Madius 28

1Is wat ti pan itac nadiat atumop, wat lep lahlah an nadiat uhup irai wiik, is yetpan a Mere nupu Mactala im lep Mere is eche par almoi inmun nij. 2Is um omoi alupas; is ahes an nohatag a nagelo o Natimarid, um asuol, um apan um atipagki inhat an neucsen mun nij, um ateuc iran. 3Is idivaig nauwainapit nesganimtan, um ahi napelumai iran, is idivaig sno: 4eris imtitai yin a ilpu atimi aminjinaig inmun nij, um ucjucjucaij, eris idivaig ilpu atimi emesmas ara. 5Is tas a nagelo, um ika ehele intakata erahki, Jim imtitaig aijaurau: ek ato ainyak, nikavaig, erau ahilek Iesu aijaurau eris atgei yin an nauincai atgeig: 6et ti aien igcaki: et mun nusjai aien, et idivaig is asaig aien: apam aijaurau, um almoi inuarin ineig is asjeuc iran a Natimarid: 7auroauro aijaurau um apan, um asuptecnaig ehele ilpu atimi atahaijeg yin, mika et mun nusjai aien vai inmas o un; et apan aien Calili um uhup iramia; akupu ecet yin aijaua eahki: ek mun idim asaig ehelemirau ainyak. 8Erus ahes o unmun nij arau, um auroauro um atga urau, erus imtitaig arau um imyiacitak alupas; erus athut arau um apan par asuptecnaig ehele ilpu atimi atahaijeg yin.

9Erus wat apan arau par asuptecnaig ehele ilpu atimi atahaijeg yin, is ehtet ira rau a Iesu, um ika, Kaiheuc vai caurau. Erus apan arau um asjira neduon, um atpuse vai yin. 10Is ika ehele rau a Iesu, Jim imtitaig aijaurau: jam apan um asaig ehele ilpu etoak mika eri apan ara Calili: erupu ecet nyak eahki ara.

11Erus wat atga urau arau, eris apan an nuarin-pece nahaiji ilpu eucsupo, um asuptecnaig ehele ilpu atimi ahlap esjilid nitai iji eigki asega. 12Eris wat asjapicnaig ara im lep ilpu atimi tas alep, eris um tas jipe ara, um alupai ilpu eucsupo mune is ahinag, 13um ika, Akumu ika aijaua, Eris apan a ilpu atimi atahaijeg yin an nepeig, um ahneg yin an numjeg unyima. 14El et atahaijeg a natimarid, ecrupu tas ehelen aijama, um imyiahras caua. 15Eris leucse mune ara, um ago nedo ineigki eris asaig ehele ra: eris asan tas ineigki a nupu Jutaia um imyihum pam an naopan ineig.

16Eris apan Calili a ilpu atimi atahaijeg yin is eleven, an nedoon ineig is asuptecnaig ehele ra a Iesu. 17Eris wat ecet yin ara, eris atpuse vai yin ara: ja eris imyiisjis nahcil nahaiji ra.

18Is apan a Iesu um tas ehele ra, um ika, Eris ati nemda asega imi nyak an nohatag im nobohtan. 19Va nitai ineigki akumu apan aijaua, um ika eri alaigaheni nup urai iji pece asega, um baptiso ira ra an nidai Etmak, im Inhal o un, im Nesgumrau Upene: 20um esege imi ra mika eri imyiaiji niji itai asega ara kis tas alep vaig ehelemia ainyak: ekpu idim amen ehelemia ainyak irai iji adiat, um yetpan an nehni u naopan. Emen.

Currently Selected:

Madius 28: ATY1863

Highlight

Copy