EXODUS 29

Edianare Aaron ye Nditɔ Esie Enim Enɔ Abasi

1NDIEN ŋkpɔ emi ke afo edinam ye mmɔ ndinam mmɔ esana, man eda oku mi: da abak enaŋ kiet, ye okukim erɔŋ iba eke efɔŋde ema, 2ye uyo eke leaven miduhe, ye obukpa uyo eke leaven miduhe, eke eyetde aran; nam mmɔ ke ata eti ndom wheat. 3Ndien sin mmɔ ke akpan kiet, nyuŋ da mmɔ ke akpan oro saŋa kpere, ye abak enaŋ, ye okukim iba oro. 4Ndien da Aaron ye nditɔ esie saŋa kpere enyin-usuŋ tent esop, nyuŋ yet mmɔ mmɔŋ. 5Ndien da edisine-ŋkpɔ oro, sine Aaron frock, ye ekura ephod, ye ephod, ye mbana-ikpanesit, nyuŋ da ubɔp-ephod kpaha enye: 6ndien yara enye mitre ke ibuot, nyuŋ da edisana diadem dian ke mitre. 7Ndien da aran nyere tɔhɔ enye ke ibuot, yet enye ntem.

8Ndien da nditɔ esie saŋa kpere, 9nyuŋ sine mmɔ frock. Nyuŋ kpaha mmɔ ubɔp-isin, Aaron ye nditɔ esie, nyuŋ yara mmɔ uyaribuot. Ndien itie oku edidi itie eke mmɔ ke nsinsi ewuhɔ; ntem ke afo ediyɔhɔ Aaron ye nditɔ esie ubɔk.

10Ndien da enaŋ oro di ke iso tent esop; ndien yak Aaron ye nditɔ esie eda ubɔk mmɔ edori ke ibuot enaŋ oro. 11Ndien wot enaŋ oro ke iso Jehovah, ke enyin-usuŋ tent esop. 12Nyuŋ da nnuenubɔk fo da iyip enaŋ oro tɔi ke nduk itie-uwa, ndien men kpukpru iyip ŋwaŋa ke ukot itie-uwa. 13Ndien da ofuri ikpɔŋ emi ɔfuhɔde nsia, ye caul emi edianade ke esit, ye ekput mbiba, ye ikpɔŋ emi ɔfuhɔde mmɔ, fɔp mmɔ ke itie-uwa. 14Ndien da unam enaŋ oro, ye ikpa esie, ye ifuɔ esie, fɔp ke ikaŋ ke edem nna: uwa idiɔk ido edi oro.

15Ndien da okukim kiet; ndien yak Aaron ye nditɔ esie eda ubɔk mmɔ edori okukim oro ke ibuot. 16Ndien wot okukim oro, nyuŋ da iyip esie, sime ke itie-uwa kan kuk. 17Ndien ŋko dianare okukim ndidu, nyuŋ yet nsia esie, ye nnuk esie, nyuŋ dori ke ndidu esie, ye ke ibuot esie. 18Ndien fɔp ofuri okukim oro ke itie-uwa: enye edi edifɔp uwa Jehovah: enye edi edinem utebe, uwa ikaŋ Jehovah.

19Ndien da okukim eken; yak Aaron ye nditɔ esie enyuŋ eda ubɔk mmɔ edori okukim oro ke ibuot. 20Ndien wot okukim, nyuŋ da iyip esie tɔi Aaron ke mben utɔŋ nnasia, ye nditɔ esie ke mben utɔŋ nnasia, ye ke nnuenubɔk obodom ubɔk nnasia mmɔ, ye ke nnuenukot obodom ukot nnasia mmɔ, nyuŋ sime iyip ke itie uwa kan kuk. 21Ndien da ubak iyip emi odorode ke itie-uwa ye eke aran nyere, sime Aaron, ye edisine-ŋkpɔ esie ye nditɔ esie, ye edisine-ŋkpɔ nditɔ esie nde; ndien enye eyesana, ye edisine-ŋkpɔ esie, ye nditɔ esie, ye edisine-ŋkpɔ nditɔ esie nde. 22Ndien da ikpɔŋ okukim, ye isim, ye ikpɔŋ emi ɔfuhɔde nsia, ye caul emi adianade ke esit, ye ekput mbiba, ye ikpɔŋ emi ɔfuhɔde mmɔ, ye afara nnasia: koro enye edide okukim eriyɔhɔ-ubɔk: 23nyuŋ da uyo kiet, ye obukpa uyo aran kiet, ye mfefere obukpa uyo kiet, ke uyo eke leaven miduhe, sio ke akpan emi anade ke iso Jehovah. 24Ndien men kpukpru sin Aaron ke ubɔk, ye ke ubɔk nditɔ esie; nyuŋ fuŋ mmɔ ke edifuŋ uwa ke iso Jehovah. 25Ndien bɔ mmɔ ŋkpɔ oro ke ubɔk, kɔfɔp ke itie-uwa kɔrɔ ke edifɔp uwa, ke edinem utebe ke iso Jehovah, enye edi uwa ikaŋ Jehovah. 26Ndien sio ikɔŋ-esit okukim ɔyɔhɔ-ubɔk Aaron, nyuŋ fuŋ enye ke edifuŋ uwa ke iso Jehovah: ndien enye eyedi udeme fo. 27Nyuŋ da ikɔŋ-esit edifuŋ uwa, ye ukot edimenere uwa, eke efuŋde, enyuŋ emenerede ke enyɔŋ, ke okukim ɔyɔhɔ-ubɔk, emi enyenede Aaron, ye emi enyenede nditɔ esie, nim ke edisana ŋkpɔ: 28ndien enye eyedi se Aaron ye nditɔ esie edibɔde nditɔ Israel ke nsinsi ewuhɔ: koro edide edimenere uwa: ndien eyebɔ nditɔ Israel edimenere uwa, esio ke uwa emem mmɔ, edimenere uwa eke mmɔ enɔde Jehovah.

