LUKE 1
1
Angel Jehovah Etiŋ Abaŋa Emana John ye Jesus
1SIA ediwak owo ema ekesin ubɔk ndinam mbuk mbaŋa mme ŋkpɔ oro ekɔwɔrɔde esu ke otu nnyin; 2kpa nte mmɔ, emi ekedide mme ntiense toto ke eritɔŋɔ ye mme andikwɔrɔ ikɔ Abasi, ekayakde enɔ nnyin; 3sia mma ŋkɔtɔŋɔ ke eritɔŋɔ ntim ntiene nde kpukpru ŋkpɔ, eketie mi nde nteɔfɔn ndiwet ke itie ke itie nnɔ fi, ata eti Theophilus; 4man afo otim ɔfiɔk ete se ekekpepde fi edi ata akpanikɔ.
5Ke eyo Herod, edidem Judaea, oku kiet okodu, emi ekerede Zechariah, owo ŋka Abijah: ndien enye enyene ŋwan emi otode ke otu nditɔ Aaron, enyiŋ esie onyuŋ ekere Elizabeth. 6Mmɔ mbiba enyuŋ edi edinen ke enyin Abasi, esaŋa ke kpukpru mbet ye mme ewuhɔ Jehovah, enana ndo. 7Ndien mmɔ inyeneke eyen, koro Elisabeth edide ada; mmɔ mbiba enyuŋ esɔŋ.
8Edikem, ke ini Zechariah anamde utom itie oku ke iso Abasi ke iduɔk ŋka esie, 9nte ido mme oku edide, afia ɔwɔrɔ enye ndiduk ke temple Jehovah ndifɔp incense; 10ofuri otu owo enyuŋ ebɔŋ akam ke okure ke ini ufɔp-incense. 11Ndien angel Jehovah ɔbiɔŋɔre enye ke iso, ada ke itie ufɔp-incense ke ubok nnasia. 12Ke ini Zechariah okutde, esit otimere enye, ndik onyuŋ anam enye. 13Edi angel ɔdɔhɔ enye ete, Kufehe ndik, Zechariah; koro ema ekop mkpe-ubɔk fo; ndien ŋwan fo Elizabeth eyeman eyen eren ɔnɔ fi, afo eyeyuŋ osio enye enyiŋ John. 14Ndien afo eyenyene inemesit ye idaresit; ediwak owo eyenyuŋ edara emana esie. 15Koro enye eyekpon ke iso Jehovah; idiŋwɔŋke wine ye ɔkpɔsɔŋ mmin; eyenyuŋ ɔyɔhɔ ye Edisana Spirit toto ke emana esie; 16enye eyenyuŋ anam ediwak nditɔ Israel ekabare etiene Jehovah Abasi mmɔ. 17Ndien enye eyeda spirit ye odudu Elijah ebem Enye (Messiah) iso, man enye akabare esit mme ete ɔnɔ nditɔ, onyuŋ akabare mbon nsɔŋibuot anam mmɔ esaŋa ke ɔniɔŋ ndinen owo; onyuŋ anam mmɔ emi ekenimde enɔ Ɔbɔŋ ebeŋe idem ebet Enye. 18Zehariah ɔdɔhɔ angel ete, Ndida nso mfiɔk emi? koro ami ndide ebiowo, ŋwan mi onyuŋ ɔsɔŋde. 19Ndien angel ɔbɔrɔ enye ete, Ami ndi Gabriel, emi ndade ke iso Abasi; ekenyuŋ edɔŋ mi ete ntiŋ nnɔ fi, nnyuŋ mbuk eti mbuk emi nnɔ fi. 20Ndien sese, afo eyedi imum, udunyuŋ ukemeke nditiŋ ikɔ, tutu osim usen eke ŋkpɔ emi edisude, koro mukonimke ikɔ mi ke akpanikɔ, emi edisude ke edikem ini mmɔ. 21Edi mbio-obio ke ebebet Zacharias, enyuŋ eyik adaŋa ini nte enye ebigide ke temple. 22Edi ke adaŋemi enye ɔwɔrɔde, ikemeke nditiŋ ikɔ nnɔ mmɔ: ntre ke mmɔ efiɔk ete, enye ama okut ŋkukut ke temple: ndien enye ada ibuot anam idiɔŋɔ ɔnɔ mmɔ, onyuŋ etie imum. 23Edikem ke adaŋemi mme usen erida oku esie ekurede, enye ɔnyɔŋ ufɔk.
