LUKE 2

Emana Jesus

(Mt 1.18-25)

1EDIKEM ke mme usen oro, Caesar Augustus owuk ewuhɔ, ete, ewet enyiŋ kpukpru ekondo esin ke ŋwed. 2Emi edi akpa eriwet enyiŋ owo nsin ke ŋwed, ke ini Quirinius edide andikara Syria. 3Ndien kpukpru owo eka ke obio mmɔ kiet kiet ndisin enyiŋ ke ŋwed. 4Joseph ŋko oto ke obio Nazareth, ke Galilee, ɔdɔk aka ke Judaea, ke obio David emi ekerede Bethlehem, koro enye edide owo ufɔk ye oruk David, ndisin enyiŋ esie ke ŋwed; 5Mary emi ekadade enɔ enye ke ndɔ, emi ekperede ndiman eyen, onyuŋ asaŋa ye enye. 6Edikem, ke adaŋemi mmɔ edude do, ekem usen eke enye edimande eyen. 7Ndien enye aman akpan esie; onyuŋ ada ɔfɔŋ awaŋ Enye ke idem, onyuŋ onim Enye ke usin-udia ufene; koro itie miduhe inɔ mmɔ ke ufɔk-isen-owo.

8Ndien mme ekpemerɔŋ edu ke edem oro, emi etiede ke iŋwaŋ ekpeme erɔŋ mmɔ ke okoneyo. 9Ndien angel Jehovah edi edikpere mmɔ, ubɔŋ Jehovah onyuŋ ayama akan mmɔ okuk: ndien ndik anam mmɔ eti-eti. 10Angel onyuŋ ɔdɔhɔ mmɔ ete, Ekufehe ndik; koro sese, mmada eti mbuk akwa idaresit, eke edinyenede kpukpru owo, nsɔk mbufo; 11koro Andinyaŋa, emi edide Christ Ɔbɔŋ, amana ɔnɔ mbufo mfin ke obio David. 12Emi onyuŋ edi idiɔŋɔ eke enɔde mbufo; mbufo eyekut nsek-eyen emi ewaŋde ke ɔfɔŋ nte anade ke ebiet usin-udia ufene. 13Ndien idaha oro udim mbon heaven edu ye angel oro; mmɔ enyuŋ etoro Abasi, ete,

14Uboŋ enyene Abasi ke ata enyɔŋ.

Emem onyuŋ odu ke isɔŋ ke otu owo emi Enye enende iso ye mmɔ.

15Edikem ke ini mme angel ema ekadaŋa ekpɔŋ mmɔ enyɔŋ ke heaven, mme ekpemerɔŋ edɔhɔ kiet eken ete, Eyak nnyin ika ke Bethlehem ikese ŋkpɔ emi okotibede, emi Jehovah asiande nnyin. 16Mmɔ enyuŋ ewara eka, enyuŋ ekut Mary ye Joseph, ye nsek-eyen nte anade ke usin-udia ufene. 17Edi ke ini mmɔ ekutde ŋkpɔ emi, mmɔ ebuk se eketiŋde enɔ mmɔ ebaŋa eyen emi. 18Ndien kpukpru mmɔ emi ekopde edu ke mkpa-idem kabaŋa ŋkpɔ eke mme ekpemerɔŋ etiŋde enɔ mmɔ. 19Edi Mary omum kpukpru ŋkpɔ emi akama, onyuŋ ekere mmɔ ke esit esie. 20Ndien mme ekpemerɔŋ efiak enyɔŋɔ, ekpono enyuŋ etoro Abasi kabaŋa kpukpru ŋkpɔ oro mmɔ ekokopde enyuŋ ekutde, kpa nte eketiŋde enɔ mmɔ.

21Ke ini ekemde usen itiaita emi enyenede ndinim Eyen mbobi, mmɔ esio Enye enyiŋ Jesus, kpa enyiŋ oro angel okosiode Enye ke mika-iyomoke Enye kaŋa.

22Ke adaŋemi mme usen erinam mmɔ esana ekemde, nte ibet Moses etemede, mmɔ eda Eyen edi ke Jerusalem, ndiyak nnɔ Jehovah (nte ewetde ke ibet Jehovah ete, 23Kpukpru eyeneren emi esirerede itie-uman edikere se edianarede enɔ Jehovah), 24ndinyuŋ ŋwa uwa, nte ibet Jehovah etemede, mbomo ŋkuku iba, me nditɔ ibiom iba. 25Ndien sese, owo kiet odu ke Jerusalem emi ekerede Simeon; owo emi edi edinen owo emi eteŋede Abasi, onyuŋ etiede ebet ndɔŋesit Israel: ndien Edisana Spirit odoro enye ke idem. 26Edisana Spirit ama onyuŋ ayarare ɔnɔ enye ete enye idikpaha tutu enye okut Christ emi Jehovah ɔdɔŋde. 27Ndien enye asaŋa ke Spirit oduk ke temple: ekem ke adaŋemi ete ye eka edade Eyen, kpa Jesus, eduk, man enam ye Enye nte ido ibet edide, 28Simeon emen Enye akama ke ubɔk, onyuŋ otoro Abasi, ete,

29Ke emi, O; Obɔŋ, Afo ke ayak owo Fo ɔnyɔŋ ke ifure,

Nte Afo ɔkɔdɔhɔde;

30Koro enyin mi emekut erinyaŋa Fo,

31Eke afo okonimde ke iso kpukpru mme idut;

32Ete, edi uŋwana eke ediyararede ŋkpɔ ɔnɔ mme Gentile,

onyuŋ edi ubɔŋ ikɔt Fo Israel.

