Madius 27

1Is wat lahlah an nuhialeg, eris tas jipe vai Iesu a ilpu atimi ahlap esjilid asega, im ilpu atimi tas alep an pece, mika eri atgei yin: 2eris arore yin ara, um imyiapan yin, um ati yin ehele Ponjus Pailet natimarid.

3Is wat ato a Jutas natimi aniv yin mika eris ika ara eri atgei yin, is ohocred inliinmopon aien, is lep imyiapan ehele ilpu atimi ahlap esjilid im ilpu atimi tas alep inuari silver is dirte iji ehki aien, 4um ika, Kis mun ago nedo has ainyak, um aniv natimi upene ineigki. Eris um ika ara, Eruauo vai cama? tup aiek marom. 5Is ethaigse inuari silver iji ehki aien anliin neom ahlap, um atga o un, um apan, um ispun alcinwan. 6Eris leh inuari silver iji ehki a ilpu atimi ahlap esjilid, um ika, Et itaup nativaig an nuarin ikni mune iran, nimtan ja ineigki. 7Eris tas jipe ara, um ika, eri auanimtan nuarin-nobohtan o natimi ago ipjiitai an nuari silver iji ehki, par atelmoi nup urai taka uarin iran. 8Eris anvi nidan nuarin-nobohtan iyehki par ika, Nobohtan ja, um imyihum pam naopan ineig. 9Is um ehneijid intas is asaig a naprofeta Jeremaia, um ika, “Eris leucse inuari silver is dirte ara, nimtan eris asaig vai yin, eris asaig nimtan ineigki vai yin a nupu Isreel; 10um auanimtan nuarin-nobohtan o natimi ago ipjiitai, is idivaig is asaig ehelek a Ihova.”

11Is um atidai a Iesu an nuhup o natimarid: is ahodai yin a natimarid, um ika, Na Atimarid u nupu Jutaia aiek, ka o’o? Is ika ehelen a Iesu, Na mun asaig aiek. 12Eris atijai itai iran a ilpu atimi ahlap esjilid im ilpu atimi tas alep, ja is eti tas aien. 13Is um ika ehelen a Pailet, Na atahaijeg niji itai et ahinag aiek era asuptecnaig vai euc ara, ka o’o? 14Is idim eti tas ehelen aien; va nedo ineigki is um imyiali alupas a natimarid. 15Is um ucce nedo o natimarid an nasjapicnaig iyehki, is ahiyi natimi is ethi aien anliin neom ipjin imi atimi, aien aigki eris merit vai yin ara. 16Is amen anliin neom ipjin ura an naopan iyehki natimi auatatimi esjilid is ethi, nidan Barabas. 17Eris wat asjapicnaig ara, is ika ehele ra a Pailet, Ekpu atceijaig di imi caua ainyak? Barabas, ka Iesu er anvi nidan par ika Kristo? 18Is ato aien, nikavaig, eris ati yin a ilpu atimi tas alep va nauatitai ura vai yin.

19Is wat ateuc aien an nitai ateuc tas alep iran, is abraig pan tah ehelen a ehgan, um ika, Jim ago tah nitai aiek irai natimi upene ineigki: et mun alupas nohocred unyak vai yin an numjeg ahnag unyak inpeig. 20Ja eris auahas inliinmopoi atimi is ahinag a ilpu atimi ahlap esjilid im ilpu atimi tas alep, mika eri imyialep Barabas, jam auahas Iesu. 21Is um tas a natimarid, um ika ehele ra, Ekpu ahiyi tah rau a di ainyak imi caua? Eris um ika ara, Barabas. 22Is um ika ehele ra a Pailet, Ekpu ago inhe ainyak irai Iesu er anvi nidan par ika Kristo? Eris ika ara asega, Eri atgei yin an nauincai atgeig. 23Is ika a natimarid, Auri? is ago nev edo has aien? Ja eris um lep ahlaig emda ara, um ika, Eri atgei yin an nauincai atgeig.

24Is wat ato a Pailet, nikavaig, is auatialidi nimyiisjis o un, um esjilid nehtauo o atimi, is leh inwai aien, um ahisjim an nuhup ura, um ika, Ek adicinadicin ainyak vai inja irai natimi upene ineigki: tup aijaua marom. 25Eris tas natimi asega, um ika, Etmu eteuc irama, im lep irai ilpu hal unyima, inja iran.

26Is um ahiyi Barabas imi ra aien: jam aredei Iesu, um ati yin ehele ra mika eri atgei yin ara an nauincai atgeig.

27Eris imyiapan Iesu an nimnim o natimarid a ilpu eucsupo o un, eris asjapicnaig pan ehelen a ilpu eucsupo asega. 28Eris atipagki napelumai iran ara, um aso yin an napelumai cop. 29Eris ahod incat ara irai itai upunupun, um adgaig imi yin, um ati nauanieg an matan: eris atpuse an nuhup o un ara, um imyiafakahcil yin, um ika, Kaiheuc vai euc, ak Natimarid u nupu Jutaia! 30Eris agdei yin ara, um leh nauanieg, um aredei nidjinin iran. 31Eris imyiafakahcil yin ara, ja par atipagki napelumai iran, um aso yin an napelumai o un, um imyiapan yin par atgei yin an nauincai atgeig. 32Eris wat apan itac ara, eris ecet nupu Sairini is ethi ara, nidan Saimona: eris ika ehelen ara yi ahelwei nauincai atgeig aien.

