EXODUS 4

Abasi Ɔnɔ Moses Utibe Odudu Nte Idiɔŋɔ

1NDIEN Moses ɔbɔrɔ ete, Edi, sese, mmɔ idibuɔtke idem ye ami, idinyuŋ ikopke uyo mi: koro mmɔ eyedɔhɔ, ete, Jehovah ikowutke fi idem. 2Ndien Jehovah obup enye ete, Nsidi oro ke ubɔk fo? 3Ndien enye ete, Esaŋ. Ndien Enye ete, Men enye duɔk ke isɔŋ. Ndien enye emen esaŋ ɔduɔk ke isɔŋ, ndien esaŋ akabare edi urukikɔt; ndien Moses efehe ɔkpɔŋ enye. 4Ndien Jehovah ɔdɔhɔ Moses, ete Nyan ubɔk fo mum enye isim. Ndien enye anyan ubɔk esie omum urukikɔt, ndien urukikɔt akabare enye esaŋ ke ubɔk; 5man mmɔ enim ke akpanikɔ, ete ke Jehovah Abasi ete mmɔ, Abasi Abraham, ye Abasi Isaac, ye Abasi Jacob ama owut fi idem.

6Ndien Jehovah ɔtɔnɔ ntak ɔdɔhɔ enye, ete, Sin ndien ubɔk fo ke ikpanesit fo. Ndien enye esin ubɔk esie ke ikpanesit: ndien adaŋemi osiode enye, sese, ubɔk akabare enye akpa afia nte snow. 7Ndien enye ɔdɔhɔ ete, Tɔŋɔ ntak sin ubɔk fo ke ikpanesit fo. Ndien enye ɔtɔŋɔ ntak esin ubɔk ke ikpanesit esie; onyuŋ osio enye ke ikpanesit ŋko, ndien, sese, enye amakabare nte obukidem esie. 8Ama ekem, edieke mmɔ midibuɔtke idem ye afo, midinyuŋ ikopke uyo mbemiso idiɔnɔ oro, mmɔ eyebuɔt idem ye uyo udiana akpa idiɔŋɔ. 9Ndien ama ekem, edieke midibuɔtke idem ye uyo idem idiɔnɔ mbiba emi, minyuŋ ikopke uyo fo, ndien afo edida mmɔŋ ke akpa ɔduɔk ke obot: ndien mmɔŋ emi afo edidade ke akpa, eyekabare iyip ke obot.

10Ndien Moses ɔdɔhɔ Jehovah, ete, Mbɔk, Ɔbɔŋ mi, ami ndige owo udɔn-ikɔ, akananam, ye idem ini emi afo ɔdɔhɔde ye owo fo: koro ami ndobide inua, nnyuŋ ndobide edeme. 11Ndien Jehovah ɔdɔhɔ enye ete, Anie ɔnɔ owo inua? anie onyuŋ anam imum, ye inan, ye okut usuŋ, ye nnan? 12Nte idige ami Jehovah? Ka ndien, ami nyenyuŋ ndu ye inua fo, nnyuŋ nteme fi se afo edidɔhɔde. 13Ndien enye ete, Mbɔk, Ɔbɔŋ mi, da ubɔk owo eke afo edidɔŋde, dɔŋ utom.

14Ndien Jehovah ayat esit ye Moses, onyuŋ ɔdɔhɔ ete, Nte Aaron Levite idige eyen-uka? mmɔfiɔk nte enye otimde nditiŋ ikɔ. Ndien ŋko, sese, enye ɔmɔŋ owɔrɔ edi ndisobo ye afo: ndien, ke ini edikutde fi, enye eyedat esit. 15Ndien afo editiŋ ɔnɔ enye, onyuŋ ada ikɔ oro esin enye ke inua: ami nyenyuŋ ndu ye inua fo, ye inua esie, nnyuŋ nteme mbufo se mbufo edinamde. 16Enye eyenyuŋ ɔdɔhɔ ye mbio oro ɔnɔ fi: ke ntre ke enye editie nte inua fo, afo edinyuŋ etie nte Abasi ɔnɔ enye. 17Nyuŋ da esaŋ emi afo edidade anam mme idiɔŋɔ oro, kama ke ubɔk fo.

18Ndien Moses ɔnyɔŋ ke ebiet Jethro ete aŋwan esie, onyuŋ ɔdɔhɔ ete, Mbɔk, yak mi nnyɔŋ ntiene nditɔ-ete mi emi edude ke Egypt, nnyuŋ nse mme mmɔ esuk ededu uwem. Ndien Jethro ɔdɔhɔ Moses, ete, Ka ke ifure.

19Jehovah onyuŋ ɔdɔdɔ Moses ke Midian, ete, Fiak ka ke Egypt: koro kpukpru mmɔ oro ekeyomde uwem fo, emekpaŋa. 20Ndien Moses ada ŋwan esie ye nditɔ iren esie, odori ke ass, onyuŋ afiak aka ke isɔŋ Egypt. Moses onyuŋ akama esaŋ Abasi ke ubɔk esie. 21Jehovah onyuŋ ɔdɔhɔ Moses ete, Ke ini afo afiakde aka ke Egypt, tiŋ enyin ke kpukpru mme utibe ŋkpɔ emi nsinde fi ke ubɔk, nnyuŋ nnam mmɔ ke iso Pharaoh: edi ami nyesɔŋ enye esit, ndien enye idisanake mbon oro iyak. 22Ndien afo edidɔhɔ Pharaoh, ete, Ntem ke Jehovah ɔdɔhɔ, ete, Israel edi eyen mi, ye akpan mi: 23ndien ndɔhɔ fi, nte, Sana eyen mi yak, man enye anam ŋkpɔ ɔnɔ mi: ndien munyimeke enye ndiyak, sese, ami nyewot eyen fo, kpa akpan fo.

24Edikem ke usuŋ ke ebiet idaŋ ke okoneyo, Jehovah osobo ye enye, onyuŋ oyom enye ndiwot. 25Ndien Zipporah ada ikwa itiat, osibe eyen esie edut efep, ada onim enye ke ikpat, ete, Afo edi owo-ndɔ iyip mi, 26Ndien enye asana enye ayak: ndien enye (ŋwan) ɔdɔhɔ, ete, Owo-ndɔ iyip, kabaŋa mbobi.

27Ekem Jehovah ɔdɔhɔ Aaron ete, Ka kosobo ye Moses ke wilderness. Ndien enye aka okosobo ye enye ke obot Abasi onyuŋ otim enye inua. 28Ndien Moses emen kpukpru ikɔ Jehovah emi Enye ɔkɔdɔŋde enye utom, ye kpukpru mme idiɔŋɔ emi Enye eketemede enye, etiŋ ɔnɔ Aaron.

29Ndien Moses ye Aaron eka ekesop ye kpukpru mme ebio-owo nditɔ Israel: 30ndien Aaron etiŋ kpukpru ikɔ oro Jehovah ama ɔkɔdɔhɔ Moses, onyuŋ anam mme idiɔŋɔ oro ke iso kpukpru owo. 31Ndien kpukpru owo enim ke akpanikɔ: ndien adaŋemi mmɔ ekopde, ete ke Jehovah ɔmɔŋ ekere nditɔ Israel, onyuŋ ese ukut mmɔ, mmɔ enuhɔ, enyuŋ etuak ibuot.

Currently Selected:

EXODUS 4: ENA

Highlight

Copy