LUKE 16
16
Ukwaŋ Akama-Ukpɔhɔre
1ENYE ɔdɔhɔ mbet Esie ŋko ete, Owo inyene kiet okodu emi enyenede akama-ukpɔhɔre; ndien etiŋ enɔ enye ete, akama-ukpɔhɔre oro ke asuan inyene esie. 2Ntre ke enye okot owo oro onyuŋ ɔdɔhɔ enye ete, Nso idi emi ke ŋkop mbaŋa fi? nɔ mi ibat ŋkpɔ eke afo akamade, koro mudukaha iso aba ndikama ukpɔhɔre. 3Ekem akama-ukpɔhɔre ɔdɔhɔ ke esit esie ete, Ndinam didie, koro ete ɔbɔde mi itie-akama-ukpɔhɔre? nnyeneke idem ndifuŋ isɔŋ; ndibeŋe ebeŋe edi mi ŋkpɔ but. 4Mmɔfiɔk se ndinamde, man ke adaŋemi edibɔde mi ukpɔhɔre, owo ekpeda mi esin ke ufɔk mmɔ. 5Ntre enye okot kpukpru mme akama-isɔn ete esie, onyuŋ ɔdɔhɔ akpa owo ete, Akama ete mi ifaŋ? 6Enye oro ete, Abaŋ aran ikie. Akama-ukpɔhɔre ɔdɔhɔ enye ete, Bɔ ŋwed isɔŋ fo, tetie ini kiet, wet aba ye duop. 7Enye onyuŋ ɔdɔhɔ owo eŋwen ete, Afo akama ifaŋ? Enye ɔdɔhɔ ete, Ekebe ibokpot ikie. Enye ɔdɔhɔ owo oro ete, Bɔ ŋwed isɔŋ fo, wet anaŋ. 8Ndien ɔbɔŋ oro otoro ukwaŋ akama-ukpɔhɔre, koro enye anamde ɔniɔŋ-ɔniɔŋ: koro mbon eyo emi edi ɔniɔŋ ke mbubehe mmɔ ye mbio emana mmɔ, ekan nte nditɔ uŋwana edide. 9Mmonyuŋ ndɔhɔ mbufo nte, eda mammon ukwaŋido ekɔ mme ufan enim enɔ idem mbufo; man kini oro ebede efep, mmɔ oro ekpada mbufo eduk ke nsinsi iduŋ. 10Owo eke anamde akpanikɔ ke ata ekpri ŋkpɔ onyuŋ anam akpanikɔ ke akamba ŋkpɔ; owo eke akwaŋade ke ata ekpri ŋkpɔ onyuŋ akwaŋa ke akamba ŋkpɔ. 11Ntem edieke mbufo midaha ukwaŋ mammon inam akpanikɔ, anie edisin mbufo ata inyene ke ubɔk? 12Onyuŋ edieke mbufo minamke akpanikɔ ye se idide eke owo eŋwen, anie edinɔ mbufo se idide eke idem mbufo? 13Baba eyen -ufɔk kiet ikemeke ndisaŋa utom mme ete iba: koro enye eyesua kiet, ama eken; midige ntre, enye eyesɔŋɔ ada ye kiet, esin enye eken ke ndek. Mbufo ikemeke ndisaŋa utom Abasi ye eke mammon.
14Mme Pharisee emi edide mme ama-inyene ekop kpukpru ikɔ emi, enyuŋ esak Enye nsahi. 15Ndien Enye ɔdɔhɔ mmɔ ete, Mbufo edi mmɔ emi enamde owo ebat mbufo ke nti owo, edi Abasi ɔmɔfiɔk esit mbufo: koro se ikponde owo ke enyin edi mbubiam ke iso Abasi. 16Ibet ye mme prophet ekedu tutu osim ini John: tɔŋɔ ke ini oro ekwɔrɔ eti mbuk Obio Ubɔŋ Abasi, kpukpru owo enyuŋ enam unyaŋa eduk ke esit. 17Emem enyɔŋ ye isɔŋ ndibe mfep akan ekpri ntɔi kiet ke ibet nditre ndisu. 18Owo ekededi eke osiode ŋwan esie ndɔ, onyuŋ ɔdɔde efen, esin efibe: owo eke ɔdɔde ŋwan emi esiode ndɔ onyuŋ esin efibe.
Owo Inyene Kiet Ye Lazarus
19 Owo inyene kiet okodu emi esinede eti ididuot ɔfɔŋ-idem ye eti ɔfɔŋ linen, onyuŋ adiade edinem udia kpukpru usen. 20Edi esimen ebeŋe-ebeŋe kiet emi ekerede Lazurus, emi inia eyɔhɔde enye ke idem, ekenim ke inua-otop esie; 21enye onyuŋ oyom eda mbubek udia eke eduɔŋɔde ke okpokoro owo inyene oro ebɔk enye; edi kpa mme ebua esidedi edidei inia esie. 22Ekem ebeŋe-ebeŋe oro akpa, ndien mme angel emen enye ekonim ke ikpanesit Abraham. Owo inyene oro onyuŋ akpa ŋko, ndien ebuk enye. 23Ndien ke Hades enye odu ke ndutuhɔ, onyuŋ emenere enyin esie okut Abraham anyan ebiet, ye Lazarus ke ikpanesit esie. 24Enye onyuŋ ofiori ete, Ete Abraham, tua mi mbɔm, nyuŋ dɔŋ Lazarus ekedebi iso nnuen ubɔk esie ke mmɔŋ, edibit edeme mi; koro ndude ke ndutuhɔ ke ikaŋ emi. 25Edi Abraham ɔdɔhɔ enye ete, Eyen mi, ti nte afo okokutde ufɔn fo ke ini uwem fo, ye nte Lazarus okonyuŋ okutde idiɔk: edi kemi enye ke okop idɔŋesit mi, edi afo ke odu ke ndutuhɔ. 26Akan oro, akamba ukpe odu ke ufɔt nnyin ye mbufo, man mmɔ eke eyomde ndito mi ntiene mbufo ekukeme, owo okunyuŋ ekeme ndito do ndi mi. 27Edi enye ɔdɔhɔ ete, Mmekpe fi ubɔk ndien, ete, nte ɔdɔŋ Lazarus aka naŋa ke ufɔk ete mi, 28koro mmenyene nditɔ-ete iren ition, man enye asian mmɔ se idude ke edem emi, mbak mmɔ ŋko edidi ke itie ndutuhɔ emi. 29Edi Abraham ete enye, mmɔ enyene Moses ye mme prophet; yak mmɔ ekpaŋ utɔŋ enɔ mmɔ. 30Edi enye ɔdɔhɔ ete, Baba, ete Abraham, edi owo ama oto ke otu mme akpa-mkpa aka ke ɔtɔ mmɔ, mmɔ ekpakabare esit. 31Edi enye ɔdɔhɔ ete, Edieke mmɔ mikpaŋke utɔŋ inɔ Moses ye mme prophet, mmɔ idinimke ke akpanikɔ owo okpototo ke otu mme akpa-mkpa eset.
Currently Selected:
LUKE 16: ENA
Highlight
Share
Copy
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.
