Madius 26

1Is asuptecnaig ehni nitai iji eigki asega a Iesu, ja par ika ehele ilpu atimi atahaijeg yin, 2Eka ato aijaua, nikavaig, et wit ti pan itac nadiat inyi ero, uhu wit asjapicnaig u napaska; uhpu aniv Inhal o natimi mika eri atgei yin an nauincai atgeig. 3Eris asjapicnaig a ilpu atimi ahlap esjilid im ilpu atimi esege, im ilpu atimi tas alep an pece, an nimnim o natimi esjilid an nahlap, nidan Keafas, 4um tas jipe mika eri efaifa vai Iesu, par atgei yin. 5Ja eris ika ara, Eri jim ago ira adiat asjapicnaig, va eri jim ehtauo natimi.

6Is wat amen Bedane a Iesu anliin neom o Saimona natimi lepros, 7is han ehelen intakata is ethi, um apos nipjinitai alabaster, is amen iran nitai aspi esjilid um upene nipin, um atladwijai an nidjinin an nateuc o un um hag. 8Eris wat ecetai a ilpu atimi atahaijeg yin, eris edemda ara, um ika, Er auahas vanhe? 9et upene nahtaivaig nitai aspi ineigki um leh nimtan alupas, par alupai ilpu ihki atimi. 10Is wat ato a Iesu is ika ehele ra aien, Eka auri aijaua par imyidohalav intakata ineigki? et mun ago nauritai upene irak aien, 11era amen ehelemia a ilpu ihki atimi irai iji adiat; ja inki ti amen ehelemia ainyak irai iji adiat: 12et mun atladwijai nitai aspi ineigki aien an nohuk va natelmoi nyak: 13et inivaijec ineig ek asaig ehelemia ainyak mika, Uhpu asuptecnaig nedo ineigki et mun ago a intakata ineigki, nitai imyiehva yin irai iji pece asega an nobohtan, uhpu asuptecnaig intas-upene ineigki iran.

14Is apan a Jutas nupu Karyot ehele ilpu atimi ahlap esjilid, is atimi is ethi aien ira atimi is twelv iji ehki, 15um ika ehele ra, Aki alupai nyak inhe aijaua va ekpu aniv yin ehelemia ainyak? Eris ika ara eri alupai yin inuari silver yi dirte. 16Is atupun aien an naopan iyehki, um imyieris yin par aniv yin.

17An nadiat uhup eris asjapicnaig va nareto is ti leven iran, eris apan ehele Iesu a ilpu atimi atahaijeg yin, um ika ehelen, Nai merit aiek vaig eda igca ecri imyecrei napaska aijama mika apu ecaig aiek? 18Is ika aien, Apan aijaua an nuarin-pece itaup ehele natimi et ethi eahki, um ika ehelen, Et ika a Natimi esege, Et mun ubutpotet nadiat unyak; ekpu ecaig napaska ainyak anliin neom unyum im lep ilpu atimi atahaijeg nyak. 19Eris ago nedo ineigki is asaig a Iesu a ilpu atimi atahaijeg yin, um imyecrei napaska. 20Is wat jupura, is ateucse aien im lep natimi is twelv. 21Eris wat hag ara, is ika aien, Et inivaijec ineig ek asaig ehelemia ainyak mika, etpu aniv nyak tah inyi ethi iramia. 22Eris ohocred alupas ara asega, um ika athiathi ehelen, Ainyak, ka o’o, ak Natimarid? 23Is tas aien, um ika, Aien aigki ecrau esipiaig nipjinitai aijumrau, etpu aniv nyak aien: 24et apan a Inhal o natimi et idivaig eris aged vai yin: ja a’a, auwe vai nat naico etpu aniv Inhal o natimi aien! el is upene vai nat naico, el eris eti apos yin. 25Is tas a Jutas natimi aniv yin, um ika, Ak Natimi esege, ainyak, ka o’o? Is um ika ehelen aien, Na mun asaig aiek.

