HECHOS 11

Jerusalén criccunaman Pedro huillashcamanta

1Dios rimashcata mana israelcunapish chasquishcatami, apostolcunapish, Judea llacta criccunapish yachac chayarca. 2Chaimantami Jerusalenman Pedro cuticpica, circuncisionta ruhuashca criccunaca rimarirca. 3Paicunaca:

—¿Ima nishpatac mana circuncisionta ruhuashca gentecunapac huasiman yaicushpa, paicunahuan micurcangui?— nirca.

4Chaimanta Pedro sumacta parlashpaca:

5—Ñucaca Jope pueblopi Diosta mañacushpami, muscuipi shina, jatun lienzo chuscu puntapi huatashca, jahua pachamanta ñucapacman shamucucta ricurcani. 6Chaita alli ricushpaca, charina animalcuna, piña sacha animalcuna, pambata aisarishpa puric animalcuna, alasyuc animalcuna chaipi cactami ricurcani. 7Chaimanta shuc rimashca uyarishpaca: “Pedro, jatari. Caicunata huañuchishpa micui” nirca. 8Shina nicpimi ñucaca: “Mana, Apunchic Jesús. Mapa animalcunataca mana micushachu, jaicapi mana micushcanichu” nircani. 9Ñuca chashna nicpi, jahua pachamanta cutin rimashca uyarishpaca: “Dios chuyayachishcataca, ama mapami nichu” nirca. 10Chai lienzo quimsa cutin ricurishpaca, jahua pachamanmi apashca carca.

11Chai ratomi Cesarea pueblomanta cachashca quimsa runacuna ñuca maipi cac huasiman chayarca. 12Chashna paicuna shamucpica, Diospac Espiritumi mana caita chaita yuyashpa, paicunahuan richun nirca. Caishuc sucta criccunapish ñucahuanmi rirca. Chashna rishpami, chai runapac huasiman yaicurcanchic. 13Chai runaca paipac huasipi ángel ricurishpa: “Pedro nishca Simonta Jope pueblomanta pushamuchun cachai. 14Paimi canpish, cambac huasi familiacunapish ima shina quishpirina cashcataca huillanga” nishca carca. 15Ñuca paicunaman huillai callaricpica, sarun ñucanchicman shamuc shinallatacmi, Diospac Espíritu paicunapacmanpish shamurca. 16Chashna shamucpimi, Apunchic Jesús huillashcataca yuyarircani. Paica: “Juanca yacullahuanmi bautizarca. Ashtahuanpish cancunaca asha punzhacuna quipaca, Diospac Espirituhuanmi bautizashca canguichic” nircami. 17Ñucanchic Apunchic Jesucristota cricpi, Dios paipac Espirituta cushca shinami, paicunamanpish curca. Dios chashna ruhuacucta jarcangapacca ñucaca, ¿imatac caniyari?— nirca.

18Chashna nicta paicuna uyashpaca, mana imata nircacunachu. Ashtahuanpish Diostaca “allimari cangui” nishpami:

—¡Diosca mana israelcunapish Diosman cutirishpa, huiñai causaita charichunmi munan!— nirca.

Antioquía pueblo criccunamanta

19Estebanta huañuchishca quipa, llaquichi callaricpimi, criccunaca Fenicia, Chipre llactacunaman, Antioquía puebloman miticushpa rircacuna. Chai llactacunapica pimanpish mana huillashpa, israelcunallaman huillashpami rircacuna. 20Chashna cacpipish, Chipre llactamanta, Cirene pueblomanta, Antioquía puebloman shamuc maijan criccunaca, mana israelcunamanpish Apunchic Jesusmanta alli huillaita huillarcami. 21Diosca paicunahuanmi carca. Chaimantami achcacuna Apunchic Jesusta crishpa, ñaupa mana alli causaita saquircacuna.

22Jerusalenpi tandanacushca criccuna chaita yachashpaca, Bernabetami Antioquía puebloman cacharca. 23Bernabé chaiman chayashpaca, Diosca yallita cuyashpa, quishpichishcata ricushpami cushicurca. Tucui criccunatami Apunchic Jesusllata tucui shunguhuan cazuchun rimarca.

24Bernabeca alli runa, alli cric, Diospac Espíritu jundami carca. Chaimantami pai huillacpica, achca gentecuna Apunchic Jesusta crirca. 25Chaimantami Bernabeca Tarso pueblopi Saulota mashcangapac rirca. Chaipi tupashpaca, Antioquía pueblomanmi pushamurca. 26Chaipica huata jundatami achca gentecunaman yachachishpa, criccunahuan tandanacushpa causarca. Chai pueblopimi Apunchic Jesusta caticcunataca: “Criccuna” nishpa, cayai callarirca.

27Chai punzhacunapimi, Dios ima nishcata huillaccunaca Jerusalenmanta Antioquía puebloman shamurca. 28Agabo shuti runa shayarishpa, Diospac Espíritu yuyaita cucpi, tucui llactacunapi ima mana pucucpi yarcai tiyanamanta huillarca. Chaica, jatun mandac Claudio mandacui punzhacunapimi, chashna tucurca. 29Chashna huillacpimi, Antioquía pueblo criccunaca paicuna imallata cui pudishcata Judea llacta criccunaman cuchun cachanata yuyarirca. 30Paicuna chashna ruhuashpaca, Judea llacta criccunata pushaccunaman cuchunmi, Bernabeta, Saulota cacharca.

Currently Selected:

HECHOS 11: QCA10

Highlight

Copy