Lukas 5

1Is aiji aien u unjop Jenesaret, eris atamerit ehelen natimi is ahinag, par atahaijeg intas o Atua; 2is ecetai nelcau is ero an jop aien: eris asuol iran a ilpu atimi ahilek mu, um yiri opoig ura. 3Is aridjai aien an nelcau is ethi irahki is ohuun a Saimona, um ika ehelen yi apok tintin. Is ateucse aien an nelcau, um esege imi atimi. 4Is wat tas ehni aien, is ika ehele Saimona aien, Akumu apok an jop aijaua, um ana irai opoig unyimia vai mu. 5Is tas a Saimona, um ika ehelen, Ak natimi alupas, ecra mun asjeuc an jop aijama an nepeig asega, jam eti leh tah nitai; jai ekpu lep ana an nopoig ainyak vai intas unyum. 6Eris wat ago ara, eris ahteganadau irai mu is ahinag acen ara: is um ahtamud nopoig ura: 7eris auhan nikmara vai ilpu etoara ara, an tak elcau, mika eri apan um atau imi ra. Eris apan ara, is ohua nelcau is ero, um ubutpotet u netevaig. 8Is wat almoi a Saimona Pitrus, is atpuse aien u niji neduei Iesu, um ika, Ude nyak aiek; ek atimi auatatimi ainyak, ak Natimarid. 9Is imyiali aien, im lep ra asega ehelen, vai mu is ahinag eris leucse ara: 10im lep Jakobus im Joanes ohwat hal o Sebetaius, erus atau imi Saimona arau. Is ika ehele Saimona a Iesu, Jim imtitaig aiek; napu leucse atimi aiek um imyihum pan. 11Eris wat apahai ara, eris ude niji itai asega ura ara, um ahced yin. 12IS amen a Iesu an nuarin-pece is ethi: is wat ecet yin natimi lepros is ethi, is atpuse an nesganimtan aien, um ugni yin, um ika, Ak Natimarid, el et merit aiek, na emda, aiek par ago adicinadicin nyak. 13Is adan nikman aien, um atcei pan yin, um ika, Ek merit ainyak: namu adicinadicin aiek. Is auroauro um edoaijaig iran naleprose. 14Is acaiji yin aien, mika yi jim asuptecnaig ehelen tah: um ika, Namu apan aiek, um ehvai euc ehele natimi ahlap, um ahlap va nadicinadicin iram, an nitai ineig is asaig a Moses, nitai asuptecnaig imi ra. 15Ja is um idim apaahni intas vai yin: eris ahtag pan ehelen natimi is ahinag mika eri atahaijeg intas o un, um lep ika eri cehcehe va niji emehe ura. 16Is ude ra aien, um apan an namasacen, um alaigaheni.

17IS wat esege aien an nadiat is ethi, eris ateuc eahki a ilpu Farisi im ilpu atimi esege intas alep, eris ahes irai iji uari-pece asega Calili, im Jutaia, im Jerusalem: is ago cehcehe atimi emehe a Natimarid an nemda o un. 18Eris imyiapan ehelen natimi is ethi atimi an nitai ahled, is emehe aien va napalse: eris merit ara nimyiapan yin vaig anliin neom, par ati yin an nuhup o un. 19Jai is ehka vai ra napanvaig anliin neom va atimi is ahinag, ja eris ahei neom ara, um asvaijeijei neom, um atise yin im lep nitai ahled o un an nibla atimi an nuhup o Iesu. 20Is wat ecetai nimyiisjis ninivaijec ura aien, is ika ehelen aien, Ak natimi ineigki, eh mun iknipagki nedo has unyum. 21Eris aktaktai a ilpu atimi esege, im ilpu Farisi, um ika, Di neigki et asan tas has esjilid aien? et emda ache a Atua par iknipagki nedo has. 22Is wat ato naktaktai ura a Iesu, is tas aien, um ika ehele ra, Inhe ineigki eka aktaktai anliinmopomia aijaua? 23et tup upene nikavaig, Eh mun iknipagki nedo has unyum; ka nikavaig, Atidai aiek, um atga? 24im lep ineig, mika aki ato aijaua, nikavaig, et emda a Inhal o natimi an nobohtan par iknipagki nedo has, (is ika aien ehele natimi emehe va napalse,) Ek ika ehelum ainyak, Atidai aiek, um leh nitai ahled unyum, um apan an neom unyum. 25Is auroauro aien um atidai an nuhup ura, um leh nitai ineig is asjeuc iran aien, um atga o un, um apan an neom o un, um imyiahpas Atua. 26Eris imyiali ara asega, um imyiahpas Atua; eris imtitaig alupas ara, um ika, Inta mun almoi niji itai imyiali akaija an nadiat ineigki.

27Is wat ago nitai iji eigki aien, is alau ijo aien, um ecet natimi akwanaham is ethi, nidan Livai, is ateuc aien an neom asjapicnaig mune iran: is ika ehelen aien, Ahced nyak aiek. 28Is ude niji itai asega o un aien, um atidai, um ahced yin. 29Is auanetha alupas vai yin a Livai anliin neom o un: eris ateuc ehele ra a ilpu atimi akwanaham im lep tak atimi, is ahinag ara. 30Eris tas upoupo a ilpu atimi esege im ilpu Farisi vai ilpu atimi atahaijeg yin, um ika, Eka auri aijaua par ehrihag um umwig aijaua im ilpu atimi akwanaham im ilpu atimi auatatimi? 31Is tas a Iesu, um ika ehele ra, Er eti ika ehele natimi atipagki nemehe yi aminjinai ra era cehcehe ara; ja ara ache era emehe ara: 32kis eti ham ainyak par ahlaig vai ilpu atimi upene, ja vai ilpu atimi auatatimi ache, mika eri adumoij anliinmopura ara.

33Eris ika ehelen ara, Era auri a ilpu atimi atahaijeg Joanes im lep o ilpu Farisi par ehcahinag atwakam, um alaigaheni; ja era hag a ilpu atimi atahaijeg euc, um umwig? 34Is ika ehele ra aien, Et ehka vai ilpu alaig o natimi leh ehgan natwakamvaig, an namen u natimi leh ehgan ehele ra: 35ja etpu yetpam nadiat iji ehki, uhu wit atipagki natimi leh ehgan ehele ra, erupu atwakam ara ira adiat iji ehki.

36Is lep asan tas ecsipece is ethi ehele ra aien, um ika, Et eti ijei pan inuarin napelumai mat tah natimi an mohtan napelumai; va yi jim ahpati inmohtan napelumai va napelumai mat, um eche nuarin napelumai mat, um lep eche inmohtan napelumai. 37Et eti atladwi waina mat tah natimi irai hubej itu acen; va yi jim atpoijej inhubej vai waina mat, um elel waina um takitai inhubej: 38ja er idim atladwi waina mat irai hubej mat; et par upene ehro. 39Et wat umnyi waina itu tah natimi, et idim eti lep ahvig waina mat aien: et ika aien, Et esjilid waina itu.

Currently Selected:

Lukas 5: ATY1863

Highlight

Copy