33Eris wat apan ara an nuarin is ethi nidan Colcoda, nesgan tas ineigki, nuarin o nipjinipek o atimi, 34eris aluman vinecar ara eris ago pelaig an wai acen: is atimtim iran aien, jam eti umnyi. 35Eris um atgei yin ara an nauincai atgeig, um ahai apelumai o un um edaig jipe itai asjaaicnaig: et idivaig intas is upyi asaig a naprofeta, um ika, “Eris ahai apelumai itac unyak ira ra ara, um edaig jipe itai asjaaicnaig va napelumai uhup unyak.” 36Eris ateucse ara, um aminjinaig yin eahki; 37eris atijai u nidjinin ijinies ara intas ineig eris aged vai yin, um ika, IESU INEIGKI NATIMARID U NUPU JUTAIA. 38Eris lep atgei natimi ehneg itai is ero ehelen an nauincai atgeig; is ethi an matan, im lep is ethi an moun.

39Ara eris atga an nefalaig ara eris atuh yin ara, um auhohaig nidjinira, 40um ika, Aiek na auahas neom ahlap aiek, um lep actaig an nadiat et eseij, namu imyiatamaig euc aiek: el et Hal o Atua aiek, namu asuol an nauincai atgeig aiek. 41Eris lep imyiafakahcil yin a ilpu atimi ahlap esjilid, im ilpu atimi esege, im ilpu atimi tas alep, um ika, 42Is imyiatamaig tak atimi aien; ja et auatialidi aien par imyiatamaig yin: el et Atimarid u nupu Isreel aien, etmu asuol aien an nauincai atgeig an naopan ineig, va ecrupu asgeig iran aijama: 43is asgeig irai Atua aien; etmu imyiatamaig yin aien, el et aiyu inliinmopon aien vai yin: is ika aien, Ek Hal o Atua ainyak. 44Erus lep atuh yin a natimi ehneg itai erahki, eris atgei rau ehelen an nauincai atgeig.

45Is wat adiatadiat is atupun inmehcim an pece asega um yetpan an jupki. 46Is wat jupki is ahlaig ijinies a Iesu, um ika, “Elai, Elai, lema sabakdenai?” nesgan tas ineigki, “Ak Atua unyak, ak Atua unyak, na auri aiek par ude nyak?” 47Eris wat atahaijeg ara eris aiji ubutpotet ara, eris ika a ilpu ahaiji ra, Et ahlaig vai Elaija aien. 48Is auroauro natimi is ethi ira ra um athut, im leh nisa, um ahtaijuli a vinecar, um ati an nauanieg, um aluman. 49Eris um ika nahaiji ra, Eklim erop, intupu almoi akaija, kit etpu han a Elaija par imyiatamaig yin. 50Is lep ahlaig ijinies a Iesu, um edekjai nesgan. 51Is um ahpati natcai apelumai anliin neom ahlap, is ahes ijinies um asuol; is amaamai nobohtan, um ameled nij; 52um asalgei ehpaiitai; eris lep anusjai ohui ilpu atimi upene eris emesmas is ahinag: 53is wat nusjai aien eris ahes u ehpaiitai ara, um apan an nuarin-pece itaup, um ehcohos pan ehele atimi is ahinag.

54Is wat ahgei nomoi a natimi alupas u ilpu eucsupo, im lep ra eris amen ehelen ara par aminjinaig Iesu, um almoi nitai iji eigki, eris imtitaig alupas ara, um ika, Et inivaijec ineig, nikavaig, et Hal o Atua aien. 55Eris amen eahki a ilpu takata is ahinag, um aiji itac acen par almoi, eris ahes Calili ara, um ahced Iesu, um aheca o un: 56is amen ehele ra a Mere nupu Mactala, im Mere risi Jakobus im Joses, im lep risi ohwat hal o Sebetaius.

57Is wat jupura is apan natimi ikni itai Arimadia is ethi, nidan Josef; is atimi atahaijeg Iesu aien: 58is apan aien ehele Pailet, um ugni nohui Iesu. Is ika a Pailet eri alupai yin nohun. 59Is leh nohun a Josef, um aso an napelumai yilyil um upene, 60um ati an mun nij mat o un, is ahti aien: um atcelcaig inhat alupas um atapanes an neucsen mun nij, um atga o un. 61Is ateuc a Mere nupu Mactala, im lep Mere is eche, ubutpotet o unmun nij.

62Is wat lep lahlah an tak apnyin, an nadiat epitpitac nadiat imyecrei itai iran, eris asjapicnaig pan ehele Pailet a ilpu atimi ahlap esjilid im ilpu Farisi, 63um ika, Ak natimarid, ecra imyiehva aijama intas is asaig a natimi efaifa ineigki, an naopan numoh o un, um ika, Et wit ti pan itac nadiat inyi eseij, ekpu lep nusjai ainyak: 64va nedo ineigki namu ika aiek eri ahtapanes upene inmun nij an nadiat inyi eseij, va eri jim apan a ilpu atimi atahaijeg yin an nepeig, um ahneg yin, um ika ehele atimi, Et mun nusjai aien vai inmas o un: etpu esjilid nedo ahnag ineigki iran yehki uhup. 65Is um ika ehele ra a Pailet, Era amen ehelemia a ilpu eucsupo: apan aijaua, um ahtapanes ipjin et idivaig nato itai unyimia. 66Eris apan ara, um ahtapanes ipjin inmun nij, um ati nitai asjaaicnaig an hat, um ikni ilpu eucsupo.

Currently Selected:

Madius 27: ATY1863

Highlight

Copy