Lukas 1

1Eris idim ika natimi is ahinag eri asuptecnaig upene nauritai iji eigki inta idim imyiisjis ninivaijec vaig akaija, 2et idivaig eris asaig ehelema a ilpu atimi iji ehki, eris upyi hup ara um ecetai, ja par asuptecnaig intas, 3va nitai ineigki, kis lep ika ainyak, ak natimi alupas, Diofilus, ki lep asuptecnaig upene ehelum an nitasvitai, kis idim ato upene nitai iji eigki asega ainyak itu acen um imyihum pam an naopan ineig, 4mika an ato aiek, nikavaig, et idim inivaijec nitai iji eigki, eris esege imi euc.

5AN NAOPAN iyehki is wat atimarid an pece Jutaia a Herot, is eteuc natimi ahlap is ethi, nidan Sakaraias, is mapoi Abaija aien: is lep mapoi Eron a ehgan, nidan Elisabed. 6Is atoh nedo urau arau an nuhup o Atua, erus apos upene intas alep asega o Ihova arau, im niji itai is ikni aien, eris eti lep ated rau. 7Ja is ti inhal urau, is eti asvalav a Elisabed; erus mun efatimi arau. 8Is amen aien, um ago nauritai o ilpu atimi ahlap aien an nuhup o Atua, is idivaig ilpu etoan, 9is idivaig nedo o ilpu atimi ahlap, is leh nitai asjaaicnaig vaig o un aien par apan anliin neom ahlap o Ihova, um atnamud nitai auanipin upene. 10Eris amen ijo natimi asega is ahinag, um alaigaheni an nuarin-nadiat iyehki eris atnamud nitai auanipin upene iran. 11Is ehcohos ehelen a nagelo is ethi o Ihova, um aiji an nahaijin nefata uari nitai auanipin upene an matan. 12Is wat ecet yin a Sakaraias, is ehioehio inliinmopon aien, um imtitaig. 13Is um ika ehelen a nagelo, Jim imtitaig aiek, ak Sakaraias: eh mun atahaijeg nalaigaheni unyum; etpu apos inhalav atamaig a ehgam Elisabed, napu anvi nidan aiek par ika Joanes: 14etpu imyiacitak inliinmopom aiek um cediaig; uhu wit apos yin, erupu imyiacitak yin natimi inyi ahinag: 15etpu esjilid aien an nuhup o Ihova, inyi ti umnyi waina aien im kava; uhu wit apos yin, etpu idim amen alupas ehelen a Nesgan Upene: 16etpu imyiadumoij pan aien nupu Isreel inyi ahinag ehele Ihova Atua ura: 17etpu uhup iran aien, etpu emda inliinmopon aien inyi idivaig Elaija, etpu hedaig inliinmopoi ilpu atmil ura vai ilpu hal ura, im lep inliinmopoi ilpu atimi esjum va narapakau o ilpu atimi upene; etpu ago upene atimi aien par aitgai Natimarid. 18Is ika ehele nagelo a Sakaraias, Ekpu ehvato nitai ineigki ainyak? ek mun efatimi ainyak, um lep ahinag inmesese irai ehgak. 