Genese 46
46
1KE Isaraela ame he me anyin lap hia, me o hnyi Bere-seba, me hudo eling je hut ka Khongu Isaaka a kamen. 2Ke Khong ame ba kö Isaraela hnyi hna omanenâ hnyi hnyinghet, ka habe, Jekob, Jekob lö. Me e ame ha, ka habe, Inya ang. 3Ke e ame ha, ka habe, Inya Khong, a Khongon kâmâm: ca ot he ka he Aigupito ai; anyin oge me he ka wiö u eling me hnyei ae gan: 4oge me he ka tha he möu Aigupito ai; kʼ oge me he bi nya ka hum u hmetu ûheny e: kʼ ame he Josefa ka hlec li emâkâm. 5Ke Jekob ame he thö ûheny Bere-seba: ke je laku Isaraela adre me hum Jekob a kamödrin, me lakudrin ae ûhnyûkong, me je laöiödrin hon je ûkat ame kunâ hnö Farao me hnân tabödrin. 6Ke ödrin e hom minya haledrin ta je hnahat, me tang omjehedrin waleji ae hu gadrin hnyi Kanana, me o Aigupito, wale Jekob me anyin lap hia a tha e me: 7je lakon obaga, me laöbiny obaga, a tha e me, me je lakon wahlu me je laöbiny wahlu, me mâtrâniny hia thithö ame tha he me Aigupito ai. 8Ke walang je ien laku Isaraela ödrin e o Aigupito, a Jekob me lakon obaga: jia Reubena nöku Jekob a atö. 9Ke haba je laku Reubena; jia Enoka, me Palu, me Hezerona, me Karemi. 10Ke haba je laku Simeona; jia Jemuela, me Jamina, me Ohada, me Jakina, me Zohara, me Saulo nokon momo Kanana. 11Ke haba je laku Levi; jia Geresoma, me Kohatha, me Merari. 12Ke haba je laku Juda; jia Era, me Onana, me Sela, me Farez, me Zera: ke a mokcu Era me Onana hnyi hnyei Kanana. Ke lo li laku Farez, jia Hezerona me Hamula. 13Ke haba je laku Isakara; jia Tola, me Pua, me Jobu, me Simerona. 14Ke haba je laku Zebulona; jia Sereda, me Elona, me Jalela. 15Wale je laku Jekob hnö Lea hna hnokoâ hnyi Padanarama, me Dina a nokon hlu; ke haba hnyat hia thithö je lakon obaga me wahlu, me, ödrin thöte theri. 16Ke haba je laku Gada; jia Zifiono, me Hagi, me Suni, me Ezebona, me Eri, me Aroda, me Areli. 17Ke haba je laku Asera; jia Iemina, me Ieseva, me Iesevi, me Beria, me Sera a hanidrin: ke lo laku Beria; jia Heberu, me Malekiela. 18Wale je laku Zilepa hnö Labana hna ham kö Lea a nokon, kʼ ame hnokoâ me Jekob, ödrin sikstin. 19Ke haba li laku Rakela öiö Jekob; jia Josefa me Beniamina. 20Ke adre hnokoâ lo laku Josefa hnyi hnyei Aigupito, jia Manase me Eferaima, wale hnö Asenatha nöku Potifera, at bihut hnyi Ona. 21Ko haba je laku Beniamina; jia Bela, me Bekera, me Asebala, me Gera, me Naamana, me Eki, me Rosa, me Mupima, me Hupima, me Areda. 22Wale je mâtrâni Jekob me Rakela, haba hnyat hia, me, fortin. 23Ke haba nöku Dana; jia Husima. 24Ke haba je laku Nafatali; jia Jazela, me Guni, me Jezera, me Silema. 25Wale je laku Bila hnö Labana hna ham kö Rakela a nokon, kʼ ame hnöku ödrin je laku Jekob: ke haba hnyat hia, me, ödrin seven. 26Haba tavat hia a tha he me Jekob Aigupito ai, wale a hnokoâ, ke ca ha bi je laûngû Jekob, me, ödrin sikste siks hia thithö; 27ke lo laku Josefa e ame hnokoâ hnyi hnyei Aigupito: kʼ ödrin sevente tavat hia hnyi lap anyi Jekob, wale tavat ödrin e o hnyi hnyei Aigupito.
28Ke e ame kunâ bânâ Juda kö Josefa me me he ka kû Gosena kâu; me ödrin e o but hnyi hnyei Gosena. 29Ke Josefa ame penapena anyin kariota, me he Gosena ai he ka iouny me Isaraela a kamen; ke ödru me iouny dö, me Josefa ame ta ju hon nyin, me tenge beû hmâ hon nyin. 30Ke haingö Isaraela kö Josefa ka habe, Hnö nya but walang ang he ka mok, anyin oge wâ thö hnyimâkâm a u möt. 31Ke Josefa ame ha ka je liamekeiny me, me lap anyin kamen, ka habe, Oge me he ka thumetu Farao, me ha kâu, ka habe, A o thö könya je liamekeiny mönya, me lap anyi cica ûhedrin hnyi hnyei Kanana; 32kʼ ödrin je hnyat tuö mamoe, anyin a odrin hnyat tuö omeno ehac: kʼ ödrin e hia but hom je hnahat mamoe a haledrin, me je hnahat kâu, me anyidrin ta je ûnyi hia. 33Ke e ka he Farao ka haö ʼbun, me hnei öbun, ka habe, Ieû huliwa a öbun khenen kâu? 34me öbun e he ka ha, ka habe, Öhmun lathnyabaem hnyat tuö meno hwân hnyi hidröu a öhmun ke ne o but walang ang öhmun me lakamöhmun: mʼ öbun e he ka laba hnyi hnyei Gosena; anyin a at Aigupito adre me ikikiâ hnyat tnö mamoe.
Currently Selected:
Genese 46: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
