Genese 45
45
1KE ca khanö Josefa hmetu he ka hokhnyok hnyi hnyimaködrin hia adre me tot unyin; me ame hongot, ka habe, Kunâ but unyik tavat hia. Ke Josefa ame omanenâ e bi ka je liamekeiny më, ke ba ke at biju unyin. 2Ke e ame tenge hwege göranyai: kʼ ame löng at Aigupito, kʼ ame löng minya lap anyi Farao. 3Ke haingö Josefa ka je liamekeiny më, ka habe, Inya Josefa; hawa e möt cica? Ke ca khana je liamekeiny mē he ka thu kâu, anyin ödrin e uthmok gan. 4Ke Josefa ame ha ka je liamekeiny mē, ka habe, Hok ju jem öbun könya. Mʼ ödrin e hakekenyâ. Me ame ha, ka habe, Inya Josefa liamekeiny möbun, waleji at öbun e ûco kââng Aigupito ai. 5Ke walang ang ca hmak je hnyekubun, ke ca tenge can anyibun monu, hnyi hnöbun hna ûcû nya kââng; anyin a Khong ame kunö nya bân inya hnân ûhömeli. 6Anyin a lo but li hunainy hmiâ ang hnyi hnyei: ke thabûng biju ta huna ke ba hmetu trohnen me menu. 7Ke Khong ame kunâ bân inya he ka tuʼ öbun a kolon biju hnyi hnyei, me he ka omeli öbun hnen ûhömeli ae gan. 8Anyin öbun e ca kunö nya jem, ke hnen Khong: ke a hia but otilö nya hnân kamö Farao, me thaniny hnyaban hia, me at musi hnyei Aigupito hia. 9Ie he thʼ öbun kö cica, me ha kâu, ka habe, Walang hna ha hnö Josefa a nokom, ka habe, A hia but Khong otilö nya hnân thaniny hnyei Aigupito hia thithö: he but jem könya, ca bec: 10ke u ma he ka laba hnyei Gosena, mʼ u ma hakekenyi nya, u me je lakom, me je laöbem, me halem je hnahat mamoe, me halem je kâu, me ânyâm ta je ûnyi hia thithö: 11kʼ oge me he ka tuö u eling, anyin a thabûng biju je hunainy hmiâ; wâ u nye theduoc, me ânyâm lap, me ânyâm ta je ûnyi hia 12Ke wâ bi, ame wâ li emaköbun, me li emakö Beniamina a keik, a gʼ ame fuc köbun hnen hnyimök. 13Ke öbun e he ka thumetu cica ge anyik hmanenang hia hnyi Aigupito, me ta je ûnyi hia öbun e wâ: ke ie su cica but jem. 14Ke e ame ta ju hon nyi Beniamina a keiny, me tenge, ke Beniamina ame tenge hon nyin. 15Ke e ame ûcimhnyimak me je liamekeiny më hia, me tenge ködrin: ke hwaban e haba je liamekeiny më ödrin e ûhnenamö me.
16Ke adre me löng hnyi hnyaba Farao, ka habe, A o thö je liamekeiny me Josefa: ke haba Farao me lathnyabainy ödrin e sënyin. 17Ke haingö Farao, kö Josefa, ka habe, Ha thö ka je liamekeiny möu, ka habe, Walang ûnyi öbun e ha ka ânyâ, bi hokâ ju hon halebun je meno, ke he thʼ öbun ka hnyi hnyei Kanana; 18me hom dö kamöbun me anyibun je lap jem könya: ke oge me he ka ham köbun soiny hnyei Aigupito, kʼ öbun e he ka han pipikhenyainy hnyei. 19Ke walang ang, oge me hûna köu ûnyi öbun e he ka ânyâ; hom dö je ûkat hnyi hnyei Aigupito hobi kâu je lakubun ae ûhnyûkong, me je laöiöbun, ke hom but kamöbun me he jem. 20Ke ca ûnykûme bi anyibun ta je ûnyi; anyin a hobi köbun soiny hnyei Aigupito hia. 21Kʼ ame ânyâ helâe hnen je laku Isaraela: ke Josefa ame ham ködrin ta je ûkat hoton hna hûna hnö Farao, kʼ ame ha kamejidrin hobi kâu gethen. 22Ke e ame ham ködrin hia ûsa lo je ûkhaû; ke e ame ham kö Beniamina kun ta haded sileva, ke thabûng ta ûkhaû. 23Ke walang hnen hna kunâ ka kamen, libenyita je asina, adre bi hokâ ge ta je ûnyi ae so hnyi Aigupito, ke libenyita ta je asina momo adre bi hokâ hnen hwit, me areto, me kamejin kamen eû hnyi gethen. 24Ke e ame kunâ je liamekeiny më, mʼ ödrin e he but: ke haingen ködrin, ka habe, Ca he öbun ka û eû hnyi gethen. 25Ke ödrin e he but ûheny Aigupito me o hnyi hnyei Kanana ûnyi Jekob a kamödrin. 26Ke ödrin e thumeto e ka habe, E tiga möt Josefa, ke e at ame musö hnyei Aigupito hia. Kʼ ame hmak hnyekon, anyin a e ame ca köp ödrin. 27Ke ödrin e thumeto e ge ta je ûnyi hia ame ha Josefa ködrin: ke e ame wâ je ûkat a kunâ Josefa hnân taben bi, me ame möt hmetu thö hnyeku Jekob a kamödrin: 28ke haingö Isaraela, ka habe, E ûcû, e tiga möt bi Josefa nökuk: oge me he ka he me iouny me kʼ iny tiga ca mok.
Currently Selected:
Genese 45: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