29Ndien edisana edisine-ŋkpɔ Aaron eyenyene nditɔ esie eke editienede enye edem, man eyet mmɔ aran, enyuŋ eyɔhɔ mmɔ ubɔk ke esit. 30Yak eyen esie eke adade oku ke ibuot esie, esine mmɔ ke usen itiaba, enye emi edidukde ke tent esop, ndinam ŋkpɔ ke edisana ebiet. 31Ndien da okukim ɔyɔhɔ-ubɔk, tem unam esie ke edisana ebiet. 32Ndien Aaron ye nditɔ esie edida unam okukim oro, ye uyo eke odude ke akpan, eta ke enyin-usuŋ tent esop. 33Yak mmɔ enyuŋ eta ŋkpɔ oro edade esio isop, man eyɔhɔ mmɔ ubɔk, enyuŋ enam mmɔ esana: edi kuyak esen owo ata: koro ŋkpɔ oro edide edisana. 34Ndien edieke ubak unam ɔyɔhɔ-ubɔk, ye eke uyo oro, edaŋde tutu eyo esiere, men se isuhɔre fɔp ke ikaŋ; ekuta enye: koro enye edide edisana ŋkpɔ.

35Ndien ntem ke afo edida kpukpru se ntemede fi anam ɔnɔ Aaron ye nditɔ esie: yɔhɔ mmɔ ubɔk ke ofuri usen itiaba. 36Nyuŋ wa enaŋ uwa idiɔk ido kpukpru usen, ke usio-isop; nyuŋ nam itie-uwa asana ke erisio isop esie; nyuŋ yet enye aran, man onim enye ke edisana ŋkpɔ. 37Ke ofuri usen itiaba ke afo edisio isop itie-uwa, onyuŋ onim enye ke edisana ŋkpɔ; ndien itie uwa oro eyedi ata edisana; yak kpukpru owo eke etukde itie-uwa edi edisana.

38Ndien emi edi se afo ediwade ke itie uwa: nditɔ erɔŋ iba isua kiet kpukpru usen, kpukpru ini. 39Wa eyen erɔŋ kiet ke usenubɔk, nyuŋ wa eyen erɔŋ eken ke mbubreyo. 40Ndien omer eti ndom-uyo kiet, eke etɔhɔde editim aran ke pint ye ubak, ye wine ke pint ye ubak, ke ediŋwɔŋ uwa, esaŋa ye eyen erɔŋ kiet. 41Nyuŋ wa eyen erɔŋ eken ke mbubreyo, nam enye nte enamde inuak-udia usenubɔk, ye ediŋwɔŋ uwa esie, ke edinem utebe, ke uwa ikaŋ Jehovah. 42Emi edidi nsinsi edifɔp uwa ke ofuri emana mbufo, ke enyin-usuŋ tent esop, ke iso Jehovah; emi ndisobode ye mbufo do, man ntie do ndɔhɔ ikɔ ye afo. 43Ndien nyesobo do ye nditɔ Israel, ndien ubɔŋ mi eyenam enye asana. 44Nyenyuŋ nnim tent esop ke itie uwa ke edisana ŋkpɔ; nnyuŋ nnim Aaron ye nditɔ esie ke edisana, man eda oku mi. 45Nyenyuŋ nduŋ ke otu nditɔ Israel, nnyuŋ ndi Abasi mmɔ. 46Ndien mmɔ eyefiɔk ete ke ami ndi Jehovah Abasi mmɔ, emi ŋkosiode mmɔ ke isɔŋ Egypt, man nduŋ ke otu mmɔ: ami ndi Jehovah Abasi mmɔ.

Currently Selected:

EXODUS 29: ENA

Highlight

Copy