Genese 43
43
1KE gan hmâ but hmiâ hnyi hnyei. 2Ke ödrin e hia but han hwit waleji ödrin e hom ûheny Aigupito, me ame ha ködrin kamödrin, ka habe, He hmetu thʼ öbun ka ûcû ö ʼtin. 3Ke haingö Juda kâu, ka habe, A hûna hwegiâ köhmun hnen at, ka habe, Ca he hmetu öbun ka iohnyimak mönya e ka hia unyibun keibun. 4U je ne he ka tha kunâ möhmun keihmun, mʼ öhmun e he ka he me ûcû âm; 5kʼ u je ne ca he ka hnyi kunâ e, mʼ öhmun e ca he ka he kâ e: anyin a haingen at köhmun, ka habe, Öbun e ca he ka iohnyimak mönya e ka hia minya unyibun keibun. 6Ke Isaraela ame ha, ka habe, Ieû gabun öbun e okongu nya, me haimemenâ ka at a gʼ ame hu keibun biju ang? 7Ke ödrin e thu, ka habe, A hnö wia gahmun hnen at me je lahanöhmun, me ha, Hawa, e tiga möt kamöbun? ke e hu keibun biju eiö? mʼ öhmun e thu kâu hoton ta je ûnyi eling: anyin ae ca khanöhmun a gʼ ame he ka ha, ka habe, He thʼ öbun ka hom keibun? 8Ke Juda ame ha kö Isaraela a kamen, ka habe, Hna but könya da, kʼ öhmun e he ka tha he; mʼ ötin e möt, me ca mok, öhmun, möu, me je lakutin. 9Oge me he ka bi singiny; kʼ u ma he ka elâm e unyik: iny ka ca he ka hom hmetu e köu, me ip hnyi hnyimâkâm, e so e takû nya konginy nyiele balua: 10anyin adre ne ca ovheli öhmun, mʼ öhmun e ne hmetu but ang aloiny. 11Kʼ ame ha ködrin hnö Isaraela a kamödrin, ka habe, Hawe, a ne helâe, walang hnöbun hna he ka ânyâ, hom dö hnyi tangöbun je tang ta je wan ae ûnyi hnathu hnyi hnyei, ke hom dö ka at ta je bwihlany, wale tap basama, me tap hani, me setura, me muro, me je betuni, me je saked: 12ke hom dö je tang mone a usa lo hnyi je hnyamöbun; ke haba je mone adre hitangen hnyi hnyimen tangöbun je tang, hom hmetu thö hnyi je hnyamöbun; wâ adre nye ânyâ monoâ: 13ke hom minya thö keibun, me todrö, me he hmetu thʼ öbun ka at: 14ke so e he Khong Aekhanahia ka okûâ köbun betenge hnen at me me tha kunâ möbun liamekeiny möbun me Beniamina minya. Kʼ adre ne ohia lakuk, hawe, iny kong ut. 15Ke a hom je bwihlany eling hnen tavat, mʼ ödrin e hom je mone, ûsa lo li tang hnyi je hnyamödrin, tha ödrin me Beniamina; kʼ ödrin e tot me he Aigupito ai, me tha tot hnyi hnyimakö Josefa. 16Ke Josefa ame ō Beniamina unyidrin, me ame ha ka at ame tuö hnyaban, ka habe, Su thö tavat eang ka hnyi uma, me hlingö meno, me penapena; anyin ödrin e he ka tha han mönya eâu jebigösah. 17Me ame ânyâ hnen at helâ me hna ha hnö Josefa; me hum ödrin ka hnyi uma umo Josefa. 18Kʼ ame ot je hnyat anyin adre me su ödrin ka hnyi hnyaba Josefa; kʼ ödrin e ûhaköu ka habe, Can je mone adre hitangen hnyi tangötin je tang hnyi ûen a bân, mʼ adre me su ötin kââng; me me he ka heleû can gatin, me ut kötin, he ka hom hwenbʼ ötin, me haletin je asina. 19Kʼ ödrin e he ka at ame tuö hnyaba Josefa, me ûhuenamö më hnyi hwanumen uma, 20me ha, ka habe, Than lö, öhmun e bân ka he jem ehac ka ûcû jeû: 21ke öhmun e o but ka hnyi omtabaga, me öhmun e khong ut tangöhmun je tang, ke wâ bi, e ve e anyihmun je mone hnyi hnyimen tangöhmun je tang, wale anyihmun je mone ae bekhöt: kʼ öhmun e hom hmetu ang hnyi je hnyamöhmun. 22Ke öhmun e hom walang ang ke je mone hnyi je hnyamöhmun he ka ûcû jeû: e ca manen köhmun ie at ame hitangen hmetu anyihmun je mone hnyi tangöhmun je tang. 23Ke haingen ködrin, ka habe, Öbun so, ca ot: hnen Khongubun, a Khongon kamöbun hna ham köbun tang omjeû hnyi tangöbun je tang: oge hia but kap anyibun mone. Ke e ame hum Simeona but ködrin. 24Ke haba at ame hom je hnyat ka hnyi uma umo Josefa, me ham ködrin utköiö mʼ ödrin e hneû je li cadrin; kʼ ame han haledrin je asina. 25Ke ödrin e penapena ta je bwihlany hobi kâu e ka o Josefa hnyi jebigö: anyin a ödrin e löng a ödrin e he ka hnyi han eling. 26Ke a o but Josefa ka hnyi uma, mʼ ödrin e hom kâu eiö hnyi uma anyidrin je bwihlany, me ödrin e nom ju hnyikânâi kâu. 27Ke e ame hnei ödrin ge anyidrin sot, me ha, ka habe, Hawa, e hwege kamöbun, waleji hingat öbun e ha? hawa e möt balua e? 28Ke ödnn e thu, ka habe, E hwege athnyabaem a kamöhmun, kʼ e möt balua. Ke ödrin e nom je bödrin me iâû. 29Ke e ame bwele me ö Beniamina a keiny, a tha hinyen më, me ha, ka habe, Wale keibun wakeiat hmönyin, waleji öbun e ha könya? Ke haingen, ka habe, Nokuk lö, e so Khong ame he ka betenge gam. 30Ke Josefa ame he mweimwei; anyin a e gan hmâ anyin ibetengiö ka keiny: kʼ ame heleû dok he ka tenge hnyin; me e ame didrut ka hnyi hnyeulen me tenge eling. 31Ke e ame osûâ hnyimakan, me dit hmetu but me hokhnyok me ha, ka habe, Laulau but. 32Kʼ ödrin e ve laulau hobi kâu, me hobi ködrin, me hobi kâu hnyat Aigupito ödrin e tha han më, anyin ae kap ka at Aigupito he ka tha han me at Heberu; anyin ae ikiki ka at Aigupito ûnyi e. 33Kʼ ödrin e laba gaga hnyi hnyimakan, wale atö ke ne o but ka wakeiat hnyi je ve hnödrin bi: ke haba hnyat ödrin e uthmok. 34Ke e ame kunâ ködrin ta je tap jeû ûnyi gan: ke gan hmâ hna haö Beniamina hudrin a othabûng. Kʼ ödrin e ic me tha senyin më.
Currently Selected:
Genese 43: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
