Genese 42
42
1KE khanö Jekob but ae hu jeû Aigupito, me Jekob ame ha ka je lakon, ka habe, Ieû e gabun öbun e iwahmö thibi? 2Ke haingen, ka habe, Wâ bi, oge löng ut a e hu jeû Aigupito: he thʼ öbun kâ e ka ûcû ö ʼtin mʼ ötin e möt me ca mok. 3Me ame he ta je latuhö Josefa a libenyita he ka ûcû jeû hnyi Aigupito. 4Ke Jekob ame ca kunö Beniamina kei Josefa tha e me je latuhan, anyin a haingen, ka habe, Wâ e nye o but kong kâu. 5Ke ame o but je laku Isaraela he ka ûcû jeû, unyin tavat adre me o eling: anyin ae hmiâ but hnyei Kanana. 6Ke Josefa ame musi hnyi hnyei, kʼ ame ûcû jeû me tavat hia hnyi hnyei: kʼ ame o but je latuhö Josefa me nom ju hnyikânâi kâu. 7Ke a wâ but Josefa je latuhan, me wâhmakhmeto ödrin, me e ame bi ke at ködrin, me fuc hwege, me ha ködrin, ka habe, Öbun e mwi ua? Kʼ ödrin e thu, ka habe, Öhmun e mwi hnyi hnyei Kanana, öhmun e he ka ûcû jeû. 8Ke Josefa ame wâhmakhmeto je latuhan, kʼ ödrin e ca wâhmakhmeto e bi. 9Ke Josefa ame ûnykûme li bwi e ame bo gadrin, me e ame ha ködrin, ka habe, Öbun je hnyat ae kong; öbun e o but he ka ecmâkâ hnyei ae ba ûnyi. 10Kʼ ödrin e thu kâu, ka habe, Than lö, e ba, kʼ ame o but lathnyabaem he ka ûcû jeû. 11Je lakon at a khaca öhmun hia; öhmun e hnathu, öhmun e ca he ka ecmâkâ hnyei, a öhmun lathnyabaem. 12Ke haingen ködrin, ka habe, Ohe, öbun e o but he ka ecmâkâ hnyei ae ba ûnyi. 13Ke haingödrin, ka habe Haba öhmun lathnyabaem je liamekeiny a twelv, lakon at a khaca, hnyi hnyei Kanana; ke haba wakeiat hmönyin tha e biju me kamöhmun walang ang, ke hia but khaca. 14Ke Josefa ame ha ködrin, ka habe, Wale hnök hna ha köbun, ka habe, öbun je hnyat ame he ka ecmâkâ hnyei: 15ke walang hnân ohnathu öbun, ka habe, Kia inya Farao a öbun e ca he ka he ûheny ang e ka ca o minya eang keibun wakeiat hmönyin. 16Kunâ thö ke at gabun he ka hom keibun, kʼ adre me he ka eʼ öbun me cubec hobun hofuc, öbun e ne hnathu: ke ame ne ba, kia inya Farao a öbun je hnyat ame he ka ecmâkâ hnyei. 17Ke e ame eʼ ödrin kun ta bong. 18Ke haba hnyi bong a kuniny Josefa ame ha ködrin, ka habe, Ânyâ thʼ öbun ûnyi ang mʼ öbun e möt; anyin a iny outen Khong: 19öbun e ne hnathu, e so adre ca ke at gabun a je liamekeiny hnyi uma adre eʼ öbun hnyin; ke he thʼ öbun hom dö jeû ka anyibun je lap ae mekihnânem: 20kʼ öbun hmeto thö könya keibun a wakeiat hmönyin; me me ohnathoâ hobun hofuc, mʼ öbun e ca he ka mok. Kʼ ödrin e ânyâ helâe. 21Ke ödrin e tha ûhnenamö, ka habe, E hnathu jönitin keitin anyin a ötin e wâ thö vecin hnyekon e, waleji e ame khöû kötin kʼ ötin e ca löng bi; waleling me me o but kötin vec eang. 22Ke haba Reubena ame thu ködrin, ka habe, Hawa, oge ca hia but ha köbun, ka habe, ca okongoâ da; kʼ öbun e ca löng? Anyin a wale wâ bi, adre me elâm hwaban dren. 23Ke ca khanʼ ödrin a Josefa ame löng hmakhmeto, anyin a e ame ûhnenamö mödrin deny at ame wia hwan hnyei. 