24Ke mme usen oro ema ekebe, Elisabeth ŋwan esie oyomo, onyuŋ odibe ɔfiɔŋ ition; 25onyuŋ ɔdɔhɔ ete, Ntem ke Jehovah akanam ye ami ke usen emi Enye osukde enyin ese mi, ndimen but mi ke otu owo mfep.
26Edi ke ɔyɔhɔ ɔfiɔŋ itiokiet Abasi ɔdɔŋ angel Gabriel utom. 27Ke obio Galilee emi ekerede Nazareth, etiene eyen-aŋwan, emi ekedade enɔ owo ufɔk David emi ekerede Joseph ke ndɔ; enyiŋ eyen-aŋwan oro ekere Mary. 28Ndien angel oduk etiene enye, onyuŋ ɔdɔhɔ ete, Mmɔkɔm fi, afo emi enyenede akwa mfɔn-iso, Jehovah odu ye afo. 29Edi ikɔ oro otimere Mary esit eti-eti, enye onyuŋ ekere ke esit esie se oruk ekɔm oro ɔkpɔwɔrɔde. 30Ndien angel ɔdɔhɔ enye ete, Kufehe ndik, Mary: koro afo ama okut mfɔn-iso ke iso Abasi. 31Ndien sese, afo eyeyomo, onyuŋ aman eyeneren, onyuŋ osio Enye enyiŋ JESUS. 32Enye eyekpon, eyenyuŋ ekere Eyen Andikoŋ-ŋkan; Jehovah Abasi eyenyuŋ ɔnɔ Enye ebekpo ete Esie David: 33Enye eyeda ubɔŋ ufɔk Jacob ke nsinsi; Ubɔŋ Esie idinyuŋ ikureke. 34Edi Mary ɔdɔhɔ angel ete, Ŋkpɔ emi edikeme didie ndisu, sia mmenyeneke ebe? 35Ndien angel ɔbɔrɔ enye ete, Edisana Spirit eyedoro fi ke idem, odudu Andikoŋ-ŋkan eyeyuŋ ofuk fi: mmɔdo se idimanade eyekere Edisana, Eyen Abasi. 36Ndien sese, Elisabeth iman fo, enye ŋko omoyomo eyeneren ke usɔŋ esie, ndien emi edi ɔyɔhɔ ɔfiɔŋ itiokiet ye enye emi ekokotde ada. 37Koro ikɔ baba kiet eke otode Abasi idinanake odudu. 38Mary ete, Sese, ofin-aŋwan Jehovah; akpakam osu ɔnɔ mi kpa nte uyo fo edide. Ekem angel adaha ɔkpɔŋ enye.
39Edi ke mme usen oro Mary adaha ke enyɔŋ ke usɔp aka ke obio Judah kiet, ke edem obot-obot; 40onyuŋ oduk ke ufɔk Zecharias ɔkɔm Elizabeth. 41Edikem, ke ini Elisabeth okopde ekɔm Mary, eyen ɔfrɔ ke idibi esie; ndien Elizabeth ɔyɔhɔ ye Edisana Spirit, 42onyuŋ ofiori ke ɔkpɔsɔŋ uyo, ete, Ɔfɔfɔn ɔnɔ fi ke otu iban, onyuŋ ɔfɔfɔn ɔnɔ mfri idibi fo. 43Ke ntak ewe ɔwɔrɔ ntem ɔnɔ mi, ete eka Ɔbɔŋ mi ekpedi edise mi? 44Koro sese, uyo ekɔm fo okododuk mi utɔŋ, eyen ɔfrɔ mi ke idibi ɔnɔ idaresit. 45Onyuŋ ɔfɔfɔn ɔnɔ ŋwan emi onimde ke akpanikɔ; koro mme ŋkpɔ oro Jehovah eketiŋde ɔnɔ enye eyesu. 46Ndien Mary ɔdɔhɔ ete,
Ukpɔŋ mi ke okpono Jehovah,
47Spirit mi omonyuŋ adara ke Abasi Andinyaŋa mi.
48Koro Enye ekesede usuhɔre-itie ofin-aŋwan Esie.
Koro, sese, ɔtɔŋɔde ke emi kpukpru emana eyedɔhɔ ete, Ɔfɔfɔn ɔnɔ mi.
49Koro Enye emi enyenede odudu ama anam ikpɔ ŋkpɔ ɔnɔ mi:
Enyiŋ Esie onyuŋ edi Edisana.
50Mbɔm Esie onyuŋ ana ɔnɔ kpukpru emana,
Ɔnɔ mmɔ emi ebakde Enye.
