Genese 50
50
1ME Josefa ame ta hon hnyimakan kamen me tenge hon, me ûcimhnyimak mē. 2Ke Josefa ame hûna ka lathnyabainy a je hnyat tren bubun he ka onâkâ kamen: kʼ ame onâki Isaraela hnen je hnyat tren bubun. 3Kʼ adre um dö je bong a fâti hobi kâu e; anyin a wale je bong adre me oumo hnyin hna onâkâ: ke sevente ta je bong hnen at Aigupito hna tengiâ e.
4Ke a um dö ta je bongon hna tengiâ e, me haba Josefa ame ha ka lap anyi Farao, ka habe, Öbun e ne betenge gak, ha thö ka hnyi hnyikönyö Farao, ka habe, 5Cica ame kunö nya he ka khemanyin, ka habe, Wâ bi, oge me he but ang ka mok: ke haba erkemok oge hiny hobi könya bi hnyi hnyei Kanana, u ma he ka könim nya eling. Ke walang ang, ö u hnö nya but ka he me könim cica, mʼ iny hmetu ju. 6Ke haingö Farao, ka habe, He thö ka konâm kâmâm, helâ me hnen hna kunö u he ka khemanyin. 7Ke Josefa ame he but he ka konâm kamen; kʼ ame tha he më lathnyabai Farao hia, a je hingating hnyaban, me wahingat hia hnyi hnyei Aigupito, 8me lap anyi Josefa hia, me je liamekeiny më, me lap anyin kamen: ke adre hnen biju lakudrin ae ûhnyûkong, me ta je mamoe, me haledrin ta je kâu, hnyi hnyei Gosena. 9Kʼ ame tha he me ta je ukariota me tavat adre me tabö hos: ke gan hmâ bunyen. 10Kʼ ödrin e o but ka hnyi hnahuje hwit anyi Atada, wale hoton Joridano, me ödrin e hnyamok eling me tenge hwege: ke e ame otilâ je bongon hnyamoko kamen a seven. 11Ke a wâ but tavat aten hnyei, wale at Kanana, a gʼ adre tenge hnyamok hnyi hnahuje hwit anyi Atada, me ödrin e ha, ka habe, Wale hnyamok ae gan hmâ anyin at Aigupito; waleling adre me hwenyi ien e Abela-mizeraima, wale hoton Joridano. 12Ke haba lakon ödrin e ânyâ kâu helâ me hnen hna hûna ködrin: 13anyin a je lakon ödrin e hom e ka hnyi hnyei Kanana, me konâm hnyi op hnyi utkânâ hnyi Makepela, waleji a ûco Aberahama tha e me utkânâ hnân khön komok hnyin, ûnyi ga Eferona at Heth, cicö Mamere.
14Ke Josefa ame hmetu Aigupito ai, e me je liamekeiny më, me ödrin hia adre me tha he më ka hnyi konâm kamen, hwaban hna konâm kamen. 15Ke a wâ but je liamekeiny me Josefa a ga mokcu kamödrin, me haingödrin, ka habe, Ame ne he ka he Josefa ka liûkötiʼ ota, me bi hwaban köta anyitin ta je monu waleji ötin e ânyâ kâu. 16Ke ödrin e ûkhûnöng kö Josefa, me ha, ka habe, Haingen kâmâm ke tiga ca mok, ka habe, 17Öbun e he ka ha helang kö Josefa, ka habe, Oge me sumatö u he ka hna degecâ hulö anyin je liamekeiny möu me hwakecidrin ae kong, anyin a ödrin e ânyâ kong köu: ke walang ang, ö u hna degecâ hulö anyin lathnyabainy Khongon kâmâm. Ke Josefa ame tenge hnyi ûen ödrin e fuc kâu. 18Kʼ ame he minya je liamekeiny më me ta ju hnyi hnyimakan, me ha, ka habe, Wâ bi öhmun je athnyabaem. 19Ke haingö Josefa ködrin, ka habe, Ca ot: hawa, hwaban Khong inya? 20Ke haba öbun eja ke ne öbun e ûnykûme ehac he ka okongu nya, haba Khong ame ûnykûme he ka osoâ bi, me me hwâdâ helâ me hnyi bong ang, he ka omelö tavat ae se hia madre me möt. 21Anyin a wale ca ot: oge me he ka hat öbun, me je lakubuu ae ûhnyûkong. Ke e ame otubweli ödrin, me fuc menyik ködrin.
22Ke Josefa ame laba hnyi Aigupito, e me lap anyin kamen: ke mot Josefa khaca haded ke libenyita taje huna. 23Ke Josefa ame wâ laku Eferaima ke ne o but ka hnyi do a kuniny: me laku Makir minya nöku Manase adre hnokoâ me ip hnyi li jevö Josefa. 24Ke haingö Josefa ka je liamekeiny me, ka babe, Oge me be but ang ka mok: ke e hnathu ame be Khong ka senʼ obun, me hum öbun tinyi hnyi hnyei eang ka hnyi hnyei e ame khemanyiuâ ko Aberahama, me Isaaka, me Jekob. 25Ke Josefa ame kuna je laku Isareala he ka khemanyin, ka habe, E hnathu Khong ame he ha senʼ öbun, ke öbun e he ka hom minya je jeiök ûbeny ang. 26Ke Josefa ame mokcu, ke haba hunainy me khaca haded ke libenyita je hunainy: ke ödrin e onâkâ e, me bitangen hnyi tang hnyi Aigupito.
Currently Selected:
Genese 50: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
