GENESIS 18

Abasi Ɔŋwɔŋɔ Ndinɔ Abram Isaac

1EKEM Jehovah owut enye idem esie ke ɔtɔwɔk ofriyo Mamre: enye onyuŋ etie do, ke enyin usuŋ tent esie ke ufɔt uwemeyo; 2ndien enye emenere enyin esie okut, ndien, sese owo ita edade ekpere enye, ndien ke okutde, enye adaha ke enyin usuŋ tent okosobo ye mmɔ, ɔnuhɔ ke isɔŋ. 3Ndien enye ɔdɔhɔ ete, Ɔbɔŋ mi, edieke nnemde fi, mbɔk, kunyuŋ ukpɔŋ owo fo. 4Mbɔk yak eda ekpri mmɔŋ ediyet mbufo ukot, mbufo enyuŋ etie ke idak eto eduɔk odudu: 5ndien nyeda uyo esisit ndi, mbufo enyuŋ esɔŋ idem; ndien edinyɔŋɔ: koro edide emi esin ewaha etiene owo mbufo. Ndien mmɔ ete, Nam nte ɔdɔhɔde. 6Ndien Abraham awara aka ebiet Sarah ke tent, ete, Wara buen ata eti ndom uyo ke udomo ita, nyuŋ nam mfefere uyo. 7Abraham onyuŋ efehe aka ke ɔtɔ ufene, akada nsek eyen enaŋ eke ɔfɔnde, ɔnɔ akparawa kiet; ndien enye awara etem enye. 8Ndien enye ada mmɔŋeba eke abaride, ye mmɔŋeba eke eniŋede, ye eyen enaŋ oro eketemde, edinim mmɔ ke iso; ndien enye ada do ekpere mmɔ ke idak eto, ndien mmɔ edia.

9Ekem, mmɔ ebup enye, ete, Enye Sarah aŋwan fo? Ndien enye ete, Se enye mmɔ ke tent. 10Ndien enye ɔdɔhɔ, ete, Nditreke ndifiak ntiene fi ke adaŋemi isua akabarede; ndien, sese, Sarah ŋwan fo eyeman eyen-eren. Sarah ɔmɔŋ onyuŋ adada ke enyin usuŋ tent okop, enye onyuŋ odu Enye ke edem.

11Edi Abraham ye Sarah edi ŋkani, eka ke usɔŋ; ido iban ama onyuŋ etre ye Sarah. Ndien 12Sarah asak imam ke esit esiemɔ ete, Ke adaŋemi idem ememde mi, nte esit edinem mi, emi ɔbɔŋ 13mi ŋko edide akani? Ndien Jehovah ɔdɔhɔ Abraham ete, Nsinam Sarah asakde ntem, ete nte ami ndiman ke akpanikɔ ke 14ndide akani aŋwan? Nte ŋkpɔ ɔsɔŋ akan Jehovah? Ke ini emi enimde, nyefiak ntiene fi, ke ukabare isua, ndien Sarah eyenyene eyen. 15Ndien Sarah akaŋ ete, Ke imɔ isakke: koro ndik anamde enye, Ndien Enye ɔdɔhɔ ete, Idige ntre; ŋkɔm amasak. 16Ekem, mbon oro edaha ke enyɔŋ ewuk enyin ese Sodom: ndien Abraham asaŋa ye mmɔ akayak ke usuŋ.

17Ndien Jehovah ɔdɔhɔ, ete, Nte ndedip Abraham se ami nyomde ndinam; 18ndien Abraham iditreke ndidi akamba ye ɔkpɔsɔŋ idut, kpukpru mme idut ererimbot eyenyuŋ ekut mfɔn eke otode 19enye ke idem? Koro mmemek enye, kpaŋ enye ekpeteme nditɔ esie ye ufɔk esie eke editienede enye, ete ekpeme usuŋ Jehovah, ndinam se ifɔnde inyuŋ inende; kpaŋ Jehovah akpada kpukpru se ɔkɔdɔhɔde abaŋa Abraham ɔsɔk enye.

20Ndien Jehovah ɔdɔhɔ ete, Koro mfiori Sodom ye Gomorrah okponde eti, idiɔk-ŋkpɔ mmɔ onyuŋ 21odobide eti-eti, yak ŋkam nsuhɔre ŋkese mme mmɔ enenam kpukpru ŋkpɔ ke uyo mfiori emi osimde mi; ndien midige ntre, nyefiɔk. 22Ndien mbon oro ekabare ekpɔŋ ɔtɔ oro, eka ke Sodom: edi Abraham ada kaŋa ke iso Jehovah.

23Ndien Abraham asaŋa ekpere, ete, Nte afo eyenyuŋ osobo edinen owo ye mme idiɔk? 24Ndusuk edinen owo aba ye duop edu ke obio oro: nte afo eyenyuŋ osobo, udunyuŋ udahakedo unɔ ebiet oro, ubaŋa edinen owo aba ye duop eke edude ke esit? 25Nsa fo O! Ndinam ntem, ndiwot mmɔ eke enende ye mmɔ eke minenke: mmɔ eke enende ndinyuŋ ntie nte mmɔ eke minenke, nsa fo O! Nte Ebierikpe ofuri ererimbot idinamke se inende? 26Ndien Jehovah ɔdɔhɔ, ete, Mma ŋkut edinen owo aba ye duop, ke Sodom ke esit obio, nyedahado nnɔ ofuri ebiet mbaŋa mmɔ.

27Ndien Abraham ɔbɔrɔ, ete, Sese, mbɔk, mmodomo ndidɔhɔ ye Ɔboŋ mi, ndien ami ndi ntan ye ntɔŋ: 28mme edisuhɔ ition ke edinen owo aba ye duop oro; nte afo eyebiat ofuri obio abaŋa ition oro? Ndien enye ɔdɔhɔ, ete, Ndibiatke, ke mma ŋkut aba ye ition do. 29Ndien enye ɔtɔŋɔ ntak ɔdɔhɔ Enye, ete, Ndusuk edikut aba do. Ndien enye ete, Ndinamke mbaŋa aba oro. 30Ndien enye ɔdɔhɔ, ete, Mbɔk, esit okuyat Ɔbɔŋ mi, yak ndɔhɔ: mme edikut edip ye duop do. Ndien Enye ete, ndinamke, mma ŋkut edip ye duop do. 31Ndien enye ɔdɔhɔ, ete, Mbɔk, sese, ndotke nte ndɔhɔde ye Ɔbɔŋ mi: mme edikut edip do. Ndien enye ete, 32Ndibiatke mbaŋa edip. Ndien enye ɔdɔhɔ, ete, Mbɔk, esit okuyat Ɔbɔŋ mi, ndien nyedɔhɔ ini kiet emi: mme edikut duop do. 33Ndien enye ɔdɔhɔ, ete, Ndibiatke mbaŋa duop. Ndien Jehovah ɔnyɔŋ, ke adaŋoro ama ɔkɔdɔhɔ ye Abraham ama: Abraham onyuŋ afiak aka ke ebiet esiemɔ.

Currently Selected:

GENESIS 18: ENA

Highlight

Copy