51Enye akada ubɔk Esie ayarare odudu;
Enye akasuan mbon ntaŋidem ke ekikere esit mmɔ.
52Enye ekemen mbɔŋ efep ke ebekpo mmɔ,
Onyuŋ ofori mmɔ emi ekpride.
53Enye akada nti ŋkpɔ ɔyuhɔ mmɔ emi biɔŋ ɔdɔŋde,
Okonyuŋɔdɔŋ mbon-inyene enyɔŋɔ ubɔk-ubɔk.
54Enye akanyaŋa Israel owo Esie,
Man Enye eti mbɔm Esie,
55(Kpa nte Enye eketiŋde ɔnɔ mme ete nnyin)
Mbɔm emi Enye atuade Abraham ye nditɔ esie ke nsinsi.
56Mary adaŋ ye enye ŋkpɔ nte ɔfiɔŋ ita, ndien ɔnyɔŋ ufɔk.
57Ekem osim ini emi Elizabeth edimande eyen, ndien enye aman eyeneren. 58Mbɔhiduŋ ye iman esie enyuŋ ekop ete, Jehovah ama anam mbɔm Esie okpon ɔnɔ enye; mmɔ enyuŋ edara ye enye. 59Ekem ke ɔyɔhɔ usen itiaita mmɔ edi edinim eyen mbobi; ndien mmɔ emɔŋ edisio enye enyiŋ ete esie Zechariah. 60Edi eka esie ɔbɔrɔ ete, baba; enye edikere John. 61Ndien mmɔ edɔhɔ enye ete, Baba owo kiet ke oruk fo ikereke enyiŋ oro. 62Edi mmɔ enam idiɔŋɔ ebup ete esie enyiŋ eke enye oyomde esio enye. 63Enye ete enɔ imɔ itiat-ŋwed, onyuŋ ewet ete, Enyiŋ esie edi John. 64Ndien idem akpa mmɔ kpukpru. Idaha oro inua ye edeme esie atara, enye onyuŋ etiŋ ikɔ otoro Abasi. 65Ndik omum kpukpru mbɔhiduŋ mmɔ: mmɔ enyuŋ esuan mbuk kpukpru ŋkpɔ oro ke edem obot-obot Judaea. 66Ndien kpukpru owo eke ekopde emum mbuk oro ekama ke esit, ete, Nso oruk owo ke eyen emi edidi? Koro ubɔk Jehovah ododu ye enye.
67Ekem Zechariah ete esie ɔyɔhɔ ye Edisana Spirit, enye onyuŋ etiŋ nte prophet, ete,
68Itoro enyene Jehovah Abasi Israel;
Koro Enye emedi ndise ikɔt Esie, onyuŋ afak mmɔ;
69Onyuŋ anam nduk erinyaŋa otibe ɔnɔ nnyin
Ke ufɔk owo Esie David,
70(Kpa nte Enye akadade inua nti prophet Esie etiŋ toto ke eritɔŋɔ ererimbot),
71Ndinyaŋa nnyin nsio ke ubɔk mme asua nnyin, ye ke ubɔk kpukpru mmɔ emi esuade nnyin:
72Nditua mme ete nnyin mbɔm,
Ndinyuŋ nti edisana ediomi Esie,
73Uŋwɔŋɔ oro Enye ɔkɔŋwɔŋɔde ɔnɔ Abraham ete nnyin,
74Ete, ke ima isio nnyin, ke ubɔk mme asua nnyin, iyeyak nnyin
Inam ŋkpɔ inɔ Imɔ ke ifure,
75Ke edisana ido ye edinen ido ke iso Imɔ ke ofuri uwem nnyin.
76Edi afo, eyen mi, eyekere prophet Andikoŋ-ŋkan:
Koro afo eyebem Ɔbɔŋ iso ndidiɔŋ usuŋ Esie;
77Ndinɔ ikɔt Esie ifiɔk erinyaŋa
Ke erifen mme idiɔk-ŋkpɔ mmɔ
78Oto ke esit mbɔm Abasi nnyin,
Emi esinde usiere oto ke enyɔŋ edisim nnyin,
79Ndiyama nnɔ mmɔ eke etiede ke ekim ye mfut mkpa;
Nditeme ukot nnyin ndiduk ke usuŋ emem.
80Edi eyen oro ɔkɔri, onyuŋ okop idem ke spirit; onyuŋ oduŋ ke desert tutu osim usen eke eyararede enye enɔ Israel.
Currently Selected:
LUKE 1: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
