Genese 44
44
1KE e ame hûna ka at ame tuö hnyaban, ka habe, Öunöngötâ ju ta je tang tangen je hnyat ge jeû, me me hmak ka hijen, ke ve hitangen ju anyidrin je mone hnyi hnyimen je tang. 2Ke hitangen ju anyik kaia, wale kaia sileva hnyi hnyimen tang tangen wakeiat, me mone hwaban ân tang jeû. Kʼ ame ânyâ helâ me hofuc ho Josefa. 3Ke a lany jut, e ame kunâ je hnyat, ödrin me haledrin je asina 4Ke ödrin e he but ûhedrin hnyi taun, kʼ ödrin tiga ca sâkâû, me Josefa ame ha ka at ame tuö hnyaban, ka habe, Todrö, wadring dö hoton je hnyat, ke u ka hom tilʼ ödrin, ha thö ködrin, ka kabe, Ieû gabun obune bi hwaban so hnen kong? 5Hawa, ca e ûnyi ic anyin anyik than, me anyin ûnyi hnân kikite? e kong hnöbun hna ânyâ. 6Ke e ame hom tilʼ ödrin me ha ködrin je hofuc eling. 7Ke haingödrin kâu, ka habe, Than j ame ha hofuc eling geû? Ohe e ca khanʼ öhmun je athnyabaem he ka ânyâ ûnyi e. 8Wâ bi, haba je mone öhmun e wâ hnyi hnyimen tangöhmun je tang, me öhmun e hom hmetu köu ûheny hnyi hnyei Kanana: hawe, öhmun a kâmâu ka venâu sileva me gol ûnyi hnyi uma umen tuhâm? 9Ke adre ne wâ unyin ke at gahmun a je lathnyabaem, me ame he ka mok, kʼ öhmun e he biju ka bi lathnyabainy than. 10Ke haingen, ka habe, E so e he ka helâ me hobun hofuc; ka habe, E ka wâ thö e unyin ke at, me ame he ka bi athnyabaik; kʼ öbun e he biju ka wisa. 11Kʼ ödrin e ie hom but tangödrin ta je tang hnyikânâi, me ve khong tangödrin je tang. 12Me e ame hwân ka elâm unyin atö ke ne; o but ka wakeiat: kʼ adre wâ ju kaia hnyi tang tangö Beniamina. 13Me ödrin e kia anyidrin je ûkhaû me ve ip hmetu je hok hnyi haledrin je asina, me hmetu ka hnyi taun. 14Kʼ ame o but Juda me je liamekeiny më ka hnyi uma umö Josefa; ke tiga e e: kʼ ödrin e ta ju hnyikânâi hnyi hnyimakan. 15Ke haingö Josefa ködrin, ka habe, Ie ûnyi ang öbun e ânyâ? e ca khanʼ öbun a inya ang at ae tren kikite? 16Ke Juda ame ha ka habe, Than lö, öhmun e he ka thu ieû? ke ieû öhmun e he ka ha? kʼ öhmun e he ka kâmâu hna haiwisai öhmun? A hia but Khong omanenâ konginy je lathnyabaem: wâ bi öhmun je hwenbâ anyin than, walʼ öhmun ang, me at minya adre wâ gan kaia. 17Ke haingen, ka habe, Ohe, ame ca he ka helâe: ke haba at adre wâ unyin kaia e ame he ka hwenbâ unyik; ke haba öbun, he thʼ öbun me hmanenang ka kamöbun.
18Me haba Juda ame hakekeny kâu, me ha, ka habe, Than lö, ö u hnö nya a athnyabaem he ka ha ong hofuc ka hnyi li hnyikönyen than, ke ca he ânyam hmönyin ka palulu ka athnyabaem: anyin a u ûcû me Farao. 19Hnen than hna hnei öhmun je lathnyabaem, ka habe, Hawa, e hu kamöbun, me keibun? 20Ke öhmun e thu ka than, ka habe, E hu kamöhmun, a hingat, me nokon hingat a e a wakeiat at ae ûhnyûkong; ke a mokcu tuhan, ke hake e biju nokon hinyen, kʼ ame betenge gan hnen kamen. 21Kʼ u je ha köhmun a je lathnyabaem, ka habe, Hom but könya me inye he ka wâ e. 22Kʼ öhmun e ha köu than, ka habe, E ca khana da he ka hna kamen: anyin a ne hna kamen; me ame he ka mok. 23Ke u je ha köhmun lathnyabaem, ka habe, A ne ca tha o möbun keibun a wakeiat, ca he hmetu öbun ka iohnyimak mönya. 24Ke öhmun e o but ka kamöhmun a athnyabaem, me öhmun e thumeto e ge hwâm hofuc, than. 25Ke kamöhmun ame ha, ka habe, He hmetu thʼ öbun ka ûcû ö ʼtin. 26Me haingöhmun, ka habe, E ca khanʼ öhmun he ka he: e ka he unyihmun keihmun a wakeiat, öhmun e he ka he: anyin ae ca khanʼ öhmun he ka iohnyimak me at eling, e ka hia bi unyihmun keihmun a wakeiat. 27Ke haingö cica athnyabaem köhmun, ka habe, E khanʼ öbun a ga hnokoâ hnen öiök lo lakuk li baga: 28kʼ ame he but gak ke at, ke haingök, ka habe, A hia but oloû usu kia e; kʼ oge me ca wâ hmetu e: 29ke öbun e ne hom minya at ang unyik, kʼ ame ne o but kâu kong, mʼ öbun e he ka otengiö nya, kʼ oge hûan dut, ke ne o but ka hnyi erkemok. 30Ke walang ang iny ka o kö cica athnyabaem, ke hia biju gahmun da; anyin adre ûhûkâlâköuâ anyin möt me möt anyin da; 31ke e ka wâ but ae hia biju gahmun da, me e ame he ka mokcu: kʼ ame he je lathnyabaem ka otengiâ athnyabaem a kamöhmun ke hûen dut ke ne o but ka hnyi erkemok. 32Ke haba inya athnyabaem singiny da hobi kö cica, ka habe, Oge ne ca he ka hom hmetu e kâu, ame he bala ka jönik ga cica nyiele balua. 33Ke walang ang than lö ö u hnö nya a athynabaem ka laba biju, a bâ, me hwaban da; ke so e tha he thö da me latuhan. 34Anyin oge ma kâmâu ka he kö cica ke hia biju unyik da? wâ inye wâ thö kong ame he ka o kö cica.
Currently Selected:
Genese 44: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
