Lukas 2
2
1An naopan iyehki is tas alep a Sisar Acustus, um ika, eri aged nidai atimi asega an pece. 2(Eris atupun um aged ehni nidai atimi an naopan iyehki is atimi alupas Sirya a Sairinyus.) 3Eris apan natimi asega irai uari-pece ura, mika eri aged idara. 4Is lep ahes an nuarin-pece Nasared a Josef an pece Calili, um apan alaig Jutaia, an nuarin-pece o Tevit, nidan Bedleem, is mapoi Tevit aien um up uran pece o un, 5mika eri aged nidan im lep Mere ehgan, eris upyi asanlai imi yin ehelen, is um opouc aien. 6Erus amen eahki arau, um uhum pan naopan iyehki is apos inhal o un aien. 7Is apos inhalav atamaig o un aien inmetto, um aso pam yin an napelumai, um ati yin an nelcau hag o kurimatau; is ti inuarin ineig eru amen iran arau anliin neom ehele atimi asega. 8Eris amen an pece iyehki a ilpu atimi asgi siip, eris amen ara an lelitai, um aminjinaig siip ura an nepeig. 9Is ehcohos pan ehele ra a nagelo is ethi o Ihova, is ehlo ra naijora Ihova; eris um imtitaig alupas ara. 10Is ika ehele ra a nagelo, Jim imtitaig aijaua: ekpu idim asuptecnaig ehelemia ainyak intas upene: erupu imyiacitak alupas natimi asega: 11eh mun apos Natimi imyiatamaig caua, an nadiat ineigki an nuarin-pece o Tevit, et Kristo aien Natimarid: 12nitai asjaaicnaig imi caua ineigki; Akupu ecet inhalav aijaua er aso pam yin an napelumai, et asjeuc aien an nelcau hag o kurimatau. 13Eris lep auroauro a ilpu agelo is ahinag an nohatag, um ehcohos pan ehele nagelo iyehki, um imyiahpas Atua, um ika, 14Etmu eteuc nimyiahpas vai Atua an nohatag ijinies acen; um eteuc neigpa an nobohtan, im naiheuc va atimi.
15Eris wat ude ra a ilpu agelo um aridjai an nohatag, eris tas jipe a ilpu atimi asgi siip, um ika, Ti apan Bedleem akaija, um almoi nitai ineig et mun ham, et mun asuptecnaig eheleija a Ihova. 16Eris auroauro ara um apan, um ecet Mere, im Josef, im lep inhalav nasjeucvaig an nelcau hag o kurimatau. 17Eris wat ecetai ara, eris asuptecnaig intas eris asaig ehele ra vai inhalav ineigki. 18Natimi asega iji ehki eris atahaijeg intas ineigki ara, eris imyiali nitai iji eigki ara eris asaig ehele ra a ilpu atimi asgi siip. 19Is imyiehva nitai iji eigki asega a Mere, um aktaktai inliinmopon. 20Eris atga ura a ilpu atimi asgi siip, um naaurineig vai Atua, um imyiahpas yin, va nitai iji eigki asega eris atahaijeg ara um almoi, et idivaig eris asaig ehele ra.
