LUKE 15

Erɔŋ Emi Osopde

(Mt 18.10-14)

1EDI kpukpru mme publican ye mme idiɔk owo ekasaŋa ekpere Enye, ndikop ikɔ Esie. 2Ndien mme Pharisee ye mme scribe esuk uyo ete, Owo emi adadara mme idiɔk owo, onyuŋ adia ŋkpɔ ye mmɔ.

3Edi Enye otop ŋke emi ɔnɔ mmɔ, ete, 4Ewe owo ke otu mbufo edinyene erɔŋ ikie, ndien kiet osop, idikpɔŋke anaŋ ye efurenaŋ ke desert, ibine erɔŋ oro osopde, tutu okut. 5Ndien ama okut enye, odori ke afara esie adat esit. 6Ndien ke ini enye osimde ufɔk, okot mme ufan ye mbɔhiduŋ esie edi, ete mmɔ, Edara ye ami, koro mma ŋkut erɔŋ mi emi okosopde. 7Ndɔhɔ mbufo nte, Kpasuk ntre ke idara edidu ke heaven abaŋa idiɔk owo kiet emi akabarede esit, akan nti owo anaŋ ye efurenaŋ, emi minyeneke se ekabarede esit ebaŋa.

8 Ŋko ewe ŋwan edinyene mbak silver duop, ndien kiet ɔbɔhɔ enye osop, ididomoke utuenikaŋ ikpɔri ufɔk itim iyom, tutu ɔfiɔhɔ. 9Ndien ama ɔfiɔhɔ, okot mufan ye mbɔhiduŋ esie edi, ete mmɔ, Edara ye ami, koro mma mfiɔhɔ okuk emi okosopde. 10Ndɔhɔ mbufo nte, Kpasuk ntre ke idara odu ke iso mme angel Abasi abaŋa owo kiet emi akabarede esit.

Eyen Eren Emi Osopde

11Enye onyuŋ ɔdɔhɔ ete, Owo kiet ekenyene nditɔ-iren iba: 12ndien udɔ ɔdɔhɔ ete esie ete, Ete, nɔ mi udeme ŋkpɔ eke edinyenede mi. Ntem ke ete edeme inyene esie ɔnɔ mmɔ. 13Ibigike bigi udɔ ataŋ kpukpru se enyenede, adaha aka anyan idut; ndien do ke enye asuan inyene esie ke eridu otime uwem. 14Edi ke ini enye ama akasuan kpukpru ama, ɔkpɔsɔŋ akaŋ otibe ke idut oro; enye onyuŋ ɔtɔŋɔ ndidu ke unana. 15Ndien enye aka akadian idem ye eyen idut oro, enye oro onyuŋ ɔdɔŋ enye aka iŋwaŋ ɔkɔbɔk mme edi. 16Enye onyuŋ oyom ndidia ikpɔk udia, eke mme edi ediade, nyuhɔ; owo inyuŋ inɔŋɔ enye ŋkpɔ. 17Edi ke ini enyin aŋwaŋade enye, enye okut idem sie, ete, Sese, adaŋa ediwak mbio-utom ete mi enyene udia eke awakde akan mmɔ ndidia edi se mi mi, mmɔŋ ndikpa ye biɔŋ. 18Nyedaha nnyuŋ ntiene ete mi, nnyuŋ ndɔhɔ enye nte, Ete, mmanam idiɔk-ŋkpɔ ndian heaven ye ke iso fo: 19ndotke aba ndikere eyen fo: da mi nte owo-utom fo kiet. 20Ndien enye adaha ke enyɔŋ etiene ete esie. Edi ke ini enye odude kaŋa nsan-nsan, ete esie okut enye, onyuŋ atua enye mbɔm, efehe, awaŋa enye ke itɔŋ, onyuŋ otim enye inua. 21Edi eyen ɔdɔhɔ enye ete, Ete, mmanam idiɔk-ŋkpɔ ndian heaven ye ke iso fo: ndotke aba ndikere eyen fo. 22Edi Ete ɔdɔhɔ ikɔt esie ete, Ewara eda ata eti ɔfɔŋidem oro edisine enye; enyuŋ esine enye mkpanuen ke ubɔk ye ikpa-ukot ke ukot: 23enyuŋ eda-enaŋ emi enyenede isek ewot, eyak nnyin idia inyuŋ idat esit: 24koro eyen mi emi ama akpa, onyuŋ ɔtɔŋɔ ntak odu uwem; enye ama osop, ndien ikut enye. Ntre ke mmɔ etɔŋɔ ndinam mbre.

25 Edi akpan esie odu ke iŋwaŋ: ndien nte enye asaŋade ekpere ufɔk, okop ikwɔ ye unek; 26ndien enye okot eyen-ufɔk kiet, obup enye se mme ŋkpɔ oro ewɔrɔde. 27Enye oro ɔdɔhɔ ete, Eyen-uka amafiak edi: ete fo ama onyuŋ owot eyen-enaŋ eke enyenede isek, koro okutde enye ye nsɔŋ-idem. 28Edi akpan oro akpaha esit, inyuŋ inyimeke ndiduk; ntre ke ete esie ɔwɔrɔ edi edikpe ye enye. 29Edi enye ɔbɔrɔ ete esie, ete, Sese, mmanam utom nnɔ fi adaŋa ediwak isua emi, akanam nnyuŋ nnenike uyo fo: edi akananam afo unɔŋɔ mi ndomo eyen ebot kiet, ete nda nnam mbre ye mme ufan mi: 30edi ke adaŋami eyen fo emi ama ekedi, emi akadiade inyene fo ye mme akpara, afo ama owot eyen-enaŋ eke enyenede isek ɔnɔ enye. 31Edi ete ɔdɔhɔ enye ete, Eyen mi, afo odu ye ami kpukpru ini, kpukpru se inyenede mi onyuŋ enyene fi. 32Edi odot nnyin ndidara nnyuŋ nnem esit, koro eyen-eka fo emi ama akpa, onyuŋ odu uwem: ama osop, ndien ikut enye.

Currently Selected:

LUKE 15: ENA

Highlight

Copy