19Is tas a nagelo, um ika ehelen, Ek Cebriel ainyak, um aiji an nuhup o Atua; eris abrai nyak mika ki tas ehelum ainyak, um asuptecnaig ehelum intas upene iji eigki: 20napu idim pop aiek; etpu ehka intasvaig, um uhum pan an naopan iyehki etpu yetpam nitai iji eigki, va nimyiisjis nahcil unyum vai intas unyak, uhpu ehneijid an naopan o un. 21Eris aitgai Sakaraias natimi, um imyiali va namen o un anliin neom ahlap is itu iran. 22Is wat alau ijo aien, is um ehka intasvaig ehele ra: eris ato ara mika et mun ehcohos tah nitai ehelen anliin neom ahlap: is ahpoijaiji ra aien, is pop aien. 23Is wat atid nauritai o un aien, is atga o un aien, um apan an neom o un. 24Is wat ti pan itac nadiat iji ehki, is um opouc a ehgan Elisabed, is amen anliin neom o un aien an mohoc is ikman, um ika, 25Is ago nedo ineigki vai nyak a Ihova an naopan iyehki is wat alum nyak aien, um atipagki nitai ineig ek ehcamai vaig ainyak an nuhup o atimi. 26IS wat ti pan itac inmohoc is siks, is abrai Cebriel nagelo o un a Atua, mika yi apan aien an nuarinpece is ethi, nidan Nasared, an pece Calili, 27ehele natahaig is ethi, is aminjinanlai aien ehele natimi is ethi, nidan Josef, is mapoi Tevit aien; nidan natahaig iyehki Mere. 28Is han ehelen a nagelo, um ika, Kaiheuc vai euc, na mun ahesmoij aiek, etmu amen ehelum a Ihova: na esjilid aiek irai ilpu takata. 29Is wat ecet yin aien, is ehioehio inliinmopon aien vai intas o un; is aktaktai aien, um ika, Neveh tas ineigki? 30Is ika ehelen a nagelo, Jim imtitaig aiek, ak Mere: et mun aiheuc vai euc a Atua: 31napu opouc aiek, um apos inhalav atamaig, um anvi nidan par ika IESU: 32etpu esjilid aien, uhpu anvi nidan par ika Inhal o un Et esjilid aien: etpu ati imi yin a Ihova Atua dorona o etpon Tevit: 33etpu atimarid o ilpu mapoi Jekob aien irai iji mesese; inyi ti lep ti nelcau o un. 34Is ika ehele nagelo a Mere, Inyi echamecha nitai ineigki, kis eti ato natamaig ainyak? 35Is tas a nagelo, um ika ehelen, Etpu yetpan iram a Nesgan Upene, etpu ahelmon euc nemda o un Et esjilid aien: uhpu anvi nidan nitai upene iyehki napu apos aiek, par ika Inhal o Atua; 36et idim opouc a etoam Elisabed irai inhalav atamaig an nefatimi o un: is ti pan itac inmohoc is siks is opouc aien, eris ika is eti asvalav aien: 37et tup upene vai Atua niji itai asega. 38Is ika a Mere, Ek idim aheca atahaig o Ihova ainyak; etmu eteuc nitai ineigki ehelek, yi idivaig intas unyum.

