Genese 41
41
1KE hwaban lo li huna, Farao ame bwi: ke wâ bi, e ame tot hnyi haten wagewe. 2Ke wâ bi ame o thö ûheny û hnyi wagewe je kâu a seven ae so ka wâ me pipikhenya; kʼ ödrin e han hnyi sâmun. 3Ke wâ bi hwabödrin dö, ame o minya thö ûheny û hnyi wagewe ke je kâu a seven ae kong ka wâ me delâ; kʼ ödrin e tha tot me ke je kâu hnyi haten wagewe. 4Ke haba je kau ae kong ka wâ me delâ, ödrin e han je kau a seven ae so ka wâ me pipikhenya. Me a hmak dö Farao. 5Ke e ame mokut hmetu me bwi: ke wâ bi seven ta je wan hwit ae wa se ke hlau ame kû hnyi vheny a khaca. 6Ke wâ bi, hwaban e, ame kû thö seven je wan hwit ae kong me meleca hnen anghwei. 7Ke haba je wan hwit ae kong ame han je wan hwit a seven ae wa se me hlau. Ke a hmak dö Farao, ke wâ bi, bwi bi. 8Ke haba hnyi hnyomakatu me ame hmak hnyekon; me e ame ûkhûnöng ka hawâ ta je magoi Aigupito hia me tavat ae metâ hia: ke Farao ame aû gaga ködrin bwiny; ke ba at ae khana he ka ha bongon kö Farao. 9Ke haba taben tavat adre me khöp utköiö belen than ame ha kö Farao, ka habe, Inya oge me ûnykûme hnyi bong ang anyik monu: 10ka habe, Farao ame hmönyin ka je lathnyabainy, me ame ip nya hnyi uma ceat hnyi uma umen taben tavat tue, tha inya me taben tavat bi han: 11ke öhmu me bwi hnyi lit a khaca, inya më; ke öhmu me ve bwi me ve bongon bi li bwihmu. 12Ke e bi unyihmu ke hidröu at Heberu, athnyabainy taben tavat tue; me öhmu me aû gaga kâu, ke e ame ha köhmun bongon li bwihmu; e ve bongon li bwihmu hnyi hnen hna ha. 13Kʼ ame hwâdâ thö helâ me hnen hna ha bongon köhmu, ka habe, e ame hna hmetu könya hanymök, ke haba ke at bi adre ma uhno. 14Ke haba Farao ame ûkhûnöng he ka hum Josefa, mʼ adre me hom logotâ but e ûnyi hnyi uma ceat eû hnyi kânâ: ke e ame gi me khavâ me he kö Farao. 15Ke haingö Farao kö Josefa, ka habe, Oge bwi ke ba at ae khana he ka ha bongon: ke oge löng ut gam, ka habe, U je ne löng bwi e khatö u he ka ha bongon. 16Ke Josefa ame thu kö Farao, ka habe, E ca khanö nya: ke ame he Khong ka thu kö Farao ûnyi ae so. 17Ke haingö Farao kö Josefa, ka habe, Wâ bi hnyi bwik oge me tot hnyi haten wagewe: 18ke wâ bi, ame o thö ûheny u hnyi wagewe je kau a seven ae pipikhenya me so ka wâ; kʼ ödrin e han hnyi sāmun: 19ke wâ bi hwabödrin dö ame o thö ke je kâu a seven ae sēnyin me ti kong ka wâ, me delâ, oge me ca wâ konginy helâe eang Aigupito: 20ke haba je kau ae kong me delâ ödrin e han je kâu a bân a seven ae pipikhenya: 21ke ödrin ka hia but ön ödrin, me ca manen dö, ka habe, ödrin e hia but ön ödrin; kʼ ödrin kong bala ka wâ helâ me eja. Mʼ inya oge me hmak dö. 22Ke oge me wâ hnyi ke bwik, me wâ bi, seven ta je wan hwit ae hlau me so ame kû hnyi vheny a khaca: 23ke wâ bi, hwaban ame kû thö ke je wan hwit a seven ae meleca, me kong, me ba önyen hnen anghwei: 24ke haba je wan hwit ae kong ame han je wan hwit a seven ae so: ke oge me omanenâ e ka je magoi; ke ba at ae khana omanenâ bongon könya. 25Ke Josefa ame ha kö Farao, ka habe, Khaca thibi hnö Farao hna bo: a hia but Khong omanenâ kö Farao ûnyi e ame he ka ânyâ. 26Haba je kau a seven ae so, me wale seven ta huna; ke haba je wan hwit a seven ae, me wale seven ta huna: khaca thibi ang bwi. 27Ke haba je kau ae dela me kong a seven ame o hwabödrin, me wale seven ta je huna, ke haba je wan hwit ae ba önyen ame ohû hnen anghwei; me wale seven ta je hunainy hmiâ. 28Wale ûnyi oge me ha kö Farao, ka habe, Khong ame hia but omanenâ kö Farao hnen hna he ka ânyâ. 29Wâ bi, ame he ka o ta huna a seven, ke gan hmâ widrany eang hnyi hnyei Aigupito hia: 30ke hwaban e ame he ka o ta hunainy hmiâ a seven; kʼ adre me he ka hnying widran hnyi hnyei Aigupito; kʼ ame he ka aû but hnyei hnen hmiâ. 31Kʼ ame ca he hmetu ka manen widrany hnyi hnyei anyin ae gan hmâ hmiâ hwaban e, anyin ame he ka ti gan hmâ hmiâ eling. 