EXODUS 5

Moses ye Aaron Eka ke iso Pharaoh

1EKEM Moses ye Aaron edi edidɔhɔ Pharaoh, ete, Ntem ke Jehovah Abasi Israel ɔdɔhɔ, ete, Yak ikɔt mi eka, man mmɔ ekenam usɔrɔ enɔ mi ke wilderness. 2Ndien Pharaoh ɔdɔhɔ ete, Jehovah edi anie, eke ŋkopde uyo esie, nnyuŋ nyak Israel eka? 3Mfiɔkke Jehovah, ndinyuŋ nyakke Israel eka. Ndien mmɔ edɔhɔ ete, Abasi mme Hebrew okosobo ye nnyin: mbɔk, yak nnyin ida isaŋ usen ita ika ke wilderness, ikawa uwa inɔ Jehovah Abasi nnyin, mbak enye edida idiɔk udɔŋɔ, mme ofut etiene nnyin. 4Ndien edidem Egypt, ɔdɔhɔ mmɔ ete, Nsinam mbufo Moses ye Aaron esinde mbon emi ekpɔŋ utom mmɔ? mbufo eka mbiomo mbufo. 5Ndien Pharaoh ɔdɔhɔ, ete, Sese, mbon iŋwaŋ emi ke ewewak ke emi, ndien mbufo etre mmɔ mbiomo mmɔ.

6Ndien kpa usen oro Pharaoh owuk mme otuk mbio oro, ye mme etubom mmɔ, ete, 7Mbufo ekunɔ aba mbio oro nnyanyaŋa eke edade enam brick, nte akpa; eyak mmɔ eka ekeda nnyanyaŋa ke idem mmɔ 8Ndien ama edi ibat brick emi mmɔ ekam esinamde akpa, mbufo enim suk oro enɔ mmɔ; ekusio baba kiet: koro mmɔ efu ifu: oro esin mmɔ efiori ete, Yak nnyin ika ikawa uwa inɔ Abasi nnyin. 9Yak utom oro odobi mmɔ, man mmɔ enam ke esit; ekunyuŋ ekop ikɔ abiaŋa.

10Ndien mme otuk mbon oro, ye mme etubom mmɔ ewɔŋɔ eka ekedɔhɔ kpukpru owo, ete, Ntem ke Pharaoh ɔdɔhɔ, ete, Ndinɔŋɔ aba mbufo nnyanyaŋa. 11Mbufo eka ekeda nnyanyaŋa ke idem mbufo ke ebiet eke mbufo edikutde: edi idisioho baba esisit ke se mbufo enamde. 12Ndien kpukpru owo esuana ke ofuri isɔŋ Egypt, etetaŋ mbio ibokpot ke ibuot nnyanyaŋa. 13Ndien mme otuk mmɔ ekɔbɔ mmɔ, ete, Mbufo enam utom mbufo ema, kpa utom usen ke usen esie, kpa nte emi nnyanyaŋa okodude. 14Ndien ɔbɔŋ ndidaha nditɔ Israel, emi ikɔt Pharaoh emi etukde mmɔ ekedoride ete ese mmɔ eken, ete, enam didie mbufo mikamaha utom mbufo, mkpɔŋ, ye mfin, ke erinam brick nte akpa?

15Ndien ndidaha nditɔ Israel, edi ndiseme nnɔ enɔ Pharaoh, ete, Nsinam afo anamde ntem ye nnyin ifin fo? 16Ke inɔŋɔ nnyin ifin fo nnyanyaŋa, ndien mmɔ edɔhɔ nnyin, ete, Mbufo enam brick: ndien, sese, ke ebebɔŋ nnyin ifin fo; edi ikɔ enyene ikɔt fo. 17Ndien enye ɔdɔhɔ ete, mbufo edi ifu, ifu, ifu: oro esin mbufo edɔhɔ ete, Yak nnyin ika ikawa uwa inɔ Jehovah. 18Mbufo eka ndien, ekenam utom: koro midinɔŋɔ mbufo nnyanyaŋa, edi mbufo enɔ suk ibat brick. 19Ndien ndidaha nditɔ Israel ekut ete ke mmimɔ itie ke idiɔk itie, koro edɔhɔde ete, Mbufo ekusio baba kiet ke ibat brick mbufo eke kpukpru usen.

20Ndien mmɔ edisobo ye Moses ye Aaron emi edade ebet mmɔ ke ini mmɔ etode ke ebiet Pharaoh: 21enyuŋ edɔhɔ mmɔ ete, Jehovah osuk ese mbufo, onyuŋ ekpe ikpe: koro mbufo enamde nnyin itebe ke iso Pharaoh, ye ke iso ikɔt esie, enyuŋ esinde mmɔ ofut ke ubɔk ete ewot nnyin. 22Ndien Moses afiak etiene Jehovah, ete, Ɔbɔŋ, nsinam afo ɔdiɔkde ye mbon emi? 23Nsinam afo ɔdɔŋde mi utom? Koro toto nte ŋkaka ke ɔtɔ Pharaoh, nnyuŋ ndɔhɔ ke enyiŋ fo, enye ɔdɔdiɔk ye mbio emi; afo unyuŋ unyaŋake ikɔt fo baba.

Currently Selected:

EXODUS 5: ENA

Highlight

Copy