Is ude yin a nagelo, um atga o un. 39An naopan iyehki is atidai a Mere, um auroauro, um apan alaig an nuarin-pece is ethi irai lola edoon, an pece Jutaia: 40um apan anliin neom o Sakaraias, um aiheuc vai Elisabed. 41Is wat atahaijeg intas aiheuc o Mere a Elisabed, is eliaujai a inhal o un an nipjinetgan; is amen alupas ehele Elisabed a Nesgan Upene: 42is ahlaig ijinies aien, um ika, Na esjilid aiek irai ilpu takata, um lep esjilid inhal unyum: 43nev edo ineig vai nyak, et mun ham ehelek a risi Natimarid unyak? 44ek wat atahaijeg intas aiheuc unyum ainyak, et mun eliaujai inhal unyak an nipjinetgak va nimyiacitak o un. 45Et mun ahesmoij aien is imyiisjis ninivaijec aien: uhpu ehneijid nitai iji ehki is asaig ehelen a Ihova. 46Is um ika a Mere,

EK imyiahpas Ihova an nesgak ainyak, 47et imyiacitak inliinmopok ainyak, vai Atua Natimi imyiatamaig nyak: 48kis wat tup atahaig ainyak, is aiheuc vai naheca o un aien: erupu asan tas upene vai nyak atimi asega, um yetpan irai iji mesese. 49Is ago nedo emda vai nyak Aien et esjilid aien; et idim upene nidan. 50Et aiheuc vai ra aien era imtitaig yin ara, um yetpan irai iji mesese. 51Is ago nedo emda an nikman aien; um terimterim irai ilpu atimi iji eigki is ijinies inliinmopura ara irai aktaktai ura. 52Is iknipagki ilpu atimi alupas aien irai dorona ura, jam atijai ra sji eigki eris opoupou ara. 53Is alayi ilpu atimi ehtele ra niji itai upene aien; jam abraig pan ra eris ikni itai ara, um eti alupai ra itai. 54Is atau imi Isreel naheca o un aien, um imyiehva naiheuc o un, 55vai Ebraham, im lep ilpu mapon asega irai iji mesese, is idivaig is upyi asaig aien ehele ilpu retpoija. 56IS amen a Mere ehelen an mohoc is eseij, ja par apan an neom o un.

57IS yetpam naopan ineig inyi apos inhal o un a Elisabed; is apos inhalav atamaig o un aien. 58Eris ato a ilpu atimi eblaamnem o un im ilpu atimi ehpan iran, nikavaig, is esjilid naiheuc o Ihova vai yin; eris ehrimyiacitak ehelen ara. 59Is wat ti pan itac nadiat is eet, eris asjapicnaig atimi mika eri aperitome irai inhalav; eris anvi nidan ara par ika Sakaraias, nilpun nidai etman. 60Is tas a risin, um ika, O’o; uhpu anvi nidan par ika Joanes. 61Eris ika ehelen ara, Er eti anvi nidan ineigki iran tah natimi ehpan iram. 62Eris ahpoijaiji etman ara, mika yi anvi nidan. 63Is ugni nitai aged iran aien, um aged, um ika, Et idan Joanes. Eris imyiali ara asega. 64Is um auroauro um asalgei nipjineucsen, is um eti pop aien, um tas, um imyiahpas Atua. 65Eris imtitaig atimi asega eris amen ubutpotet ehele ra ara: is apaahni intas va nitai iji eigki irai lola edoon asega an pece Jutaia. 66Eris ikni irai liimopura natimi asega eris atahaijeg ara, um ika, Inyi echamecha inhalav ineigki! Is amen ehelen nikmai Ihova. 67Is amen alupas a Nesgan Upene ehele etman Sakaraias; is upyi tas vaig aien, um ika, 68NAAURINEIG vai Ihova Atua o nupu Isreel; et mun ateghe ilpu atimi o un aien, um imyiatamai ra, 69et mun atijai nepat imyiatamaig caija aien, et mapoi Tevit aien naheca o un; 70et idivaig is upyi asaig aien irai ilpu profeta upene o un, itu acen: 71mika yi imyiatamaig caija vai ilpu atimi tak atimi iraija, im lep vai ra asega era amcel vai caija ara; 72um ago nedo aiheuc ineig is upyi asaig aien ehele ilpu retpoija, um lep imyiehya intas-etipup upene o un aien; 73intas upyi asaig iyehki is asig yi aktit aien ehele etpoija Ebraham, 74mika yi aiheuc vai caija aien, um imyiatamaig caija va atimi tak atimi iraija, mika ti aheca o un akaija, um jim imtitai ra, 75um ago nedo upene, im nedo atoh an nuhup o un, irai iji adiat an numumoh uja. 76Ak inhal unyak, uhpu anvi nidam par ika na profeta o un aiek Et esjilid aien: napu uhup aiek irai Natimarid, par ahped nefalaig vai yin; 77um asuptecnaig intas imyiatamaig caija ehele ilpu atimi o un, va uhpu iknipagki nedo has ura, 78va nedo aiheuc esjilid o Atua uja; va vitai ineigki et mun ateghe caija inlah an nohatag, 79par lah ehele ra era amen an naupat ara, et ahelmon ra inmas, um lep atau iraija an nefalaig eigpa. 80IS alupas inhalav iyehki, um emda inliinmopon; is amen aien irai uari amasacen, um uhum pan naopan iyehki is ehcohos aien ehele nupu Isreel.

Currently Selected:

Lukas 1: ATY1863

Highlight

Copy