EXODUS 2

Ini Emana ye Ini Uyen Moses

1EKEM eyen ufɔk Levi kiet aka ɔkɔdɔ eyen Levi aŋwan. 2Ndien ŋwan oro oyomo, aman eyen-eren: ndien adaŋemi enye okutde nte eyen eyede, enye odip eyen ke ɔfiɔŋ ita. 3Ekem ke enye mikwe aba nte odipde eyen, enye ada ekebe nkukip, eyet enye bitumen ye itai, esin eyen ke esit; ndien emen enye aka okonim ke nnyanyaŋa ke mben akpa. 4Ndien eyen-eka esie aŋwan ada do nsan nsan, ete ifiɔk se idinamde enye.

5Ekem eyen Pharaoh aŋwan ɔsuhɔre aka uyere ke akpa; 6ndien nditɔ-iban esie esaŋa ke mben akpa; ndien ke ini enye okutde ekebe oro ke otu nnyanyaŋa, enye ɔdɔŋ ofin aŋwan esie akada edi. Ndien enye ɔkubɔre okukip, okut eyen oro; ndien, sese, eyen ke atua. 7Ndien, enye atua eyen mbɔm, onyuŋ ɔdɔhɔ, ete, Eyen mme Hebrew kiet edi emi. Ndien eyen-eka esie aŋwan ɔdɔhɔ eyen Pharaoh, ete, Nte ŋka ŋkokot edep kiet ke otu iban mme Hebrew nnɔ fi, man enye ɔbɔk eyen emi ɔnɔ fi? 8Ndien, eyen Pharaoh aŋwan ɔdɔhɔ enye, ete, Ka. Ndien eyen oro aka okokot eka eyen. 9Ndien eyen Pharaoh aŋwan ɔdɔhɔ enye ete, Da eyen emi ka kɔbɔk enye nɔ mi, ndien ami nyenɔ fi ŋkpɔ eyen utom fo. Ndien ŋwan oro ada eyen oro, onyuŋ ɔbɔk enye. 10Ekem eyen oro okpon, ndien aŋwan ada enye ɔsɔk eyen Pharaoh aŋwan, ndien eyen etie ye enye nte eyen esie. Ndien enye osio eyen enyiŋ Moses, ete, Koro ŋkosiode enye ke mmɔŋ.

11Edikem ke usen oro, ke Moses ama okokpon, enye ɔwɔrɔ aka ke ɔtɔ nditɔ-ete esie, ekese mbiomo mmɔ; ndien enye okut eyen Egypt kiet amiade eyen mme Hebrew, owo nditɔ-ete esie kiet. 12Ndien enye akabare ese edem emi, ye edem eken, onyuŋ okut nte owo ndomo kiet miduhe; ndien enye owot eyen Egypt oro, onyuŋ obuk enye ke ntan. 13Enye onyuŋ ɔwɔrɔ edem usen, ndien, sese, Hebrew iba eŋwana eŋwan; ndien enye ɔdɔhɔ andidue, ete, Nsinam afo amiade eyen usɔ? 14Ndien enye ɔdɔhɔ ete, Anie odori fi ete edi ɔbɔŋ ye ebiere-ikpe ke otu nnyin? Nte afo ɔmɔŋ oyom ndiwot mi, kpa nte okowotde eyen Egypt oro? Ndien Moses edige, ete, Emi! ke ŋkpɔ emi ayarare.

15Ekem, adaŋemi Pharaoh okopde ikɔ emi, enye oyom Moses ndiwot. Edi Moses efehe ɔbɔhɔ iso Pharaoh, aka okoduŋ ke isɔn Midian: ndien enye ɔsuhɔre etie do ke mben obube mmɔŋ. 16Ndien oku Midian enyene nditɔ-iban itiaba: ndien mmɔ edi edikoi mmɔŋ, esin ke ŋkpɔ eyɔhɔ. Man enɔ ufene ete mmɔ eŋwɔŋ. 17Ndien mme ekpeme-erɔŋ edi edibin mmɔ efep; edi Moses adaha ke enyɔŋ anyaŋa mmɔ, onyuŋ ɔnɔ ufene mmɔ mmɔŋ enwɔŋ. 18Ekem adaŋemi mmɔ esimde Reuel ete mmɔ, enye ɔdɔhɔ, mmɔ ete, Mbufo enam didie ewara enyɔŋ mfin emi? 19Ndien mmɔ edɔhɔ ete, Eyen Egypt kiet okosio nnyin mme ekpeme-erɔŋ ke ubɔk, onyuŋ okoi mmɔŋ nte ekemde ɔnɔ nnyin, onyuŋ ɔnɔ ufene nnyin eŋwɔŋ. 20Ndien enye ɔdɔhɔ nditɔ-iban esie, ete, Enye enye ndien? Nsinam mbufo ekpɔŋde owo oro ntem? mbufo ekot enye edi edidia ŋkpɔ. 21Ekem Moses onyime nditie ye owo oro: enye onyuŋ ada Zipporah eyen esie ɔnɔ Moses ɔdɔ. 22Ekem enye aman eyen-eren, ndien enye (Moses) osio eyen enyiŋ Gershom: koro enye ɔdɔhɔde, ete, Ami ndi esen owo ke esen idut.

23Edikem ke anyan ini oro edidem Egypt akpa: ndien nditɔ Israel eseme ufin mmɔ, enyuŋ etuaŋa; ndien eseme emi mmɔ esemede ufin mmɔ ɔdɔk osim Abasi. 24Ndien Abasi okop mmum mmɔ, Abasi onyuŋ eti ediomi emi enye okodiomide ye Abraham, ye Isaac, ye Jacob. 25Ndien Abasi ese nditɔ Israel, Abasi onyuŋ ɔfiɔk.

Currently Selected:

EXODUS 2: ENA

Highlight

Copy