GENESIS 17

Idiɔŋɔ Ediomi Emi Abasi Akanamde ye Abram

1NDIEN adaŋa emi Abram osimde isua anaŋ ye efurenaŋ, Jehovah owut Abram idem esie, ete enye, Ami ndi Abasi Ibom, saŋa ke iso mi, nyuŋ fɔn ma. 2Nyenyuŋ nnim ediomi mi ke ufɔt mi ye afo, nnyuŋ nnam fi awak eti-eti. 3Ndien Abram ɔduɔ ke isɔŋ okibi iso esie: ndien 4Abasi ɔdɔhɔ enye ete, Ami, sese, ediomi mi odu ye afo, afo eyenyuŋ edi ete ediwak mme idut. 5Enyiŋ fo idinyuŋ ikereke aba Abram, edi enyiŋ fo edikere Abraham: koro nnimde fi ke ete ediwak idut. 6Nyenyuŋ nnam fi ɔtɔt eti-eti nnyuŋ nnam fi akabare edi idut, ndidem eyenyuŋ eto fi ke idem. 7Nyenyuŋ nnam ediomi mi ɔsɔŋɔ ada ye afo, ye ubon fo eke editienede fi ke emana mmɔ, ke nsinsi ediomi, nte ndi Abasi fo, ye eke ubon fo eke editienede fi. 8Nyenyuŋ nda isɔŋ emi afo edide esen owo ke esit, kpa ofuri isɔŋ Canaan nnɔ fi, ye ubon fo eke editienede fi, ke nsinsi udeme; ndien ami nyedi Abasi mmɔ.

9Abasi onyuŋ ɔdɔhɔ Abraham ete, Afo eyenyuŋ ekpeme ediomi mi, afo ye ubon fo eke editienede fi, ke emana mmɔ. 10Emi edi ediomi mi eke mbufo edikpemede, ke ufɔt mi ye mbufo, ye ubon fo eke editienede fi: nim kpukpru iren-owo ke otu mbufo mbobi. 11Mbufo enyuŋ esibe edut mbufo efep; ndien emi eyedi idiɔŋɔ ediomi ke ufɔt mi ye mbufo. 12Yak eyen usen itiaita ke otu mbufo ana mbobi, kpukpru iren owo ke emana mbufo; eke amanade ke ufɔk, eke enyuŋ edepde ke inyene, ye kpukpru isen owo eke midige oruk mbufo. 13Owo eke amanade ke ufɔk fo, ye eke edepde ke inyene fo, ekutre ndina mbobi: ndien ediomi mi eyedu mbufo ke obukidem nte nsinsi ediomi. 14Ndien ama edi owo edut emi misibeke enye edut ifep, yak esibe ukpɔŋ oro efep ke oruk esie; enye abiat ediomi mi.

15Ndien Abasi ɔdɔhɔ Abraham, ete, Ama edi Sarai ŋwan fo, kukot aba enyiŋ esie ete, Sarai, koro Sarah edide enyiŋ esie. 16Nyenyuŋ ndiɔŋ enye, nnyuŋ nnɔ fi eyen eke otode enye ke idem ŋko; nnyuŋ ndiɔŋ enye, ndien enye eyekabare edi eka idut; ndidem idut eyeto enye ke idem. 17Ndien Abraham ɔduɔ ke isɔŋ okubi iso esie, onyuŋ asak imam, ndien ɔdɔhɔ ke esit esie, ete, Nte eyen edimana ɔnɔ owo isua ikie? Nte Sarah, emi edide isua anaŋ ye duop, eyenyuŋ aman eyen? 18Ndien Abraham ɔdɔhɔ Abasi, ete, Ishmael akpakam odu uwem 19ke iso fo. Ndien Abasi ɔdɔhɔ ete, Sarah ŋwan fo iditreke ndiman eyen nnɔ fi, afo eyenyuŋ osio enye enyiŋ Isaac. Ami nyenyuŋ nnam ediomi mi ada ye enye ye ubon esie ŋko eke editienede enye edem, nte nsinsi ediomi. 20Mmonyuŋ ŋkop nnɔ fi ke ikɔ Ishmael: sese mmɔŋ ndiɔŋ enye, nnyuŋ nnam enye ɔtɔt, nnyuŋ nnam enye awak eti-eti, enye eyebon mbɔŋ duopeba, nyenyuŋ nnam enye edi akamba idut. 21Nyenyuŋ nnam ediomi mi ada ye Isaac, emi Sarah edimande ɔnɔ fi, ke adaŋa emi isua ebem eke edide. 22Ekem, Enye etre ndidɔhɔ ye enye, ndien Abasi ɔdɔk ɔkpɔŋ Abraham.

23Ndien Abraham ada Ishmael eyen esie, ye kpukpru nditɔ ufɔk esie ye kpukpru owo emi enye ekedepde ke inyene, kpukpru iren owo ke otu nditɔ ufɔk Abraham, onim mmɔ mbobi ke kpasuk usen oro Abasi ɔdɔhɔde ye enye. 24Abraham onyuŋ edi isua anaŋ ye efurenaŋ, 25ke ini enye anade mbobi. Ishmael eyen esie onyuŋ edi isua duopeta ke ini enye anade mbobi. 26Ke kpasuk usen oro, Abraham ye Ishmael eyen esie ena mbobi; 27kpukpru owo ufɔk esie, emi emanade ke ufɔk, emi enye okonyuŋ edepde ke inyene ye eyen esen owo, enyuŋ ena mbobi ŋko.

Currently Selected:

GENESIS 17: ENA

Highlight

Copy