26Eris wat hag ara, is leh nareto a Iesu, um naaurineig iran, um aswaplec, um alayi ilpu atimi atahaijeg yin, um ika, Leh aijaua um ecaig: nohuk ineigki. 27Is lep leh nipjinitai aien, um naaurineig iran, um alupai ra, um ika, Akumu umnyi aijaua asega; 28inja irak ineigki vai intas-etipup mat, eh mun atladwi va atimi et ahinag, va uhpu eti aru nedo has ura: 29ja ek asaig ehelemia ainyak mika, Inki ti lep umnyi nidi vaine ainyak, um uhum pan naopan iyehki, ekpu umnyi waina mat ainyak ehelemia an nelcau o Etmak. 30Eris acesaces nohranitai ara, ja par alau ijo um apan an nedoon Olivet. 31Is um ika ehele ra a Iesu, Akupu imyiehcamai nyak aijaua asega an nepeig ineigki: eris aged, um ika, “Ekpu auud natimi asgi siip ainyak, erupu terimterim jipe siip.” 32Ja ek wit lep nusjai ainyak, ekpu apan ainyak Calili um uhup iramia. 33Is tas a Pitrus, um ika ehelen, Neri imyiehcamai euc natimi asega, ja inki ti imyiehcamai euc ainyak. 34Is um ika ehelen a Iesu, Et inivaijec ineig ek asaig ehelum ainyak mika, Napu ehceseij ateri nyak aiek, ja etpu ahlaig injaa, an nepeig ineigki. 35Is um ika ehelen a Pitrus, El ek mas ehelum ainyak, el ek eti ateri euc ainyak. Is idim ucce intas ura asega.

36Eris ahced Iesu ara um apan an nuarin is ethi nidan Kedsemani, is um ika ehele ilpu atimi atahaijeg yin aien, Ateucse aijaua igcaki, ki apan ainyak eagko, um alaigaheni. 37Is leh Pitrus aien im ohwat hal o Sebetaius, is esjilid intaigtaig o un im nohocred. 38Is um ika ehele ehtaij aien, Et ohocred alupas inliinmopok ainyak um idivaig inmas: amen aijautaij igcaki, um aiji ehelek. 39Is eti elvatga aien, um atpuse, um alaigaheni, um ika, Ak Etmak, el et wat eti ehka, el eh mun atipagki nipjinitai ineigki ehelek: jai jim imyiaiji intas unyak, jam imyiaiji intas unyum. 40Is apan aien ehele ehtaij atimi atahaijeg yin, um ecet ehtaij numjegvaig, is ika ehele Pitrus aien, Ehtaij auri aijautaij par eti aiji an aur et ethi ache? 41Aiji aijautaij um alaigaheni, va ahtiji jim apan an nedo oop cautaij; et emda inliinmopomitaij aijautaij, ja et auatialidi nohumitaij. 42Is lep apan aien um alaigaheni, um ika, Ak Etmak, el et ehka natipagkivaig nipjinitai ineigki ehelek, tup aiek marom, nikavaig, ki umnyi ainyak. 43Is um han aien um ecet ehtaij, ehtijis lep umjeg ahtaij: is aroparop nesganimtai ehtaij. 44Is ude ehtaij aien, um lep atga o un, um ehceseij alaigaheni, um asaig intas iji ehki. 45Is apan aien ehele ehtaij atimi atahaijeg yin, um ika ehele ehtaij, Umjeg aijautaij, um atumop: et mun ubutpotet naopan ineig, eh mun aniv Inhal o natimi ehele ilpu atimi auatatimi: 46atidai aijautaij, ti atga uja akaija: et mun ubutpotet aien et aniv nyak aien.

47Is wat tas aien, is um han a Jutas, natimi is ethi ira atimi is twelv, eris ahced yin natimi is ahinag, eris ahes ehele ilpu atimi ahlap esjilid ara, im ilpu atimi tas alep an pece, um apos auitoga im nelop. 48Is asuptecnaig ehele ra a natimi aniv yin, um ika, Aien ekpu aijumnyi yin ainyak, aien aigko; asjiraig upene yin aijaua. 49Is eti laulau is um yetpan aien ehele Iesu, um ika, Kaiheuc vai euc, ak Natimi esege; um aijumnyi yin. 50Is um ika ehelen a Iesu, Ak etoak, na mun ham aiek vanhe? Eris apan ara um asjirai Iesu, um leh yin. 51Is arise an nahaijin tah is ethi ehele Iesu, um aihiacse nauitoga o un, um auud naheca o natimi esjilid an nahlap, um auudyialis intikgan. 52Is um ika ehelen a Iesu, Lep atohoaigse nauitoga unyum aiek an cedpan: erupu emesmas va nauitoga ara asega era apos auitoga ara. 53Nai ikha aiek? el ek ugni Etmak ainyak an naopan ineig, etpu auroauro aien um alupai nyak ilpu agelo lijon et twelv um eled: 54ja uhpu ehneijid intas eris aged um uauo, mika yi idim ucce? 55Is ika a Iesu ehele atimi is ahinag an nuarin-nadiat iyehki, Eka mun idim ham aijaua um auanedo an natimi ehneg itai irak, um apos auitoga im nelop mika ki leh nyak: kis ateuc ehelemia ainyak anliin neom ahlap irai iji adiat um esege imi caua, ja akis eti arop irak aijaua. 56Ja eh mun ago nitai iji eigki asega, par ehneijid intas eris aged a ilpu profeta.

