Lukas 4

1Is amen alupas ehele Iesu, a Nesgan Upene, is ahes Jortan aien um atga o un, is imyiapan yin a Nesgan Upene an namasacen; 2is ago nedo oop vai yin a Tiapolo ira adiat is forte. Is eti caig tah nitai aien ira adiat iji ehki: is wat ti pan itac nadiat iji ehki, is ehtele yin aien. 3Is um ika ehelen a Tiapolo, El et Hal o Atua aiek, namu ika aiek yi areto inhat ineigki. 4Is tas ehelen a Iesu, um ika, Eris aged, um ika, “Eri eti umumoh natimi vai areto ache, ja vai intas asega o Atua.” 5Is imyiaridjai yin a Tiapolo an nedoon ijinies is ethi, um auro um ehvaig ehelen niji elcau asega an nobohtan: 6is um ika ehelen a Tiapolo, Ekpu alupai euc nemda asega ineigki ainyak, im niji itai upene iran: eris idim atceijaig imi nyak; ekpu atceijaig ainyak imi natimi ineig ek merit ainyak nalupai yin vaig: 7el et alaigaheni vai nyak aiek, el et par imi euc nitai iji eigki asega. 8Is tas a Iesu, um ika ehelen, Apan aiek an nidjik, ak Satana: eris aged, um ika, “Namu alaigaheni vai Ihova Atua unyum aiek, um aheca o un” ache. 9Is imyiapan yin Jerusalem aien, um atijai yin an nijintin neom ahlap, um ika ehelen, El et Hal o Atua aiek, namu ahes igcaki aiek um aliaujaise: 10eris aged, um ika, “Etpu tas ehele ilpu agelo o un aien vai euc, mika eri aminjinai euc ara:” 11“erupu aposjai euc irai ikmara ara, va an jim atgeig yi oplec neduom aiek an hat.” 12Is tas a Iesu, um ika ehelen, Eris asaig, um ika, “Namu jim ago nedo oop vai Ihova Atua unyum aiek.” 13Is wat oop yin ehni a Tiapolo, is ude yin aien ira adiat is eti elpat.

14IS lep apan Calili a Iesu va nemda o Nesgan Upene: is apaahni intas vai yin an pece asega marahed mihtag. 15Is esege imi ra aien irai eom alaigaheni ura, eris imyiahpas yin natimi asega.

16Is apan Nasared aien eahki is upyi amen aien: is apan aien anliin neom alaigaheni an nadiat atumop, is idivaig nupyi edo o un, um atidai mika yi esvi itai. 17Eris alupai yin nitasvitai o Aiseya naprofeta. Is algei nitasvitai aien, um ecetai nuarin ineig eris aged intas ineigki iran, um ika, 18“Et amen ehelek a Nesgai Ihova; is ati nyak aien mika ki asuptecnaig intas-upene ainyak ehele ilpu ihki atimi; is abrai nyak aien mika ki ago cehcehe ainyak ilpu atimi emehe inliinmopura, um lep asuptecnaig natceijaivaig ilpu atimi eris tup leucse ra, um ago lah nesganimtai ilpu atimi aupat nesganimtara, um ahiyi ilpu atimi ohocred, 19um asuptecnaig naopan upene o Ihova.” 20Is atapanes an nitasvitai aien, um lep alupai naheca, um ateucse. Eris amaharan ara asega anliin neom alaigaheni. 21Is atupun aien, um ika ehele ra, Eh mun ehneijid an nadiat ineig an nuhup unyimia intas ineigki eris aged. 22Eris imyiahpas yin ara asega, um imyiali intas upene iji ehki is ahes an nipjineucsen. Eris ika ara, Inhal o Josef ineigki, ka o’o? 23Is um ika ehele ra aien, Akupu idim ika ehelek aijaua an tas ecsipece ineigki, Ak natimi atipagki nemehe, namu ago cehcehe eucaiek: namu ago nedo iyehki aiek igcaki an pece unyum ecris atahaijeg aijama, nikavaig, as ago Kaperneum aiek. 24Is um ika aien, Et inivaijec ineig ek asaig ehelemia ainyak mika, Et eti upene inliinmopoi atimi vaig tah naprofeta an pece o un. 25Ek idim asan tas inivaijec ehelemia ainyak mika, eris amen an pece Isreel a ilpu takata is ahinag eris emesmas a ilpu atamnyura an naopan iyehki, an numoh o Elaija, eris atapanes an nohatag an mesese is eseij im lep inmohoc is siks, is um alupas numlaig has an pece asega; 26jai eris eti abraig pan Elaija ehelen tah ra, intakata is ethi ache is mas natamnyu un is amen Sarefad aien nuarin-pece is ethi Saiton. 27Eris amen an pece Isreel a ilpu atimi lepros is ahinag an naopan iyehki, an numoh o Elaisa naprofeta; jai eris eti ago adicinadicin tah ra, Neaman ache nupu Sirya. 28Eris wat atahaijeg nitai iji eigki ara asega anliin neom alaigaheni, eris edemda alupas ara, 29um atidai, um ahlo pan itac yin an nuarin-pece ura, um imyiapan yin an nijin nedoon iyehki eris alcei niji eom ura iran, mika eri ethaigse yin. 30Jai is apan aien an nibla ra, um atga o un, 31um apan Kaperneum, nuarin-pece is ethi Calili, um esege imi ra irai iji adiat atumop. 32Eris um imyiali nesege o un ara: is emda intas o un.

33Is amen anliin neom alaigaheni natimi is ethi, is amen iran nagelo has, is ahlaig ijinies aien, 34um ika, Ude cama; nai merit aiek vanhe ehelema, ak Iesu nup an Nasared? na mun ham aiek mika an auahas cama, ka o’o? ek ato euc ainyak; na Atimi Itaup o Atua aiek. 35Is um acaiji yin a Iesu, um ika, Jim tas aiek, um atceijai yin. Is wat ethaigse yin an nibla ra a nagelo has, is atceijai yin aien, um eti auahas yin. 36Eris um imyiali ara asega, um tas jipe ehele ra, um ika, Et echamecha intas ineigki! et esjilid natimi alupas o un im nemda o un, et acaiji ilpu agelo has aien, era atceijai atimi ara. 37Is apaahni intas vai yin irai iji uari pece asega marahed mihtag.

38Is ahes anliin neom alaigaheni aien, um alau ijo, um apan anliin neom o Saimona. Is leh alupas nemehe ihlup a risi ehgai Saimona; eris ugni yin vai yin ara. 39Is han aiji aien ithan, um acaiji nemehe ihlup; is um edoaijaig iran: is um auroauro aien um atidai, um aheca ura.

40Is wat ete nagesega, eris imyiapan ehelen ilpu atimi emehe is ahinag ara, is ahinag nemehe ira ra; is atijai nikman aien ira ra asega, um ago cehcehe ra. 41Eris atceijai atimi is ahinag a ilpu agelo has, um ahlaig ijinies, um ika, Nai Kristo aiek Inhal o Atua. Is acaiji ra aien, mika eri jim tas ara: eris ato ara, nikavaig, is Kristo aien. 42Is wat lahlah an tak apnyin, is atga o un aien, um apan an nuarin namasacen: eris ahilek yin natimi, um apan ehelen, um acaiji yin, mika yi jim ude ra aien. 43Is um ika ehele ra aien, Eris idim ika ki asuptecnaig nelcau o Atua ainyak irai uari-pece et eche: eris abraig nyak mika ki ago nedo ineigki ainyak. 44Is um esege imi ra aien irai eom alaigaheni Calili.

Currently Selected:

Lukas 4: ATY1863

Highlight

Copy