24Ke e ame he thö unyidrin, me tenge; ke e ame hmetu ködrin me ûhnenamö mödrin, me hum Simeona unyidrin me ca e hnyi hnyimaködrin. 25Ke Josefa ame kunâ he ka ounöngötâ tangödrin je tang ge hwit, me ve hitangen anyidrin je mone hnyi tangödrin je tang, me ha kamijidrin hobi kâu eû hnyi gethen: kʼ adre ânyâ helâe ködrin. 26Kʼ ödrin e ve ip ta je tang hwit hon haledrin je asina, me he but. 27Ke haba ke at gadriu ame khong tangen tang he ka han haleny asina hnyi omtabaga, kʼ ame wâ anyin mone; ke wâ bi e hnyi hnyimen tangen tang. 28Ke e ame ha ka je liamekeiny më, ka habe, Wale hmetu thö ang anyik je mone hnyi tangök tang: me ame gâ udrin, kʼ ödrin e öbubuny me ûhaköuâ, ka habe, Ieû ang a ânyâ kötin Khong? 29Ke ödrin e o but kö Jekob a kamödrin hnyi hnyei Kanana, me ödrin e thumeto e ge ta je ûnyi hia ame o but ködrin, ka habe, 30Ame fuc hwege köhmun at, wale thaniny hnyei, me ha, öhmun e ecmâkâ hnyei. 31Ke haingöhmun kâu, ka habe, öhmun e hnathu, öhmun e ca ecmâkâ hnyei: 32öhmun je liamekeiny a twelv, ke khaca thibi kamöhmun; a hia but ke at, ke haba wakeiat hmönyin e unyin kamöhmun hnyi bong ang hnyi hnyei Kanana. 33Ke ame ha köhmun at, wale thaniny hnyei, ka habe, Walang haten mʼ inye he ka wâhmakhmetoâ a öbun e hnathu, hnen biju ang unyik ke at gabun je liamekeiny ke hok ö ʼbun dö ka anyibun je lap ae mekihnânem, ke he thʼ öbun: 34ke hom dö könya keibun wakeiat hmönyin: ke wale oge me he ka wâhmakhmetoâ a öbun e ca he ka ecmâkâ hnyei, kʼ öbun je hnyat ae hnathu: ke oge me he ka ham hmetu köbun liamekeiny möbun, me öbun e he ka ûcû hnyi hnyei. 35Ke ödrin e ve hingâlâ önyen tangödrin je tang, ke wâ bi, ve e bi hnyi tangödrin je tang anyidrin je tang mone; ke ödrin e wâ me kamödrin anyidrin je tang mone, mʼ ödrin e ot. 36Kʼ ame ha ködrin Jekob a kamödrin, ka habe, Öbun hnyat öbun e ohia lakuk: a hiö Josefa but, ke hiö Simeona but, kʼ öbun e he minya ju ka hum Beniamina: hnân okongu nya ta je ûnyi hia thithö eling. 37Ke haingö Reubena ka kamen, ka habe, U ma he ka hlingâ lakuk li baga, iny ka ca hom hmetu e köu: hna but e ka hnyi hnyamök, ke oge me he ka hmeto e köu. 38Ke e ame ha, ka habe, Ame ca he nökuk ka tha he möbun; anyin a mokcu keiny, ke hake biju e: ke a ne o but kong kâu eû hnyi gethen öbun e he, me öbun e he ka otengiö nya kʼ iny hûen dut ke ne o but ka hnyi erkemok.
Currently Selected:
Genese 42: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
