuk mme obukpɔk, nyuŋ nam mkpanuen mmɔ ke gold, ke eke itie mme bar: nyuŋ fuk mme bar ke gold. 30Ndien neŋere ebiet-iduŋ, kpa ke ido esie emi ewutde fi ke akamba obot oro.

31Ndien da awawa, ye purple, ye ididuot, ye eti edifiak linen, nam ukara: nam enye sin cherubim, ubɔk-usɔ ɔdɔk-ɔfɔŋ. 32Nyuŋ kɔŋ enye ke obubɔk shittim inaŋ eke ofukde gold, (ntok mmɔ edidi gold) eke enyuŋ ewukde ke socket silver inaŋ. 33Ndien kɔŋ ukara oro ke idak ŋkɔp; nyuŋ men ekebe ŋkpɔ-ntiense duk do ke edem ukara oro: ndien ukara oro onyuŋ abahare edisana ubet ke ata edisana ɔnɔ mbufo. 34Ndien kubi itie usio-isop ke ekebe ŋkpɔ-ntiense ke ata edisana ebiet. 35Nyuŋ diɔk okpokoro ke iso ukara, uwuk utuenikaŋ onyuŋ ekem ye okpokoro, ke ŋkaŋ ebiet-iduŋ edem usuk: nyuŋ diɔk okpokoro ke ŋkaŋ edem edere.

36Ndien da awawa, ye purple, ye ididuot, ye eti edifiak linen, nam ikpehe enyin-usuŋ ebiet-iduŋ, ke ubɔk-usɔ ɔdɔk-ɔfɔŋ. 37Nyuŋ nam obukpɔk eto shittim ition nɔ ikpehe emi, nyuŋ fuk mmɔ ke gold; ntok mmɔ edidi gold: nyuŋ tara okpoho nam socket ition nɔ mmɔ.

Currently Selected:

EXODUS 26: ENA

Highlight

Copy