EXODUS 1

Nditɔ Israel Ebɔ Ukut ye Ndutuhɔ ke Isɔŋ Egypt

1NDIEN mme mmɔ emi edi enyiŋ nditɔ Israel, emi eketienede Jacob eduk ke Egypt; kpukpru owo eduk ye ufɔk mmɔ. 2Reuben, ye Simeon, ye Levi, ye Judah, 3ye Isaachar, ye Zebulun, ye Benjamin, 4ye Dan, ye Naphtali, ye Gad, ye Asher. 5Ndien kpukpru mme ukpɔŋ emi eketode Jacob ke ŋkpatian-ukot edi ukpɔŋ ata ye udop: ndien Joseph odu ke Egypt. 6Ekem Joseph akpa, ye kpukpru nditɔ-ete esie, ye ofuri emana oro. 7Ndien nditɔ Israel etɔt, enyuŋ esiaha, enyuŋ ewak, enyuŋ esɔŋ eti-eti; ndien mmɔ eyɔhɔ ke isɔŋ oro.

8Ekem obufa edidem emi mifiɔkke Joseph, adaha ada ke Egypt. 9Ndien enye ɔdɔhɔ ikɔt esiemɔ, ete, Sese, obio nditɔ Israel ke ewak enyuŋ esɔŋɔ ekan nnyin. 10Mbufo edi ndien, nnyin ikari ŋkari ye mmɔ; mbak mmɔ ediwak, ndien ama ekem, ke ekɔŋ editibede, mmɔ edinyuŋ edian idem ye mme asua nnyin, enyuŋ eŋwana ekɔŋ ye nnyin, enyuŋ edaŋa ke isɔŋ emi. 11Ndien mmɔ edori mme etubom mbon utom, ete ese mmɔ, man efik mmɔ ke mbiomo mmɔ. Ndien mmɔ ebɔp obio unim-ŋkpɔ enɔ Pharaoh, kpa Pithom ye Raamses. 12Edi adaŋa nte efikde mmɔ, ntre ke mmɔ edediɔŋ ewak, enyuŋ etɔt. Ntem ke nditɔ Israel enyene mmɔ ndik. 13Ndien nditɔ Egypt esin nditɔ Israel enam utom ke ufik: 14enyuŋ enam uwem odoro mmɔ ke ɔkpɔsoŋ ufin, ke mbat, ye ke brick, ye ke kpukpru utom iŋwaŋ, ke ofuri utom mmɔ eke esinde mmɔ enam ke ufik.

15Ndien edidem Egypt ɔdɔhɔ mme omum iban Hebrew uman; emi enyiŋ kiet ekerede Shiphrah, enyiŋ enye eken onyuŋ ekere Puah: 16ndien enye ɔdɔdɔ, ete, Ke ini mbufo emumde iban Hebrew uman, enyuŋ esede ŋkpɔ uyere mmɔŋ, ama edi eyen-eren, mbufo ewot enye; edi ama edi eyen-aŋwan, ndien enye edidu uwem. 17Edi mme omum uman oro ebak Abasi, ndien inamke nte edidem Egypt ɔkɔdɔhɔde mmɔ, edi enim nditɔ-iren uwem. 18Ndien edidem Egypt okot mme emum uman oro edi, onyuŋ ɔdɔhɔ mmɔ, ete, Nsinam mbufo enamde ŋkpɔ emi, ke enim nditɔ-iren uwem? 19Ndien mme omum uman edɔhɔ Pharaoh, ete, Koro iban mme Hebrew mibietke iban Egypt: koro mmɔ edide kpraŋ-kpraŋ, enyuŋ eman eyen ke mme omum uman mikaisimke mmɔ kaŋa. 20Mmɔdo Abasi ɔfɔnde ido ye mme omum uman: ndien mbon oro ewak, enyuŋ esɔŋ eti-eti. 21Edikem, koro mme omum uman oro ebakde Abasi, enye anam ufɔk ɔnɔ mmɔ. 22Ndien Pharaoh owuk kpukpru ikɔt esiemɔ, ete, Mbufo emen kpukpru nditɔ-iren eke emanade, eduɔŋɔ ke akpa, edi enim kpukpru nditɔ-iban ke uwem.

Currently Selected:

EXODUS 1: ENA

Highlight

Copy