EXODUS 28

Edisine Ŋkpɔ Mme Oku

1NDIEN afo sio Aaron eyen-uka, ye nditɔ-iren esie ŋko, ke otu nditɔ Israel, dian idem, man mmɔ eda oku mi, kpa Aaron, ye Nadab, ye Abihu, ye Eleazar, ye Ithamar nditɔ Aaron 2Nyuŋ nam edisana edisine-ŋkpɔ ubɔŋ ye uyai nɔ Aaron eyen-uka. 3Afo nyuŋ dɔhɔ kpukpru mbon eti ibuot, emi nsinde mmɔ spirit mi ke esit nyɔhɔ, ete, enam edisine-ŋkpɔ Aaron, man enam enye asana, man enye ada oku mi. 4Ndien edisine-ŋkpɔ emi ke mmɔ edinam: mbana-ikpanesit, ye ephod, ye ekura, ye ŋwet-ŋwet frock, ye mitre, ye ubɔp-isin; yak mmɔ enyuŋ enam edisana edisine-ŋkpɔ enɔ Aaron eyen-uka, ye nditɔ esie, man enye ada oku mi. 5Ndien yak mɔ ebɔ gold, ye awawa, ye purple, ye ididuot, ye eti linen.

6Ndien yak mmɔ eda gold, ye awawa, ye purple, ye ididuot, ye eti edifiak linen oro, enam ephod ke ubɔk-usɔ ɔdɔk-ɔfɔŋ. 7Enye edinyene afara iba eke ekɔtde ɔtɔ kiet, ke utit esie mbiba; ntem ke edikɔt enye. 8Ndien ŋko ubɔp-ephod emi odude enye ke esit, edidi ubɔk-usɔ kiet, ye idem kiet ye enye; ke gold ye awawa, ye purple, ye ididuot, ye eti edifiak linen. 9Ndien bɔ itiat onyx iba, nyuŋ kap enyiŋ nditɔ Israel sin mmɔ ke esit: 10enyiŋ mmɔ itiokiet ke itiat kiet, ye enyiŋ itiokiet emi esukde, ke itiat eken, nte mmɔ ekemanade. 11Da ubɔk-usɔ akap-itiat, nte ekapde seal, kap itiat mbiba oro, nte enyiŋ nditɔ Israel edide; nam mmɔ sin ke socket o-gold. 12Ndien da itiat iba oro dian ke afara ephod, (man edi) itiat eriti nditɔ Israel; ndien Aaron eyebiom enyiŋ mmɔ ke iso Jehovah, ke afara esie mbiba, ke ŋkpɔ eriti. 13Ndien nam socket o-gold; 14ye ŋkpɔkɔbi ata eti gold iba, nam mmɔ mfiaha-mfiaha, ubɔk-usɔ uruk, ndien da mfiaha-mfiaha ŋkpɔkɔbi oro tebe ke mme socket.

15Ndien nam mbana ikpanesit-ikpe, ubɔk-usɔ ɔdɔk-ɔfɔŋ; nam enye nte enamde ephod, da gold ye awawa, ye purple, ye ididuot, ye eti edifiak linen, nam enye. 16Enye edidi ukem-ukem, fut iba; uniɔŋ esie edidi ubɔk kiet, ye ubara esie ubɔk kiet. 17Nyuŋ sin itiat ke esit nte ekam esinde, ke udim itiat inaŋ: udim sardius, ye topaz, ye carbuncle, edidi akpa udim. 18Ndien udiana akpa udim edidi emerald, ye sapphire, ye diamond. 19Ɔyɔhɔ udim ita, jacinth, ye agate, ye amethyst. 20Ye ɔyɔhɔ udim inaŋ, beryl, ye onyx, ye jasper: esine ke socket o-gold ke ɔtɔ eke esinde mmɔ. 21Ndien itiat oro esaŋa ye enyiŋ nditɔ Israel, duopeba: ekem ye enyiŋ mmɔ, nte emi ekapde seal; kpukpru nte enyiŋ mmɔ esaŋade edidu ke esit, ekem ye mme esien duopeba. 22Ndien da ata eti gold nam mfiaha-mfiaha ŋkpɔkɔbi, ubɔk-usɔ uruk, tebe ke mbana-ikpanesit. 23Nyuŋ nam mkpanuen o-gold iba dian ke mbana-ikpanesit nyuŋ, sin mkpanuen o-gold iba oro ke mbuot mbana-ikpanesit mbiba. 24Nyuŋ tebe uruk gold iba oro ke mkpanuen iba, ke mbuot mbana-ikpan esit. 25Nyuŋ da mbuot iba uruk iba tebe ke socket iba oro, dian ke mme afara ephod ke iso. 26Ndien nam mkpanuen gold iba, sin mmɔ ke mbuot mbana-ikpan-esit mbiba, ke mben esie, emi odude ke ŋkaŋ ephod, ke edem. 27Nyuŋ nam mkpanuen gold iba, dian ke afara ephod mbiba ke isɔŋ, ke iso esie, ekpere isobo esie, ke enyɔŋ ubɔp-ephod. 28Ndien yak eda awawa erebin etebe mkpanuen mbana-ikpanesit ke mkpanuen ephod, man ana ke enyɔŋ ubɔŋ-ephod, ndien owo okutat mbana-ikpanesit efep ke ephod. 29Ndien Aaron eyebiom enyiŋ nditɔ Israel ke mbana-ikpanesit-ikpe ke esit esie, ke ini enye odukde ke edisana ebiet, man edi ŋkpɔ eriti ke iso Jehovah kpukpru ini.

