Genese 47
47
1KE Josefa ame he me thumetu Farao, ka habe, A o thö cica me je liamekeiny mönya, me haledrin je hnahat mamoe me haledrin je hnahat kau, me anyidrin ta je ûnji hia ûnyi hnyi hnyei Kanana; ke wâ bi, ödrin dut hnyi hnyei Gosena. 2Ke e ame hom ke je liamekeiny mē, a ödrin thabûng, me hum ödrin ka hnyi hnyimakö Farao. 3Ke haingö Farao ka je liamekeiny më, ka habe, Ieû öbun e khenen kâu? Ke haingödrin kö Farao, ka habe, Öhmun hnyat tuö mamoe a lathnyabainy, öhmun me lakamöhmun. 4Ke haingödrin kö Farao, ka habe, Öhmun e o but he ka laba kanyua hnyi hnyei; anyin ae ba an je hnahat haleny lathnyabaem; anyin ae gan hmâ hmiâ hnyi hnyei Kanana: ke ö u he walang ang ka hnʼ öhmun a lathnyabaem ka laba hnyi hnyei Gosena. 5Ke Farao ame ha kö Josefa, ka habe, A o thö köu kâmâm me je liamekeiny möu: 6waleû hnyei Aigupito hnyi hnyimâkâm; olabā ju kâmâm me je liamekeiny möu hnyi kânâ ae hoso; e so ödrin e laba hnyi hnyei Gosena: ke e ka khanö u ke je hnyat ae meta unyidrin, otilʼ ödrin dö he ka musi hnyi ta je hnahat a halek. 7Ke Josefa ame hum Jekob a kamen ka hnyi hnyimakö Farao: ke Jekob ame hahnahici Farao. 8Ke haingö Farao kö Jekob, ka habe, Ve but ta je bonginy hunaiâm? 9Ke Jekob ame thu kö Farao, ka habe, Khaca haded me thöte ta je huna oge me he kanyua hnyin; wakhalet thibi me kong ta je hunainy möt a inya, ke ca tha ûcû me je bonginy hunainy möt anyin lakamök hnyi je bonginy hnödrin hna he kanyua hnyin. 10Ke Jekob ame hahnahici Farao, me he ûheny ûnyi Farao. 11Ke Josefa, ame olabâ kamen me je liamekeiny më, me ha gadrin hnyi hnyei Aigupito, hnyi kânâ ae hoso, hnyi hnyei Ramese, helâ me hna hûna hnö Farao. 12Ke Josefa ame han kamen, me je liamekeiny më, me lap anyin kamen hia ge areto, hoton anyidrin je lap.
13Ke ba areto hnyi hnyei hia; anyin ae gan hmâ but hmiâ; ke mat ut hnyei Aigupito me hnyei Kanana hnen hmiâ. 14Ke Josefa ame ûkhacaköuâ ta je mone hia ûnyi hnyi hnyei Aigupito me ûnyi hnyi hnyei Kanana, hwaban je hwit adre me ûco: ke Josefa ame hom ta je mone ka hnyi uma umo Farao. 15Ke ba but mone hnyi hnyei Aigupito me hnyei Kanana, me ame he but at Aigupito hia kö Josefa me ha, ka habe, Ö u ha öhmun: anyin a ieû ohmun e he ka mok hnyi hnyimâkâm? anyin ae ba but mone. 16Ke haingö Josefa, ka habe, Hom but jem halebun ta je meno; ke oge me he ka ha öbun hwaban halebun ta je meno e ka ba but mone. 17Ke adre me hom kö Josefa haledrin ta je meno: ke Josefa ame ham ködra areto hwaban ta je hors, me je mamoe, me kâu, me je asina: ke e ame ha ödra ge areto hnyi huna eling hwaban haledra je meno. 18Ke a um dö huna eling, me adre me o but kâu hnyi huna a loiny, me haingödra kâu, ka habe, Öhmun e ca he ka ikhâlâ gam than a e ba but anyihmun mone; ke e but unyâm than halehmun ta je meno; ke ba hmetu ke ûnyi a anyihmun hnyi hnyimâkâm than, ke so bi je unyihmun me ihmun je hnyei: 19ke anyin a ieû öhmun e he ka mok hnyi hnyimâkâm, öhmun me je ihmun? ûcû öhmun dö me je ihmun hwaban areto, ke haba öhmun me je ihmun ame he ka bi athnyabai Farao: ke ha hanihmun me öhmun e he ka möt me ca mok, me me ca he ka iny wau kânâ. 20Me Josefa ame ûco ta hnyei hia hnyi Aigupito hobi kö Farao; anyin ame ve ûco hnen at Aigupito ta je idrin, anyin ae gan hmâ hmiâ unyidra: me me i Farao but kânâ. 21Ke e ame hom tavat ka hnyi je taun ûnyi hnyi ke hnyigöulen Aigupito ke ne o but ka hnyi ke hnyigöulen. 22Ke e ame ca ûco hnyei iny tavat bi hut: anyin a hnö Farao hna khenâ hwajekhon tavat bi hut, kʼ ödrin e han jekhöu Farao ame ham ködrin; waleling mʼ adre me ca ûco idrin. 23Ke Josefa ame ha ka tavat, ka habe, Wâ bi, oge hia but ûcû öbun me je ibun hnyi bong ang hobi kö Farao: wâ bi, walang ang ta je hanibun, he thʼ öbun ka belökâ kânâ. 24Ke e ka hwenying ut, öbun e he ka ham kö Farao je ke keihen a thabûnginy, ke haba vak ta ke keihen me hobi köbun, hnân haniny hnyei, me hnân ö ʼbun, me anyibun je lap, me an je wanakat unyibun. 25Ke haingödrin, ka habe, U je hia but omeli öhmun; ö u betenge gahmun than, kʼ öhmun e ka bi athnyabai Farao. 26Ke Josefa ame otilâ ûnyi eling hnân hnanyibu hnyi hnyei Aigupito ke ne o but hnyi bong ang, ka habe, Hobi kö Farao ta je ke keihen a thabûnginy; ke ca helâe ta hnyei iny tavat bi hut, ca i Farao bi e. 27Ke Isaraela ame laba hnyei Gosena, hnyi hnyei Aigupito; ke hu idrin eling, kʼ ödrin e hât me si gan hmâ.
28Ke haba Jekob ame laba hnyi hnyei Aigupito seventin ta huna: ke haba je bongu Jekob, wale hunainy anyin möt hia, me, khaca haded ke fâte seven ta je huna. 29Ke hakekeny jut ûen ame he Isaraela ka mok; ke e ame baö Josefa e nokon, me hûna kâu, ka habe, U je ne betenge gak, ö u inâ ju hnyamâm hmelen jevak, me ânyâ ûnyi ae so me hnathu könya; u na ca he ju ka könim nya eang Aigupito: 30ke iny ka tha mokut me lakamök u ma he ka sam nya ûheny ang Aigupito, me könim nya hnyi anyidrin hna khön komok. Ke e ame ha, ka habe, Oge me he ka ânyâ helâ me hwâm hofuc. 31Me haingen, ka habe, Khemanyin dö könya: me e ame khemanyin kâu. Ke Isaraela ame nom dut hon hageny; hna mokut.
Currently Selected:
Genese 47: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