Eris ude yin a ilpu atimi atahaijeg yin asega, um aha.

57Ara eris arop irai Iesu ara eris imyiapan yin ara ehele Keafas natimi esjilid an nahlap, an nuarin iyehki eris asjapicnaig iran a ilpu atimi esege im ilpu atimi tas alep. 58Is apitac yin a Pitrus, jam itac acen vai yin, um apan an nimnim o natimi esjilid an nahlap, is apan aien um ateuc ehele ilpu aheca, mika yi almoi ehneijai nedo ura vai yin. 59Eris ahilek atimi par asan tas ahcil vai Iesu a ilpu atimi ahlap esjilid, im ilpu atimi tas alep, im ilpu atimi alupas asega, mika eri atgei yin; 60jam eti ecet tah: eris apan a ilpu atimi ahcil is ahinag, ja eris eti ecet tah ara. Erus epitpitac natimi ahcil is ero, 61um ika, Is ika a nat naico, Ek emda ainyak par auahas neom ahlap o Atua, um lep ago an nadiat inyi eseij. 62Is um atidai a natimi esjilid an nahlap, um ika ehelen, Na asaig tah nitai aiek, ka o’o? inhe ineigki era asuptecnaig vai euc ara sji eigki? 63Ja is eti tas a Iesu.

Is tas a natimi esjilid an nahlap, um ika ehelen, Ek asaig ehelum ainyak vai Atua umoh, mika an asuptecnaig aiek ehelema, mika nai Kristo aiek, Inhal o Atua, ka o’o. 64Is um ika ehelen a Iesu, Na mun asaig aiek: ja ek asaig ehelemia ainyak mika, Akupu ecet Inhal o natimi aijaua an tak aopan nateucvaig an matan Et emda aien, im lep napam o un an nepeig an nohatag. 65Is ahpati napelumai iran a natimi esjilid an nahlap, um ika, Et mun asan tas has esjilid aien; inta auri akaija par lep ahilek atimi par asuptecnaig vai yin? eka mun atahaijeg intas has esjilid o un aijaua: 66eka ikha aijaua? Eris tas ara, um ika, Et upene natgei yin vaig. 67Eris agdei nesganimtan ara, um abli yin; eris lep ahpoi yin a ilpu ahaiji ra irai ikmara, 68um ika, Asuptecnaig aiek ehelema, ak Kristo, Et mun ahpoi euc a di?

69Is ateuc a Pitrus ijo an nimnim: is apan ehelen natahaig is ethi, um ika, As idim amen aiek ehele Iesu nupu Calili. 70Ja is um ateri aien an nuhup ura asega, um ika, Ek eti ato intas unyum ainyak. 71Is alau ijo aien um apan an naiyu, is lep ecet yin natahaig is eche, um ika ehele atimi eahki, Is amen a nat eigki ehele Iesu nup an Nasared. 72Is ehcero ateri aien, um asan tas has esjilid, um ika, Ek eti ato natimi ineigki ainyak. 73Eris lep epitpitac ara eris aiji ubutpotet, um apan, um ika ehele Pitrus, Nai idim atimi et ethi ira ra aiek; na auoh intas ura aiek. 74Is asan tas has aien im intas itaup, um ika, Ek eti ato natimi ineigki ainyak. Is um auroauro um ahlaig injaa. 75Is um imyiehva a Pitrus intas is asaig ehelen a Iesu, um ika, Napu ehceseij ateri nyak aiek, ja etpu ahlaig injaa. Is apan itac aien, um taig alupas.

Currently Selected:

Madius 26: ATY1863

Highlight

Copy