30Ndien da Urim ye Thummim sin ke mbana-ikpanesit-ikpe; ndien mmɔ eyedoro Aaron ke esit, ke ini enye odukde ke iso Jehovah, ndien Aaron edibiom ikpe nditɔ Israel ke esit esie ke iso Jehovah kpukpru ini.

31Nyuŋ nam ofuri ekura ephod ke awawa. 32Ndien itɔŋ esie odu enye ke ufɔt; itɔŋ oro enyene ibuŋ ubɔk-usɔ ɔdɔk-ɔfɔŋ, akan okuk, ebiet itɔŋ ufuhɔ-ikpanesit ekɔŋ, man okuwaha. 33Nyuŋ nam pomegranate awawa ye purple ye ididuot ke ibuŋ esie, sin ke ibuŋ esie kanade kuk, nyuŋ sin ŋkanika gold ke ufɔt mmɔ kanade kuk. 34Ŋkanika gold kiet, ye pomegranate kiet, ŋkanika gold kiet, ye pomegranate kiet, ke ibuŋ ekura kanade kuk. 35Ndien Aaron edisine enye ke idem ke ini enye anamde ŋkpɔ; ndien eyekop uyo esie ke ini enye odukde ke edisana ubet ke iso Jehovah, ye ke ini enye ɔwɔrɔde ŋko, man enye okukpa.

36Nyuŋ nam ubak ata eti gold, nyuŋ kap enye nte ekapde seal: EDISANA ŊKPƆ JEHOVAH. 37Nyuŋ da awawa erebin tebe enye, man enye ana ke mitre; yak edian enye mitre ke iso. 38Yak enye onyuŋ ana Aaron ke ɔkpɔ-iso, man Aaron obiom isop edisana ŋkpɔ, emi nditɔ Israel edinimde ke edisana, ye eke kpukpru edisana enɔ mmɔ; ntem ke ana enye ke ɔkpɔ-iso kpukpru ini, man mmɔ enem Jehovah esit.

39Ndien da eti linen dɔk ŋwet-ŋwet frock; nyuŋ nam mitre ke eti linen; nyuŋ nam ubɔp-isin ubɔk-usɔ ɔdɔk-ɔfɔŋ.

40Nyuŋ nam frock ubɔŋ ye uyai nɔ nditɔ Aaron, nyuŋ nam ubɔp-isin nɔ mmɔ, 41Nyuŋ da mmɔ sine Aaron eyen-uka, ye nditɔ esie ŋko ke idem; ndien yet mmɔ aran ke idem, nyuŋ yɔhɔ mmɔ ubɔk, nyuŋ nam mmɔ esana man eda oku mi. 42Nyuŋ nam ɔfɔŋ-ukot linen nɔ mmɔ, man efuk iferi obukidem mmɔ, etɔŋɔ ke isin esim ifuhi. 43Ndien yak Aaron ye nditɔ esie esine mmɔ ke idem, ke ini mmɔ edukde ke tent esop, ye ke ini mmɔ edide ke itie-uwa ndinam ŋkpɔ ke edisana ubet, man ekudue isop, ekunyuŋ ekpa: eyedi nsinsi ewuhɔ ɔnɔ enye, ye nditɔ esie eke editienede enye ke edem.

Currently Selected:

EXODUS 28: ENA

Highlight

Copy