21IS wat ti pan itac nadiat is eet eris aperitome irai inhalav, eris anvi nidan par ika IESU, is anvi nidan a nagelo an naopan iyehki is pam eti opouc iran a risin. 22IS wat ti pan itac nadiat ago adicinadicin risin iran is idivaig intas alep o Moses, erus imyiapan yin Jerusalem arau mika eru ati yin an nuhup o Ihova; 23(et idivaig eris aged an tas alep o Ihova, um ika, “Erumu itaup vai Ihova a ilpu halav atamaig asega inmetto;”) 24um ahlap an nitai ahlap, et idivaig eris aged an tas alep o Ihova, um ika, “Nalaupa inyi ero, ka nucip haklin inyi ero.” 25Is amen Jerusalem natimi is ethi, nidan Simeon; is atimi upene aien um alaigaheni vai Atua, is aitgaig nitai imyiacitak imi nupu Isreel aien: is amen ehelen a Nesgan Upene. 26Is asuptecnaig ehelen a Nesgan Upene, mika yi upyi alum Kristo o Ihova aien, ja pah mas. 27Is apan aien anliin neom ahlap va Nesgan Upene: erus wat imyiapan Iesu inhalav ahwat atmil o un, mika eru ago nedo iyehki vai yin et idivaig intas alep, 28is leh yin aien, um ablim pam yin, um naaurineig vai Atua, um ika, 29Ak Natimarid, ek aheca unyum ainyak, an adceijaig eigpa nyak aiek an naopan ineig, et idivaig intas unyum: 30ek mun ecet natimi imyiatamaig cama unyum ainyak, 31aien as ati yin aiek an nuhup u atimi asega; 32mika yi itai lah aien imi nup urai iji pece, im lep nitai imyiahpas imi nupu Isreel unyum. 33Is imyiali a Josef im risin va nitai iji eigki eris asaig vai yin. 34Is asan tas upene vai rau a Simeon, um ika ehele Mere risin, Eris ati inhalav ineigki mika eri eropse nahaiji atimi inyi ahinag, um atidai inyi ahinag irai nupu Isreel, et lep itai asjaaicnaig uhpu asan tas has vai yin: 35(etpu idim ahcai inliinmopom nauitoga,) mika uhpu asuptecnaig naktaktai o inliinmopoi atimi inyi ahinag. 36Is amen naprofeta takata is ethi, nidan Ana, inhal o Fanuel, is mapoi Eser aien: is idim efatimi aien; is leh natamnyu un aien an natahaig o un, um amen ehelen an mesese is seven; 37is um mas a natamnyu un; is eete for inmesese iran; is amen aien an neom ahlap, um aheca o Atua an natwakam im nalaigaheni irai iji epeig im niji adiat. 38Is apan aien anliin neom an nuarin-nadiat iyehki, um lep naaurineig vai Ihova, um tas vai yin ehele ra asega Jerusalem, eris aitgaig natimi imyiatamaig ra ara. 39Erus wat atid niji itai asega arau, is idivaig intas alep o Ihova, erus adumoij pan arau Calili, an nuarin-pece urau Nasared. 40Is alupas a inhalav iyehki um emda inliinmopon, um esjilid narapakau o un: is aiheuc vai yin a Atua.
41ERUS apan Jerusalem ahwat atmil o un irai iji mesese u nasjapicnaig va napaska. 42Is wat twelv inmesese iran, erus apan Jerusalem arau, is idivaig nedo o atimi u nasjapicnaig iyehki. 43Is wat ti pan itac nadiat iji ehki, erus adumoij pan arau, is amen a Iesu Jerusalem is adualep aien; ja is eti ato a Josef im risin: 44erus aktaktai arau mika is ahced atimi aien; erus atga an nadiat is ethi arau, um ahilek yin ehele ilpu atimi ehpan ira rau im ilpu atimi eblaamnem urau: 45erus wat ti ecet yin arau, erus adumoij pan Jerusalem arau, um ahilek yin. 46Is wat ti pan itac nadiat is eseij, erus ecet yin arau anliin neom ahlap nateucvaig an niblai ilpu atimi esege; is atahaijeg ra aien, um lep ahodai ra vai itai. 47Eris imyiali yin ara asega eris atahaijeg yin, va nato upene o un im nasuptecnaig upene itai o un. 48Erus wat ecet yin arau, erus imyiali arau: is ika ehelen a risin, Ak inhal unyak, na auri aiek par ago nedo ineigki vai cumrau? ek mun ahilek euc ainyak im etmam, um imyitaig euc. 49Is ika ehele rau aien, Erau ahilek nyak aijaurau vanhe? erau idim ato aijaurau, nikavaig, eris idim ika ki ago niji auritai o Etmak ainyak. 50Ja erus eti ato arau intas ineig is asaig ehele rau aien. 51Is ahced rau aien, um apan Nasared, um imyiaiji intas urau: ja is apos intas asega iji ehki anliinmopon a risin. 52Is alupas a Iesu, is esjilid nato itai o un; is upene inliinmopoi Atua vai yin, im lep inliinmopoi atimi.
Currently Selected:
Lukas 2: ATY1863
Highlight
Share
Copy
Want to have your highlights saved across all your devices? Sign up or sign in
historic text maintained by the British and Foreign Bible Society