32Ke Farao ame olo bo, waleling me me he Khong ka ohmâ ûnyi e, kʼ ame ie he Khong ka ohwâdâ. 33Anyin a wale e so e he Farao ka ûca at ae hu oûnykûminy me metâ, ke otilâ e, hon hnyei Aigupito. 34Ke so e he Farao ka ânyâ ta je ûnyi eang, wale he ka otilâ ta je homakan hon hnyei me hlo ke keihen a thabûnginy jeû hnyi hnyei Aigupito hnyi je hunainy widrany a seven. 35Ke so adre me he ka ûkhöûnâ je jeû hia thithö hnyi ta je huna eling ae so ame he ka o, me ûkhöûnâ hwit me me musö hnö Farao, hnân jeû hnyi je taun, ke hamödrin he ka tuö e. 36Ke wale thibi e jeû adre me he ka ip penapena hobi kâu tavat hnyi je hunainy hmiâ a seven ame he ka o ka hnyi hnyei Aigupito; me me ca he ka hia tavat hnen hmiâ. 37Ke so hofuc eling kö Farao me lathnyabainy hia thithö. 38Me haingö Farao ka lathnyabainy, ka habe, Hawa, ötin e he ka wâ at ae ûcû me at ang, ke e unyin Hanon Khong? 39Ke Farao ame ha kö Josefa, ka habe, E ba at ae hu oûnykûminy me metâ helâ möu, anyin a hia but Khong omanenâ köu ta je ûnyi hia e: 40u thibi at ame he ka hon hnyabak, kʼ u ma he ka musö ik hnyei hoton hwâm hofuc: ke theron thiju oge ma he ka beönua hom. 41Me haingö Farao kö Josefa, ka habe, Wâ bi, oge hia but otilö u hon hnyei Aigupito hia. 42Ke Farao ame uny wen banyen me inâ ga Josefa, me okhavâ e ge ta je ûkhaû lino, me ovhekinyâ e ge sa gol; 43kʼ ame ip e hon anyin ûkariota a loiny; kʼ adre me hongot hnyi hnyimakan, ka habe, Iâû ju öbun: kʼ ame otilâ e hon hnyei Aigupito hia. 44Ke haingö Farao kö Josefa, ka habe, Inya Farao, ke u ka ca musi, e ba at ame he ka ogörânyâ hnyamen me can hnyi hnyei Aigupito hia. 45Ke Farao ame hwenyi iö Josefa, ka habe, Zafenatha-paenea; kʼ ame ham kâu Asenatha nöku Potifera at bihut hnyi Ona, hnân âiân. Ke Josefa ame vheno hnyei Aigupito hia. 46Ke thöte ta je hunai Josefa, hnyi ûen e ame tot hnyi hnyimakö Farao than Aigupito. Ke Josefa ame he ûheny ûnyi Farao, me vheno hnyei Aigupito hia. 47Kʼ ame wa gan hmâ but kânâ hnyi je hunainy widrany a seven. 48Ke e ame ûkhöûnâ ta je jeû hia thithö hnyi je huna a seven hnyi hnyei Aigupito, me ip hnyi ta je taun: waleji troban ta je utkânâ igigilö ta je taun, e ame ve ip hnyin. 49Ke Josefa ame ûkhöûnâ hwit helâ me önyin köiö, e ti gan hmâ, waleling me me ca aû hmetu e; anyin a ca hnân aû. 50Ke ame hnokoâ li laku Josefa a baga, ke tiga hia je hunainy hmiâ, wale ame hnokoâ hnö Asenatha nöku Potifera at bihut hnyi Ona. 51Ke Josefa ame hwenyi ien atö, Manase: haingen, ka habe, Anyin a hia but Khong okhöti nya hnyi anyik ta je vec hia, me hnyaba cica hia. 52Ke e ame hwenyi ien wakeiat Eferaima: haingen, ka habe, Anyin a Khong ame osi nya hnyi hnyei adre oveci nya hnyin. 53Ke a um dö je hunainy widrany a seven hnyi hnyei Aigupito. 54Me ame hwân ka o je hunainy hmiâ a seven, helâ me hnö Josefa hna ha: ke e but hmiâ hnyi te je hnyei hia; ke e hu han bi hnyi hnyei Aigupito hia. 55Ke ame mekihnânem but hnyei Aigupito hia, me haba tavat adre me tengiâ kö Farao ba han: ke Farao ame ha ka at Aigupito hia, ka habe, He thʼ öbun kö Josefa; me ânyâ thö ûnyi ama he ka ha köbun. 56Ke hmiâ hia thö je hnyei hia: ke Josefa ame khöng ut ta je uma jeû hia, me ûcû ka at Aigupito; ke gan hmâ but hmiâ hnyi hnyei Aigupito. 57Kʼ ame he Aigupito ai ta je hnyei hia he ka ûcû jeû ûnyi Josefa, anyin ae gan hmâ hmiâ hnyi ta je hnyei hia.
Currently Selected:
Genese 41: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
