EXODUS 3

Abasi Okot Moses

1NDIEN Moses ɔbɔk ufene Jethro, oku Midian, ete ŋwan esie; ndien enye ada ufene oro aka ke edem wilderness, onyuŋ osim ke Horeb obot Abasi. 2Ndien angel Jehovah owut enye idem ke edeme-ikaŋ ke esit eto kiet; ndien ke enye okutde, sese, ikaŋ ke asak ke eto oro, edi itaha eto. 3Ndien Moses ete, Yak ŋkam ŋwaha ŋkese akwa ndise emi, anam didie eto emi mitaha ikaŋ. 4Ndien adaŋemi Jehovah okutde ete enye awaha edi ndise, Abasi etie ke ufɔt eto oro okot enye ete, Moses, Moses! Ndien enye ete, Se mi mi. 5Ndien enye ɔdɔhɔ ete, Kusaŋa ukpere ken; sio ikpa-ukot fo ke ukot fo fep: koro ɔtɔ oro afo adade ke esit edi edisana isɔŋ. 6Enye onyuŋ ɔdɔhɔ ŋko ete, Ami ndi Abasi usɔ, Abasi Abraham, ye Abasi Isaac, ye Abasi Jacob. Ndien Moses ofuk iso esie: koro enye efehede Abasi ndise.

7Ndien Jehovah ɔdɔhɔ ete, Mmotim ŋkut ukut ikɔt mi emi edude ke Egypt, mmonyuŋ ŋkop eseme mmɔ ebaŋa mme otuk mmɔ; koro mfiɔkde ubiak mmɔ; 8mmonyuŋ nsuhɔre ndisio mmɔ nditɔ Egypt ke ubɔk, ndinyuŋ nda mmɔ ŋwɔrɔ ke isɔŋ oro, ndɔk ŋka isɔŋ emi ɔfɔnde, onyuŋ aŋwaŋade, ke isɔŋ emi ɔfiɔrɔde mmɔŋ-eba ye aran-ɔkwɔk; ke ɔtɔ mme Canaanite, ye mme Hittite, ye mme Amorite, ye mme Perizzite, ye mme Hivite, ye mme Jebusite. 9Ndien, sese, eseme nditɔ Israel omosim mi: mmonyuŋ ŋkut ufik emi nditɔ Egypt efikde mmɔ. 10Di, ndien, nyedɔŋ fi utom ke ɔtɔ Pharaoh, man afo osio ikɔt mi, kpa nditɔ Israel, ke isɔŋ Egypt efep.

11Ndien Moses ɔdɔhɔ Abasi, ete, Ami ndi anie, eke ndikade ke ɔtɔ Pharaoh, nnyuŋ nsio nditɔ Israel ke Egypt mfep? 12Ndien Enye ɔdɔhɔ ete, Nditreke ndidu ye afo; ndien emi eyedi idiɔŋɔ fo, ete ke edi ami ndɔŋ fi utom: ke ini afo ama ada mbio oro ke Egypt ɔwɔrɔ, mbufo eyenam ŋkpɔ enɔ Abasi ke akamba obot emi.

13Ndien Moses ɔdɔhɔ Abasi, ete, Sese, adaŋemi ami ŋkade ŋkosim nditɔ Israel, nnyuŋ ndɔhɔ mmɔ nte, Abasi mme ete mbufo ɔdɔŋ mi ntiene mbufo; ndien mmɔ edɔhɔ mi ete, Enye ekere didie? ndidɔhɔ mmɔ didie? 14Ndien Abasi ɔdɔhɔ Moses ete, AMI NDUDU EMI NDUDU: enye onyuŋ ɔdɔhɔ ete, Ntem ke afo edidɔhɔ nditɔ Israel, ete, AMI NDUDU ɔdɔŋ mi ntiene mbufo.

15Ndien Abasi ɔtɔŋɔ ntak ɔdɔhɔ Moses ete, Ntem ke afo edidɔhɔ nditɔ Israel, ete, Jehovah Abasi mme ete mbufo, Abasi Abraham, ye Abasi Isaac, ye Abasi Jacob, ɔdɔŋ mi utom ke ɔtɔ mbufo; emi edi enyiŋ mi ke nsinsi, emi onyuŋ edi se edade eti mi ke kpukpu emana. 16Ka kosop ye mme ebio-owo Israel, nyuŋ dɔhɔ mmɔ ete, Jehovah Abasi mme ete mbufo, Abasi Abraham, ye eke Isaac, ye eke Jacob okowut mi idem, ete, Mmotim nse mbufo, ye se enamde mbufo ke Egypt: 17Mmonyuŋ ndɔhɔ nte, Nyesio mbufo ke ukut Egypt, nda ŋka isɔŋ mme Canaanite, ye mme Hittite, ye mme Amorite, ye mme Perizzite, ye mme Hivite, ye mme Jebusite, ke isɔŋ emi ɔfiɔrɔde mmɔŋ-eba ye aran-ɔkwɔk. 18Ndien mmɔ eyekop uyo fo: ndien afo ye mme ebio-owo Israel eka ke ɔtɔ edidem Egypt, ekedɔhɔ enye ete, Jehovah Abasi mme Hebrew okosobo ye nnyin: mbɔk, ndien, yak nnyin ida isaŋ usen ita ke wilderness, ikawa uwa inɔ Jehovah Abasi nnyin. 19Ndien ami mmɔfiɔk nte ke edidem Egypt idiyakke mbufo eka, ekpedi ke ɔkpɔsɔŋ ubɔk. 20Ndien nyenyanare ubɔk mi mmia Egypt ke kpukpru mme utibe ŋkpɔ mi emi ndinamde ke otu mmɔ: ndien amanam enye eyesana mbufo ayak. 21Nyenyuŋ nsin nditɔ Egypt enen iso ye ikɔt mi emi: ndien ekem ke adaŋemi mbufo edisaŋade, mbufo idisaŋake ubɔk-ubɔk: 22edi kpukpru iban eyebeŋe mbɔhiduŋ mmɔ, ye ŋwan eke oduŋde ke ufɔk mmɔ, ŋkpɔ silver, ye ŋkpɔ gold, ye edisine-ŋkpɔ: ndien mbufo eda mmɔ esine nditɔ-iren mbufo, ye nditɔ-iban mbufo ke idem: enyuŋ ebume ŋkpɔ Egypt.

Currently Selected:

EXODUS 3: ENA

Highlight

Copy