Genese 40
40
1KE hwaban ta je ûnyi e haba at ame khöp utköiö belen than Aigupito, me at minya ame bi han, ame kong hwakecidru ka anyidru than, a than Aigupito. 2Ke Farao ame hmönyin ka li athnyabainy, wale taben tavat khöp utköiö belen than, me taben tavat adre me bi han. 3Ke e ame hnʼ ödru mʼ adre me tuʼ ödru hnyi uma umen taben hnyat tue, hnyin uma ceat wale adre cö Josefa hnyin. 4Ke haba taben tavat tue ame ip ödru unyi Josefa, me e ame huliwa ködru: kʼ ödru me laba hnyi ke je bong hnyi uma ceat. 5Ke ödru me ve bwi hnyi hnyinghet a khaca, ke ve bongon li bwidru, wale at ame khöp utköiö belen than Aigupito, me at ame bi han, wale adre cʼ ödru hnyin uma ceat. 6Ke ame didrö Josefa ködru hnyi hnyomakatu ka ō ʼdru, ke wâ bi, ödru me hlöuhlöu. 7Me e ame hnö li athnyabai Farao unyin, adre me tuʼ ödru hnyin uma umen tuhan, ka habe, Ieû ame khöt gan li hnyimaköbu hnyi bong ang? 8Kʼ ödru me thu kâu, ka habe, Öhme bwi, ke ba at ae khana he ka ha bongon. Ke haingö Josefa ködru, ka habe, Hawa, ca hamen Khong he ka ha ta je bongon? Bethe ha thö könya. 9Me haba taben hnyat khöp utköiö belen than ame aû gaga bwiny kö Josefa, haingen ka habe, Walang bwik, wâ bi e hnyi hnyi makök e hu vine; 10ke kun ta vheiny vine; ke helâke ame vhöng me suou vongon; me ame oâ je de wan vine ta je wan ae mat: 11ke e hnyi hnyamök kaia anyi Farao; me oge me hom je wan vine me owa ka hnyi kaia anyi Farao, me hom kaia ka hnyi hnyamö Farao. 12Ke haingö Josefa, ka habe, Walang bongon; Haba je vheiny a kun, me wale kun ta bong; 13ke e tiga ca um kun ta bong, ama he Farao ka ogörânyâ bâm, me ham hmetu köu hûdrâm: kʼ u ma he ka ham hmetu kaia anyi Farao ka hnyi hnyamâm, helâ me hwakecâm ehac, kʼ u me tiga khöp belen. 14Ke so u ma ûnykûmi nya minya e ka hu sot gam, ke o u na betenge gak, me haimemenö nya kö Farao, me me hum nya minya but ûnyi hnyi uma eang: 15anyin adre hia but venöu nya ûnyi hnyi hnyeiny at Heberu: ke ba ke ûnyi oge hia but ânyâ eang mʼ adre me ip nya ju hnyi hmonop. 16Ke a wâ but taben tavat bi han, a e so hna ha bongon, me e ame ha kö Josefa, ka habe, Oge bwi minya, ke wâ bi, kun ta tang areto ae hau hon bök: 17ke haba hnyi hnyin tang ethö görany e hu jeû hia adre le hobi kö Farao; kʼ ame han e hnen ta je meno ame gâ ûnyi hnyi tangen hon bök. 18Ke Josefa ame thu, ka habe, Walang bongon: haba ta tang a kun, me wale kun ta bong; 19ke tiga ca um kun ta bong ame he Farao ka ogörânyâ bâm ûnyi hnyi unyâm, me uhni u hnyi ûö; kʼ ame he ka an unyâm hnen ta je meno ame gâ. 20Ke haba hnyi bong a kuniny, wale bong ae gan adre hnöku Farao hnyin, ke e ame bi jeû hobi kâu lathnyabainy hia: ke e ame ogörânyâ bân taben tavat khöp utköiö belen than, me me bân taben tavat bi bân unyin lathnyabainy. 21Ke e ame ham hmetu hanymen ka taben tavat khöp utköiö belen than; me ame ham hmetu kaia ka hnyi hnyamö Farao: 22ke e ame uhno taben tavat bi han, helâ me hnö Josefa hna ha bongon ködru. 23Ke ame ca ûnykûmi Josefa bi hnen taben tavat khöp utköiö belen than, kʼ ame hnying ut e.
Currently Selected:
Genese 40: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