33Ndien idem akpa ete ye eka Jesus ke mme ŋkpɔ oro etiŋde ebaŋa Enye. 34Simeon onyuŋ ɔdiɔŋ mmɔ, onyuŋ ɔdɔhɔ Mary eka Esie ete, Sese, ema enim Eyen emi, man ediwak owo ke Israel eduɔŋɔ enyuŋ edaha eda; man Enye onyuŋ edi 35Idiɔŋɔ eke etiŋde ikɔ edian (ofut eyenyuŋ okim fi ukpɔŋ ŋko) man ekikere ediwak esit ekpeyarare. 36Prophet-aŋwan kiet onyuŋ odu, emi ekerede Anna, eyen Phanuel, emi otode ke esien Asher (enye edi ata ebiowo, emi okudude ye ebe isua itiaba tɔŋɔ enye ɔkɔdɔ ndɔ, enye ama onyuŋ edi ebe-akpa ke isua anaŋ ye inaŋ); 37enye ikpɔŋke temple, edi atuak ibuot ɔnɔ Abasi ke eritre udia ye mkpe-ubɔk okoneyo ye uwemeyo. 38Enye onyuŋ oduk edi kpa idaha oro, ɔkɔm Abasi, onyuŋ etiŋ abaŋa Eyen oro ɔnɔ kpukpru owo emi etiede ebet erifak Jerusalem.

Mary Ye Joseph Efiak Enyɔŋ Nazareth

39Ekem ke mmɔ ema ekanam kpukpru ŋkpɔ eke esaŋade ye ibet Jehovah ema, mmɔ efiak enyɔŋɔ ke Galilee, ke Nazareth obio mmɔ. 40Ndien Eyen oro ɔkɔri, onyuŋ okop idem, onyuŋ ɔyɔhɔ ye ɔniɔŋ: Abasi onyuŋ enen iso ye Enye.

Jesus Aka Itie Ntuakibuot Ke Jerusalem

41Ndien ete ye eka Esie ekam ekaka Jerusalem kpukpru isua ke ini usɔrɔ passover. 42Ekem ke ini Jesus osimde isua duopeba, mmɔ edɔk eka, nte ido usɔrɔ edide. 43Ndien ke ini mme usen usɔrɔ ekurede, nte mmɔ efiakde enyɔŋ, Jesus, Eyen mmɔ, ɔsuhɔ ke edem ke Jerusalem; edi ete ye eka Esie ifiɔkke. 44Mmɔ ese ete Enye odu ke otu mbon-isaŋ; ntre ke mmɔ esaŋa isaŋ usen kiet; ndien mmɔ eyom Enye ke otu iman mmɔ ye mme ɔdiɔŋɔ mmɔ. 45Edi ke ini mmɔ mikwe Enye, mmɔ efiak edi ke Jerusalem ndiyom Enye. 46Edikem ke usen ita ema ekebe, mmɔ ekut Enye ke temple, nte etiede ke ufɔt mme andikpep, akpaŋ utɔŋ okop se mmɔ etiŋde, onyuŋ obup mmɔ mbume: 47edi idem akpa kpukpru mmɔ emi ekopde ikɔ Esie, abaŋa ɔniɔŋ ye mme ibɔrɔ Esie. 48Ndien ke ini ete ye eka ekutde Enye, idem akpa mmɔ eti-eti: eka Esie onyuŋ ɔdɔhɔ Enye ete, Eyen mi, nsinam anamde ntem ye nnyin? Sese, usɔ ye ami imasaŋa iyom Fi ye mfuhɔ. 49Ndien Enye ete mmɔ,Nsidi ntak eke mbufo eyomde Mi? nte ifiɔkke ite, nnyene ndidu ke ufɔk Ete Mi? 50Edi mmɔ ifiɔkke se ikɔ oro Enye etiŋde ɔnɔ mmɔ ɔwɔrɔde. 51Ekem Enye asaŋa ye mmɔ ɔsuhɔre edi ke Nasareth, onyuŋ osuk ibuot ɔnɔ mmɔ; edi eka Esie omum kpukpru mme ikɔ oro akama ke esit esie. 52Ndien Jesus ɔkɔri ke eti ibuot ye idaha, onyuŋ ɔdɔdiɔŋ edi eyen mfɔn-iso ke iso Abasi ye ke iso owo.

Currently Selected:

LUKE 2: ENA

Highlight

Copy